যোহননা 6 - Garo New Testament

হাজাল বংআ মান্দিনা চা·আখো হ·ন্না

¹ উনি জা·মানো যীশু গালীল সাগালনি নালসাচানা রি·য়াংজক। ইয়া সাগালখো তিবিরিয়া সাগাল ইন্নেবা মিংআ।

² বাং·বিয়া মান্দি যীশুখো জা·রিকনা হা·বাচেংজক, মুয়ানা সাগিবারাংনি সাক্কাও বিনি দাক্কা আইয়াও ইনমানগিবা কামরাংখো বিসং নিক্কামিং।

³ যীশু বিনি জা·রিকগিবারাংখো রা·এ হা·ব্রি থিম·সাও গাখাতে আসংজক।

⁴ উয়া সময়ও যিহূদীরাংনি ওয়াতচাংআনি সাল সেফাংবাজকমিং।

⁵ যীশু নিএতোন নিকজক বাং·আ মান্দিরাং বিচানা রি·বাংজক। বিয়া ফিলিপনা আগানজক, “ইয়া মান্দিরাংনা চা·না হ·ন্না আনচিং বাচ্চানিখো রুটিখো ব্রিনুয়া?”

⁶ ফিলিপখো সিং·মিকে নিনা গিত্তাসা বিয়া উয়া খাৎথাখো আগানজক, মুয়ানা মুয়াখো দাকনুয়া উখো বিয়া হা·আইয়ামিং।

⁷ ফিলিপ যীশুনা আগানজক, “বিসং সাকফ্রাকফ্রাক অকখিসা দাক্কে মা·ন্নোবা দিনার রিৎচাগ্মিনি রুটিবা হং·মানজানুয়া।”

⁸ যীশুনি জা·রিকগিবারাংও আন্দ্রিয় মিংআ সাকসা দংআমিং। বিয়া শিমোন-পিতরনি জংগিবা হং·আমিং।

⁹ আন্দ্রিয় যীশুনা আগানজক, “ইনো বি·সা সাকসাচা যব মিনি রুটি গিলবংআ আরো না·থক মাংগ্মি দংআ, ইন্দিবা মান্দি বাং·বিয়ানা উয়া হং·নুয়ামা?”

¹⁰ যীশু আগানজক, “মান্দিরাংখো আসংএতবো।” উয়া হা·দামও সামচেং বাং·আ দংআমিং। মান্দিরাং উনি সাক্কাওন আসংজক। উনো মি·আসান হাজাল বংআমাং দংআমিং।

¹¹ ইনি জা·মানো যীশু উয়া রুটিখো রা·এ ইসলখো মিৎথেলজক আরো আসংগিবারাংনা সুয়ালে হন·জক। উয়ানদাক্কেন বিয়া না·থকখোবা হন·জক। হা·সিকা দিপ্পাৎ গিম্মিকান মান·জক।

¹² মান্দিরাংনি অক্ষায়ে চা·আনি জা·মানো যীশু বিনি জা·রিকগিবারাংনা আগানজক, “গিৎচাগিবারাংখো চিম্মংবো জেদাক্কে মামুংআন নাসিজা।”

¹³ মান্দিরাংনি চা·আনি জা·মানো জা·রিকগিবারাং উয়া গিলবংআ রুটিনি গিৎচাগিবাখো চিম্মংএ চি·গ্মি খকো গাপ্পেতজক।

¹⁴ যীশুনি ইন্দাকগিবা আইয়াও ইনমানগিবা কামখো নিক্কে মান্দিরাং আগান্না হা·বাচেংজক, “ইয়া বিবিন হা·গিলসাকো রি·বানা আগানগিবা উয়া আগানসোগিবা হং·আ।”

¹⁵ ইনি হা·সেলো যীশু হা·আইনা মান·জক, মান্দিরাং বিখো রাজা থারিনা ইন্নে রিম·না রি·বাংজক। উনি গিম্মিন বিয়া সাকসান দা·আবা উয়া হা·ব্র্রিচানা রি·য়াংজক।

