ওয়াত্তেতারাংনা 22 - Garo New Testament

¹ “জংআদারাং আরো আপফারাং, দা·আও আংআ আন·থাংনি গিম্মিন আগানচাকনুয়া, খিন্নাবো।”

² মান্দিরাং বিখো ইব্রীয় খু·সুকচা খাৎথা আগানাখো খিন্নাএ স্রক দংজক। উনোন পৌল আগানজক,

³ “আংআ সাকসা যিহূদী মান্দি হং·আ। কিলিকিয়ানি তার্ষ সংজিলমাও আংআ আৎচিয়া, ইন্দাকোবা ইয়া সংজিলমাওন আংআ দাল·জক। গমলীয়েলনি জা·চক কেচ্চিও আসংএ আংআ আনচিংনি ফাগিৎচামরাংনি নিয়ামরাংখো চু·গিম্মিক দাক্কে স্খিজক। ইসলনি গিম্মিন দা·আলো না·সং জেদাক্কে বিমচিপিংআ আংআবা উয়ানদাক্কেন হং·আমিং।

⁴ যীশুনি রামাও জেরাং রি·নুয়ামিং বিসংখো আংআ গিচ্চিয়েতি বাং·আরাংখোন স·ওতে গালনুয়ামিং আরো মি·আসা আরো মিচিকরাংখো রি·ম্মে জেলো দন্নুয়ামিং।

⁵ ইয়া খাৎথা বিবি হং·আ, ইনি সাক্ষি দাল·বাৎগিবা খামাল আরো দাল·বাৎগিবা খ্রিমানি গিম্মিকান হং·আ। আংআ বিসংচানিখো দামেস্ক সংজিলমানি থরমনি দাল·গিবারাংনা চিঠি রা·আমিং আরো উয়ানদাকগিবা মান্দিরাংখো বন্দি দাক্কে যিরূশালেমোনা রিমবাএ শাস্তি হ·ন্না উয়োনা রি·য়াংআমিং।

⁶ “উনো সালজাচ্চি হং·জক। আংআ দামেস্কনি সেফাংগ্রিক রি·বানি জা·মানো রাং·গিত্তিক আংনি সামব্রিও সালগিওনি চিং·ব্রাপা সেং·আ থেং·সুজক।

⁷ আংআ হা·আও গা·আকজক আরো সানিবা আংনা ইন্দাকে আগানাখো খিন্নাজক, ‘শৌল, শৌল, মুয়ানা না·আ আংখো গিচ্চিয়েতিংজক?’

⁸ “আংআ সিং·জক, ‘গিত্তেল, না·আ সা?’ “বিয়া আগানজক, ‘আংআ নাসরতনি যীশু, জেখো না·আ গিচ্চিয়েতিংআ।’

⁹ আংমুং দংগিবারাং উয়া সেং·আখো নিকজক, ইন্দিবা আংমুং খাৎথা আগানগিবানি খাৎথাখো বিসং হা·আইজাজক।

¹⁰ “উনোন আংআ আগানজক, ‘গিত্তেল, আংআ মুয়াখো দাকনুয়া?’ “গিত্তেল আগানজক, ‘চাখাতবো, দামেস্কওনা রি·য়াংবো। নাং·না জেখো থারিয়ে দনসোজক উখো উয়োন নাং·না আগান্নুয়া।’

¹¹ আংনি রিপ্পেংরাং জাকখো রি·ম্মে আংখো দামেস্কচানা রিম্মাংজক, মুয়ানা উয়া চিং·ব্রাপা সেং·আও আংআ মিকগ্রি হং·জকমিং।

¹² “জা·মানো অননিয় মিংগিবা মান্দি সাকসা আংচা রি·বাজক। বিয়া মোশিনি নিয়ামরাংখো খা·ফাকে মানিনুয়ামিং, আরো উনি গিম্মিক যিহূদীরাং বিখো নাম্মেন মান্দিরা·নুয়ামিং।

¹³ বিয়া আংনি কেচ্চিও রি·বাএ চাদেংএ আগানজক, ‘জং শৌল, নাং·নি নিক্কানি বিল রি·বাফিলখানা।’ আরো উনোন আংআ বিখো নিকনা মান·জক।

¹⁴ “উনোন অননিয় আগানজক, ‘আনচিংনি ফাগিৎচামরাংনি ইসল নাং·খো বাচ্ছিয়ে রা·জক জেদাক্কে না·আ বিনি হা·সিকাখো হা·আইনা মা·ন্না, আরো উয়া খাকখেৎগিবা মান্দি, আগানস্খাওদে যীশু খ্রীষ্টখো নিকনা মা·ন্না আরো বিনি খু·সুকখো খিন্নানা মা·ন্না।

¹⁵ না·আ বিনিন সাক্ষি হং·নুয়া আরো নাং·নি নিকগিবাখো আরো খিন্নাগিবাখো মান্দিরাংনা আগানবো।

