যোহননা 19 - Garo New Testament

¹ উনোন পীলাত যীশুখো রা·আংএ চাবুকচা দকখানা গি·য়েৎজক।

² সিপাইরাং বুসুনি গি·সা মুকুটখো থারিয়ে যীশুনি স্খুও স্থিকেতজক।

³ জা·মানো বিখো গিৎচাকম্রাং বা·রাখো গান্নেতজক আরো বিচা রি·য়াংএ আগানজক, “ও যিহূদীরাংনি রাজা, রাসং হং·খানা!” ইখো আগানে সিপাইরাং বিনি নাথেংখো দকথাপনা হা·বাচেংজক।

⁴ পীলাত হা·ফালও রি·বাফিলে মান্দিরাংনা আগানজক, “নিবো, আংআ বিখো হং·খাত্তেতি না·সংচা রা·বাজক জেদাক্কে আংআ বিনি মামুং দোসখোন নিকজাংআ ইন্নে না·সং হা·আইনা মা·ন্না।”

⁵ যীশু উয়া বুসুনি মুকুটখো আরো গিৎচাকম্রাং বা·রাখো চিন্নে হা·ফালও রি·বাজক। উনোন পীলাত মান্দিরাংনা আগানজক, “ইয়া নিবো, উয়া মান্দি।”

⁶ যীশুখো নিক্কে খামাল দাল·গিবারাং আরো পেয়াদারাং চ্রিকে আগানজক, “চিসলো দাৎখাপবো, বিখো চিসলো দাৎখাপবো।” পীলাত মান্দিরাংনা আগানজক, “না·সংআন বিখো রা·আংএ চিসলো দাৎখাপবো, মুয়ানা আংআ বিনি মামুং দোসখোন নিকজাংআ।”

⁷ যিহূদীরাংনি দাল·গিবারাং পীলাতনা আগানজক, “চিংনি গি·সা নিয়াম দংআ, উয়া নিয়াম গিত্তা বিয়া সিনা খ্রাআ, মুয়ানা বিয়া আন·থাংখো ইসলনি দেফান্থি ইনজক।”

⁸ পীলাত ইয়া খাৎথাখো খিন্নাএ খেনবিজক।

⁹ বিয়া নক নিং·আচা রি·য়াংফিলে যীশুখো সিং·জক, “না·আ বাওনি রি·বাজক?” ইন্দিবা যীশু পীলাতনা মামুংখো আগানচাকজাজক।

¹⁰ ইনি গিম্মিন পীলাত যীশুনা আগানজক, “না·আ আংমুং খু·সুক আগানজানুয়ামা? নাং·খো ওয়াতনা বা চিসলো হ·ন্না আংনি বিল দংআ ইখো না·আ হা·আইয়ামা?”

¹¹ যীশু আগানচাকজক, “সাক্কাওনি নাং·না বিল হন·জাওদে আংনি সাক্কাও নাং·নি মামুং বিলআন দংজানুয়ামিং। উনি গিম্মিন আংখো নাং·নি জাক্কো হন·গিবানিন পাপ বাং·বাত্তা।”

¹² ইয়া খাৎথাখো খিন্নাএ পীলাত যীশুখো ওয়াতনা হাম·জক, ইন্দিবা যিহূদীরাংনি দাল·গিবারাং চ্রিকে আগানজক, “না·আ ইয়া মান্দিখো ওয়াত্তোদে না·আ সম্রাট কৈসরনি রিপ্পেং হং·জা। সাবা আন·থাংখো রাজা ইন্নোদে বিয়া সম্রাট কৈসরনি বোবিল হং·আ।”

¹³ ইখো খিন্নাএ পীলাত যীশুখো হা·ফালও রা·বাজক আরো রং·থিচা রিক্কা মিংগিবা বিচাল দাকরামো আসংজক। ইব্রীয় খু·সুকচা উয়া হা·দামখো গাব্বাথা মিংনুয়ামিং।

¹⁴ উয়া সাল ওয়াতচাংআনি সালনা থারিসোআনি সালমিং। উনো সালজাচ্চিমাং হং·আমিং। পীলাত যিহূদীরাংনি দাল·গিবারাংনা আগানজক, “ইয়া নিবো, না·সংনি রাজা।”

