ওয়াত্তেতারাংনা 27 - Garo New Testament

রোমনি রামাও পৌল

¹ জাহাসও দাক্কে চিংখো ইটালীচা রিম্মাংনা থিক হং·আনি জা·মানো পৌলখো আরো মিত্তাম বন্দিরাংখো যুলিয় মিংগিবা সুবিদার সাকসানি জাক্কো হন·জক। যুলিয় সম্রাটনি আন·থাংনি সিপাইরাংওনি সাকসা সুবিদার হং·আমিং।

² চিংআ আদ্রামুত্তীয়নি জাহাসও গাখাতে রি·না হা·বাচেংজক। এশিয়ানি গিপ্পিন গিপ্পিন সাগাল চিবাতরামচা রি·য়াংনা ইন্নে জাহাস থারিয়ান দংআমিং। ম্যাসিডোনিয়া হা·দকনি থিষলনীকী সংজিলমানি আরিষ্টার্খ চিংমুং দংআমিং।

³ সালগিপ্পিনো চিংনি জাহাস সীদোনচা দংদিপজক। যুলিয় পৌলমুং নাম্মা বেওয়ালখো দাকজক আরো বিখো বিনি রিপ্পেংরাংচা রি·য়াংনা হন·জক জেদাক্কে বিনি রিপ্পেংরাং বিনি নাংআনি বস্তুরাংখো হ·ন্না মা·ন্না।

⁴ জা·মানো উয়োনি দা·আবা চিংনি জাহাস ওয়াতজক। বালওয়া থারাকানি গিম্মিন সাইপ্রাসনি জেগিত্তা বালওয়া দংজামিং চিংআ উগিত্তা রি·য়াংজক।

⁵ জা·মানো চিংআ কিলিকিয়া আরো পাম্‌ফুলিয়ানি মিকখাংও দংগিবা সাগালখো বাত্তে লুকিয়া হা·দকনি মুরা সংজিলমাওনা রি·বাজক।

⁶ সুবিদার উয়ো আলেক্‌জান্দ্রিয়ানি জাহাস গি·সাখো মান·জক। উয়া জাহাস ইটালী হা·সংচানা রি·য়াংআমিং ইন্নে বিয়া চিংখো রা·এ উয়া জাহাসও গাদোজক।

⁷ চিংনি জাহাস বাং·আ সাল খা·সিনসিন রি·এ নেং·এদিক্কে ক্লীদোন সংজিলমানি সেফাংচা রি·বাজক, ইন্দিবা বালওয়ানা চিংআ মিকখাংচা রি·য়াংনা মান·জাজক। উনোন চিংআ ক্রীটনি জেগিত্তা বালওয়া দংজামিং উগিত্তা রি·য়াংএ সল্‌মোনীনি সেফাং গিত্তা রি·জক।

⁸ সাগালনি রিক্কাম গিত্তা নেং·এদিক্কে রি·এ চিংআ নিথুয়া বন্দর মিংগিবা হা·দামচা রি·বাজক। লাসেয়া সংজিলমা উনি সেফাংওনমিং।

⁹ ইন্দাকে বাং·আ সাল রি·য়াংজক। উনো অকগুমিন চাক্কানি সাল ব·ন্নাংএ সিন·খারি সকবাজক। উনি হা·সেল জাহাসও দাক্কে রি·য়া খেন্নানি হং·জক। ইনি গিম্মিন পৌল জাহাসনি মান্দিরাংখো সিমসাকেতনা আগানজক,

¹⁰ “নিবো, আংআ নিকনা মা·ন্নিংআ আনচিংনি রি·য়াও নামগিজানি দংআ। উয়া নামগিজা আনচিংনি জাহাস আরো মালনিসান হং·নুয়া ইন্দাকে হং·জা, আনচিংনি জাংগিনিবা নামগিজা হং·নুয়া।”

¹¹ ইন্দিবা সুবিদার পৌলনি আগানাখো খিন্নাচাকগিজা জাহাসনি কেপ্তিন আরো জাহাসনি নকগিবানি খাৎথাখো খিন্নাচাকজক।

¹² সিন·খারিও বন্দলও দংনা খ্রাজা ইন্নে বাং·আ মান্দিরাংআন ইন্দাকে থিক দাকজক, উয়োনি মা·ন্নোদে ফৈণীকচা রি·য়াংএ সিন·খারিও দংআ হং·নুয়া। ফৈণীক ক্রীট চিচাংনি জাহাস দনখামানি হা·দামমিং। ইয়া হা·দামনি সালগিপেং-সালিরাম আরো সালগ্রো-সালিরামচাবাক্কা বাংবাং হং·আমিং।

