ইফিষীয়রাংনা 4 - Garo New Testament

খ্রীষ্টনি বে·এনো আপসান হং·আ

¹ উনি গিম্মিন গিত্তেলনা বন্দি দংএ আংআ না·সংচা ইন্দাকে মল·মলিংজক, ইসল জেনি হা·সেল না·সংখো রিক্কামজক উনা খ্রাএ রি·বো।

² না·সংনি গিসিক-বেওয়াল জেদাক্কে চু·গিম্মিক রিন্নকা আরো সনথল হং·আ। চাকচিকবো আরো খা·সানি গিসিকখো রা·এ সাকসা সাকগিপ্পিনখো চাকবো।

³ জে থম·থমা আনচিংখো নাংরিমেতজক উয়া থম·থমাচা গিসিক রংথালগিবানি রন·গিবা নাংরিমাখো রাক্ষিনা মংসংবাত্তে খ্রেংবো।

⁴ ইসল না·সংখো রিক্কামজক ইন্নে না·সংনি গিসেপো মিংসাসান খা·দংআ দংআ, গি·সাসান বে·এন দংআ, সাকসাসান গিসিক রংথালগিবা দংআ,

⁵ সাকসাসান গিত্তেল দংআ, মিংসাসান বিবিরা·আ দংআ, মিংসাসান রিপ্পলা দংআ,

⁶ আরো গিম্মিকনি ইসল আরো ফাগিবা সাকসাসান দংআ। বিয়ান গিম্মিকনি সাক্কাও; বিয়ান গিম্মিকনি গিসেপো আরো গিম্মিকনি খা·থংও দংআ।

⁷ ইন্দিবা খ্রীষ্ট জেদাক্কে থারিয়ে দনসোজক উয়া গিত্তাদে আনচিং গিম্মিকান মংসংগিবা খা·সাচাক্কাখো মান·জক।

⁸ রংথালগিবা শাস্ত্রও ইনি গিম্মিন চক্কা দংআ, বিয়া জেনসালো সালগিচানা গাদোজক, উনসালো বন্দিরাংখো রিম্মাংফাজক, আরো বিয়া মান্দিরাংনা বাং·এ র·ন্নানিখোবা রন·জক।

⁹ “বিয়া গাদোজক,” ইয়া খু·সুকওনি ইখোন হা·আইনা মান·জামা, খ্রীষ্ট হা·নিংআওনা হং·ওনবামিং?

¹⁰ জেআন হং·ওনবামিং বিয়ান গিম্মিকখো চু·সকেতনা দা·আবা সিলগানা বাত্তেবা সাক্কাচানা গাদোজক।

¹¹ বিয়ান মিত্তাম মান্দিখো ওয়াত্তেতা, মিত্তামখো আগানসোগিবা, মিত্তাম মান্দিখো নাম্মা খাৎথাখো আগানফ্রাকগিবা আরো মিত্তামখো ফামং আরো স্খিএতগিবা দাক্কে বাচ্ছিয়ে রা·জক।

¹² বিয়া ইরাংখো বাচ্ছিয়ে রা·জক জেদাক্কে ইসলনি মান্দি গিম্মিক বিনান দাকচাকে র·ন্না থারিসোআ আরো ইন্দাকে খ্রীষ্টনি বে·এন রিক্কা হং·আ।

¹³ ইনি মিকসংআ হং·জক, জেদাক্কে আনচিং গিম্মিকান ইসলনি দেফান্থিখো বিবিরা·এ আরো বিখো নাম্মেদাক্কে হা·আইনা মা·ন্নে আপসান হং·আ; আরো খ্রীষ্ট জেদাক্কে গিম্মিক গুণও চু·সকগিবা হং·আ, আনচিংবা জেদাক্কে উগিত্তান গিম্মিক গুণও চু·সকগিবা হং·আ। উনোদে আনচিং আরবা বি·সা গিত্তা দংজানুয়া।

¹⁴ মান্দিরাং নামগিজা বুদ্ধিচা গিপ্পিনরাংখো ব্রাংআ রামাচানা রা·আংনা জে ব্রাংগিবা স্খিয়াখো স্খিয়েতা, উয়া ব্রাংগিবা স্খিয়াও আনচিং বালওয়াও ফকফেকা গিত্তা ইচা-উচা দাকজানুয়া।

¹⁵ বাত্তেসা আনচিং খা·সানি গিসিকখো রা·এ খ্রীষ্টনি গিম্মিনো বিবিখো আগান্নুয়া আরো গিম্মিক গিত্তা দাল·রোরোএ খ্রীষ্ট গিত্তা হং·নুয়া। বিয়ান বে·এননি স্খুথং।

¹⁶ গিম্মিক বে·এনখো ইন্দাকে খাআ দংআ, জেদাক্কোদে বাক গিম্মিক আন·থাংথাংনি হা·দামও দংএ বে·এনমুং নাংরিমে দংআ। বাক গিম্মিক থিক দাক্কে কাম দাকমিত্তিংও বে·এন গিম্মিকান স্খুনি রি·দিলাও দাল·রোরোআ আরো খা·সাও আন·থাংখো রিক্কা।

