যোহননা 1 - Garo New Testament

ইসলনি খাৎথা মান্দি ফি·ল্লে আৎচিজক

¹ চেংওন খাৎথা দংআমিং, খাৎথা ইসলমুং দংআমিং আরো খাৎথা আন·থাংআন ইসলমিং।

² আরো চেংওনিন বিয়া ইসলমুং দংআমিং।

³ উয়া খাৎথাচা গিম্মিকখো দাক্কা হং·আমিং, আরো দাকগিবারাংনি গিসেপো মিংসাবা বিনি আগ্রে হং·জা।

⁴ বিচা জাংগি দংআমিং আরো উয়া জাংগিন মান্দিরাংনা সেং·আ হং·আমিং।

⁵ উয়া সেং·আ আন্দালাও থেং·সুয়া ইন্দিবা আন্দালা সেং·আখো হামজাজক।

⁶ ইসল যোহন মিংগিবা সাকসা মান্দিখো ওয়াত্তেতামিং।

⁷ বিয়া সেং·আনি গিম্মিন সাক্ষি হ·ন্না রি·বামিং জেদাক্কে বিনি সাক্ষি হ·ন্নাখো খিন্নাএ দিমদাকান বিবিরা·না মা·ন্না।

⁸ যোহন আন·থাংদে উয়া সেং·আ হং·জামিং ইন্দিবা উয়া সেং·আনি গিম্মিন সাক্ষি হ·ন্নাসা রি·বামিং।

⁹ জেআন মান্দি দিমদাকনা সেং·আখো হ·ন্না, উয়ান চং·মতগিবা সেং·আ, বিয়া হা·গিলসাকো রি·বামিং।

¹⁰ বিয়া হা·গিলসাকোন দংআমিং আরো হা·গিলসাক বিচান হং·আমিং, ইন্দিবা হা·গিলসাকনি মান্দিরাং বিখো হা·আইজাজক।

¹¹ বিয়া সংথাংও রি·বাজক, ইন্দিবা বিনি আন·থাংনি মান্দিরাংআন বিখো রা·চাকজাজক।

¹² ইন্দিবা বিখো বিবিরা·এ রা·চাকগিবা সাকফ্রাকফ্রাকখোন বিয়া ইসলনি দে হং·খানা বিলখো হন·জক।

¹³ ইয়া মান্দিরাং হান·চিওনি আৎচিজা, বে·এননি বা মি·আসা মান্দিনি হা·সিকাওনিবা হং·জা, ইন্দিবা ইসলোনিসা হং·আ।

¹⁴ উয়া খাৎথান মান্দি ফি·ল্লে আৎচিজক আরো আনচিংনি গিসেপো দংফাজক। ফাগিবা ইসলনি সাকসা খাম·খাম দেফান্থি গিত্তা বিনি রাসংখো আনচিং নিকজক। বিয়া খা·সাচাক্কাও আরো বিবিও গাপগিবা হং·আ।

¹⁵ যোহন বিনি গিম্মিনো চ্রিকে সাক্ষি হ·ন্নে আগানজক, “বিয়ান উয়া মান্দি জেনি গিম্মিন আংআ আগানামিং, আংনি জা·মানো রি·বাগিবা আংনা দাল·বাৎগিবা হং·আ, মুয়ানা বিয়া আংনা স্খাংওনিন দংআ।”

¹⁶ আনচিং দিমদাকান বিনি উয়া গাপসুয়াকাওনিখো খা·সাচাক্কানি সাক্কাও দা·আবা খা·সাচাক্কাখো মান·জক।

¹⁷ মোশিচা নিয়ামরাংখো হ·ন্নামিং, ইন্দিবা যীশু খ্রীষ্টচা খা·সাচাক্কা আরো বিবি রি·বাজক।

¹⁸ দারাংবা ইসলখো মামুং সালোবা নিকখুজা। বিমুং দংফাগিবা উয়া সাকসা খাম·খাম দেফান্থি, জে আন·থাংআন ইসল হং·আ, বিয়ান বিখো ফারাকজক।

যোহননি সাক্ষি হ·ন্না

¹⁹ যিহূদীরাংনি দাল·বাৎগিবারাং জেনসালো যিরূশালেম সংজিলমাওনি মিত্তাম খামালরাংখো আরো লেবীয়রাংখো যোহনচা ওয়াত্তেতজক উনসালো যোহন বিসংচা সাক্ষি হন·জক। বিসং সিং·জক, “না·আ সা?”

