গালাতীয়রাংনা 3 - Garo New Testament

বিবিরা·আনি গিম্মিন বা নিয়ামনি গিম্মিন?

¹ ও হা·আইচাকগিজা গালাতীয়রাং! সা না·সংখো যাদু মনতল দাকজক? যীশু খ্রীষ্টখো চিসলো দাৎখাপামিং ইখো না·সংচা নাম্মেদাক্কেন আগানফ্রাকজক।

² আংআ না·সংচাখোসান হা·আইনা হা·ম্মা, না·সং নিয়ামখো মানিয়ে গিসিক রংথালগিবাখো মা·ন্নামিংমা, নাম্মা খাৎথাখো খিন্নাএ বিবিরা·এ মা·ন্নামিং?

³ না·সং ইন্দাকেন হা·আইচাকগিজাগিবা হং·আমা? গিসিক রংথালগিবাচা গিত্তাল জাংগি হা·বাচেংএ দা·আও আন·থাংনি খ্রেংআও চু·সকনা হা·ম্মিংআমা?

⁴ না·সং বু·এন ইন্দাকফিল্লে দুক চাকজকমা? না·সংনি উয়া দুক চাক্কা নাসিনাদা হং·জা ইন্নে আংআ খা·দংআ।

⁵ মুয়ানা ইসল গিসিক রংথালগিবাখো না·সংনা র·ন্না আরো না·সংনি গিসেপো ইন্দাকফিল্লে আইয়াও ইনমানগিবা কামখো দাক্কা উখো চানচিয়ে নিবো। নিয়ামখো না·সং মানিয়া ইন্নেন বিয়া ইরাংখো দাক্কামা, নাম্মা খাৎথাখো খিন্নাএ বিবিরা·জক ইন্নে দাক্কা?

⁶ অব্রাহামনি খাৎথাখো চানচিয়ে নিবো। রংথালগিবা শাস্ত্রও চক্কা দংআ, “অব্রাহাম ইসলনি খাৎথাখো বিবিরা·জক আরো উনি গিম্মিন ইসল বিখো দোসগ্রি ইন্নে রা·চাকজক।”

⁷ ইনি গিম্মিন ইয়া খাৎথাখো না·সং হা·আইএ দনবো, ইসলখো বিবিরা·গিবারাংসান অব্রাহামনি দেদ্রাং হং·আ।

⁸ রংথালগিবা শাস্ত্রও স্খাংআন চক্কা দংআমিং, বিবিরা·আনি গিম্মিনান গিপ্পিন জাতরাংখো ইসল দোসগ্রি ইন্নে রা·চাকনুয়া। অব্রাহামচা স্খাংআন ইয়া খাৎথাখো আগানে নাম্মা খাৎথাখো আগানামিং, “নাং·ওন গিম্মিক জাতরাং ফাত্তিয়াখো মা·ন্নুয়া।”

⁹ ইন্দাকোদে নিকনা মা·ন্না, ইসলখো বিবিরা·এ অব্রাহাম জেদাক্কে ফাত্তিয়াখো মা·ন্নামিং উয়ানদাক্কে উনি জা·মানোনি ইসলখো বিবিরা·গিবারাংবা উয়া ফাত্তিয়াখো মা·ন্নিংজক।

¹⁰ রংথালগিবা শাস্ত্রও চক্কা দংআ, “উয়া মান্দি শাপ মান·গিবা হং·আ, জেআন নিয়ামও চকগিবা গিম্মিক খাৎথাখো মানিজা।” ইন্দাকোদে নিকনা মা·ন্না, জেরাং নিয়ামখো মানিয়াও ফাংচাকা বিসং গিম্মিকনি সাক্কাও ইয়া শাপ দংআ।

¹¹ ইনা আগ্রে ইখোবা নাম্মেদাক্কে নিকনা মা·ন্নিংজক, নিয়ামখো মানিয়ানি গিম্মিন ইসল দারাংখোবা দোসগ্রি ইন্নে রা·চাকজা, মুয়ানা রংথালগিবা শাস্ত্রনি আগানা গিত্তা, “জেখো দোসগ্রি ইন্নে রা·চাকা বিয়া বিবিরা·আচান জাংগিখো মা·ন্নুয়া।”

¹² বাত্তেসা নিয়াম আগানা, “জে মান্দি নিয়াম গিত্তা রি·য়া বিয়া উয়োন জাংগিখো মা·ন্নুয়া।”

¹³ নিয়ামখো মানিজানি গিম্মিন জে শাপ আনচিংও দংআমিং, খ্রীষ্ট উয়া শাপখো আন·থাংনি সাক্কাও রা·এ আনচিংখো জক্কেৎজক। রংথালগিবা শাস্ত্রও ইয়া খাৎথা চক্কা দংআ, “জেখো ফাংও খাদিংদিয়া বিয়া শাপ মান·গিবা হং·আ।”

¹⁴ ইসল অব্রাহামনা জে ফাত্তিয়াখো র·ন্নামিং উয়া ফাত্তিয়াখো জেদাক্কে যীশু খ্রীষ্টও গিপ্পিন জাতরাংবা মা·ন্না, আরো আনচিং জেদাক্কে বিবিরা·আচা খু·রাচাকগিবা গিসিক রংথালগিবাখো মা·ন্না, উনি গিম্মিনান খ্রীষ্ট উয়া শাপখো আন·থাংনি সাক্কাও রা·আমিং।

