যোহননা 5 - Garo New Testament

দা·আও সাকসা সাগিবা নামজক

¹ ইয়ারাংনি জা·মানো যীশু যিরূশালেমচানা রি·য়াংজক, মুয়ানা উয়া সময়ও যিহূদীরাংনি গি·সা পর্ব দংআমিং।

² যিরূশালেমো মেষ দ·গাচিলনি সেফাংও চিবল গি·সা দংআ; উনো নকখিমগ্মাং চিগাত দামবংআ দংআ। ইব্রীয় খু·সুকচা উখো বৈথেস্‌দা মিংআ।

³ উয়া হা·দামরাংও বাং·বিয়া সাগিবা মান্দিরাং গা·আকে দংনুয়ামিং। কানা, জা·খোরা, আরো বে·এন সিক্রেপগিবারাংবা উরাংও দংআমিং।

⁴ সাকসা সা·গ্রে মিত্তাম সময়ও রি·বাএ উয়া চিবলো হং·খাতে চিখো মজিমেতনুয়ামিং, আরো উনি জা·মানোন জে সাগিবা মান্দি চিও স্খাং হং·খাতনুয়ামিং বিনি সাবিসিরাং নাম্মাংনুয়ামিং। উয়া সাগিবারাং উয়ো চি মজিমানা নিচাকসোএ দংনুয়ামিং।

⁵ বিলসি খলাৎচিচেৎনা সাএ দংগিবা সাকসা মান্দিবা উনো দংআমিং।

⁶ বাং·বিয়া সালোনি বিনি ইন্দাকে গা·আকে দংআখো হা·আইএ যীশু বিখো সিং·জক, “না·আ নামনা হা·সিকামা?”

⁷ সাগিবা মান্দি আগানচাকজক, “চি মজিমমিত্তিংও আংখো চিবলও হং·খাতেতনা গিত্তা আংনি মান্দি সাকসাবা দংজা। আংনি রি·য়াংনা স্খাংআন সাকগিপ্পিন চিও হং·খাতারিংআ।”

⁸ যীশু বিখো আগানজক, “চাখাতবো, নাং·নি থুচাকানিখো দি·থমে রামা রি·বো।”

⁹ উনোন উয়া মান্দি নামজক আরো বিনি থুচাকানিখো দি·থমে রামা রি·না হা·বাচেংজক। উয়া সাল নেং·থাকানি সালমিং।

¹⁰ ইনি গিম্মিন যিহূদীনি দাল·বাৎগিবারাং উয়া নাম্মেতগিবা মান্দিখো আগানজক, “দা·আল নেং·থাকানি সাল; থরমনি নিয়াম গিত্তা থুচাকানিখো দি·থমে রা·না খ্রাজা।”

¹¹ উনোন বিয়া উয়া দাল·গিবারাংনা আগানজক, “ইন্দিবা আংখো নাম্মেতগিবান আংনা আগানজক, ‘নাং·নি থুচাকানিখো দি·থমে রামা রি·বো।’ ”

¹² বিসং উয়া মান্দিখো সিং·জক, “ ‘নাং·নি থুচাকানিখো দি·থমে রামা রি·বো,’ ইন্নে আগানগিবা উয়া মান্দি সা?”

¹³ ইন্দিবা উয়া মান্দি বিয়া সা উখো হা·আইজামিং, মুয়ানা উয়া হা·দামও বাং·বিয়া মান্দি দংআনি গিম্মিন যীশু উয়োনি রি·য়াংজকমিং।

¹⁴ উনি জা·মানো যীশু উয়া মান্দিখো থরম নক্কো গ্রংএ আগানজক, “নিবো, না·আ নামজক। দা·আ পাপ দাক্কাবো, জেদাক্কে নাং·নি নামগিজানি হং·জা।”

¹⁵ উনোন উয়া মান্দি যিহূদীনি দাল·বাৎগিবারাংচা রি·য়াংএ বিখো নাম্মেতগিবা যীশু ইন্নে আগানজক।

দেফান্থিনি বিল

¹⁶ নেং·থাকানি সালো যীশু ইয়া কামরাংখো দাক্কিংআমিং ইন্নে যিহূদী দাল·গিবারাং বিখো স·ওতে গালনা হাম·জকমিং।

¹⁷ উনোন বিয়া উয়া দাল·গিবারাংনা আগানজক, “আংনি ফা ফাংনান কাম দাক্কিংআ আরো আংআবা দাক্কিংআ।”