²⁰ যোহন জিচাকজাজক ইন্দিবা খু·রাচাক্কে ইনজক, “আংআ খ্রীষ্ট হং·জা।”

²¹ উনোন বিসং যোহনচা সিং·জক, “ইন্দিদে সা? না·আ এলিয়মা?” বিয়া আগানজক, “হং·জা, আংআ এলিয় হং·জা।” বিসং আগানজক, “ইন্দিদে না·আ উয়া আগানসোগিবামা?” বিয়া আগানচাকজক, “হং·জা।”

²² উনোন বিসং বিনা আগানজক, “ইন্দিদে না·আ সা? চিংখো ওয়াত্তেতগিবারাংনা চিংআ ফি·ল্লাংএ মামুংখো আগানচাকনা নাংনুয়া। না·আ আন·থাংনি গিম্মিনো মুয়াখো আগানিংআ?”

²³ যোহন আগানজক, “আংআন উয়া খু·রাং, জেনি গিম্মিনো আগানসোগিবা যিশাইয় আগানসোআমিং, হা·গিসি জওলো সাকসানি খু·রাং চ্রিকে আগানিংজক, নাং·নি গিত্তেলনি রামাখো স্রংএতবো।”

²⁴ যোহনচা ওয়াত্তেতগিবারাং ফরীশী হং·আমিং। বিসং যোহনখো সিং·জক,

²⁵ “না·আ খ্রীষ্ট হং·জাওদে, এলিয় হং·জাওদে বা উয়া আগানসোগিবাবা হং·জাওদে, ইন্দিদে মুয়ানা না·আ রিপ্পলেতিংআ?”

²⁶ যোহন উয়া ফরীশীরাংনা আগানচাকজক, “আংআ চিও রিপ্পলেতিংআ, ইন্দিবা না·সংনি গিসেপো ইন্দাকগিবা সাকসা দংআ জেখো না·সং হা·আইজা।

²⁷ বিয়ান উয়া মান্দি আংনি জা·মানো জেনি রি·বানি খাৎথা দংআমিং। আংআ বিনি জা·খপনি ফিতাখো এংনাবা খ্রাজা।”

²⁸ যর্দন চিবিমানি নালসাচা বৈথনিয়া সংও জেও যোহন রিপ্পলেতিংআমিং উনো ইরাং হং·আমিং।

²⁹ উনি সাল সাও যোহন যীশুখো আন·থাংচানা রি·বাখো নিক্কে আগানজক, “হাইওয়া নিবো ইসলনি মেষ বি·সা, জেআন মান্দিনি গিম্মিক পাপখো হা·রিকা।

³⁰ বিয়ান উয়া মান্দি জেনি গিম্মিনো আংআ আগানামিং, আংনি জা·মানো সাকসা রি·বাংজক জে আংনা বাত্তে দাল·বাৎগিবা হং·আ, মুয়ানা বিয়া আংনা স্খাংওনিন দংআ।

³¹ আংআ বিখো হা·আইজামিং, ইন্দিবা ইস্রায়েলরাংচা বিখো ফারাকেতনা আংআ রি·বাএ চিও রিপ্পলেতিংজক।”

³² উনি জা·মানো যোহন ইখো সাক্ষি হন·জক, “আংআ গিসিক রংথালগিবাখো কইতর গিত্তা সালগিওনি হং·ওনবাএ বিনি সাক্কাও দংআখো নিকজক।

³³ আংআ বিখো হা·আইজামিং, ইন্দিবা আংখো চিও রিপ্পলেতনা ওয়াত্তেতগিবান আংনা আগানেতজক, ‘জেনি সাক্কাও গিসিক রংথালগিবাখো হং·ওনবাখো নিকনুয়া, বিয়ান উয়া জেআন গিসিক রংথালগিবাও রিপ্পলেতনুয়া।’

³⁴ আংআ উখো নিকজক আরো সাক্ষি হ·ন্নিংজক, ইয়ান ইসলনি দেফান্থি হং·আ।”

জা·রিকগিবারাংখো রা·চাকা

³⁵ উনি সাল সাও ফি·ল্লে উয়া হা·দামও যোহন আরো বিনি জা·রিকগিবা সাকগ্মি দংআমিং।

³⁶ উনো যীশুখো রামা রি·য়াংআখো নিক্কে যোহন আগানজক, “হাইওয়া নিবো, ইসলনি মেষ বি·সাখো।”

³⁷ যোহননি ইন্দাকে আগানাখো খিন্নাএ উয়া জা·রিকগিবা সাকগ্মি যীশুখো জা·রিকফানা হা·বাচেংজক।

³⁸ যীশু হান·ফিলে বিসংনি জা·রিকবাখো নিক্কে আগানজক, “না·সং মুয়াখো সান্দিংআ?” যোহননি জা·রিকগিবারাং সিং·জক, “রব্বি (ফি·ওদে স্খিগিবা), না·আ বানো দংআ?”

