লূকনি চকগিবা নাম্মা খাৎথা 10 - Garo New Testament

সাকসৎস্নি জা·রিকগিবারাংখো ওয়াত্তেতা

¹ উনি জা·মানো গিত্তেল যীশু আরোবা সাকসৎস্নি জা·রিকগিবারাংখো বাচ্ছিয়ে রা·এ আগানফ্রাকনা ওয়াত্তেতজক। বিয়া আন·থাং জে সংরাংচা আরো হা·দামরাংচা রি·য়াংনা মিকসংআমিং উয়া হা·দামরাংচা রি·য়াংনা স্খাং জা·রিকগিবারাংখো সাকগ্মি গ্মি দাক্কে ওয়াত্তেতসোজক।

² বিয়া জা·রিকগিবারাংনা আগানজক, “মিরাংদে বাং·বিবিআন, ইন্দিবা কাম দাকগিবাদে বাং·জা। ইনি গিম্মিন মি রাতনা কাম দাকগিবারাংখো ওয়াত্তেতখানা নকগিবাচা মল·মলবো।

³ না·সং রি·য়াংবো; মাৎচা হা·রেকনি গিসেপো মেষ গিত্তান আংআ না·সংখো ওয়াত্তেতিংআ।

⁴ দকরা বা জা·খপরাংখো দা·আ রা·আংআবো আরো রামাও সাকসাখোবা দা·আ সালাম দাক্কাবো।

⁵ না·সং জে নকচা রি·য়াংনুয়া উয়োনা স্খাং আগানবো, ‘ইয়া নক্কো থম·থম হং·খানা।’

⁶ থম·থমাখো নামনিকগিবা উয়োনা দংওদে না·সংনি থম·থমা বিনি উয়োন দংনুয়া, ইন্দিবা উয়ানদাকগিবা দংজাওদে না·সংনি থম·থমা না·সংচান ফিল·বানুয়া।

⁷ উয়া নক্কোন দংবো আরো বিসংনি চা·না হন·গিবাখোন চা·বো, মুয়ানা কাম দাকগিবাদে বিনি মা·ন্নানিখো মা·ন্না খ্রাআ। নক গি·সাখো ওয়াত্তে নক গি·সাওনা দা·আ রি·য়াংআবো।

⁸ “বাদিআবা সংচা রি·য়াংওদে আরো উনি মান্দিরাং না·সংখো রা·চাকোদে না·সংনা চা·না হন·গিবাখোন চা·বো।

⁹ উয়া সংনি সাগিবারাংখো নাম্মেতবো আরো বিসংনা আগানবো, ‘ইসলনি সংনক না·সংনা সেফাংজক।’

¹⁰ ইন্দিবা বাগিবাবা সংও রি·য়াংওদে আরো উনি মান্দিরাং না·সংখো রা·চাকজাওদে উয়া সংনি রামারাংও রি·য়াংএ ইন্দাকে আগানবো,

¹¹ ‘চিংনি জা·চকরাংও মা·বাকগিবা না·সংনি সংনি হা·দুলাখোবা না·সংনি সাক্কাও দকফ্রংজক। ইন্দিবা না·সং হা·আইএ দনবো, ইসলনি সংনক সেফাংজক।’

¹² আংআ না·সংনা আগানিংআ, বিচালনি সালো উয়া সংনা বাত্তে সদোম সংজিলমানি মান্দিরাংনি অবস্থা চাকথোবাত্তানি হং·নুয়া।

¹³ “হং·সিখানা নাং·না কোরাসীন! হং·সিখানা নাং·না বৈৎসৈদা! না·সংও দাকগিবা বিল্লাকগিবা কামরাংখো সোর আরো সীদোন সংজিলমাও দাক্কোদে বাসোকোনিন বিসং ছালা গান্নে হা·দুবুও আসংএ পাপওনি গিসিকখো ফি·ল্লেতনুয়ামিং।

¹⁴ বিবিন, বিচালনি সালো সোর আরো সীদোননি অবস্থা না·সংনা বাত্তে চাকথোবাত্তানি হং·নুয়া।

¹⁵ আরো না·আ, কফরনাহূম, না·আ সালগিওনা সক্কে চুবাত্তাও গাদোয়াংনুয়ামা? মামুং সালোবা মান·জানুয়া, নাং·খো খা·মাচা সিগিবারাংনি হা·দামও গাল্লেতনুয়া।”

