ওয়াত্তেতারাংনা 21 - Garo New Testament

যিরূশালেমচাবাক্কা

¹ ইফিষনি মন্ডলীনি দাল·গিবারাংওনি রি·য়াংএ চিংআ জাহাসও দাক্কে কো চিচাংচানা রি·য়াংজক। সালগিপ্পিনো চিংআ রোদঃ চিচাংওনা রি·বাজক। জা·মানো উয়োনি পাতারা সংজিলমাচানা রি·য়াংজক। উয়ো চিংআ ফৈনীকিয়াচা রি·য়াংনা জাহাস গি·সা মান·জক।

² উনোন চিংআ উয়া জাহাসও গাদোএ রি·য়াংজক।

³ জা·মানো সাইপ্রাস চিচাংখো নিক্কে চিংআ সিরিয়া হা·সংনি সোর সংজিলমাচা রি·য়াংএ জাহাসওনি হং·খাতজক। উয়ো জাহাসনিখো চিংনি মালরাংখো রং·খাতনা খাৎথা দংআমিং।

⁴ উনি জা·রিকগিবারাংখো সান্দিয়ে মা·ন্নে চিংআ বিসংমুং সাল স্নি দংজক। উয়া জা·রিকগিবারাং গিসিক রংথালগিবাচা পৌলখো যিরূশালেমচা রি·য়াংজাখানা মল·মলজক।

⁵ ইন্দিবা উয়া সালরাং রি·য়াংআনি জা·মানো চিংআ বিসংখো ওয়াত্তে চিংনি রামাও রি·জক। গিম্মিক জা·রিকগিবারাং আরো বিসংনি জিকগিবারাং আরো বি·সারাং চিংমুং সংজিলমানি হা·ফালচা রি·বাজক। জা·মানো সাগাল রিক্কামো চিংআ জা·স্খু দে·ম্মে বি·জক।

⁶ জা·মানো সাকসা সাকগিপ্পিনখো ওয়াতগ্রিকে চিংআ জাহাসও গাদোজক আরো বিসং নকচা ফি·ল্লাংজক।

⁷ সোরওনি চিংআ তলিমায়িওনা সকজক। উয়ো বিবিরা·গিবা জংআদারাংখো সালাম হ·ন্নে বিসংমুং সালসা দংফাজক।

⁸ সালগিপ্পিনো চিংআ কৈসরিয়াওনা সকজক আরো নাম্মা খাৎথাখো আগানফ্রাকগিবা ফিলিপনি নক্কো দংজক। বিয়া যিরূশালেম মন্ডলীনি উয়া সাকস্নি দাকচাকে হন·গিবারাংওনি সাকসা হং·আমিং।

⁹ বিনি সেখিমগিজাগিবা সাকব্রি দেমিচিক দংআমিং। বিসং মান্দিরাংচা আগানসোগিবা গিত্তা ইসলনি খাৎথাখো আগান্নুয়ামিং।

¹⁰ চিংআ উয়ো বাং·গিজা সাল দংআনি জা·মানো যিহূদিয়াওনি আগাব মিংগিবা সাকসা আগানসোগিবা রি·বাজক।

¹¹ বিয়া চিংচা রি·বাএ পৌলনি খাংখারি খাগিবাখো এংজক আরো উচা আন·থাংনি জাক-জা·চকখো খাএ আগানজক, “গিসিক রংথালগিবা আগানা, ‘যিরূশালেমনি যিহূদীরাং ইয়া খাংখারি খাগিবানি নকগিবাখো ইন্দাকে খানুয়া আরো গিপ্পিন জাতরাংনি জাক্কো হ·ন্নুয়া।’ ”

¹² ইয়া খাৎথাখো খিন্নাএ উনি মান্দিরাং আরো চিংআ পৌলখো যিরূশালেমচা রি·য়াংজাখানা মল·মলজক।

¹³ উনোন পৌল আগানজক, “না·সং গ্রাপে আংনি গিসিকো মুয়ানা দুক হ·ন্নিংআ? গিত্তেল যীশুনি গিম্মিন আংআ যিরূশালেমো বন্দি দংনাসান হং·জা, সিনাবা থারিয়ে দংআ।”

¹⁴ বিখো স্রক দংএতনা মান·জাএ চিংআ স্রক দংজক আরো জা·মানো আগানজক, “গিত্তেলনি হা·সিকা গিত্তা হং·খানা।”