¹⁸ যীশুনি ইন্দাকে আগানানি গিম্মিন যিহূদীরাংনি দাল·গিবারাং বিখো স·ওতে গালনা হাম·জক, মুয়ানা বিয়া নেং·থাকানি সালনি নিয়ামখো ফি·ইংআমিং ইয়াসান হং·জা, ইসলখো আন·থাংনি ফাগিবা ইন্নে রিক্কামে আন·থাংখো ইসল গিত্তা দাল·নিকজকমিং।

¹⁹ উনি গিম্মিন যীশু উয়া দাল·গিবারাংনা আগানজক, “আংআ বিবিন না·সংনা আগানিংআ, দেফান্থি আন·থাংওনি মামুংখোন দাকনা মান·জা। ফাগিবাখো জেখো দাক্কাখো নিক্কা উখোসান দাকনা মা·ন্না, মুয়ানা ফাগিবা জেখো দাক্কা দেফান্থিবা উখোন দাক্কা।

²⁰ ফাগিবা দেফান্থিনা খা·সাআ আরো বিয়া আন·থাং জেখো দাক্কা উখো দেফান্থিনা ফিন্নিকা। বিয়া ইরাংনাবা দাল·বাৎগিবা কামরাংখো দেফান্থিনা ফিন্নিকনুয়া, জেদাক্কে দেফান্থিনি উয়া কামরাংখো দাক্কাখো নিক্কে না·সং আইয়াও ইনমানা।

²¹ ফাগিবা জেদাক্কে সিগিবারাংনা জাংগিখো হ·ন্নে চাখাত্তেতা উয়ানদাক্কেন দেফান্থিবা জেনা হা·সিকা বিনা জাংগিখো হ·ন্না।

²² ফাগিবা দারাংখোবা বিচাল দাকজা, ইন্দিবা গিম্মিক বিচাল দাক্কানিখো দেফান্থিনা হন·জক,

²³ ফাগিবাখো জেদাক্কে দিমদাকান মান্দিরা·আ উয়ানদাক্কে দেফান্থিখোবা মান্দিরা·আ। দেফান্থিখো জে মান্দিরা·জা, বিখো ওয়াত্তেতগিবা উয়া ফাগিবাখোবা বিয়া মান্দিরা·জা।

²⁴ “আংআ না·সংনা বিবিন আগানিংআ, আংনি আগানাখো জে খিন্নাচাকা আরো জে আংখো ওয়াত্তেতগিবাখো বিবিরা·আ বিয়া ফাংনাজলনি জাংগিখো মান·জক। বিখো গ্রো নাংগিবা ইন্নে ফতজানুয়া; বিয়াদে সিয়াওনি জাংগিওনা গা·বাতজক।

²⁵ আংআ না·সংনা বিবিন আগানিংআ, ইন্দাকগিবা সাল রি·বাংজক, ইন্দিবা দা·আওন সকজক, জে সময়ও সিগিবারাং ইসলনি দেফান্থিনি খু·রাংখো খিন্নানুয়া আরো খিন্নাগিবারাং থাংচানুয়া।

²⁶ মুয়ানা জেদাক্কে ফাগিবা আন·থাংআন জাংগি মান·রিকগিবা হং·আ উয়ানদাক্কেন বিয়া দেফান্থিখোবা জাংগি মান·রিকগিবা হং·খানা হন·জক।

²⁷ ফাগিবা দেফান্থিনা মান্দিরাংখো বিচাল দাকনা বিল হন·জক, মুয়ানা বিয়া মান্দিনি দেফান্থি হং·আ।

²⁸ ইখো খিন্নাএ দা·আ আইয়াও ইনমানাবো, মুয়ানা ইন্দাকগিবা সাল রি·বাংজক, জেরাং গোপরামও দংআ বিসং দিমদাকান মান্দিনি দেফান্থিনি খু·রাংখো খিন্নাএ হং·খাতে রি·বানুয়া।

²⁹ নামগিবা কামখো দাকগিবারাং জাংগিখো মা·ন্না চাখাতনুয়া, আরো নামগিজা কামখো দাকগিবারাং শাস্তিখো মা·ন্না চাখাতনুয়া।

³⁰ আংআ আন·থাংওনি মামুংখোবা দাকনা মান·জা; জেদাক্কে খিন্না উগিত্তান বিচাল দাক্কা। আংআ খাকখেৎ দাক্কে বিচাল দাক্কা, মুয়ানা আংআ আংনি হা·সিকা গিত্তা কাম দাকনা হাম·জা ইন্দিবা আংখো ওয়াত্তেতগিবানি হা·সিকা গিত্তান কাম দাকনা হা·ম্মা।

