ইব্রীয়রাংনা 6 - Garo New Testament

¹ ইনি গিম্মিন খ্রীষ্টনি বিদিংও স্খাং জে স্খিয়াখো মান·জক, হাই, উখো বাত্তাংএ আনচিং চু·সকাওনা সক্কাংনা। বিথিগ্রি কামওনি গিসিক ফি·ল্লেতা, ইসলনি সাক্কাও বিবিরা·আ,

² দিংথাং দিংথাং রিপ্পলানি বিদিংও স্খিয়া, জাক দনদাপা, সিগিবারাংনি থাংচাআ আরো ফাংনাজলনি শাস্তি-ইন্দাকগিবা হা·বাচেংআনি খাৎথারাংখো রা·এ আনচিং জেদাক্কে দা·আবা গিত্তাল দাক্কে ফাংচাকানিখো রিকফিলজা।

³ ইসল হ·ন্নোদে আনচিং চু·সকনুয়া;

⁴ মুয়ানা জেরাং রাং·সা সেং·আখো নিকজক, সালগিনি হ·ন্নানি থোআখো আরো গিসিক রংথালগিবাখো মান·জক,

⁵ ইসলনি খিন্নাথোগিবা খাৎথানি থোআখো মান·জক আরো জে চাসং রি·বাংজক উনি বিলনি বিদিংও হা·আইজক,

⁶ আরো উনি জা·মানো খ্রীষ্টওনি ফি·ল্লে রি·য়াংজক, বিসংখো দা·আবা গিত্তাল দাক্কে গিসিক ফি·ল্লানি রামাও রিমবানা মান·জা। ইয়াদে হং·না মান·জা, মুয়ানা বিসং আন·থাংআন ইসলনি দেফান্থিখো দা·আবা চিসলো দাৎখাপিংজক আরো গিম্মিকনি মিকখাংও বিখো মান্দিরা·জাংজক।

⁷ জে হা·আ জেম·জেম মিকখানি চিখো চা·চিপে হা·বা গামগিবারাংনি নাংগিবা সামবিজাকরাংখো চাএতা উয়া হা·আ ইসলনি ফাত্তিয়াখো মা·ন্না।

⁸ ইন্দিবা জে হা·আ বুসুগ্রিম আরো বিদুরাংখো চাএতা উয়া হা·আ কামনা চলিজা আরো উয়ো শাপ গা·আকানি খেন্না দংআ। বন·চতাও মান্দিরাং উখো সো·এ গাল্লা।

⁹ খা·সাগিবা রিপ্পেংরাং, চিংআ ইন্দাকা খু·সুকরাংখো আগানিংআ ইন্দাকোবা চিংআ বিবিরা·আ, না·সংনি অবস্থা উয়ানদাক্কে দাকজা; পাপওনি জক্কানি বিথিখো না·সংনি জাংগিও নিকনা মা·ন্নিংআ।

¹⁰ ইসল খাকখেৎ বিচাল দাকগিবা হং·আ; ইনি গিম্মিন না·সংনি কামখো আরো বিনি মান্দিরাংনা দাকচাকে হ·ন্নে না·সং বিনা জে খা·সাখো ফিন্নিকজক আরো ফিন্নিকিংজক, উখো বিয়া গুয়ালজানুয়া।

¹¹ চিংআ হা·ম্মা, না·সং দিমদাকান জেদাক্কে বন·চতানা দিপ্পাৎ আপসান হা·সিকাখো ফিন্নিকা। উনোদে না·সং চু·গিম্মিক দাক্কে না·সংনি খা·দংআ চু·সকনুয়া ইন্নে দংনুয়া।

¹² না·সংনি আলসিয়া হং·আখো চিংআ হাম·জা; চিংআ হা·ম্মা, জেরাং বিবিরা·আচা আরো নাম্মেন চাকচিকাচা ইসলনি খু·রাচাকগিবা ফাত্তিয়াখো মান·রিকা না·সং বিসং গিত্তা হং·বো।

ইসলনি খু·রাচাক্কা বিবিন হং·আ

¹³ জেনসালো ইসল অব্রাহামচা খু·রাচাক্কামিং উনো বিয়া আন·থাংনি বিমুংওন মিকচেতামিং, মুয়ানা বিনা বাত্তে দাল·বাতা সাকসাবা দংজা জেনি বিমুংও বিয়া মিকচেতনা মা·ন্না।

¹⁴ বিয়া ইখো আগানে খু·রাচাক্কামিং, “আংআ নাং·না ফাত্তিনুয়া আরো নাং·নি মা·চংখো জাল্লেতনুয়া।”

¹⁵ ইনি গিম্মিন অব্রাহাম জে সময়ও নাম্মেন চাকচিকজক উনো ইসল জেখো হ·ন্না খু·রাচাক্কামিং উখো বিয়া মান·জক।

¹⁶ আন·থাংনা বাত্তে জেআন দাল·বাৎগিবা হং·আ বিনি বিমুংওন মান্দিরাং মিকচেতা। উনোদে উয়া মিকচেতা ইয়া মিকসকাখো হ·ন্না, জেখো আগানা হং·জক উয়া বিবি হং·আ, আরো ইনি হা·সেল গিম্মিক গোলমালরাং ব·ন্নাংআরিয়া।

¹⁷ ইসল জেখো হ·ন্না খু·রাচাক্কামিং, জেরাং উখো মা·ন্নুয়া বিসংনা বিয়া ইয়া মিকচেতাও নাম্মেথাল্লে ফিন্নিকনা হা·ম্মামিং, বিয়া জেখো থিক দাকজক উয়াদে আরবা দিংথাং হং·জাংআ। ইনি গিম্মিন বিয়া মিকচেতাচা ইখো ফিন্নিকজক, বিয়া জেখো থিক দাকজক উয়াদে হং·নুয়ান হং·নুয়া।

¹⁸ ইসলনি খু·রাচাক্কা আরো মিকচেতা মামুং সালোবা দিংথাং হং·জা। ইসল, জেআন বু·এ আগান্না মান·জা, বিয়ান ইখো খু·রাচাকজক আরো মিকচেতজক, জেদাক্কে আনচিংনি মিকখাংও জে খা·দংআ দংআ উখো রিম·না ইন্নে খাতনা রি·য়াংএ আনচিং নাম্মেন খা·দংএতাখো মা·ন্না।

¹⁹ ইয়া খা·দংআ আনচিংনি জাংগিও সিলথিন গিত্তা চং·মত আরো খেম·খেম হং·আ, আরো উয়া রংথালবাৎগিবা হা·দামনি পর্দানি ফিল·সাচা, আগানস্খাওদে ইসলনি মিকখাংচা রি·য়াংএ সক্কা।

²⁰ যীশুআন আনচিংনি হং·এ আনচিংনা স্খাং উয়া হা·দামচানা রি·য়াংজক। বিয়া ফাংনাজলনা মল্কীষেদক গিত্তা দাক্কে খামাল দাল·বাৎগিবা হং·জক।