যোহননা 18 - Garo New Testament

বোবিলরাংনি জাক্কো গিত্তেল যীশু

¹ ইয়া খাৎথারাংখো আগানানি জা·মানো যীশু বিনি জা·রিকগিবারাংমুং কিদ্রোণ চিরিংনি নালসাচা রি·য়াংজক। উয়ো বাগান দামসা দংআমিং। যীশু আরো বিনি জা·রিকগিবারাং উয়া বাগানচা রি·য়াংজক।

² যীশুখো জা·মানো বোবিলরাংনি জাক্কো রি·ম্মে হন·গিবা উয়া যিহূদাবা ইয়া হা·দামখো হা·আইয়ামিং, মুয়ানা যীশু সময়ফ্রাকরাংওন জা·রিকগিবারাংমুং উয়া হা·দামও থম·দাকনুয়ামিং।

³ খামাল দাল·গিবারাং আরো ফরীশীরাং যিহূদামুং সিপাই মিত্তাম আরো পেয়াদা মিত্তামখো হন·জক। উনোন যিহূদা বিসংমুং চাক্কি আরো মি·ল্লামরাংখো রা·এ উয়ো রি·বাজক।

⁴ বিনি সাক্কাও মুয়া হং·নুয়া উয়া দিমদাকখোন যীশু হা·আইয়ামিং। ইনি গিম্মিন বিয়া হং·খাতে রি·বাএ উয়া মান্দিরাংনা আগানজক, “না·সং সাখো সান্দিংআ?”

⁵ বিসং আগানজক, “নাসরতনি যীশুখো।” যীশু বিসংনা আগানজক, “আংআন উয়া।” যীশুখো বোবিলরাংনি জাক্কো রি·ম্মে হন·গিবা উয়া যিহূদাবা বিসংমুং চাদেংএ দংআমিং।

⁶ “আংআন উয়া,” ইন্নে যীশুনি আগানোন বিসং থাং·ফিলে হা·আও গা·আকজক।

⁷ যীশু দা·আবা বিসংখো সিং·ফিলজক, “না·সং সাখো সান্দিংআ?” বিসং আগানজক, “নাসরতনি যীশুখো।”

⁸ উনোন যীশু আগানজক, “আংআদে না·সংনা আগানজকান, আংআন উয়া। না·সং আংখোন সান্দিনা রি·বাওদে ইরাংখো রি·য়াংনা আগানবো।”

⁹ ইয়া হং·জক জেদাক্কে যীশুনি আগানগিবা ইয়া খাৎথা চু·সকা, “নাং·নি আংনা হন·গিবারাংওনি সাকসাখোবা আংআ গিম্মায়েতজা।”

¹⁰ শিমোন-পিতরচা মি·ল্লাম গি·সা দংআমিং। পিতর উয়া মি·ল্লামখো সাল্লোকে খামাল দাল·বাৎগিবানি নকখলনি জাক্রা নাচিলখো দেন·ফাকেতজক। উয়া নকখলনি বিমুংখো মল্ক মিংআমিং।

¹¹ ইনি গিম্মিন যীশু পিতরনা আগানজক, “নাং·নি মি·ল্লামখো বিখপো দনবো। আপফা আংনা দুকনি জে রিংচাকানিখো হন·জক উখো আংআ রিংজানুয়ামা?”

¹² উনোন উয়া সিপাইরাং আরো বিসংনি সুবিদার আরো যিহূদী দাল·বাৎগিবারাংনি পেয়াদারাং যীশুখো রি·ম্মে খাজক।

¹³ বিসং যীশুখো হাননচা রা·আংচেংজক, মুয়ানা উয়া বিলসিও জে কাইয়াফা খামাল দাল·বাৎগিবা হং·আমিং হানন বিনি হ·গিবামিং।

¹⁴ ইয়া কাইয়াফান যিহূদীরাংনি দাল·গিবারাংনা ইন্দাকে খু·ফাত্থিয়ামিং, গিম্মিক জাতনা বাত্তে সাকসানি সিয়ান নামবাত্তা।

