যাকোব 2 - Garo New Testament

দিমদাকখো আপসান দাক্কে নিবো

¹ আংনি জংআদারাং, না·সং আনচিংনি রাসংনি গিত্তেল যীশু খ্রীষ্টও বিবিরা·ওদে, দিমদাকখোন আপসান দাক্কে নিবো।

² না·সংনি থরম নক্কো সাকসা মান্দি নিথুয়া বা·রাচলাখো চিন্নে-গান্নে আরো জাক্কো সোনানি আংটিখো গান্নে রি·বাজক; দা·আবা দা·আও সাকসা দিলগিবা মান্দিবা খেন্থাসুরি বা·রাচলাখো চিন্নে রি·বাজক ইন্নে চানচিচিপবো।

³ উনো না·সং নিথুয়া বা·রাচলা চিনগিবা মান্দিখো নাম্মেন মান্দিরা·এ ইন্নোদে, “না·আ ইয়া নামবাৎগিবা হা·দামও আসংবো,” আরো উয়া দিলগিবা মান্দিখো, ‘‘না·আ হাইওয়ানো চাদেংবো’’ বা ‘‘ইনো আংনি জা·চকনি কেচ্ছিয়োনা আসংবো” ইন্নোদে,

⁴ ইন্দাকোদে না·সং আন·থাংথাংওন চন্না-দা·ল্লা দাক্কে মা·আতাখো রা·বাজামা আরো নামগিজাখো মিকসংএ বিচাল দাকজামা?

⁵ খিন্নাবো, আংনি খা·সাগিবা জংআদারাং। ইয়া হা·গিলসাকনি মিক্রোনও দিল্লা-চন্না মান্দিরাংখো ইসল বিবিরা·আও মা·ন্নে চা·গিবা হং·না বাচ্ছিয়ে রা·জামা? জেরাং ইসলনা খা·বাকা উরাংখো বিয়া জে সংনকখো র·ন্নুয়া ইন্নে খু·রাচাক্কামিং, উয়া সংনকখো মান·রিকনাবা ইসল বিসংখোন বাচ্ছিয়ে রা·জামা?

⁶ ইন্দাকোবা উয়া দিলগিবা মান্দিরাংখোন না·সং চন্নিকজক। ইন্দিবা মা·ন্নে চা·গিবারাং না·সংখো দুক রন·জামা? আরো না·সংখো বিচাল দাকগিবা নকচানা সাল্লে রা·আংজামা?

⁷ জেনি বিমুং গিত্তা না·সংখো রিক্কামা মা·ন্নে চা·গিবারাং উয়া মান্দিরা·আনি বিমুংখো জিজামা?

⁸ রংথালগিবা শাস্ত্রও চক্কা দংআ, “নাং·নি সংসুল নকসুলখো আন·থাং গিত্তা খা·সাবো।’’ না·সং বিবিন ইয়া নিয়াম গিত্তা রি·ওদে, না·সং নাম্মাখোন দাক্কিংজক।

⁹ ইন্দিবা না·সং দিমদাকখো আপসান দাক্কে নিজাওদে না·সং পাপখো দাক্কিংআ। উনো ইয়া নিয়ামান না·সংখো নিয়াম ফি·গিবা ইন্নে না·সংনি গ্রোখো রি·ম্মা।

¹⁰ সাবা নিয়াম দিমদাকখো মানিয়ে গি·সা মাংমাং নিয়ামখো ফি·ওদে বিয়া দিমদাক নিয়ামরাংখোন ফি·গিবা ইন্নানি হং·আ।

¹¹ জেআন আগানা, “দা·আ স·বাকা,” উয়ান দা·আবা আগানা, “দা·আ স·ওতা।” ইন্দাকোদে না·সং স·বাকগিজা স·ওতোদে না·সং নিয়াম ফি·গিবা হং·জামা?