গিত্তেল যীশু সাগালনি চি সাক্কাও রামা রি·জক

¹⁶ হান·থামানি জা·মানো যীশুনি জা·রিকগিবারাং সাগালনি রিক্কামওনা রি·য়াংজক,

¹⁷ আরো রিংও গাখাতে কফরনাহূম সংজিলমাচানা রি·য়াংনা সাগালখো বাত্তাংনা হা·বাচেংজক। উনো আন্দালজকমিং, আরো উনোবা যীশু বিসংচা রি·বাখুজামিং।

¹⁸ বালওয়া থা·রাক্কানি গিম্মিন সাগালোবা চি ফকফেকবিজক।

¹⁹ মাইল গিত্থাম মাইল ব্রি রিং চোএ বাত্তাংআনি জা·মানো বিসং যীশুখো সাগাল সাক্কা গিত্তা রামা রি·এ বিসংনি রিংচাবাকা রি·বাখো নিকনা মান·জক। ইখো নিক্কে জা·রিকগিবারাং খেনবিজক।

²⁰ উনোন যীশু বিসংনা আগানজক, “দা·আ খেন্নাবো; ইয়াদে আংআসা।”

²¹ জা·রিকগিবারাং বিখো রিংও গাত্তে রা·না হাম·জক, আরো বিসং জে হা·দামওনা রি·য়াংআমিং উনোন উচা সক্কাংআরিজক।

জাংগিনি রুটিনি বিদিংও স্খিয়ানিরাং

²² সাগালনি নালসাচা চাদেংএ দংগিবা মান্দিরাং সালগিপ্পিনো হা·আইনা মান·জক, রিং গি·সানি আগ্রে উনো গিপ্পিন রিংরাং দংজামিং। বিসং আরোবা হা·আইনা মান·জক, যীশু বিনি জা·রিকগিবারাংমুং উয়া রিংও গাদোজা ইন্দিবা জা·রিকগিবারাংসান রি·য়াংআমিং।

²³ ইন্দাকোবা গিত্তেল জেও মিৎথেলে মান্দিরাংনা চা·আখো হ·ন্নামিং উয়া হা·দামনি সেফাংও উনো তিবিরিয়া সংজিলমাওনি মিত্তাম রিংরাংবা রি·বাজক।

²⁴ ইনি গিম্মিন যীশু আরো বিনি জা·রিকগিবারাংনি সাকসাখোবা উয়োনা নিকজাএ বিসং উয়া রিংরাংও গাখাত্তে যীশুখো সান্দিনা কফরনাহূমচানা রি·য়াংজক।

²⁵ উয়ো সক্কে বিসং যীশুখো সান্দিয়ে মা·ন্নে আগানজক, “স্খিগিবা, না·আ বাসোকো ইয়োনা রি·বাজক?”

²⁶ যীশু আগানচাকজক, “আংআ না·সংনা বিবিন আগানিংআ, না·সং আইয়াও ইনমানগিবা কামখো নিক্কেন আংখো সান্দিংআ ইয়াদে হং·জা, ইন্দিবা অক্ষায়ে রুটি চা·না মা·ন্নানি গিম্মিনান সান্দিংআ।

²⁷ ইন্দিবা নাসিনাগিবা চা·আনা গাম্মে মুয়া হং·নুয়া? জে চা·আ নাসিজা বাত্তেসা ফাংনাজলনি জাংগিখো হ·ন্না উনি গিম্মিন গামবো। উয়া চা·আখোন মান্দিনি দেফান্থি না·সংনা হ·ন্নুয়া, মুয়ানা ফাগিবা ইসল বিখোন ইয়া কামনা খ্রাগিবা ইন্নে ফিন্নিকজক।

²⁸ ইনি গিম্মিন মান্দিরাং যীশুখো সিং·জক, “ইন্দাকোদে ইসলনি কামখো দাকনা আনচিংনি মুয়াখো দাকনা নাংনুয়া?”