পিতরনি জিচাক্কা

¹⁵ শিমোন-পিতর আরো সাকগিপ্পিন জা·রিকগিবা যীশুখো জা·রিকফাজক। খামাল দাল·বাৎগিবা উয়া সাকগিপ্পিন জা·রিকগিবাখো হা·আইয়ামিং। উয়া জা·রিকগিবা যীশুমুং খামাল দাল·বাৎগিবানি হা·থিলাও নাপজক,

¹⁶ ইন্দিবা পিতর হা·ফালচা দ·গাচিল সেফাংও চাদেংএ দংজক। উনোন খামাল দাল·বাৎগিবানি হা·আইগিবা উয়া জা·রিকগিবা হা·ফালচা রি·য়াংএ দ·গাচিলও নিথিমগিবা মিচিকখো আগানে পিতরখো নিং·আচানা রিমবাজক।

¹⁷ উয়া মিচিক পিতরনা আগানজক, “না·আবা ইয়া মান্দিনি জা·রিকগিবারাংওনি সাকসা হং·আমা?” পিতর আগানজক, “হং·জা, আংআদে হং·জা।”

¹⁸ উনো বাং·এন সি·ন্না গা·আকামিং। ইনি গিম্মিন নকখলরাং আরো পেয়াদারাং ওয়া·আলখো সো·এ উয়া হা·দামও চাদেংএ ওয়া·আল চাক্কিংআমিং। পিতরবা বিসংমুং চাদেংএ ওয়া·আল চাক্কিংআমিং।

খামাল দাল·বাৎগিবানি সিং·থেকা

¹⁹ খামাল দাল·বাৎগিবা উনোন যীশুখো বিনি জা·রিকগিবারাংনি গিম্মিন আরো বিনি স্খিয়ানি গিম্মিন সিং·জক।

²⁰ যীশু আগানচাকজক, “আংআ মান্দিরাংচা ফারাকেন খাৎথা আগানজক। আংআ ফাংনান থম·দাকরামও আরো থরম নক্কো জেও দিমদাক যিহূদীরাং থ·ম্মা উয়ো স্খিজক। আংআদে মিৎথিনাও মামুংখোবা আগানজা;

²¹ ইন্দিবা মুয়ানা আংখো সিং·আ? আংনি আগানাখো খিন্নাগিবারাংচা সিং·বো আংআ বিসংনা মুয়াখো আগানজক। আংনি আগানগিবাও বিসংনি হা·আইগিজা দংজা।

²² যীশুনি ইন্দাকে আগানমিত্তিংও বিনি সেফাংও চাদেংগিবা পেয়াদারাংওনি সাকসা বিনি নাথেংখো দকথাপে আগানজক, “না·আ খামাল দাল·বাৎগিবানা ইন্দাকে আগানচাক্কিংজক?”

²³ যীশু বিনা আগানজক, “আংআ নামগিজাখো আগানোদে উখো ফিন্নিকবো। ইন্দিবা নাম্মাখো আগানোদে মুয়ানা আংখো দক্কিংআ?”

²⁴ উনোন হানন যীশুখো খাআ গ্মাংআন খামাল দাল·বাৎগিবা কাইয়াফাচা ওয়াত্তেতজক।

পিতরনি রাং·গ্মিগিবা আরো রাং·গিত্থামগিবা জিচাক্কা

²⁵ শিমোন-পিতরনি চাদেংএ ওয়া·আল চাকমিত্তিংও মান্দিরাং বিখো ইনজক, “না·আবা বিনি জা·রিকগিবারাংওনি সাকসামা?” পিতর জিচাকে আগানজক, “হং·জা, আংআদে হং·জা।”

²⁶ পিতর জেনি নাচিলখো দেন·ফাকামিং বিনি সাকসা চাচ্চি খামাল দাল·বাৎগিবানি নকখলমিং। বিয়া আগানজক, “আংআ নাং·খো বাগানচা বিমুং নিকজামিংমা?”