¹² জে নিয়াম মান্দিখো জক্কেতা উয়া নিয়ামচা জেরাংখো বিচাল দাকনুয়া, উরাং গিত্তান আগানবো আরো দাকবো;

¹³ মুয়ানা জে খা·সাচাকজা, বিচালনি সালো বিয়াবা খা·সাচাক্কাখো মান·জানুয়া। বিচালনি সাক্কাও খা·সাচাক্কা হাম্মা।

কামচা বিবিরা·আখো ফিন্নিকবো

¹⁴ আংনি জংআদারাং, আন·থাংও বিবিরা·আ দংআ ইন্নে সাবা আগানোদে ইন্দিবা কামচা উখো ফিন্নিকজাওদে, উয়ো মুয়া লাভ দংআ? উয়া বিবিরা·আ বিখো পাপনিখো জক্কেৎনা মা·ন্নামা?

¹⁵ না·সংনি সানিবা জংআদানি বা ন-আবিনি নক্কো মামুং চা·আনিবা দংজা, গান্নানি বা·রারাংবা দংজা ইন্নে চানচিচিপবো।

¹⁶ উনো না·সংনি গিসেপো সাবা বিখো, ‘‘নাং·নি নামখানা, চা·এ রিংএ নাম্মে দংরিমবো” ইন্নোদে, ইন্দিবা বিনি নাংআনিরাংখো র·ন্নে দাকচাকজাওদে, বিনি মুয়া নাম্মানি হং·নুয়া?

¹⁷ ইন্দাকেন, জে বিবিরা·আও কাম দংফাজা, উয়া বিবিরা·দে সিগিবা হং·আ।

¹⁸ সাবা আগান্নাবা দংআ, ‘‘নাং·ও বিবিরা·আ দংআ আরো আংও নামগিবা কাম দংআ।’’ ইয়াদে নাম্মান। কামগ্রি নাং·নি বিবিরা·খো আংনা ফিন্নিকবো, আরো আংআ আংনি বিবিরা·আখো কামচা নাং·না ফিন্নিকনুয়া।

¹⁹ ইসল সাকসাসান দংআ ইন্নে না·আ বিবিরা·আ, হং·জামা? ইয়াদে নাম্মান! ইন্দিবা গিসিক নামগিজাগিবারাংবা বিখোদে বিবিরা·আ আরো থিল·থিলে খেন্না।

²⁰ আইয়াও জাদাস্রাং! কামগ্রি বিবিরা·আনি বিথি দংজা ইখো না·আ নিনা হা·ম্মিংআমা?

²¹ আনচিংনি ফাগিৎচাম অব্রাহাম জেনসালো বিনি দেফান্থি ইস্‌হাকখো গানচি সাক্কাও দন্নে বলি র·ন্নামিং, উনো উয়া কামনি গিম্মিন বিখো দোসগ্রি ইন্নে রা·চাকজামা?

²² না·আদে নিকনান মা·ন্নিংআ, বিনি বিবিরা·আমুং কামবা আপসান দংফা আরো বিনি কামআন বিনি বিবিরা·আখো চু·সকেতামিং।

²³ ইন্দাকে রংথালগিবা শাস্ত্রনি ইয়া খাৎথা চু·সকজক, “অব্রাহাম ইসলখো বিবিরা·আ আরো উনি হা·সেলো ইসল বিখো দোসগ্রি ইন্নে চানজক।” উনি গিম্মিন বিখো ইসলনি রিপ্পেং ইন্নে মিংজক।

²⁴ ইন্দাকোদে না·সং নিকনা মা·ন্নিংআ, বিবিরা·আনি গিম্মিন ইসল মান্দিখো দোসগ্রি ইন্নে চান্না ইয়াদে হং·জা, ইন্দিবা বিবিরা·আ আরো কাম দাক্কা ইয়া মিংগ্মিনি গান্দাসা ইসল মান্দিখো দোসগ্রি ইন্নে চান্না।

²⁵ আরো দারী রাহবখো বাদিকে দাক্কে দোসগ্রি ইন্নে চান্নামিং? বিয়া সিউল দাক্কে নিগিবা যিহূদীরাংখো থুম্মুয়ে দন্নানি জা·মানো গিপ্পিন রামা গিত্তা বিসংখো ওয়াত্তেতানি গিম্মিন বিখো দোসগ্রি ইন্নে চান্নামিং।

²⁶ জাংগিগ্রি বে·এন জেদাক্কে সিয়ানি হং·আ, উয়ান দাক্কে কামগ্রি বিবিরা·আবা সিয়ানি হং·আ।