যাকোব 1 - Garo New Testament

¹ আংআ ইসল আরো গিত্তেল যীশু খ্রীষ্টনি নকখল যাকোব, হা·গিলসাকনি দিমদাক হা·দকো বিলদিং বিলদাং দাক্কে দংগিবা যিহূদী জাতনি মা·চং চি·গ্মি মান্দিরাংনা সালাম র·ন্নিংআ।

বিবিরা·গিবারাংনি রুরাআ

² আংনি জংআদারাং, না·সং জেনসালো গিপ্পিন গিপ্পিন রুরাও গা·আকা উনো উখো নাম্মেন খুসি হং·আনি হা·সেল ইন্নে চানচিয়া,

³ মুয়ানা না·সং হা·আইয়া না·সংনি বিবিরা·আনি রুরাআ না·সংনি চাকচিকাখো বারিয়েতা।

⁴ উয়া চাকচিকাখো না·সংনি জাংগিও চু·সকে কাম দাকনা রন·বো, জেদাক্কে না·সং খাকখেৎগিবা হং·না মা·ন্না, আরো জেদাক্কে না·সংনি গিসিকো মামুংনান দিলজাখানা।

⁵ না·সংনি সানিবা হা·আইয়া হং·মানজাওদে বিয়া ইসলচা বি·খানা, উনোন ইসল বিনা উখো র·ন্নুয়া, মুয়ানা ইসল মামুংনাবা মা·নেংগিজা দিমদাকনান জাকস্রামে র·ন্না।

⁶ ইন্দিবা গিসিকো মামুংনা খেনচাকগিজা বিবিরা·এ বিখো ইসলচা বি·না নাংনুয়া, মুয়ানা গিসিকো জাজাওদে বিয়া বালওয়ানা ফক্‌ফেক্‌গিবা সাগালনি চি ফক্‌ফেকারাং গিত্তা হং·আ, বালওয়ান উখো স্ফাকে রা·আংআ।

⁷ ইন্দাকগিবা মান্দিদে ইসলচাখো মামুংখোবা মা·ন্না খা·দংজাখানা।

⁸ বিয়াদে গিসিকো জাজাগিবা মান্দি হং·আ আরো আন·থাংনি দিমদাক কামওন থম·থমজা।

⁹ দিলগিবা জংআদা জে ইসলো বিবিরা·আ বিখো ইসল চুবাত্তাও দন্না ইন্নে বিয়া আন·থাংখো রাসং দাকখানা।

¹⁰ আরো জে মা·ন্নে চা·আ, ইসল বিখো রিন্নকেতা ইন্নে বিয়াবা আন·থাংখো রাসং দাকখানা, মুয়ানা সামচেংরাংনি বিবাল গিত্তা বিয়াবা সিনা নাংনুয়া।

¹¹ সাল দিং·বিয়ে নাবাওন উয়া সামচেং সিক্রেপা, বিবালরাং রুরংএ গা·আকা আরো উরাংনি নিথুয়াবা ব·ন্নাংআ। মা·ন্নে চা·গিবাবা উগিত্তান বিনি কাম খা·মিত্তিংরাংওন ব·ন্নাংনুয়া।

¹² রুরানি সালো জে চাকচিকা বিয়ান ফাত্তিয়া মান·গিবা হং·আ, মুয়ানা আন·থাংখো দিমদাক রুরাও হামগিবা দাক্কে ফিন্নিকনা মা·ন্নোদে হাম্মানি মালা গিত্তা বিয়া জাংগিখো মা·ন্নুয়া। জেরাং ইসলনা খা·সাআ বিসংনা বিয়া ইয়া জাংগিখো র·ন্নুয়া ইন্নে খু·রাচাক্কা।

¹³ গিসিকো পাপ দাকনা হা·সিকোদে সাবা আগানজাখানা, “ইসল আংখো পাপনি রামাওনা সাল্লাংআ।” মামুং নামগিজান ইসলখো পাপনি রামাওনা সালবানা মান·জা, আরো ইসলবা দারাংখো পাপনি রামাওনা সালবাজাংআ।

