যোহননা 9 - Garo New Testament

মিকগ্রি মান্দি নিকনা মান·জক

¹ রামা গিত্তা রি·য়াংমিত্তিংও যীশু সাকসা মিকগ্রি মান্দিখো নিকনা মা·ন্না। বিয়া আৎচিয়াওনিন মিকগ্রিমিং।

² উনোন জা·রিকগিবারাং যীশুখো সিং·জক, “স্খিগিবা, সানি পাপ দাক্কানি হা·সেলো ইয়া মান্দি আৎচিয়াওনি মিকগ্রি হং·আ? বিনি আন·থাংওনি বা বিনি মা·আ ফাআনি হা·সেলোমা?”

³ যীশু আগানচাকজক, “বিয়া আন·থাংবা পাপ দাকখুজা, বিনি মা·আ ফাআবা দাকখুজা। ইসলনি কাম বিও ফারাকখানা গিত্তাসা ইন্দাকে হং·আ।

⁴ আংখো জে ওয়াত্তেতজক, বিনি কামখো সাল দংমিত্তিংওন আনচিংনি দাকনা নাংআ। ওয়াল রি·বাংজক, উনো সাকসাবা কাম দাকনা মান·জানুয়া।

⁵ আংনি হা·গিলসাকো দংআ দিপ্পাৎ আংআ হা·গিলসাকনি সেং·আ হং·আ।”

⁶ ইখো আগানানি জা·মানো বিয়া হা·আও খু·চি গাল্লে হা·আখো হা·দুবেক দাকজক। জা·মানো উয়া হা·দুবেকখো বিয়া উয়া মান্দিনি মিক্রোনরাংও রিপ্পাকেতে আগানজক,

⁷ “রি·য়াংবো, শীলোহনি চিবলচা রি·য়াংএ মিক্‌সুএবো।” শীলোহনি অর্থ হং·জক ওয়াত্তেতা। উয়া মান্দি রি·য়াংএ মিক্রোনরাংখো মিক্‌সুএ গালজক আরো মিক্রোনও নিকনা মা·ন্নে ফিল·বাজক। ইখো নিক্কে বিনি সংসুল-নকসুলরাং আরো বিখো বি·আম্মে চা·আখো নিকগিবা গিম্মিকান ইন্না হা·বাচেংজক,

⁸ “ইয়াদে উয়া মান্দি হং·জামা, আসংএ জে বি·আম্মে চা·নুয়ামিং?”

⁹ সাবা সাবা ইনজক, “হো·এ, ইয়ান উয়া মান্দি।” দা·আবা সাবা সাবা ইনজক, “বিগিত্তান দাক্কোবা বিয়াদে হং·জা।” ইন্দিবা উয়া মান্দি আন·থাংআন আগানজক, “হো·এ, আংআন উয়া মান্দি।”

¹⁰ বিসং বিনা আগানজক, “ইন্দিবা বাদিকে দাক্কে না·আ মিক্রোন নিকজক?”

¹¹ বিয়া আগানচাকজক, “যীশু মিংগিবা উয়া মান্দি হা·দুবেক দাক্কে আংনি মিক্রোনরাংও রিপ্পাকেতে আগানজক, ‘শীলোহনি চিবলচা রি·য়াংএ মিক্‌সুএবো।’ আংআ রি·য়াংএ মিক্‌সুজক আরো নিকনা মান·জক।”

¹² বিসং বিখো ইনজক, “উয়া মান্দি বাও?” বিয়া আগানজক, “আংআদে হা·আইজা।”

¹³ জে মান্দি মিকগ্রিমিং মান্দিরাং বিখো ফরীশীরাংচা রিম্মাংজক।

¹⁴ জেনসালো যীশু হা·দুবেক দাক্কে বিনি মিক্রোনরাংখো নিক্কেতামিং উয়া সাল নেং·থাকগিবা সাল হং·আমিং।

¹⁵ ইনি গিম্মিন বিখো ফরীশীরাংবা দা·আবা সিং·ফিলজক, “না·আ বাদিকে দাক্কে নিকনা মান·জক?” বিয়া ফরীশীরাংনা আগানজক, “বিয়া আংনি মিক্রোনরাংও হা·দুবেকখো রিপ্পাকেতামিং, আরো আংআ মিক্‌সুএ গাল্লোন নিকনা মান·জক।”