²⁹ যীশু বিসংনা আগানজক, “ইসল জেখো ওয়াত্তেতজক বিখো বিবিরা·আন ইসলনি কাম হং·আ।”

³⁰ উনোন বিসং বিখো সিং·জক, “ইন্দাকোদে বাদাকগিবা আইয়াও ইনমানগিবা কামখো না·আ দাকনুয়া জেখো নিক্কে চিংআ নাং·খো বিবিরা·না মা·ন্না? না·আ মুয়াখো দাকনুয়া?

³¹ আনচিংনি ফাগিৎচামরাংদে হা·গিসি জওলো মান্না চা·আমিং। রংথালগিবা শাস্ত্রও চক্কা দংআ, ‘ইসল সালগিওনি বিসংনা রুটি চা·না হন·জক।’ ”

³² যীশু বিসংনা আগানজক, “আংআ না·সংনা বিবিন আগানিংআ, সালগিওনি জে রুটিখো না·সং মা·ন্নামিং উখো মোশি না·সংনা হন·জা, ইন্দিবা আংনি ফাগিবা চং·মতগিবা রুটিখো না·সংনা হ·ন্নিংআ।

³³ সালগিওনি হং·ওনবাএ মান্দিনা জাংগি হন·গিবান ইসলনি হন·গিবা রুটি হং·আ।”

³⁴ মান্দিরাং বিনা আগানজক, “স্খিগিবা, ইন্দাকোদে উয়া রুটিখোন চিংনা ফাংনাজ্রিং হন·বো।”

³⁵ যীশু বিসংনা আগানজক, “আংআন উয়া জাংগিনি রুটি। আংচানা রি·বাগিবা মামুং দাক্কেবা অকখ্রিজানুয়া। আংখো বিবিরা·গিবাদে মামুং দাক্কেবা রিংনা হা·সিকজানুয়া।

³⁶ আংআদে না·সংনা আগানজকান, না·সং আংখো নিকজক ইন্দাকোবা বিবিরা·জা।

³⁷ ফাগিবা জেরাংখো আংনা হ·ন্নুয়া বিসং দিমদাকান আংচানা রি·বানুয়া। আংচা রি·বাগিবাখো আংআ মামুং দাক্কেবা হা·ফালওনা গালজানুয়া,

³⁸ মুয়ানা আংআ আংনি হা·সিকা গিত্তা কাম দাকনা রি·বাজা, ইন্দিবা আংখো ওয়াত্তেতগিবানি হা·সিকা গিত্তা কাম দাকনা সালগিওনি রি·বাজক।

³⁹ আংখো ওয়াত্তেতগিবানি হা·সিকা ইয়ান, জেরাংখো বিয়া আংনা হন·জক উয়া সাকসাখোবা জেদাক্কে আংআ গিম্মায়েতজা বাত্তেসা বন·খামানি সালো থাংচাএতনা মা·ন্না।

⁴⁰ আংনি ফাগিবানি হা·সিকা ইয়ান- না·সংনি গিসেপো দেফান্থিখো নিক্কে বিবিরা·গিবারাং জেদাক্কে ফাংনাজলনি জাংগিখো মা·ন্না। আরো আংআন বিসংখো বন·খামানি সালো থাংচাএতনুয়া।”

⁴¹ উনোন যিহূদীরাংনি দাল·বাৎগিবারাং যীশুখো খা·চাএ খা·চাএ ইন্না হা·বাচেংজক, মুয়ানা যীশু আগানামিং, “আংআন সালগিওনি হং·ওনবাগিবা উয়া রুটি।”

⁴² উয়া দাল·গিবারাং ইন্না হা·বাচেংজক, “ইয়া যোষেফনি দেফান্থি যীশু হং·জামা? আনচিং ইনি মা·আ ফাআখোদে হা·আইয়া। ইন্দিদে বিয়া বাদিকে দাক্কে ইন্না, ‘আংআ সালগিওনি হং·ওনবাজক?”