¹⁵ ইনি গিম্মিন বিসং চ্রিকে আগানজক, “হা·রিকেতবো, হা·রিকেতবো! বিখো চিসলো দাৎখাপবো।” পীলাত বিসংনা আগানজক, “না·সংনি রাজাখো আংআ চিসলো দাৎখাপনুয়ামা?” খামাল দাল·গিবারাং আগানচাকজক, “সম্রাট কৈসরনি আগ্রে চিংনি সাকসাবা রাজা দংজা।”

¹⁶ উনোন পীলাত যীশুখো চিসলো দাৎখাপনা বিসংনি জাক্কো হ·ন্নেতজক। উনোন সিপাইরাং যীশুখো রা·আংজক।

চিসলো গিত্তেল যীশুনি সিয়া

¹⁷ যীশু আন·থাংআন আন·থাংনি চিসলখো রিপ্পিএ স্খু বিখ্রক মিংগিবা হা·দাম দামসাওনা রি·য়াংজক। উয়া হা·দামখো ইব্রীয় খু·সুকচা গল্‌গথা মিংআমিং।

¹⁸ উয়ো বিসং যীশুখো চিসলো দাৎখাপজক- যীশুখো জাংচিও আরো বিনি সামগ্মিও গিপ্পিন সাকগ্মিখো দাৎখাপজক।

¹⁹ পীলাত দোসনি খাৎথাখো চক্কে যীশুনি চিসল সাক্কাও ফা·থাপজক। “নাসরতনি যীশু, যিহূদীরাংনি রাজা” ইন্নে উনো চক্কা দংআমিং।

²⁰ যীশুখো চিসলো দাৎখাপগিবা হা·দাম সংজিলমানি সেফাংওমিং ইনি গিম্মিন যিহূদীরাংওনি বাং·এন উয়া চক্কাখো পড়িজক। উখো ইব্রীয়, রোম আরো গ্রীক খু·সুকচা চক্কামিং।

²¹ উনোন যিহূদীরাংনি খামাল দাল·গিবারাং পীলাতনা আগানজক, “ ‘যিহূদীরাংনি রাজা,’ ইখো চকগিজা উনাবাত্তে ইন্দাকে চকবো, ‘বিয়া আগান্নুয়ামিং, আংআ যিহূদীরাংনি রাজা।’ ”

²² পীলাত আগানজক, “আংআ জেখো চকজক উখোন চকজক।”

²³ যীশুখো চিসলো দাৎখাপানি জা·মানো সিপাইরাং বিনি বা·রারাংখো রা·এ আন·থাংথাংও বাক ব্রি দাক্কে সুয়ালজক। জা·মানো বিসং যীশুনি চলাখোবা রা·জক। উয়া চলাও সিক্কা দংজামিং, সাক্কাওনি খা·মাওনা দিপ্পাৎ গিম্মিকখোন জাকচা খয়ে থারিয়ামিং।

²⁴ উখো নিক্কে সিপাইরাং সাকসা সাকগিপ্পিননা আগানজক, “ইখো চিৎগিজা ইন্দিবা লটারি খা·ল্লে নিখুনা ইয়া সানি হং·নুয়া।” ইরাং হং·জক জেদাক্কে রংথালগিবা শাস্ত্রনি ইয়া খাৎথা চু·সকা, বিসং আন·থাংথাংনি গিসেপো আংনি বা·রারাংখো সুয়ালা, আরো আংনি বা·রানা বিসং লটারি খা·ল্লা। আরো বিবিন সিপাইরাং ইরাংখো দাক্কামিং।

²⁵ যীশুনি মা·গিবা, বিনি মা·গিবানি নগিবা, ক্লোপানি জিকগিবা মরিয়ম আরো মগদলীনী মরিয়ম যীশুনি চিসল কেচ্চিও চাদেংএ দংআমিং।

²⁶ যীশু বিনি মা·গিবাখো আরো বিনি খা·সাগিবা জা·রিকগিবাখো চাদেংএ দংআখো নিকজক। বিনি মা·গিবানা বিয়া আগানচেংজক, “হাইওয়া নিবো, নাং·নি দেফান্থি।”

²⁷ উনি জা·মানো উয়া জা·রিকগিবানা আগানজক, “হাইওয়া নিবো, নাং·নি মা·গিবা।” উয়োনিন উয়া জা·রিকগিবা যীশুনি মা·গিবাখো বিনি আন·থাংনি নকচা রিম্মাংজক।

²⁸ ইনি জা·মানো গিম্মিকান বন·খামজক ইখো হা·আইএ রংথালগিবা শাস্ত্রনি খাৎথা চু·সকখানা ইন্নে যীশু আগানজক, “আংআ চি রিংনা হা·সিকা।”