¹⁶ ইনি গিম্মিন ফরীশীরাংওনি মিত্তামরাং আগানজক, “উয়া মান্দি ইসলোনি রি·বাজা, মুয়ানা বিয়া নেং·থাকানি সালখো মানিজা।” সাকগিপ্পিন ফরীশীরাং আগানজক, “পাপী মান্দি হং·ওদে বাদিকে দাক্কে ইন্দাকা বিল্লাকগিবা কামখো দাকনা মা·ন্না?” ইন্দাকেন বিসংনি গিসেপো দিংথাংগ্রিক্কানি হং·জক।

¹⁷ উনোন বিসং উয়া মান্দিখো দা·আবা সিং·জক, “না·আ বিনি গিম্মিন মুয়াখো আগানিংআ? মুয়ানা বিয়াদে নাং·নি মিক্রোনরাংখো নিক্কেতজক।” উয়া মান্দি ইনজক, “বিয়া সাকসা আগানসোগিবা হং·আ।”

¹⁸ ইন্দিবা উয়া মান্দি স্খাংও মিকগ্রিমিং আরো দা·আও নিকফিলনা মা·ন্নিংজক, ইখো উয়া মান্দিনি মা·আ ফাআখো রিক্কামে সিং·খুজানা দিপ্পাৎ যিহূদীরাংনি দাল·বাৎগিবারাং বিবিরা·জাজক।

¹⁹ বিসং উয়া মান্দিনি মা·আ ফাআখো সিং·জক, “ইয়ান না·সংনি উয়া দেফান্থিমা জেখো না·সং মিকগ্রি আৎচিয়ামিং ইন্না? ইন্দিদে দা·আও বিয়া বাদিকে দাক্কে নিকনা মা·ন্নিংজক?”

²⁰ বিনি মা·আ ফাআ আগানচাকজক, “চিংআ হা·আইয়া ইয়া চিংনিন দেফান্থি হং·আ, আরো ইয়া মিকগ্রি হং·এন আৎচিয়ামিং।

²¹ ইন্দিবা বাদিকে দাক্কে দা·আও বিয়া নিকনা মা·ন্নিংজক ইখো চিংআ হা·আইজা; আরো সাবা বিনি মিক্রোনখো নিক্কেতজক উখোবা হা·আইজা। বিয়া দাল·জক, বিখোন সিং·এবো। বিয়া আন·থাংআন আন·থাংনি গিম্মিন আগানখানা।”

²² বিনি মা·আ ফাআ যিহূদীরাংনি দাল·বাৎগিবারাংনা খেন্নানি গিম্মিন ইয়া খাৎথারাংখো আগানজক, মুয়ানা সাবা যীশুখো খ্রীষ্ট ইন্নে খু·রাচাক্কোদে বিখো হা·ফাল গাল্লেতনুয়া ইন্নে যিহূদীরাংনি দাল·বাৎগিবারাং থারিয়ে দংসোআমিং।

²³ উনি গিম্মিনান বিনি মা·আ ফাআ আগানামিং, “বিয়া দাল·জক, বিখোন সিং·এবো।”

²⁴ জে মান্দি মিকগ্রিমিং দাল·গিবারাং বিখো চাংগ্নিগিবাও রিক্কামে আগানজক, “না·আ বিবিখো আগানে ইসলখো রাসং দাকবো। চিংআদে হা·আইয়া উয়া মান্দি পাপী হং·আ।”

²⁵ বিয়া আগানচাকজক, “বিয়া পাপী হং·আমা হং·জা ইখো আংআ হা·আইজা; ইন্দাকোবা মিংসাখো হা·আইয়া, আংআ মিকগ্রিমিং আরো দা·আও আংআ নিকনা মা·ন্নিংজক।”

²⁶ দাল·গিবারাং আগানজক, “বিয়া নাং·খো মুয়াখো দাকজক? বাদিকে দাক্কে বিয়া নাং·নি মিক্রোনরাংখো নিক্কেতজক?”