¹⁶ দা·আও না·আ মুয়ানা হারিমিংআ? চাখাত্তে রিপ্পলবো আরো পাপওনি জক্কাখো মা·ন্না যীশুখো রিংগামে নাং·নি গিম্মিক পাপরাংখো সু·গালবো।’

¹⁷ “জা·মানো আংআ যিরূশালেমচা রি·বাফিল্লে সালসাও থরম নক্কো বি·মিত্তিংও আংআ থুনা হা·সিকা গিত্তা দাকজক।

¹⁸ উনো গিত্তেল আংমুং খাৎথা আগানাখো আংআ নিকজক। বিয়া আংনা আগানজক, ‘থেংরি দাকবো, দা·আওন যিরূশালেমখো ওয়াত্তে রি·য়াংবো, মুয়ানা আংনি গিম্মিন নাং·নি সাক্ষি হ·ন্নাখো মান্দিরাং রা·চাকজানুয়া।’

¹⁹ “আংআ আগানজক, ‘গিত্তেল, নাং·খো বিবিরা·গিবারাংখো দক্কে জেলো দন্না আংআ থম·দাকরাম দামসাওনি দামসাওনা রি·য়াংনুয়ামিং ইন্নে ইয়া মান্দিরাং হা·আইয়া।

²⁰ নাং·নি সাক্ষি স্তিফানখো স·ওতমিত্তিংও আংআ উয়ো চাদেংএ স·ওতনা আগানফাআমিং, আরো বিখো স·ওতগিবারাংনি বা·রাচলারাংখো নিরক্ষিংআমিং।’

²¹ “উনোন গিত্তেল আংনা আগানজক, ‘না·আ রি·য়াংবো, আংআ নাং·খো চে·ল্লাচানা গিপ্পিন জাতরাংচা ওয়াত্তেতনুয়া।’ ”

²² মান্দিরাং পৌলনি খাৎথাখো খিন্নাংআমিং, ইন্দিবা বিয়া গিপ্পিন জাতরাংখো আগানোন মান্দিরাং চ্রিকে ইন্না হা·বাচেংজক, “বিখো হা·গিলসাকনিখো হা·রিকেতবো; বিয়া থাংএ দংনা খ্রাজা।”

²³ মান্দিরাংনি চ্রিকো আরো বা·রারাংখো গোএ সিলগাও হা·দুলাখো গোচ্রাকো,

²⁴ উনো কমান্ডার পৌলখো সিপাইরাংনি দংরামচা রা·আংখানা গি·য়েৎজক। মান্দিরাং মুয়ানা পৌলনি সাক্কাও ইন্দাকে চ্রিকিংআ উখো হা·আইনা বিয়া বিখো চাবুকচা দক্কে সিং·থেকখানা গি·য়েৎজক।

²⁵ পৌলখো চাবুকচা দকনা খাআও উয়ো চাদেংএ দংগিবা সুবিদারনা পৌল আগানজক, “জেখো দোস দংআ ইন্নে থিক দাকখুজা ইন্দাকগিবা রোমনি মান্দি সাকসাখো দক্কা না·সংনি নিয়াম গিত্তা কাম হং·আমা?”

²⁶ ইখো খিন্নাএ উয়া সুবিদার কমান্ডারনা আগানজক, “না·আ মুয়াখো দাকনা রি·য়াংইংজক? বিয়াদে রোমনি মান্দি হং·আ।”

²⁷ উনো কমান্ডার পৌলচা রি·য়াংএ সিং·জক, “আংনা আগানবো, না·আ রোমনি মান্দি হং·আমা?” পৌল আগানজক, “হো·এ।”

²⁸ কমান্ডার আগানজক, “থাংখা বাং·এ হ·ন্নে রোমনি মান্দি হং·আনি বিলখো আংআ ব্রিএ রা·জক।” পৌল ইনজক, “ইন্দিবা আংআদে রোমনি মান্দি হং·এন আৎচিয়া।”

²⁹ ইখো খিন্নাএ বিখো সিং·থেকনা হাম·গিবারাং উনোন রি·য়াংআরিজক। কমান্ডার রোমনি মান্দি সাকসাখো খাআমিং ইন্নে হা·আইনা মা·ন্নে বিয়া খেনজক।

দাল·বাৎগিবা খ্রিমানি মিকখাংও পৌল

³⁰ যিহূদীরাং মুয়ানা পৌলখো দোস হ·ন্নিংআ উখো নাম্মেদাক্কে হা·আইনা সালগিপ্পিনো কমান্ডার পৌলখো খাআনিখো এংএতজক আরো দাল·গিবা খামালরাংখো আরো দাল·বাৎগিবা খ্রিমানি মান্দিরাংখো আপসান হং·খানা গি·য়েৎজক। জা·মানো বিয়া পৌলখো রিমবাএ বিসংনি মিকখাংও চাদেংএতজক।