মিকখা বালওয়া রাক্কা

¹³ জা·মানো সালগিপেংনি বালওয়া খা·সিনসিন বাল্লোন বিসংনি হা·ম্মা গিত্তান হং·জক ইন্নে বিসং চানচিজক। ইনি গিম্মিন বিসং জাহাসনি সিলথিনখো দি·এ ক্রীটনি রিক্কাম গিত্তা রি·জক।

¹⁴ ইন্দিবা দিকদিকসা জা·মানোন উয়া চিচাংওনি উরাকুলো মিংগিবা থারাকগিবা মিকখা বালওয়া রাকজক আরো জাহাস উয়া মিকখা বালওয়াও গা·আকজক।

¹⁵ চিংআ বালওয়ানা মিকখাংচানা রি·য়াংনা মান·জাজক; উনি গিম্মিন মিকখাংচা রি·য়াংনাখো দন্নে জাহাসখো বালওয়াও বালফাকাংনা হন·জক।

¹⁶ জা·মানো কৌদা মিংগিবা মিংসা চন্না চিচাংনি জেগিত্তা বালওয়া দংজামিং চিংআ উগিত্তা রি·জক আরো জাহাসও রিং দংগিবাখো চিংআ নেং·এদিক্কে ব·ন্নাংআনিখো জক্কেতি রা·রিকজক।

¹⁷ মান্দিরাং রিংখো জাহাসও সালদোজক আরো জা·মানো দড়িচা জাহাসনি গানসাংখো খাজক জেদাক্কে উনি তক্তারাং থাকওয়াতাংজা। সুর্তী মিংগিবা সাগালনি হান·চেং চরও জাহাস নাংদাতনা খেন্নে পালরাংখো রা·ওনে জাহাসখো বালওয়াও রি·এতজক।

¹⁸ মিকখা বালওয়ানি থারাকানা চিংনি জাহাস ইন্দাকফিল্লে মজিমজক জেনি হা·সেল সালগিপ্পিনো মান্দিরাং জাহাসনি মালরাংখো চিও গাল্লেতনা হা·বাচেংজক।

¹⁹ সালগিত্থামনি সালো বিসং জাকথাংচা জাহাসনি বস্তুরাংখোবা গাল্লেতজক।

²⁰ বাং·আ সালরাংওনিন সালখো বা আস্কিখো নিকজাজক আরো বালওয়া থারাকেন বালরোরোজক। বন·চতাও চিংআ জক্কানি গিম্মিক খা·দংআখোন ওয়াতগালারিজক।

²¹ বাং·আ সালরাংওনি মান্দিরাং মামুংখো চা·জানি গিম্মিন পৌল বিসংনি মিকখাংও চাদেংএ আগানজক, “নিবো, আংনি আগানাখো খিন্নাচাকে ক্রীটওনি জাহাসখো ওয়াতজান না·সংনা খ্রামিং। ইন্দাকোদে ইয়া নামগিজানিখো না·সং জকনা মা·ন্নুয়ামিং।

²² ইন্দিবা দা·আও আংআ না·সংচা মল·মলিংআ, না·সং গিসিকো খেনমানগিজা হং·বো, মুয়ানা না·সংওনি সাকসাবা সিজানুয়া; ইয়া জাহাসসান নাসিয়ানি হং·নুয়া।

²³ আংআ জেনি মান্দি হং·আ আরো আংআ জেনা দাকচাকে হ·ন্না উয়া ইসলনি সা·গ্রে সাকসা মিজাও ওয়াল্লো আংনি সেফাংও চাদেংএ আগানজক,

²⁴ ‘পৌল, দা·আ খেন্নাবো। নাং·খো সম্রাট কৈসরনি মিকখাংও চাদেংনা নাংনুয়া। ইয়া জাহাসও নাং·মুং রি·য়াংগিবা গিম্মিকনি জাংগিখো ইসল খা·সাচাক্কে নাং·না হন·জক।’

²⁵ ইনি গিম্মিন না·সং গিসিকো খেনমানগিজা হং·বো। আংনা জেগিত্তা আগানা উগিত্তান হং·নুয়া ইন্নে ইসলনি সাক্কাও আংনি বিবিরা·আনি দংআ।

²⁶ ইন্দিদে আনচিং বাগিবা চিচাংও রি·য়াংএ গা·আকনুয়া।”

জাহাস রিপজক

²⁷ চিংআ আদ্রিয়া সাগালনি সাক্কা গিত্তা ইন্দাকে রি·জক। মিকখা বালওয়া রাক্কানি সাল চি·ব্রিনি ওয়ালজাচ্চিও জাহাসখো চালাইগিবারাং হা·গানি সেফাংচানা সকবাজক ইন্নে চানচিজক।