¹⁵ উনি জা·মানো চিংআ জিনিসরাংখো থারিয়ে যিরূশালেমচানা রি·য়াংজক।

¹⁶ কৈসরিয়ানি মিত্তাম জা·রিকগিবারাং চিংমুং রি·য়াংফাজক আরো ম্নাসোন মিংগিবা সাইপ্রাসনি সাকসা মান্দিনি নকচানা রিম্মাংজক। বিনি নক্কোন চিংনি দংআনি খাৎথা দংআমিং। বিয়া স্খাংগিবা জা·রিকগিবারাংওনি সাকসামিং।

যিরূশালেমো

¹⁷ যিরূশালেমচা সক্কানি জা·মানো বিবিরা·গিবা জংআদারাং খুসি হং·বিএ চিংখো রা·চাকজক।

¹⁸ সালগিপ্পিনো পৌল চিংমুং যাকোবখো নিনা রি·য়াংজক। উয়ো মন্ডলীনি গিম্মিক দাল·গিবারাং দংআমিং।

¹⁹ পৌল বিসংখো সালাম হন·জক আরো বিনি আগানফ্রাকাও ইসল বাদিকে দাক্কে গিপ্পিন জাতরাংও কাম দাকজক উখো মিংসা মিংসা দাক্কে আগানজক।

²⁰ ইয়া খাৎথাখো খিন্নাএ উয়া দাল·গিবারাং ইসলখো রাসং দাকজক আরো পৌলনা আগানজক, “জং, বাসিক হাজাল হাজাল যিহূদীরাং যীশুখো বিবিরা·জক আরো বিসং গিম্মিকান মোশিনি নিয়ামরাংখো মানিনা নাম্মেন হা·সিকা, ইখোদে না·আ নিক্কিংআন।

²¹ গিপ্পিন জাতরাংনি গিসেপো দংগিবা যিহূদীরাংখো না·আ মোশিনি বেওয়ালরাংখো ওয়াত্তে রি·না স্খিংআ ইন্নে বিসং হা·আইজক, না·আ বিসংনি দেদ্রাংখো বিগিল রাতনা আরো যিহূদীরাংনি বেওয়ালখো মানিনা বেং·আ। দা·আও চিংআ মুয়াখো দাকনুয়া?

²² না·আ রি·বাজক ইন্নে বিসংদে খিন্নানুয়ান।

²³ চিংআ দা·আও নাং·না জেখো আগানা না·আ উখোন দাকবো। চিংনি গিসেপো ইন্দাকগিবা সাকব্রি মান্দি দংআ জেরাং খু·মিচেৎজক।

²⁴ ইয়া মান্দিরাংখো না·আ নাং·মুং রিম্মাংবো আরো বিসংমুং না·আ আন·থাংবা রংথালবো আরো বিসংনি স্খুনি খিন্নিখো রক্কে গালনা থাংখা হন·বো। নাং·নি গিম্মিন বিসংনি খিন্নাগিবাদে বু·আ আরো না·আ বেওয়ালরাংখো মানিয়া ইন্নে উনোন গিম্মিকান হা·আইনুয়া।

²⁵ ইন্দিবা গিপ্পিন জাতরাংও জেরাং বিবিরা·জক বিসংনা চিংআ জেখো থিক দাকজক উনি গিম্মিন বিসংনা ইয়া খাৎথাখো চক্কেতজক, মিত্তে বিমাংনা চিন·গিবা চা·আখো বিসং চা·জানুয়া, হান·চিখো রিংজানুয়া, গিত্তকখো রিম·সৎগিবারাংনি বে·এনখো চা·জানুয়া আরো থি·ল্লেকজানুয়া।”

²⁶ উনোন পৌল উয়া মান্দিরাংখো রিম্মাংএ বিসংমুং আন·থাংখোবা রংথালেতজক। সালগিপ্পিনো বিয়া থরম নকচা রি·য়াংজক, আরো বিসংনি রংথালানি কাম বাসোকো ব·ন্নুয়া আরো গিম্মিকনা বাসোকো বলি হ·ন্নুয়া উখো হা·আইএতজক।

পৌলখো বন্দি দাক্কে দনজক

²⁷ রংথালানি উয়া সাল স্নিনি জা·মানো এশিয়া হা·দকনি মিত্তাম যিহূদী পৌলখো থরম নক্কো নিকজক। বিসং উনি গিম্মিক মান্দিরাংখো খা·আওনাংএতজক আরো পৌলখো রিম·জক।