¹⁶ যীশু দা·আবা আন·থাংনি জা·রিকগিবারাংনা আগানজক, “না·সংনি খাৎথাখো খিন্নাচাকগিবা আংনি খাৎথাখোন খিন্নাচাক্কা। না·সংখো জিচাকগিবা আংখোন জিচাকা। আংখো জিচাকগিবা আংখো ওয়াত্তেতগিবাখোন জিচাক্কা।”

¹⁷ উয়া সাকসৎস্নি জা·রিকগিবারাং রি·বাফিলে খুসি হং·এ আগানজক, “গিত্তেল, নাং·নি বিমুংখো রা·এ আগানজোকনো গিসিক নামগিজাগিবারাংবা চিংনি খাৎথাখো খিন্নাচাক্কা।”

¹⁸ যীশু বিসংনা আগানজক, “আংআ সালগিওনি মিকখা রিপরাপা গিত্তা শয়তাননি গা·আকাখো নিকজক।

¹⁹ নিবো, আংআ না·সংনা চিপ্পু আরো মাংখ্রাংরাংনি সাক্কা গিত্তা রামা রি·না বিল হন·জক আরো না·সংনি বোবিল হং·গিবা শয়তাননি বিল গিম্মিকনি সাক্কাওবা বিল হন·জক। মামুংবা না·সংনি নামগিজাখো দাকজানুয়া।

²⁰ ইন্দিবা গিসিক নামগিজাগিবারাং না·সংনি খাৎথাখো খিন্নাচাক্কা ইন্নে দা·আ খুসি হং·আবো ইন্দিবা সালগিও না·সংনি বিমুংখো চক্কানি গিম্মিনসা খুসি হং·বো।”

²¹ উনোন যীশু গিসিক রংথালগিবাও খা·স্রকে আগানজক, “ও আপফা, না·আ সালগিসাক আরো হা·গিলসাকনি গিত্তেল। আংআ নাং·খো মিৎথেলা, মুয়ানা না·আ ইরাংখো হা·আইগিবা আরো বুদ্ধি দংগিবারাংওনি থুম্মুয়ে দনজক ইন্দিবা বি·সা গিত্তা দাকগিবা মান্দিরাংনা ফারাকজক। হো·এ আপফা, নাং·নি নামনিকা গিত্তান ইরাং হং·জক।

²² “আপফা আংনি জাক্কো গিম্মিকখোন হন·জক। ফানা আগ্রে দারাংবা হা·আইজা দেফান্থি সা, দা·আবা দেফান্থিনা আগ্রে দারাংবা হা·আইজা ফা সা। ইনাআগ্রে দেফান্থি জেচা ফাখো ফারাকনা হা·সিকা বিয়াসান হা·আইয়া।

²³ জা·মানো বিয়া জা·রিকগিবারাংচা নিফিলে বিসংনা সিউল দাক্কে আগানজক, “না·সং জেখো নিক্কিংআ, উখো জেরাং নিকনা মা·ন্নিংআ বিসং ফাত্তিয়াখো মান·গিবা হং·আ।

²⁴ আংআ না·সংনা আগানিংআ, না·সং জেখো নিক্কিংআ, বাং·আ আগানসোগিবা আরো রাজারাং উখো নিকনা হা·সিকেবা নিকনা মান·জাজক; আরো না·সং জেখো খিন্নাংআ, উখো খিন্নানা হা·সিকেবা খিন্নানা মান·জাজক।”

খা·সাচাকগিবা শমরিয়া মান্দিনি গল্প

²⁵ রাং·সাও শাস্ত্র স্খিগিবা সাকসা যীশুচা রি·বাজক। যীশুখো রুরাএ নিনা উয়া স্খিগিবা আগানজক, “স্খিগিবা, মুয়াখো দাকজোকনো আংআ ফাংনাজলনি জাংগিখো মা·ন্নুয়া?”

²⁶ যীশু বিনা আগানজক, “মোশিনি নিয়ামও মুয়া চক্কা দংআ? উয়ো মুয়াখো পড়িজক?”

²⁷ উয়া শাস্ত্র স্খিগিবা যীশুনা আগানচাকজক, “না·সং গিম্মিকান না·সংনি গিম্মিক খা·থংচা, গিম্মিক জাংগিচা, গিম্মিক বিলচা আরো গিম্মিক গিসিকচা না·সংনি গিত্তেল ইসলনা খা·সাবো; আরো নাং·নি নকসুলরাংখো আন·থাংনি গিত্তা খা·সাবো।”

²⁸ যীশু বিনা আগানজক, “না·আ খাকখেৎখো আগানচাকজক। না·আ ইন্দাকে দাক্কোদে জাংগি মা·ন্নুয়া।”

²⁹ উয়া স্খিগিবা আন·থাংখো নাম্মাখো ফিন্নিকনা ইন্নে যীশুনা আগানজক, “সা আংনি নকসুল হং·আ?”