²⁷ উয়া মান্দি আগানচাকজক, “আংআদে স্খাংআন না·সংনা আগানজক, ইন্দিবা না·সং খিন্নাচাকজা। মুয়ানা না·সং দা·আবা খিন্নানা হা·ম্মিংআ? না·সংবা বিনি জা·রিকগিবা হং·না হা·ম্মিংআমা?”

²⁸ ইনি গিম্মিন দাল·গিবারাং উয়া মান্দিখো নাম্মেন খা·চাএ আগানজক, “না·আন উয়া মান্দিনি জা·রিকগিবা হং·আ, ইন্দিবা চিংআদে মোশিনি জা·রিকগিবারাংসা।

²⁹ চিংআ হা·আইয়া ইসল মোশিমুং খাৎথা আগানামিং, ইন্দিবা উয়া মান্দি বাওনি রি·বাজক উখো চিংআ হা·আইজা।”

³⁰ উনোন উয়া মান্দি বিসংনা আগানচাকজক, “আইয়াও মানচা! বিয়া বাওনি রি·বাজক ইখো না·সং হা·আইজা ইন্দিবা বিয়ান আংনি মিক্রোনরাংখো নিক্কেতজক।

³¹ আনচিং হা·আইয়া ইসল পাপীরাংনি খাৎথাখো খিন্নাচাকজা। ইন্দিবা সাবা ইসলখো অলাখিগিবা হং·ওদে আরো বিনি নামনিকা গিত্তা কাম দাক্কোদে ইন্দিদে ইসল বিনি খাৎথাখো খিন্নাচাক্কা।

³² মিকগ্রি হং·এ আৎচিগিবা মান্দিনি মিক্রোনরাংখো সাবা নিক্কেতজক ইন্নে হা·গিলসাক হং·চেংওনি মামুং সালোবা খিন্নাখুজা।

³³ বিয়া ইসলোনি রি·বাজাওদে ইন্দিদে মামুংখোবা দাকনা মান·জানুয়ামিং।”

³⁴ দাল·গিবারাং আগানচাকজক, “না·আ চু·গিম্মিকান পাপওনি আৎচিয়া, আরো না·আ চিংনা স্খিফিলিংআমা?” ইখো আগানে বিসং বিখো হা·ফাল গাল্লেতজক।

³⁵ দাল·গিবারাং উয়া মান্দিখো হা·ফাল গাল্লেতজক, ইখো যীশু খিন্নাজক। জা·মানো বিয়া উয়া মান্দিখো সান্দিয়ে মা·ন্নে আগানজক, “না·আ মান্দিনি দেফান্থিখো বিবিরা·আমা?”

³⁶ বিয়া আগানচাকজক, “গিত্তেল, বিয়া সাজক, আংনা আগানবো জেদাক্কে আংআ বিখো বিবিরা·না মা·ন্না।”

³⁷ যীশু বিনা আগানজক, “না·আ বিখো নিকজক, আরো বিয়ান নাং·মুং খাৎথা আগানিংআ।”

³⁸ উনোন উয়া মান্দি আগানজক, “গিত্তেল, আংআ বিবিরা·আ।” ইখো আগানে বিয়া যীশুখো সেলামে ইসল গিত্তা দাল·নিকজক।

³⁹ যীশু আগানজক, “আংআ ইয়া হা·গিলসাকো বিচাল দাকনা রি·বাজক, জেদাক্কে নিকনা মান·গিজারাং নিকনা মা·ন্না আরো নিকনা মান·গিবারাং মিকগ্রি হং·আ।”

⁴⁰ মিত্তাম ফরীশীরাংবা যীশুমুং দংআমিং। বিসং ইয়া খাৎথাখো খিন্নাএ যীশুনা আগানজক, “ইন্দিদে না·আ চিংখো মিকগ্রি ইন্নে আগান্না হা·ম্মিংআমা?”

⁴¹ যীশু বিসংনা আগানজক, “না·সং মিকগ্রি হং·ওদে না·সংনি মামুং দোস দংজানুয়ামিং। ইন্দিবা না·সং নিক্কা ইন্নে আগানানি গিম্মিনান না·সংনি দোস দংআ।”