³⁹ যীশু বিসংনা আগানজক, “রি·বাএ নিবো।” উনোন বিসং রি·য়াংএ যীশুনি দংগিবা হা·দামখো নিজক আরো উনসালো বিমুংআন দংজক। উনো ঘণ্টা ব্রি হং·না হা·ম্মিংজকমিং।

⁴⁰ যোহননি আগানাখো খিন্নাএ জে সাকগ্মিগিবা যীশুখো জা·রিকামিং বিসংনি সাকসানি বিমুং আন্দ্রিয়মিং। বিয়া শিমোন-পিতরনি জংগিবা হং·আমিং।

⁴¹ আন্দ্রিয় স্খাং বিনি আদাথাং শিমোনখো সান্দিয়ে রা·জক আরো আগানজক, “চিংআ মশীহখো (ফি·স্খাওদে খ্রীষ্টখো) নিকজক।”

⁴² আন্দ্রিয় শিমোনখো যীশুচা রিমবাজক। যীশু শিমোনচাখো নিএতি আগানজক, “না·আ যোহননি দেফান্থি শিমোন, ইন্দিবা নাং·খো কৈফা মিংনুয়া।” ইনি অর্থ পিতর, ফি·স্খাওদে রং·থি হং·আ।

⁴³ উনি সাল সাও যীশু গালীল হা·দকচা রি·য়াংনা চানচিজক। উনো যীশু ফিলিপখো মা·ন্নে বিনা আগানজক, “রি·বাবো, আংখো জা·রিকফাবো।”

⁴⁴ ফিলিপ বৈৎসৈদা সংনি মান্দিমিং। আন্দ্রিয় আরো পিতরবা উয়া সং আপসাননি মান্দি হং·আমিং।

⁴⁵ ফিলিপ নথনেলখো সান্দিয়ে রা·এ আগানজক, “মোশি জেনি খাৎথাখো নিয়ামরাংও চক্কে দন্নাংজক আরো জেনি গিম্মিন আগানসোগিবারাংবা চকসোজক বিখো চিংআ নিকজক। বিয়া যোষেফনি দেফান্থি যীশু, নাসরত সংনি মান্দি হং·আ।”

⁴⁶ নথনেল ফিলিপনা আগানজক, “নাসরতওনি নাম্মা মামুংবা রি·বানা মা·ন্নামা?” ফিলিপ বিনা আগানজক, “রি·বাএ নিবো।”

⁴⁷ যীশু নথনেলখো আন·থাংচানা রি·বাখো নিক্কে বিনি গিম্মিনো আগানজক, “হাইওয়া নিবো, ইস্রায়েলনি সাকসা খাকখেৎগিবা মান্দি। বিনি গিসিকো বু·আ দংজা।”

⁴⁸ নথনেল যীশুখো সিং·জক, “না·আ বাদিকে দাক্কে আংখো হা·আইজক?” যীশু বিনা আগানচাকজক, “ফিলিপ নাং·খো রিক্কামনা স্খাং নাং·নি ডুমুর বিফাংনি কক্ষুমাও দংমিত্তিংওন আংআ নাং·খো নিক্কামিং।”

⁴⁹ উনি গিম্মিন নথনেল যীশুনা আগানজক, “স্খিগিবা, না·আন ইসলনি দেফান্থি, না·আন ইস্রায়েলনি রাজা হং·আ।”

⁵⁰ যীশু বিনা আগানজক, “নাং·খো উয়া ডুমুর বিফাংনি কক্ষুমাও নিক্কামিং, ইখো আগানানি গিম্মিন বিবিরা·আমা? ইনাবাত্তেবা দাল·বাৎগিবা হং·গিবারাংখোন না·আ নিকনা মা·ন্নুয়া।”

⁵¹ জা·মানো যীশু আগানজক, “আংআ না·সংনা বিবিন আগানিংআ, না·সং সালগিখো ফ্রাকাখো নিকনুয়া, আরো ইসলনি সা·গ্রেরাংখো মান্দিনি দেফান্থিওনি চাখাতাখো আরো বিচানা হং·ওনবাখো নিকনুয়া।”