³⁰ যীশু আগানচাকজক, “সাকসা মান্দি যিরূশালেমোনি যিরীহো সংজিলমাচা রি·য়াংমিত্তিংও রা·সেকগিবারাংনি জাক্কো গা·আকজক। বিসং উয়া মান্দিনি বা·রারাংখো এংজক আরো বিখো সিনা দাকফিলে দক্কে দন্নাংজক।

³¹ জা·মানো খামাল সাকসা উয়া রামা গিত্তা রি·য়াংআমিং। বিয়া উয়া মান্দিখো নিক্কে গেল্লারি রি·য়াংজক।

³² উগিত্তান সাকসা লেবীয় উয়া হা·দামচানা রি·বাজক আরো বিখো নিক্কে বিয়াবা গেল্লারি রি·য়াংজক।

³³ জা·মানো শমরিয়া হা·দকনি সাকসা মান্দিবা উয়া রামা গিত্তা রি·য়াংমিত্তিংও উয়া মান্দিনি সেফাংও সকবাজক। বিখো নিক্কে বিয়া খা·সাচাকবিজক।

³⁴ উয়া মান্দিনি সেফাংও রি·য়াংএ বিয়া বিনি মাতগিবারাংও তেলখো আরো আংগুরনি বিৎচিখো রুদাপে খাগপজক। জা·মানো আন·থাংনি গাধানি সাক্কাও বিখো গাত্তেতি গি·সা হোটেলচা রিম্মাংএ বিনা দাকচাকে হন·জক।

³⁵ উনি সাল সাও উয়া শমরিয়ানি মান্দি দীনার গি·গ্মিখো হোটেলনি নকগিবানা হ·ন্নে আগানজক, ‘ইয়া মান্দিনা দাকচাকে হন·বো। ইনা বাত্তে থাংখা বাং·এ নাংদাপোদে আংআ ফিল·বাএ উখো হন·স্খানুয়া।’ ”

³⁶ বন·খামাচাবাক্কা যীশু আগানজক, “দা·আও না·আ বাদিকে চানচিয়া? ইয়া সাকগিত্থামনি গিসেপো বাগিবা উয়া রা·সেকগিবারাংনি জাক্কো গা·আকগিবা মান্দিনি নকসুল হং·আ?”

³⁷ উয়া শাস্ত্র স্খিগিবা আগানজক, “বিনা খা·সাচাকগিবা উয়া মান্দি।” উনো যীশু বিনা আগানজক, “ইন্দাকোদে না·আবা রি·য়াংএ উগিত্তান দাকবো।”

মার্থা আরো মরিয়ম

³⁸ উনি জা·মানো যীশু আরো বিনি জা·রিকগিবারাং রামা রি·য়াংমিত্তিংও সং দামসাও নাপজক। উয়ো মার্থা মিংগিবা সাকসা মিচিক খুসি হং·এ আন·থাংনি নক্কো যীশুখো রা·চাকজক।

³⁹ মরিয়ম মিংগিবা মার্থানি সাকসা নগিবা দংআমিং। বিয়া গিত্তেলনি জা·চকনি কেচ্চিও আসংএ বিনি খাৎথাখো খিন্নাংআমিং।

⁴⁰ মার্থা ইন্দিবা চা·আ রিংআনিখো থারিনা ফিলসি ফিলথাপ দাক্কিংআমিং। উনি গিম্মিন বিয়া রি·বাএ আগানজক, “গিত্তেল, না·আ ইখো নিকজাংআমা, আংনি নগিবা আংখো সাকসান কাম দাকনা গিম্মিকখো গালচিপ্পাংজক? না·আ বিখো আগানবো জেদাক্কে বিয়া আংনা দাকচাকে হ·ন্না।”

⁴¹ উনো যীশু মার্থানা আগানজক, “মার্থা, মার্থা, না·আ বাং·আনি গিম্মিন জাজ্রেংআ আরো ফিলসি ফিলথাপ দাক্কা,

⁴² ইন্দিবা মিংসাখোসান নাংআনি দংআ। মরিয়ম উয়া নামগিবা বাকখোন বাচ্ছিয়ে রা·জক। উখো বিচানিখো রা·আংজানুয়া।”