যোহননা 13 - Garo New Testament

জা·রিকগিবারাংনি জা·চকখো জা·সুয়েতা

¹ ইরাং ওয়াতচাংআনি সালনা স্খাং হং·আমিং। ইয়া হা·গিলসাকখো ওয়াত্তে ফাগিবাওনা রি·য়াংনা বিনি সাল সকজক ইন্নে যীশু হা·আইনা মান·জকমিং। ইয়া হা·গিলসাকো বিনি আন·থাংনি মান্দিরাংনা বিয়া খা·সামিং আরো বন·খামওনা দিপ্পাৎআন খা·সামিং।

² উনো চা·মিত্তিংমিং। শয়তান ইনা স্খাংআন যীশুখো বোবিলরাংনি জাক্কো রি·ম্মে হ·ন্না শিমোননি দেগিবা যিহূদা ইষ্কারিয়োতনি গিসিকো হা·সিকেতজক।

³ যীশু হা·আইয়ামিং, ফাগিবা ইসল বিনি জাক্কো গিম্মিকখোন হন·জক। বিয়া আরোবা হা·আইয়ামিং, বিয়া বিচানিন রি·বাআ আরো বিচান ফি·ল্লাংইংজক।

⁴ ইনি গিম্মিন বিয়া চা·আওনি চাখাত্তে সাক্কাও চিনদাপগিবা বা·রাখো এংএ বা·রা গামছা ফাৎসাখো খাংখারিও খাজক।

⁵ জা·মানো বিয়া গামলাও চি রুএ জা·রিকগিবারাংনি জা·চকখো জা·সুয়েতনা হা·বাচেংজক আরো খাংখারিও খাগিবা বা·রাচা রিপ্পাকেতজক।

⁶ ইন্দাকে যীশু শিমোন-পিতরচানা রি·বাওন পিতর বিনা আগানজক, “গিত্তেল, না·আ আংনি জা·চকখো জা·সুয়েতনুয়ামা?”

⁷ যীশু আগানচাকজক, “আংআ জেখো দাক্কিংজক উখো না·আ দা·আও হা·আইনা মান·জাংজক ইন্দিবা জা·মানো হা·আইনা মা·ন্নুয়া।”

⁸ পিতর বিনা আগানজক, “না·আ আংনি জা·চকখো মামুং সালোবা জা·সুয়েতনা নাংজা।” যীশু পিতরনা আগানজক, “আংআ নাং·খো জা·সুয়েতজাওদে ইন্দিদে আংমুং নাং·নি মামুং বাক দংজা।”

⁹ উনোন শিমোন-পিতর আগানজক, “গিত্তেল, ইন্দাকোদে আংনি জা·চকখোসান হং·জা, আংনি জাকখো আরো স্খুখোবা সু·গালে হন·বো।”

¹⁰ যীশু বিনা আগানজক, “হাবুগিবানি জা·চকনা আগ্রে মামুংখোবা সু·গালনা নাংজা, মুয়ানা বিনি বে·এন গিম্মিকান রংথালা।

¹¹ না·সংদে রংথালান, ইন্দিবা গিম্মিকদে হং·জা।” সা বিখো রি·ম্মে হ·ন্নুয়া উখো বিয়া হা·আইয়ামিং। উনি গিম্মিনান বিয়া আগানজক, “না·সং গিম্মিকদে রংথালজা।”

¹² জা·রিকগিবা গিম্মিকনি জা·চকখো জা·সুয়েতানি জা·মানো যীশু বিনি চিনদাপগিবা বা·রাখো চিন্নে দা·আবা আসংজক আরো বিসংনা আগানজক, “আংআ মুয়াখো দাকজক উখো না·সং হা·আইনা মান·জকমা?

¹³ না·সং আংখো স্খিগিবা আরো গিত্তেল ইন্না, আরো খাকখেৎখোন আগানা মুয়ানা আংআ ইন্দাকেন হং·আ।

¹⁴ ইন্দিবা আংআ গিত্তেল আরো স্খিগিবা হং·এবা না·সংনি জা·চকখো জা·সুয়েতোদে না·সংবা সাকসা সাকগিপ্পিননি জা·চকখো জা·সুয়েতনা নাংআ।

¹⁵ আংআ ইখো না·সংনা দাক্কে ফিন্নিকজক, জেদাক্কে আংআ না·সংনি গিম্মিন জেখো দাকজক না·সংবা উয়ানদাক্কেন দাক্কা।

¹⁶ আংআ না·সংনা বিবিন আগানিংআ, নকখল বিনি নকগিবানা বাত্তে দাল·বাৎজা। জেখো ওয়াত্তেতজক বিখো ওয়াত্তেতগিবানা বাত্তে বিয়া দাল·বাৎজা।

¹⁷ ইরাংখো হা·আইএ উগিত্তা দাক্কোদে না·সং মিৎথেলাখো মান·গিবা হং·আ।

¹⁸ “আংআ না·সং গিম্মিকখোদে আগানজা। আংআ জেরাংখো বাচ্ছিয়ে রা·জক বিসংখোদে আংআ হা·আইয়া। ইন্দিবা রংথালগিবা শাস্ত্রনি ইয়া খাৎথা চু·সকনান নাংনুয়া, ‘আংমুং চা·রিম-রিংরিমগিবাবা আংনি সাক্কাও জা·ফা দি·জক।’

¹⁹ ইরাং হং·না স্খাংআন আংআ না·সংনা আগানিংআ, জেদাক্কে হং·আনি জা·মানো আংআন উয়া হং·আ, ইন্নে না·সং বিবিরা·না মা·ন্না।

²⁰ আংআ না·সংনা বিবিন আগানিংআ, আংআ জেখো ওয়াত্তেতা, বিখো রা·চাকগিবা আংখোন রা·চাকা, আরো আংখো রা·চাকগিবা, আংখো ওয়াত্তেতগিবাখোন রা·চাকা।”

সা গিত্তেল যীশুখো রি·ম্মে হ·ন্নুয়া?