²⁸ বিসং উনি চিখো থোএ নিজক উনি চি মিকসৎচেৎ থিং·আ। উনি দিকদিকসা জা·মানোন বিসং দা·আবা থোএ নিজক উনি চি মিকসৎদক জাক হং·আ।

²⁹ রং·থিব্রাকও নাংদাতনা খেন্নে জাহাসনি ফিল·সাচানি বিসং সিলথিন গি·ব্রিখো গাল্লেতজক আরো সাল নাবাখানা ইন্নে বি·না হা·বাচেংজক।

³⁰ জা·মানো কেপ্তিনরাং খাত্তাংনা হা·ম্মে জাহাসনি মিকখাংচানি সিলথিন গালনা দাকমিকে জাহাসওনি রিংখো সাগালো রং·খাত্তেতজক।

³¹ উনোন পৌল সুবিদার আরো সিপাইরাংনা আগানজক, “ইয়া কেপ্তিনরাং জাহাসও দংজাওদে না·সং জকজানুয়া।”

³² উনোন সিপাইরাং রিংনি দড়িখো রাত্তেতজক জেদাক্কোদে রিং চিও গা·আকা।

³³ সাল নাবানা স্খাং পৌল গিম্মিকখো চা·খানা মল·মলে আগানজক, “দা·আল সাল চি·ব্রি হং·জক, মুয়া হং·নুয়া হং·জানুয়া উখো চানচিয়ে না·সং চা·গিজা দংইংজক-মামুংখোন চা·জাজক।

³⁴ দা·আও আংআ না·সংখো মামুংখো চা·না মল·মলিংজক। থাংএ দংনা না·সংনি মামুংখোদে চা·না নাংনুয়া। নিনাদে, না·সংনি স্খুনি খিন্নি দিংসাবা নাসিজানুয়া।”

³⁵ ইখো আগানে পৌল রুটিখো রা·এ বিসংনি গিম্মিকনি মিকখাংওন ইসলখো মিৎথেলজক আরো উখো ফি·এ চা·না হা·বাচেংজক।

³⁶ উনোন বিসং খেনমানগিজা চা·না হা·বাচেংজক।

³⁷ চিংআ জাহাসও সাক রিৎচাগ্মি সৎস্নি দক দংআমিং।

³⁸ গিম্মিকনি অকখাএ চা·আনি জা·মানো জাহাসখো চেং·এতনা গম গিম্মিকখো সাগালো গাল্লেতজক।

³⁹ ওয়ালনিও বিসং হা·দামখো হা·আইনা মান·জাজক, ইন্দিবা গি·সা চন্না সাগালখো নিকজক জেনি রিক্কাম গিত্তা হান·চেং গাপ্পামিং। উনোন বিসং মা·ন্নোদে জাহাসখো উয়া রিক্কামো দন্না ইন্নে থিক দাকজক।

⁴⁰ ইনি গিম্মিন বিসং জাহাসনি সিলথিনরাংখো রাত্তে সাগালোন গাল্লেতজক আরো দড়িরাংখো এংএতজক। ইনি জা·মানো বিসং বালওয়াও মিকখাংনি পালখো ওয়াতজক আরো রিক্কাম গিত্তা রি·য়াংএ হান·চেং চরও গা·আকচাংএজক।

⁴¹ মিকখাংনি বাক সু·থেকে নাংথিংআনি গিম্মিন জাহাস রি·জাজক আরো সাগালনি চি ফকফেকানা জাহাসনি ফিল·সাচানি বাকরাং বি·থংথাংনা হা·বাচেংজক।

⁴² উনোন সিপাইরাং বন্দিরাংখো স·ওতে গালনা থিক দাকজক, জেদাক্কে বিসংওনি সাকসাবা চি জ্রোএ খাত্তাংনা মান·জা।

⁴³ ইন্দিবা সুবিদার পৌলখো থাংএতনা হা·ম্মামিং ইন্নে সিপাইরাংনি হা·সিকা গিত্তা দাকনা হন·জাজক। বিয়া চি জ্রোনা হা·আইগিবারাংখো জাহাসওনি চ্রকে রিক্কামো রি·য়াংএ গাখাতখানা গি·য়েৎজক,

⁴⁴ আরো মিত্তামরাং জাহাসনি তক্তা হং·জাওবা বি·গিবা বাকরাংখো রি·ম্মে উচা রি·য়াংখানা। ইন্দাকে গিম্মিকান হা·গাওনা নাম্মেদাক্কে সকজক।