গালাতীয়রাংনা 1 - Garo New Testament

¹ আংআ পৌল খ্রীষ্টনি সাকসা ওয়াত্তেতা হং·আ। ইয়া ওয়াত্তেতা দাক্কে সংআখো আংআ মান্দিচাখো বা মান্দিনি গিসেপো মান·জা, বাত্তেসা যীশু খ্রীষ্ট আরো ফাগিবা ইসল, জেআন খ্রীষ্টখো সিয়াওনি থাংচাএতামিং, বিসংচাখোন আংআ উখো মান·জক।

² আংআ আরো আংমুং দংফাগিবা বিবিরা·গিবা জংআদারাং, চিংআ দিমদাকান গালাতিয়া মন্ডলীরাংনা চক্কিংজক।

³ আনচিংনি ফাগিবা ইসল আরো গিত্তেল যীশু খ্রীষ্ট না·সংনা খা·সাচাকখানা আরো থম·থমাখো হন·খানা।

⁴ আনচিংনি ইসল আরো ফাগিবানি হা·সিকা গিত্তা খ্রীষ্ট আনচিংনি পাপনি গিম্মিন জাংগিথাংখো হন·চাকামিং, জেদাক্কে বিয়া দা·আওনি ইয়া নামগিজা হা·গিলসাকনি জাকনিখো আনচিংখো জক্কেৎনা মা·ন্না।

⁵ ফাংনাজলনা ইসলনি রাসং হং·খানা। আমেন।

নাম্মা খাৎথা মিংসা মা·মাংসান

⁶ খ্রীষ্টনি খা·সাচাক্কাও জেআন বিনি আন·থাংনি মান্দি হং·খানা না·সংখো রিক্কামামিং, না·সং ইন্দাকে থেংরিন বিখো ওয়াত্তে দিংথাং দাকগিবা নাম্মা খাৎথাচা না·সংনি গিসিক সকজক ইখো নিক্কে আংআ আইয়াও ইনমানিংজক।

⁷ আসলদে উয়া নাম্মা খাৎথান হং·জা। ইন্দাকোবা মিত্তাম মান্দি দংআ জেরাং না·সংখো থম·থমে দংনা রন·জাংআ, আরো খ্রীষ্টনি নাম্মা খাৎথাখো দিংথাংএতনা হা·ম্মিংআ।

⁸ ইন্দিবা জে নাম্মা খাৎথাখো চিংআ না·সংনা আগানফ্রাকজক উখো দন্নে দিংথাং দাকগিবা নাম্মা খাৎথাখো না·সংনা আগানফ্রাকোদে, উখো চিংআ আন·থাংআন দাক্কোবা বা সাকসা সা·গ্রেবা দাকখানা, ইন্দিদে বিনি সাক্কাও শাপ গা·আকখানা।

⁹ স্খাংওবা আংআ জেগিত্তা আগানা উগিত্তা দা·আওবা আগানিংআ, জে নাম্মা খাৎথাখো না·সং রা·চাকজক উখো দন্নে দিংথাং দাকগিবা নাম্মা খাৎথাখো সাবা আগানফ্রাকোদে বিনি সাক্কাও শাপ গা·আকখানা।

¹⁰ ইনি গিম্মিন আংআ সাচাখো মিৎথেলা মা·ন্না হা·ম্মা, মান্দিচাখো বা ইসলচাখো? বা মান্দিখো খুসি দাকনা হা·ম্মামা? দা·আওবা আংআ মান্দিখো খুসি দাকনা হা·ম্মোদে আংআ খ্রীষ্টনি নকখল হং·জা।

পৌল বাদিকে দাক্কে ওয়াত্তেতা হং·জক

¹¹ জংআদারাং, আংআ না·সংনা আগানিংজক, জে নাম্মা খাৎথাখো আংআ আগানফ্রাকজক উয়া মান্দিনি থারিগিবা খাৎথা হং·জা।

¹² আংআ মান্দিচাখো উখো মান·জা বা দারাংবা আংনা উখো স্খিজা, বাত্তেসা যীশু খ্রীষ্ট আন·থাংআন আংনা উখো ফারাকামিং।

¹³ যিহূদী থরমখো মানিমিত্তিংও আংআ বাদিকে দাক্কে জাংগি মিৎথাংনুয়ামিং না·সং উখো খিন্নাজক। আরো না·সং ইখোবা খিন্নাজক, বাদিকে বিল্লংএন আংআ ইসলনি মন্ডলীরাংখো গিচ্চিয়েতনুয়ামিং আরো উখো ব·ন্নেতনা হাম·নুয়ামিং।

¹⁴ আংনি আপসান বিলসিনি বাং·আ যিহূদীরাংনা বাত্তেবা আংআ উয়া থরমও বাং·এ বাত্তামিং। ইনা আগ্রে আংনি ফাগিৎচামরাংওনি জে নিয়াম রি·বাজক উনি গিম্মিনোবা আংআ নাম্মেন গিসিক নাংবাতামিং।

¹⁵ ইন্দিবা ইসল আৎচিয়াওনিন আংখো বাচ্ছিয়ে দন্নামিং আরো বিনি খা·সাচাক্কাচান ওয়াত্তেতা হং·না বিয়া আংখো রিক্কামামিং।

¹⁶ জেদাক্কে আংআ গিপ্পিন জাতরাংচা খ্রীষ্টনি নাম্মা খাৎথাখো আগানফ্রাকা, ইনি গিম্মিন জেনসালো ইসল বিনি হা·সিকা গিত্তা বিনি দেফান্থিখো আংনা ফারাকজক উনো আংআ সাকসা মান্দিমুংবা খু·ফাত্তিজাজক।

¹⁷ আরোবা, জেরাং আংনা স্খাং ওয়াত্তেতা হং·আমিং যিরূশালেমো আংআ বিসংচাবা রি·য়াংজা। আংআ উনো আরব হা·সংচা রি·য়াংআমিং আরো জা·মানো দা·আবা দামেস্ক সংজিলমাওনা ফিল·বামিং।

¹⁸ ইনি বিলসি গিত্থামনি জা·মানো আংআ স্খাং পিতরমুং গ্রংনা যিরূশালেমচানা রি·য়াংআমিং, আরো উয়ো বিমুং সালচিবংআ দংআমিং।

¹⁹ উনো গিত্তেলনি জং যাকোবনা আগ্রে ওয়াত্তেতারাংমুং আংআ গ্রংজা।

²⁰ আংআ না·সংনা জেখো চক্কিংজক উনি মামুংআন বু·আ হং·জা, ইনি সাক্ষি ইসলান হং·আ।

²¹ জা·মানো আংআ সিরিয়া আরো কিলিকিয়ানি গিসেপো দিংথাং দিংথাং হা·দামচানা রি·য়াংআমিং।

²² যিহূদিয়ানি খ্রীষ্টান মন্ডলীরাং আংখো হা·আইজামিং।

²³ বিসং ইয়া খাৎথাখোসান খিন্নামিং, “জে মান্দি আনচিংখো গিচ্চিয়েতনুয়ামিং বিয়া দা·আও খ্রীষ্টখো বিবিরা·আনি খাৎথাখো আগানফ্রাকিংজক, স্খাংদে উখো বিয়া ব·ন্নেতনা হা·ম্মামিং।”

²⁴ আরো বিসং আংনি গিম্মিন ইসলনি রাসংখো দাকনা হা·বাচেংজক।