²¹ ইরাংখো আগানানি জা·মানো যীশু খা·থংও জাজ্রেংজক। বিয়া ফারাকেন আগানজক, “আংআ না·সংনা বিবিন আগানিংআ, না·সংওনি সাকসা আংখো বোবিলরাংনি জাক্কো রি·ম্মে হ·ন্নুয়া।”

²² যীশু সাখো আগানজক উখো হা·আইনা মান·জাএ জা·রিকগিবারাং সাকসা সাকগিপ্পিনচাখো নিনা হা·বাচেংজক।

²³ বিসংওনি জেনা যীশু খা·সানুয়ামিং বিয়া যীশুনি খা·বাকোন দংআমিং।

²⁴ শিমোন-পিতর বিখো মিক্‌জাপে আগানজক, “বিয়া সাখো আগানিংআ সিং·বো।”

²⁵ উয়া জা·রিকগিবা উনো যীশুচাখো নিএ আগানজক, “গিত্তেল, বিয়া সা?”

²⁶ যীশু আগানচাকজক, “ইয়া রুটিখো সিম·বলে জেনা হ·ন্নুয়া বিয়ান উয়া মান্দি হং·আ।” আরো বিয়া রুটিখো সিম·বলে শিমোন ইষ্কারিয়োতনি দেগিবা যিহূদানা হন·জক।

²⁷ রুটিখো রা·আনি জা·মানোন শয়তান যিহূদানি নিং·আও নাপজক। যীশু বিনা আগানজক, “জেখো দাকনা হা·ম্মা উখো বিকবিক দাকবো।”

²⁸ যীশুমুং চা·গিবারাংনি সাকসাবা হা·আইনা মান·জাজক যীশু মুয়ানা যিহূদানা ইয়া খাৎথাখো আগানজক।

²⁹ সাবা চানচিজক, পর্বনা জেখো নাংআ যীশু যিহূদাখো উখো ব্রিএ রা·বানা আগানজক বা দিল্লা-চন্নারাংনা মামুংখো হন·খানা আগানজক, মুয়ানা বিসংনি থাংখানি জেপ যিহূদাচান দংনুয়ামিং।

³⁰ রুটিখো রা·আনি জা·মানোন যিহূদা হা·ফালচানা রি·য়াংজক। উনো ওয়ালজক।

গিত্তাল গি·য়েতানি গিম্মিন

³¹ যিহূদা হা·ফালচানা রি·য়াংআনি জা·মানো যীশু আগানজক, “মান্দিনি দেফান্থিনি রাসংখো ফারাকানি সাল সকবাজক আরো বিও ইসলনি রাসং ফারাকনুয়া।

³² ইসলনি রাসং বিও ফারাকোন ইসলবা মান্দিনি দেফান্থিনি রাসংখো আন·থাংও ফারাকেতনুয়া আরো উখো বিয়া থেংরিন দাকনুয়া।

³³ “বি·সারাং, দিকদিকসানাসান আংআ না·সংমুং দংখুংআ। না·সং আংখো সান্দিনুয়া, ইন্দিবা আংআ যিহূদীনি দাল·গিবারাংনা জেদাক্কে আগানামিং, ‘আংআ জেও রি·য়াংইংজক না·সং উয়ো রি·বানা মান·জানুয়া,’ উয়ানদাক্কেন না·সংনাবা দা·আও উখোন আগানিংআ।

³⁴ মিংসা গিত্তাল গি·য়েতাখো আংআ না·সংনা হ·ন্নিংজক- না·সং সাকসা সাকগিপ্পিননা খা·সাগ্রিকবো। আংআ জেদাক্কে না·সংনা খা·সামিং উয়ানদাক্কেন না·সংবা সাকসা সাকগিপ্পিননা খা·সাগ্রিকবো।

³⁵ না·সং সাকসা সাকগিপ্পিননা খা·সাগ্রিকোদে ইন্দিদে গিম্মিকান হা·আইনা মা·ন্নুয়া না·সং আংনি জা·রিকগিবা হং·আ।”

পিতরনি খু·রাচাক্কা

³⁶ শিমোন-পিতর যীশুনা আগানজক, “গিত্তেল, না·আ বাওনা রি·য়াংআ?” যীশু আগানচাকজক, “আংআ জেওনা রি·য়াংআ না·সং দা·আও আংমুং উয়োনা রি·বানা মান·জানুয়া, ইন্দিবা জা·মানো না·সং রি·বানুয়া।”

³⁷ পিতর বিনা আগানজক, “গিত্তেল, মুয়ানা দা·আও নাং·মুং রি·য়াংনা মান·জানুয়া? নাং·নি গিম্মিন আংআ জাংগিথাংখোবা হন·চাকনুয়া।”

³⁸ উনোন যীশু আগানজক, “বিবিন না·আ আংনি গিম্মিন জাংগিথাংখো হন·চাকনুয়ামা? আংআ নাং·না বিবিন আগানিংআ, দো·ও গিসিকনা স্খাংআন না·আ রাং·গিত্থাম আংখো হা·আইজা ইন্নে জিচাকনুয়া।