ইব্রীয়রাংনা 8 - Garo New Testament

যীশুআন গিত্তাল নিয়ামনি খামাল দাল·বাৎগিবা হং·আ

¹ চিংআ জেখো আগানিংআ উনি চং·মত খাৎথা ইয়ান, আনচিংনি ইন্দাকগিবা সাকসা খামাল দাল·বাৎগিবা দংআ জেআন সালগিও চুবাৎগিবা ইসলনি সিংহাসননি জাক্রাচা আসংজক।

² বিয়া রংথালবাৎগিবা হা·দামও, আগানস্খাওদে চং·মত অলাখিয়ানি-তাম্বুও ইসলনা দাকচাকে হ·ন্নিংজক। উয়া অলাখিয়ানি-তাম্বুখো মান্দি থারিজা, উখো গিত্তেলান থারিজক।

³ গিম্মিক খামাল দাল·বাৎগিবারাংখো মাৎবুরুংরাংখো বলি হ·ন্না আরো গিপ্পিন জিনিসরাংখো বলি হ·ন্না দন্না, উনি গিম্মিন ইয়া খামাল দাল·বাৎগিবানিবা মামুংখো বলি হ·ন্না নাংআ।

⁴ ইন্দিবা বিয়া দা·আও ইয়া হা·গিলসাকো দংওদে খামাল হং·না মান·জানুয়ামিং, মুয়ানা ইয়ো নিয়াম গিত্তা বলি হ·ন্নাদে খামাল দংআন।

⁵ খামাল গিত্তা বিসংনি ইয়া কাম সালগিনি কামনি গি·সা নমুনা আরো জাগ্রিংসান হং·আ। উনি গিম্মিন জেনসালো মোশি উয়া অলাখিয়ানি তাম্বুখো থারিনা রি·য়াংআমিং উনো ইসল ইখো আগানে মোশিখো সিমসাকেতামিং, “সিনাই হা·ব্রিনি সাক্কাও নাং·না জে নমুনাখো ফিন্নিকজক উগিত্তান গিম্মিক থারিয়া হং·খানা উখো নিবো।”

⁶ ইন্দিবা দা·আও আনচিং নিক্কিংআ, যীশু খামাল হং·আনি জে কামখো মান·জক উয়াদে উয়া খামালরাংনি কামনা বাত্তেবা বাং·এন দাল·বাতা, জেগিত্তা জে খু·রাচাক্কানি বিয়া নাংরিমেতগিবা হং·জক উয়া খু·রাচাক্কা স্খাংনি খু·রাচাক্কানা বাত্তেবা বাং·এন দাল·বাতা; মুয়ানা ইয়া খু·রাচাক্কা আরোবা নামনামগিবা খু·রাচাক্কাও ফাংচাকা।

⁷ স্খাংনি খু·রাচাক্কা খাকখেৎ হং·ওদে গ্মিগিবা খু·রাচাক্কা নাংজানুয়ামিং।

⁸ ইন্দিবা ইসল বিনি মান্দিরাংনি দোসখো ফিন্নিকনা রংথালগিবা শাস্ত্রও আগানজক: গিত্তেল আগানা, “সাল সকবাংজক জেনসালো আংআ ইস্রায়েল আরো যিহূদানি মান্দিরাংনা গি·সা গিত্তাল খু·রাচাক্কাখো থারিনুয়া।

⁹ মিসর হা·সংওনি বিসংনি ফাগিৎচামরাংখো আংআ জাকখো রি·ম্মে রং·খাতি রা·বামিত্তিংও বিসংনা জে খু·রাচাক্কাখো হ·ন্নামিং ইয়া গিত্তাল খু·রাচাক্কা উয়া খু·রাচাক্কা গিত্তা হং·জানুয়া। বিসং আংনি উয়া খু·রাচাক্কা গিত্তা রি·জাজক ইন্নে আংআ বিসংচা গিসিক হন·জা।” গিত্তেল ইখো আগানা।

¹⁰ গিত্তেল আরোবা আগানা, “জা·মানো আংআ ইস্রায়েলরাংনা জে খু·রাচাক্কাখো হ·ন্নুয়া উয়া হং·জক, আংনি নিয়ামখো আংআ বিসংনি গিসিকো দন্নুয়া আরো বিসংনি খা·থংওবা উখো চক্কে দন্নুয়া। আংআ বিসংনি ইসল হং·নুয়া আরো বিসং আংনিন মান্দি হং·নুয়া।

¹¹ নকসুলথাংখো আরো জংথাংখো দারাংবা ইখো আগানে স্খিএতজানাজক, ‘গিত্তেলখো হা·আইনা স্খিবো,’ মুয়ানা গিম্মিকান আংখো হা·আইনুয়া।

¹² উনি গিম্মিন আংআ বিসংনি অন্যায়খো ক্ষেমা দাকনুয়া, বিসংনি পাপখো আর মামুং সালোবা গিসিক রা·রিকজানুয়া।”

¹³ ইসল ইয়া খু·রাচাক্কাখো গিত্তাল আগানে স্খাংনি খু·রাচাক্কাখো গিৎচাম ইন্নে চলিগিজা দাক্কে গালজক। জেআন গিৎচাম আরো বাং·আ সালনি ইন্নে নাসিয়াংজক উয়া থেংরিন ব·ন্নাংনুয়া।