বিবিরা·গিবা হং·এ খ্রাগিবা জাংগিখো মিৎথাংআ

¹⁷ ইনি গিম্মিন আংআ আগানিংজক, আরো গিত্তেলনি হং·এ মংসংবাত্তেন আগানিংজক- গিপ্পিন জাতরাং জেদাক্কে নামগিজা চানচিয়াও বিসংনি জাংগিখো মিৎথাংআ না·সং উগিত্তাদে জাংগিখো দা·আ মিৎথাংআবো।

¹⁸ বিসংনি গিসিক আন্দালাও গা·আকে দংআ। খা·থং রাক্কা ইন্নে বিসং ইসলনি গিম্মিনো মামুংখো হা·আইজা, আরো উনি গিম্মিন ইসলনি রন·গিবা জাংগিওনি বিসং বাং·এ চে·ল্লাও দংআ।

¹⁹ বিসংনি চানচিয়া গক্কা হং·জক, উনি হা·সেল খা·নামগিজা হা·সিকাখো রা·এ মারাং নাংগিবা গিম্মিক কামরাংখো দাকনা বিসং লাগামগ্রি হা·সিকাও আন·থাংথাংখো ওয়াত্তেতজক।

²⁰ ইন্দিবা না·সংদে খ্রীষ্টনি গিম্মিনো ইন্দাকা স্খিয়াখো মান·খুজা।

²¹ না·সং বিনি গিম্মিন খিন্নামিং, আরো বিমুং নাংরিমে বিনি গিসেপো জে বিবি দংআ উগিত্তা স্খিয়াখো মা·ন্নামিং।

²² না·সং ইয়া স্খিয়াখো মা·ন্নামিং, না·সংনি গিৎচাম জাংগিনি গিৎচাম ‘আংআ’খো গিৎচাম বা·রা গিত্তান গালনা নাংনুয়া, মুয়ানা দাক্কামব্রুআ হা·সিকাচা উয়া গিৎচাম “আংআ” নাসিংজক।

²³ উনি ফালো না·সংনি গিসিকখো ইসলচা গিত্তাল দাক্কে রিকখানা রন·বো,

²⁴ আরো ইসলনি রন·গিবা গিত্তাল “আংআ”খো গিত্তাল বা·রা গিত্তান গানবো। বিবিনি দোসগ্রিচা আরো রংথালাচা ইয়া গিত্তাল “আংআ”খো ইসল গিত্তা থারিয়া হং·জক।

²⁵ ইনি গিম্মিন না·সং বু·আখো ওয়াতবো আরো সাকসা সাকগিপ্পিনচা বিবিখো আগানবো, মুয়ানা আনচিং গিম্মিকান সাকসা সাকগিপ্পিনমুং নাংরিমা।

²⁶ খা·আওনাংওদে উয়া খা·আওনাংআনি হা·সেল দা·আ পাপ দাক্কাবো; সাল নাপনা স্খাংআন না·সংনি খা·আওনাংআখো ওয়াতবো,

²⁷ আরো শয়তাননা দা·আ চল র·ন্নাবো।

²⁸ জেআন চা·উয়া বিয়া আরবা চা·উজাখানা, বাত্তেসা আন·থাংনি জাকচা খাকখেৎ দাক্কে কাম রিম·খানা জেদাক্কে দংগিজারাংনা র·ন্না গিত্তা বিনি মামুং দংআ।

²⁹ না·সংনি খু·সুকওনি মামুং নামগিজা খাৎথা হং·খাতজাখানা, বাত্তেসা নাংআ গিত্তা গিপ্পিনখো রিকনা ইন্নে জেআন নাম্মা উয়ানদাক্কা খাৎথান হং·খাতখানা, জেদাক্কোদে উখো জেরাং খিন্নাআ উচা বিসংনি নাম্মা হং·আ।

³⁰ না·সং ইসলনি গিসিক রংথালগিবাখো দা·আ দুক র·ন্নাবো, জেচা ইসল জক্কানি সালোনা দিপ্পাৎ না·সংখো সিল সু·এ দনজক।

³¹ মাংমেংআরাংখো ফিন্নিকা, খা·আওনাংআখো ফিন্নিকা, খা·আওনাংআ, চ্রিকে নিরিয়া-গিসিয়াখো, সাউইয়া-খা·চাআখো, আরো গিম্মিক মিকনেংআরাংখো না·সংচাখো চে·ল্লেতবো।

³² না·সং সাকসা সাকগিপ্পিননা খা·সাচাকবো, গিপ্পিননি দুকও দুক মান·ফাবো, আরো ইসল জেগিত্তা খ্রীষ্টও না·সংখো ক্ষেমা দাকজক উগিত্তা না·সংবা সাকসা সাকগিপ্পিনখো ক্ষেমা দাকবো।