নিয়াম আরো খু·রাচাক্কা

¹⁵ জংআদারাং, আংআ মিংসা রামরাম খাৎথাচা ইয়া বিদিংখো আগানে র·ন্নিংজক। রাং·সামাই মান্দিও মামুং চুক্তি থিক দাকমানোদে উয়া চুক্তিখো দারাংবা গালনা মান·জা বা উমুং মামুংখো রা·চাপনাবা মান·জা।

¹⁶ অব্রাহাম আরো বিনি দেরিচ্ছুরাংচা ইসল খু·রাচাক্কামিং। রংথালগিবা শাস্ত্র আগানজা, “দেরিচ্ছুরাংচা,” আগানস্খাওদে বাং·আ দেরিচ্ছুরাংচা, বাত্তেসা আগানা, “নাং·নি দেরিচ্ছুচা,” আগানস্খাওদে গি·সা বিৎচ্রিচা, আরো খ্রীষ্ট হং·জক উয়া বিৎচ্রিওনি।

¹⁷ আংনি খাৎথানি অর্থ হং·জক, ইসল অব্রাহামনি সময়ও খু·রাচাকগিবা গি·সা নিয়ামখো র·ন্নামিং। উনি বিলসি রিৎচাব্রি খলাৎচিনি জা·মানো নিয়ামখো র·ন্নামিং, ইন্দিবা ইনি হা·সেল স্খাংনি উয়া খু·রাচাক্কাখো গালজাজক; ইনি গিম্মিন বিনি খু·রাচাকগিবান দংআরিজক।

¹⁸ নিয়ামখো মানিয়াও ইসলনি ফাত্তিয়াখো মা·ন্না ফাংচাকোদে খু·রাচাক্কানি সাক্কাওদে ফাংচাকজা। ইন্দিবা ইসল খা·সাচাক্কে গি·সা খু·রাচাক্কা গিত্তা অব্রাহামখো ফাত্তিয়ামিং।

¹⁹ ইন্দাকোদে মুয়ানা নিয়ামখো র·ন্নামিং? মান্দিনি পাপ দাক্কানা ইসলনি খু·রাচাক্কামুং নিয়ামখো নাংরিমেতামিং। জেনি গিম্মিন ইসল খু·রাচাক্কামিং অব্রাহামনি উয়া দেরিচ্ছু রি·বাখুজানা দিপ্পাৎ নিয়ামখো র·ন্নামিং। সা·গ্রেরাংচা ইয়া নিয়ামখো রা·রিকে দন্নামিং।

²⁰ ইন্দিবা সাকসা নাংরিমেতগিবা দংওদে নাংজা; আরো ইসল সাকসাসান হং·আ।

²¹ ইন্দাকোদে নিয়াম ইসলনি দাকগিবা খু·রাচাক্কারাংনি সাক্কাও হং·আমা? হং·জাস্রাং। জাংগি র·ন্না মা·ন্না গিত্তা দাকগিবা নিয়ামখো ইসল র·ন্না মা·ন্নোদে উখো মানিয়াচা মান্দি ইসলনি রা·চাকনা খ্রাগিবা হং·না মা·ন্নুয়ামিং।

²² ইন্দিবা রংথালগিবা শাস্ত্র মান্দি গিম্মিকখো পাপনি হা·সেল দোসি ইন্নে থিক দাকজক, জেদাক্কে যীশু খ্রীষ্টখো জেরাং বিবিরা·আ বিসং বিসংনি উয়া বিবিরা·আনি গিম্মিন খু·রাচাকগিবা ফাত্তিয়াখো মা·ন্না।

²³ বিবিরা·আ রি·বানা স্খাং নিয়াম আনচিংখো রাক্ষিয়ে দন্নামিং আরো বিবিরা·আ ফারাকজা দিপ্পাৎ আনচিংখো চিপ্পে দন্নামিং।

²⁴ ইন্দাকোদে নিকনা মা·ন্না, খ্রীষ্টচা সকনা ইয়া নিয়ামান আনচিংখো রি·দিলগিবা হং·আ, জেদাক্কে বিবিরা·আচা আনচিংখো দোসগ্রি ইন্নে রা·চাকা।

²⁵ ইন্দিবা দা·আও বিবিরা·আ রি·বাজক ইন্নে আনচিং নিয়ামনি নিং·আও দংজাজক।

ইসলনি দেদ্রাং

²⁶ খ্রীষ্ট যীশুখো বিবিরা·আচা না·সং গিম্মিকান ইসলনি দেদ্রাং হং·জক,

²⁷ মুয়ানা না·সং জেরাং খ্রীষ্টও রিপ্পলজক, বা·রা গিত্তা দাক্কে না·সং খ্রীষ্টচা আন·থাংথাংখো ফিনদাপজক।

²⁸ যিহূদী আরো যিহূদী হং·গিজারাংও, নকখল আরো জাকগিত্তেল হং·গিবারাংও, মিচিক আরো মি·আসারাংও দিংথাংগ্রিকানি মামুং দংজা, মুয়ানা খ্রীষ্ট যীশুমুং নাংরিমে না·সং গিম্মিকান আপসান হং·জক।

²⁹ না·সং খ্রীষ্টনি হং·জক ইন্নে অব্রাহামনি দেরিচ্চুবা হং·জক। আরো ইসল জেখো র·ন্না অব্রাহামচা খু·রাচাক্কামিং না·সংবা উখো মান·রিকগিবা হং·জক।