⁴³ যীশু বিসংনা আগানজক, “না·সং আন·থাংথাংও দা·আ ইনগ্রিক্কা।

⁴⁴ আংনি ফাগিবা, আংখো জে ওয়াত্তেতজক বিয়া সাল্লে রা·বাজাওদে সাকসাবা আংচা রি·বানা মান·জা। আরো আংআন বিখো বন·খামানি সালো থাংচাএতনুয়া।

⁴⁵ আগানসোগিবারাংনি খি·তাপও চক্কা দংআ, ‘বিসং গিম্মিকান ইসলচানিখো স্খিয়াখো মা·ন্নুয়া।’ ফাগিবাচাখো খিন্নাচাকে স্খিয়াখো মান·গিবান আংচানা রি·বাআ।

⁴⁶ ফাগিবাখো সাকসাবা নিকখুজা, ইসলওনি রি·বাগিবাসান বিখো নিক্কা।

⁴⁷ আংআ না·সংনা বিবিন আগানিংআ, জে আংখো বিবিরা·আ বিয়ান ফাংনাজলনি জাংগিখো মা·ন্না।”

⁴⁸ “আংআন জাংগিনি রুটি।

⁴⁹ না·সংনি ফাগিৎচামরাং হা·গিসি জওলো মান্না চা·আমিং, ইন্দাকোবা বিসং সিজক।

⁵⁰ ইন্দিবা ইয়া রুটি সালগিওনি হং·ওনবাগিবা রুটি, জেদাক্কে মান্দি উখো চা·এ সিয়াওনি জকনা মা·ন্না।

⁵¹ আংআন উয়া জাংগিনি রুটি সালগিওনি হং·ওনবাগিবা। ইয়া রুটিখো চা·গিবা ফাংনাজলনা জাংগিখো মা·ন্নুয়া। আংনি বে·এনআন উয়া রুটি। মান্দি জেদাক্কে জাংগি মা·ন্না উনি গিম্মিন আংআ আংনি ইয়া বে·এনখো হ·ন্নুয়া।”

⁵² ইয়া খাৎথাখো খিন্নাএ যিহূদী দাল·গিবারাংও জিগ্রিকনা হা·বাচেংজক। বিসং ইনজক, “বাদিকে দাক্কে ইয়া মান্দি বিনি বে·এনখো আনচিংনা চা·না হ·ন্না মা·ন্না?”

⁵³ যীশু বিসংনা আগানজক, “আংআ বিবিন না·সংনা আগানিংআ, মান্দিনি দেফান্থিনি বে·এনখো আরো হান·চিখো না·সং চা·জাওদে না·সংও জাংগি দংজা।

⁵⁴ সাবা আংনি বে·এনখো আরো হান·চিখো চা·আওদে বিয়া ফাংনাজলনি জাংগিখো মা·ন্না, আরো আংআ বন·খামানি সালো বিখো থাংচাএতনুয়া।

⁵⁵ আংনি বে·এনআন চং·মতগিবা চা·আনি আরো আংনি হান·চিআন চং·মতগিবা রিংআনি হং·আ।

⁵⁶ আংনি বে·এনখো আরো হান·চিখো চা·গিবা আংওন দংআ আরো আংআবা বিও দংআ।

⁵⁷ থাংগিবা আপফা আংখো ওয়াত্তেতজক আরো বিনি গিম্মিনান আংআ থাংএ দংআ। উয়ানদাক্কেন আংখো চা·গিবাবা আংনি গিম্মিন থাংএ দংনুয়া।

