ইব্রীয়রাংনা 2 - Garo New Testament

পাপওনি জক্কানি বিদিংও সিমসাকেতা

¹ ইনি গিম্মিন আনচিং জেখো খিন্নাজক উখো মানিনা আনচিংনি আরোবা গিসিক হ·ন্না নাংআ, জেদাক্কে উয়োনি আনচিং চে·ল্লাচানা জিত্তাংজা।

² সা·গ্রেরাংচা জে খাৎথাখো আগানামিং উনি মামুংবা দিংথাং হং·খুজা; ইনাআগ্রেবা জেআন ইসলনি গি·য়েতাখো মানিজাজক আরো বিনি খাৎথাখো খিন্নানা হাম·জা বিয়া বিনি শাস্তিখো মান·জক।

³ ইন্দাকোদে পাপওনি জকনা ইসল ইন্দাকা দাল·বাতা নিয়ামখো দাকজক উখো আনচিং চন্নিকোদে বাদিকে দাক্কে আনচিং জকনুয়া? পাপওনি জক্কানি খাৎথাখো স্খাং গিত্তেল যীশুআন আগানামিং আরো জেরাং উখো খিন্নামিং বিসং আনচিংচা উয়া জক্কানি বিবিখো ফিন্নিকজক।

⁴ উমুং ইসলবা বাং·আ চিনরাংখো আরো আইয়াও ইনমানানি আরো বিলনি কামচা আরো আন·থাংনি হা·সিকা গিত্তা গিসিক রংথালগিবানি হন·গিবা হ·ন্নানিচা উনি গিম্মিনো সাক্ষি হন·জক।

যীশুআন পাপওনি জক্কেতা

⁵ রি·বাগিবা চাসংনি জে হা·গিলসাকনি খাৎথাখো চিংআ আগানিংজক, ইসল উখো সা·গ্রেরাংনি নিং·আও দনজা।

⁶ রংথালগিবা শাস্ত্রও মিংসা হা·দামও সাবা ইয়া খাৎথাখো আগানে সাক্ষি হন·জক: মান্দি মুয়া, না·আ বিনি গিম্মিনো চানচিয়া? মান্দিনি বি·সাবা মুয়া, না·আ বিচা গিসিক হ·ন্না?

⁷ না·আ মান্দিখো সা·গ্রেরাংনা বাত্তে অকখিসা চন্নেতজক। রাজানি মুকুট গিত্তা না·আ বিনা রাসংখো আরো মান্দিরা·আখো হন·জক,

⁸ আরো বিনি জা·চক নিং·আও গিম্মিকখো দনজক। জেনসালো ইসল গিম্মিকখোন মান্দিনি নিং·আও দনজক উনো বিয়া মামুংখোন উয়োনিখো গালজাজক। গিম্মিকখোন আনচিং দা·আও মান্দিনি নিং·আও নিকনা মা·ন্নিংআ ইন্দাকেদে হং·জা,

⁹ ইন্দিবা যীশুখোদে আনচিং নিকনা মা·ন্নিংআ। বিখো সা·গ্রেরাংনা বাত্তে অকখিসা চন্নিকেতামিং, জেদাক্কে ইসলনি খা·সাচাক্কাও গিম্মিক মান্দিনি হং·এ বিয়া আন·থাংআন সিচাকনা মা·ন্না। বিয়া দুকখো চাক্কে সিয়ামিং ইন্নে হাম্মানি মালা গিত্তা রাসং আরো মান্দিরা·আখো বিনা হন·জক।

¹⁰ গিম্মিক ইসলনি গিম্মিনান আরো গিম্মিক বিচান হং·আ। উনি গিম্মিন বাং·আ দেদ্রাং বিনি রাসংনি বাকখো মান·রিকফাখানা ইখো মিকসংএ জক্কানি ফাংচাকগিবা যীশুখো দুক চাক্কাচা চু·সকেতা ইসলনা থিক কামআন হং·আ।

¹¹ জেআন মান্দিরাংখো রংথালেতা উয়া যীশু আন·থাংআন আরো জেরাংখো বিয়া রংথালেতা উয়া মান্দিরাং গিম্মিকান ইসলনি নকনি মান্দি হং·আ। ইনি গিম্মিন যীশু উয়া মান্দিরাংখো জংআদা ইন্নে রিক্কামনা খ্রাচা·জা।

¹² রংথালগিবা শাস্ত্রও বিয়া ইসলনা আগানা, “জংআদারাংচা আংআ নাং·নি বিদিংও আগানফ্রাকনুয়া আরো মন্ডলীও নাং·খো মিৎথেলে গিত রিং·নুয়া।”

¹³ যীশু দা·আবা আগানা, “আংআ ইসলনি সাক্কাও ফাংচাকনুয়া।” আরো দা·আও মিংসা হা·দামও বিয়া আগানা, “ইয়া নিবো, আংআ আরো উয়া দেদ্রাং জেরাংখো ইসল আংনা হন·জক।”

¹⁴ উয়া দেদ্রাং বে·এন-হান·চিনি মান্দি হং·আ। উনি গিম্মিন যীশু আন·থাংবা বে·এন-হান·চিনি মান্দি হং·জক, জেদাক্কে সিয়ানি বিল জেনি জাক্কো দংআ উয়া শয়তানখো বিয়া আন·থাংনি সিয়াচা বিলগ্রি দাক্কা,

¹⁵ আরো সিনা খেন্নে জেরাং নকখল গিত্তা জাংগি মিৎথাংজক বিসংখো জক্কেতা।

¹⁶ যীশু সা·গ্রেরাংনা দাকচাকজা, বাত্তেসা অব্রাহামনি দেরিচ্ছু-সু·রিচ্ছুরাংনান বিয়া দাকচাকা।

¹⁷ উনি গিম্মিন যীশুখো গিম্মিক গিত্তান বিনি জংরাং গিত্তা হং·না নাংজক, জেদাক্কে বিয়া সাকসা খা·সাচাকগিবা আরো বিবিগিবা খামাল দাল·বাৎগিবা গিত্তা ইসলনা দাকচাকে হ·ন্না মা·ন্না। ইখো মিকসংএ ইন্দাকে হং·আ, জেদাক্কে বিয়া আন·থাংনি সিয়াচা মান্দিনি পাপখো হা·রিকে ইসলখো খুসি দাক্কা।

¹⁸ বিয়া আন·থাংআন রুরাআখো চাক্কে দুক চাক্কামিং ইন্নে জেরাং রুরানি মিকখাংও চাদেংআ বিসংনা বিয়া দাকচাকনা মা·ন্না।