²⁸ জা·মানো বিসং চ্রিকে ইন্না হা·বাচেংজক, “ইস্রায়েল মান্দিরাং, মিকখাংচা রি·বাবো। হা·দাম গিম্মিকনি মান্দিরাংচা আনচিংনি জাত আরো আনচিংনি নিয়ামরাংখো আরো থরম নকনি সাক্কাও জে মান্দি স্খিয়া, ইয়ান উয়া মান্দি। ইনাআগ্রেবা বিয়া থরম নক্কো গ্রীকরাংখো রিমবাএ ইয়া রংথালগিবা হা·দামখো মারাং নাংএতজক।”

²⁹ বিসং ইয়া খাৎথাখো আগানজক মুয়ানা বিসং স্খাংও ইফিষনি ত্রফিমখো পৌলমুং সংজিলমাও নিক্কামিং। উনি গিম্মিন বিসং চানচিয়ামিং, পৌল ত্রফিমখো থরম নক্কোবা রিমবাজক।

³⁰ উনোন সংজিলমা গিম্মিকো গোলমাল হং·বাজক। মান্দিরাং আপসান খাতবাএ পৌলখো রি·ম্মে থরম নকনিখো সাল্লে রা·বাজক আরো উনোন থরম নকনি দ·গারাংখো চিপ্পেতজক।

³¹ মান্দিরাং পৌলখো স·ওতনা হা·ম্মামিং, উনো রোমনি সুবিদার যিরূশালেম সংজিলমা গিম্মিকো গোলমালখো খিন্নাজক।

³² উয়া দাল·গিবা সুবিদার উনোন মিত্তাম সুবিদাররাংখো আরো সিপাইরাংখো রিমবিতে জিলমানি সেফাংও রি·য়াংজক। মান্দিরাং দাল·গিবা সুবিদারখো আরো সিপাইরাংখো নিক্কে পৌলখো দক্কাখো দনজক।

³³ উনোন সুবিদার রি·বাএ পৌলখো রিম·জক আরো গি·গ্মি জেংজুলচা বিখো খানা গি·য়েৎজক। উনি জা·মানো বিয়া সিং·জক, “ইয়া মান্দি সা? বিয়া মুয়াখো দাক্কা?”

³⁴ উনোন মান্দিরাংনি গিসেপো সাবা সাবা চ্রিকে আপসান খাৎথাখো আগানজক, দা·আবা সাবা সাবা দিংথাং খু·সুকখো ইনজক। উনি গিম্মিন সুবিদার গোলমালনি মামুং হা·সেলখো হা·আইনা মান·জাএ পৌলখো সিপাইরাংনি দংরামোনা রিম্মাংখানা গি·য়েৎজক।

³⁵ পৌলখো মান্দিরাংনি জাকনিখো জক্কেৎনা সিপাইরাং বিখো দি·থমে রা·আংজক।

³⁶ মান্দিরাং বিনি জা·মান জা·মান চ্রিকে ইন্না হা·বাচেংজক, “বিখো স·ওতে গালবো।”

মান্দিরাংচা পৌলনি খাৎথা

³⁷ সিপাইরাং পৌলখো রা·এ বিসংনি দংরামো নাপমিত্তিংও পৌল সুবিদারখো ইনজক, “নাং·না মামুংখো আগান্না মা·ন্নুয়ামা?” সুবিদার আগানজক, “না·আ গ্রীক খু·সুকখো হা·আইয়ামা!

³⁸ মিসর হা·সংনি জে মান্দি বাং·গিজা সালনা স্খাংও বোবিল দাক্কে হাজাল ব্রি মান্দি স·ওতগিবারাংখো হা·গিসি জওলচা রিম্মাংআমিং, ইন্দাকোদে না·আ উয়া মান্দি হং·জামা?”

³⁹ উনোন পৌল আগানচাকজক, “আংআ যিহূদী, কিলিকিয়া হা·দকনি তার্ষ সংজিলমানি মান্দি হং·আ। আংআ হং·আ-হং·গিজা সংজিলমানি মান্দি হং·জা। খা·সাফাএ আংখো মান্দিরাংচা খাৎথা আগান্না হন·বো।”

⁴⁰ সুবিদারনি আগান্না হ·ন্নানি জা·মানো পৌল জাং·খি সাক্কাও চাদেংজক আরো জাকখো দি·এ মান্দিরাংখো স্রক দংখানা আগানজক। মান্দিরাং স্রক দংআনি জা·মানো পৌল ইব্রীয় খু·সুকচা বিসংখো ইনজক,