²⁹ মেসেং বিৎচি গাপ্পা গি·সা দনচাক্রা উয়া হা·দামও দংআমিং। উনো বিসং গি·সা স্পঞ্জখো সিম·চিম্মে আরো এসোব বিফাংনি ডালাও সিকসেপে উখো যীশুনি খু·সুকচা রিম·জক।

³⁰ যীশু উয়া মেসেং বিৎচিখো রিংআনি জা·মানো আগানজক, “বন·জক।” জা·মানো বিয়া স্খু দেংগকে জাংগি গালজক।

³¹ উয়া সাল মানিয়ানি সালখো থারিয়ানি সাল হং·আমিং। উনি সালসাও নেং·থাকানি সালমিং, আরো উয়া নেং·থাকানি সাল মংসংগিবা সাল হং·আমিং ইন্নে যিহূদীরাংনি দাল·গিবারাং হা·ম্মামিং জেদাক্কে উয়া সালো বে·এনরাংখো চিসল সাক্কাও দনজা। ইনি গিম্মিন চিসলো দাৎখাপগিবারাংনি জা·আখো ফি·এ চিসলোনি বিসংখো রা·আংএতখানা বিসং পীলাতচা মল·মলজক।

³² উনোন সিপাইরাং রি·বাএ যীশুমুং চিসলো দাৎখাপগিবা সাকগ্মিনি জা·চকখো ফি·এ গালজক।

³³ জা·মানো সিপাইরাং যীশুনি সেফাংও রি·বাএ বিখো সিয়াখো নিক্কে বিনি জা·আখো ফি·জাজক।

³⁴ ইন্দিবা সিপাই সাকসা বিনি অকসামবেংখো সু·জক, আরো উনোন উয়োনি হান·চি আরো চি হং·খাতবাজক।

³⁵ আন·থাংনি মিক্রোনও ইন্দাকারাংখো নিকগিবান সাক্ষি হ·ন্নে আগানজক, আরো বিনি সাক্ষি হ·ন্না বিবিন হং·আ। বিয়া হা·আইয়া, বিনি আগানারাং বিবি হং·আ জেদাক্কে না·সংবা বিবিরা·না মা·ন্না।

³⁶ ইরাং হং·আমিং জেদাক্কে রংথালগিবা শাস্ত্রনি ইয়া খাৎথা চু·সকা, “বিনি গ্রেং গি·সাখোবা ফি·আ হং·জানুয়া।”

³⁷ দা·আবা শাস্ত্রনি দা·আও মিংসা খাৎথা ইয়ান- “জেখো বিসং সু·জক বিচাখো বিসং নিএতনুয়া।”

গিত্তেল যীশুনি গোপরাম

³⁸ ইরাং হং·আনি জা·মানো অরিমাথিয়া সংনি যোষেফ যীশুনি বে·এনখো রা·আংনা পীলাতচা মল·মলজক। যোষেফ যীশুনি সিউল দাক্কে জা·রিকগিবা হং·আমিং, মুয়ানা বিয়া যিহূদীরাংনি দাল·গিবারাংনা খেন্নুয়ামিং। পীলাতনি আগানানি জা·মানো বিয়া রি·বাএ যীশুনি বে·এনখো রা·আংজক।

³⁹ স্খাংও ওয়াল্লো যীশুচা রি·বাগিবা নীকদীমবা সৎবংআমাং সিম্মিলগিবা তেলখো আরো আগরখো ব্রিনে রা·বাজক।

⁴⁰ জা·মানো বিসং যীশুনি বে·এনখো রা·এ যিহূদীরাংনি গোপ্পানি নিয়াম গিত্তা উয়া গিম্মিক সিম্মিলাখো হ·ন্নে বে·এনখো বা·রাচা বিল·রিমরিমজক।

⁴¹ যীশুখো দাৎখাপগিবা হা·দামও বাগান দামসা দংআমিং আরো উয়ো গিত্তাল গি·সা গোপরাম দংআমিং। উয়া গোপরামও দারাংখোবা গোপখুজামিং।

⁴² উয়া সাল যিহূদীরাংনি পর্বনা থারিসোআনি সালমিং, আরো উয়া গোপরামবা সেফাংওন দংআনি গিম্মিন বিসং যীশুখো উয়া গোপরামওন দনজক।