²⁷ পিতর দা·আবা জিচাকজক, আরো উনোন দো·ও মাংসা গিসিকজক।

পীলাতনি মিকখাংও বিচাল দাক্কা

²⁸ যিহূদী দাল·বাৎগিবারাং ফ্রিংও যীশুখো কাইয়াফাওনি রোমনি দাল·বাৎগিবা শাসন দাকগিবা পীলাতনি নকচা রিম্মাংজক। ইন্দিবা বিসং উয়া নকনি নিং·আও নাপজাজক জেদাক্কোদে রংথালে দংএ ওয়াতচাংআনি চা·আখো চা·না মা·ন্না।

²⁹ উনোন পীলাত হা·ফালও বিসংচা রি·বাএ আগানজক, “ইয়া মান্দিখো না·সং মুয়া দোসখো হ·ন্নে দোসগ্মাং দাক্কিংজক?”

³⁰ যিহূদী দাল·বাৎগিবারাং আগানজক, “বিয়া নামগিজা কামখো দাকজাওদে চিংআ নাং·চা বিখো রিমবাজানুয়ামিং।”

³¹ পীলাত বিসংনা আগানজক, “ইখো না·সং রিম্মাংএ না·সংনি বেওয়াল গিত্তা বিচাল দাকবো।” ইনি গিম্মিন যিহূদী দাল·বাৎগিবারাং পীলাতনা আগানজক, “ইন্দিবা মান্দিনা সিয়ানি শাস্তিখো হ·ন্নানি বিলদে চিংনি জাক্কো দংজা।”

³² বাদিকে দাক্কে আন·থাং সিনুয়া যীশু স্খাংআন আগানামিং। ইরাং হং·জক জেদাক্কে বিনি উয়া খাৎথা চু·সকা।

³³ উনোন পীলাত দা·আবা নক নিং·আওনা নাপজক আরো যীশুখো রিক্কামে আগানজক, “না·আন যিহূদীরাংনি রাজামা?”

³⁴ যীশু আগানজক, “না·আ আন·থাংওনিন ইয়া খাৎথাখো আগানিংআমা, বা সাকগিপ্পিনরাং আংনি গিম্মিন নাং·না আগানে হ·ন্না?”

³⁵ পীলাত আগানচাকজক, “আংআ যিহূদীমা? নাং·নি জাতস্খারাং আরো খামাল দাল·গিবারাং নাং·খো আংনি জাক্কো হন·জক। না·আ মুয়াখো দাক্কা?”

³⁶ যীশু আগানজক, “আংনি সংনক ইয়া হা·গিলসাকনি হং·জা। আংনি সংনক ইয়া হা·গিলসাকো হং·ওদে আংআ যিহূদী দাল·বাৎগিবারাংনি জাক্কো জেদাক্কে গা·আকজা উনি গিম্মিন আংনি মান্দিরাং দাকগ্রিকনুয়ামিং; ইন্দিবা আংনি সংনকদে ইয়া হা·গিলসাকনি হং·জা।”

³⁷ পীলাত যীশুনা আগানজক, “ইন্দাকোদে না·আ রাজামা?” যীশু আগানজক, “আংআন রাজা ইন্নে না·আ খাকখেৎখোন আগানজক। বিবিনা চাক্কে সাক্ষি হ·ন্না আংআ আৎচিজক আরো উনি গিম্মিন আংআ হা·গিলসাকো রি·বাজক। সাবা বিবিও দংওদে আংনি খাৎথাখো খিন্নাচাক্কা।”

³⁸ পীলাত বিনা আগানজক, “বিবি মুয়া?” ইয়া খাৎথাখো আগানে বিয়া হা·ফালচা যিহূদী দাল·বাৎগিবারাংচা রি·য়াংফিলে আগানজক, “আংআ বিনি মামুং দোসখোন নিকজাংআ।

³⁹ ইন্দিবা না·সংনি বেওয়াল মিংসা দংআ, ওয়াতচাংআনি সালো আংআ না·সংনা সাকসা বন্দিখো ওয়াত্তেতিংআ। যিহূদীরাংনি রাজাখো আংআ ওয়াত্তেতনা, ইখো না·সং হা·ম্মামা?”

⁴⁰ ইনি গিম্মিন দিমদাকান চ্রিকে ইনজক, “বিখো হং·জা, বারাব্বাখোসা।” উয়া বারা্ববা সাকসা রা·সেকগিবা হং·আমিং।