¹⁴ মান্দিনি গিসিকনি হা·সিকান মান্দিখো পাপচানা সাল্লাংআ আরো জা·গাওনা গাল্লা।

¹⁵ গিসিকো হা·সিকারাং গাপজকোন পাপখো হং·এতা আরো পাপ গাপজকোন সিয়াখো হং·এতা।

¹⁶ আংনি খা·সাগিবা জংআদারাং, দা·আ গুয়ালা।

¹⁷ জাংগিনি দিমদাক নিথোগিবা আরো নামবাৎগিবা র·ন্নানিরাং সালগিচানি রি·বাআ; আরো উয়া ইসলচানি রি·বাআ, বিয়ান গিম্মিক থেং·সুয়ানি ফাগিবা হং·আ। বিয়া থম·থমগিজাগিবা জাগ্রিং গিত্তা দাকফিল্লে রি·য়াংজা।

¹⁸ বিনি আন·থাংনি হা·সিকাচা বিবিনি খাৎথা গিত্তা বিয়া আনচিংখো বিনি দেদ্রাং থারিজক, জেদাক্কে আনচিং বিনি থারিগিবা বস্তুরাংনি গিসেপো স্খাং নাংগিবা বিথি গিত্তা হং·না মা·ন্না।

খিন্নাএ উয়ানদাক্কে কাম দাকবো

¹⁹ আংনি খা·সাগিবা জংআদারাং, আংনি ইয়া খাৎথাখো গিসিক রা·বো-না·সং দিমদাকান খিন্নানা গং·রাকগিবা হং·বো, ইন্দিবা থেংরি থেংরি দাক্কে খাৎথা আগান্না বা খা·আওনাংনা দা·আ গং·রাকাবো;

²⁰ মুয়ানা ইসল আনচিংচাখো জেদাক্কে রংথালগিবা জাংগিখো হা·ম্মা উয়া খা·আওনাংআ গিত্তা রি·বাজা।

²¹ ইনি গিম্মিন না·সংও দংগিবা রংথালগিজা আরো নামগিজাগিবা দিমদাকখোন ওয়াতবো। ইসলনি খাৎথানি জে বিৎচ্রিখো না·সংনি খা·থংও গি·মানজক, উখো গিসিক রিন্নকে রা·চাকবো। পাপনিখো না·সংখো জক্কেতানি বিল ইয়া খাৎথাওন দংআ।

²² ইন্দিবা ইসলনি খাৎথাখো খিন্নারিওন হং·জানুয়া, উগিত্তা কামবা দাকনা নাংনুয়া। না·সং ইসলনি খাৎথাখো খিন্নাইমিংনা উগিত্তা কাম দাকজাওদে আন·থাংথাংখোন থগিয়ানি হং·আ।

^23-24 জে উয়া খাৎথাখো খিন্নারিয়া ইন্দিবা উগিত্তা কাম দাকজা বিয়াদে ইন্দাকগিবা মান্দি গিত্তা হং·আ, জে আন·থাংনি মিকখাংখো জানিরাও নিক্কে রি·য়াংআরিবা উনোন উখো গুয়ালারিয়া।

²⁵ ইন্দিবা মান্দিখো জক্কেৎনা জে চু·সকগিবা নিয়াম দংআ উখো নাম্মে গিসিক নাংএ নিগিবাদে উয়া নিয়ামখো খিন্নারিন গুয়ালগিজা বাত্তেসা উগিত্তা কামখোবা খা·আ। ইন্দাকে বিয়া আন·থাংনি কামরাংনি গিম্মিন ফাৎথিয়াখো মা·ন্না।

²⁶ সাবা আন·থাংখো থরম দাকগিবা ইন্নে চানচিওদে ইন্দিবা আন·থাংনি স্রিবাক্‌খো সিমসাকে রা·রিকজাওদে বিয়া আন·থাংখো থগিয়া। উনো বিনি থরম দাক্কারাং বু·আনি হং·আ।

²⁷ রান্দি আরো ফাগ্রি-মা·গ্রিরাংখো দুকনি সালো নিরকখিয়া আরো হা·গিলসাকনি নামগিজারাংনিখো আন·থাংখো গ্রো নাংএতগিজা নাম্মে দাক্কে রাক্ষিয়ান আপফা ইসলনি মিক্রোনও খাকখেৎ হং·গিবা আরো বিবিগিবা থরম হং·আ।