⁵⁸ ইয়ান সালগিওনি হং·ওনবাগিবা উয়া রুটি। ইয়া রুটি না·সংনি ফাগিৎচামরাংনি চা·এ সিগিবা রুটি গিত্তা হং·জা। ইয়া রুটিখো চা·গিবা ফাংনাজলনা জাংগিখো মা·ন্নুয়া।”

মান্দিরাংনি বিবিরা·জানি গিম্মিন

⁵⁹ কফরনাহূমনি থম·দাকরামচা স্খিমিত্তিংও যীশু ইয়া খাৎথাখো আগানামিং।

⁶⁰ বিনি জা·রিকগিবারাংনি গিসেপো বাং·এন ইখো খিন্নাএ আগানজক, “ইয়া স্খিয়াদে নাম্মেন রাকবাত্তা। সা ইখো রা·চাকনা মা·ন্না?”

⁶¹ ইনি গিম্মিন বিনি জা·রিকগিবারাংনি আগানগ্রিক্কাখো যীশু গিসিকথাংও হা·আইনা মান·জক। উনি গিম্মিন বিয়া বিসংনা আগানজক, “ইনি হা·সেলো না·সং গিসিকো জাজ্রেংআমা?

⁶² ইন্দিদে মান্দিনি দেফান্থি জেও দংআমিং উয়োনা বিখো গাদোয়াংআখো নিক্কোদে না·সং মুয়াখো আগান্নুয়া?

⁶³ মান্দিনি বে·এন মামুং কামনা হং·জা; গিসিক রংথালগিবান জাংগিখো হ·ন্না। আংআ না·সংনা জেখো আগানজক উয়াদে গিসিক আরো জাংগি হং·আ,

⁶⁴ ইন্দিবা না·সংনি গিসেপো ইন্দাকগিবা মিত্তাম দংআ জেরাং আংখো বিবিরা·জা।” সারাং যীশুখো বিবিরা·জা আরো সাআন বিখো বোবিলরাংনি জাক্কো রি·ম্মে হ·ন্নুয়া, যীশু উখো স্খাংওনিন হা·আইয়ামিং।

⁶⁵ উনি গিম্মিন বিয়া আগানজক, “ইনি গিম্মিন আংআ না·সংনা ইখো আগানজক, ফাগিবা বিলখো হন·জাওদে দারাংবা আংচানা রি·বানা মান·জা।”

পিতর গিত্তেল যীশুখো খু·রাচাকজক

⁶⁶ যীশুনি ইয়া খাৎথানি গিম্মিন জা·রিকগিবারাংনি গিসেপো বাং·এন ফি·ল্লাংজক আরো বিমুং রি·ফাজাজক।

⁶⁷ ইনি গিম্মিন যীশু উয়া সাকচিগ্মি জা·রিকগিবারাংনা আগানজক, “না·সংবা রি·য়াংনা হা·ম্মামা?”

⁶⁸ শিমোন-পিতর যীশুনা আগানজক, “গিত্তেল, চিংআ সাচা রি·য়াংনুয়া? ফাংনাজলনি জাংগিনি খাৎথাদে নাং·চান দংআ।

⁶⁹ চিংআ বিবিরা·জক আরো হা·আইনাবা মান·জক, না·আন ইসলনি উয়া রংথালগিবা মান্দি হং·আ।”

⁷⁰ উনোন যীশু বিসংনা আগানজক, “আংআ না·সং সাকচিগ্মিখো বাচ্ছিয়ে রা·জামা? ইন্দিবা না·সংনিন গিসেপো সাকসা বোবিল দংআ।”

⁷¹ ইনো যীশু শিমোন ইষ্কারিয়োতনি দেফান্থি যিহূদানি খাৎথাখো আগানিংআমিং, মুয়ানা বিয়ান জা·মানো যীশুখো রি·ম্মে হ·ন্নুয়া। বিয়া উয়া সাকচিগ্মিওনি সাকসা হং·আমিং।