গিত্তেল যীশুনি গিম্মিনো সাক্ষি

³¹ “আংআ আন·থাংনি গিম্মিন সাক্ষি হ·ন্নোদে আংনি উয়া সাক্ষি হ·ন্না বিবি হং·জা।

³² আংনি গিম্মিন সাক্ষি হন·গিবা সাকগিপ্পিন দংআ, আরো আংআ হা·আইয়া আংনি গিম্মিন বিনি সাক্ষি হ·ন্না বিবি হং·আ।

³³ না·সং যোহনচা সিং·না ওয়াত্তেতামিং, আরো বিয়া বিবিনি হং·এ সাক্ষি হন·জক।

³⁴ আংআ মান্দিনি সাক্ষি হ·ন্নাও ফাংচাকজা, ইন্দিবা না·সং জেদাক্কে পাপওনি জকনা মা·ন্না উনি গিম্মিন ইয়া খাৎথারাংখো আগানিংআ।

³⁵ যোহনআন থেং·সুয়াখো হন·গিবা উয়া চিং·গিবা চাক্কি হং·আমিং; না·সং বাং·গিজা সালনা উয়া থেং·সুয়াও হান·সেংনা হা·ম্মামিং।

³⁶ ইন্দিবা যোহননি সাক্ষিনা বাত্তে দাল·বাৎগিবা সাক্ষি আংচা দংআ, মুয়ানা ফাগিবা আংনা জে কামরাংখো দাকনা হ·ন্না উরাংখোন আংআ দাক্কিংআ। আরো ফাগিবান আংখো ওয়াত্তেতজক ইন্নে উরাং আংনি গিম্মিন সাক্ষি হ·ন্না।

³⁷ আংখো ওয়াত্তেতগিবা, উয়া আপফা, বিয়া আন·থাংআন আংনি গিম্মিন সাক্ষি হন·জক। না·সং মামুং সালোবা বিনি খু·রাংখো খিন্নাখুজা, মিকখাং বিমাংখোবা নিকখুজা।

³⁸ ইনাআগ্রেবা বিনি খাৎথা না·সংনি খা·থংও দংখামজা, মুয়ানা বিয়া জেখো ওয়াত্তেতজক বিখো না·সং বিবিরা·জা।

³⁹ না·সং রংথালগিবা শাস্ত্রখো গিসিক নাংএ পড়িয়া, মুয়ানা উয়োন না·সং ফাংনাজলনি জাংগিখো মা·ন্নুয়া ইন্নে চানচিয়া। ইন্দিবা উয়া শাস্ত্রদে আংনি বিদিংওন সাক্ষি হ·ন্না;

⁴⁰ ইন্দাকোবা জাংগি মা·ন্না গিত্তা না·সং আংচানা রি·বানা হা·সিকজা।

⁴¹ “আংআ মান্দিনি রাসংখো মা·ন্না হাম·জা,

⁴² ইন্দিবা আংআ না·সংখো হা·আইয়া। আংআ হা·আইয়া না·সংনি খা·থংও ইসলনা খা·ফাক্কা দংজা।

⁴³ আংআ আংনি ফাগিবানি বিমুংও রি·বাজক আরো না·সং আংখো রা·চাকজাংআ; ইন্দিবা সাকগিপ্পিন আন·থাংনি বিমুংও রি·বাওদে বিখো না·সং রা·চাকনুয়া।

⁴⁴ না·সং সাকসা সাকগিপ্পিনচাখো রাসংখো মা·ন্না হা·ম্মা, ইন্দিবা সাকসানগিবা ইসলোনিখো মান·গিবা রাসংখো হাম·জা। ইনি জা·মানো না·সং বাদিকে দাক্কে বিবিরা·না মা·ন্না?

⁴⁵ আপফাচা আংআ না·সংখো গ্রো নাংগিবা ইন্নে ফতনুয়া ইন্দাকে দা·আ চানচিয়াবো; ইন্দিবা জে মোশিনা না·সং খা·দংএ দংআ উয়া মোশিন না·সংখো গ্রো নাংগিবা ইন্নে ফতজক।

⁴⁶ না·সং মোশিখো বিবিরা·ওদে আংখোবা বিবিরা·নুয়ামিং, মুয়ানা মোশিদে আংনি বিদিংওন চকজক।

⁴⁷ ইন্দিবা না·সং বিনি চক্কাখোন বিবিরা·জাওদে বাদিকে দাক্কে আংনি আগানাখো বিবিরা·নুয়া?”