ওয়াত্তেতারাংনা 12 - Garo New Testament

পিতর জেলোনি জক্কা

¹ উয়া সময়ও রাজা হেরোদ খ্রীষ্টান মন্ডলীনি মিত্তাম মান্দিরাংখো গিচ্চিয়েতনা রি·ম্মে রা·বামিং।

² বিয়া যোহননি আদাগিবা যাকোবখো মি·ল্লামচা স·ওতেতামিং।

³ উখো নিক্কে যিহূদীরাংনি খুসি হং·আখো নিক্কে বিয়া পিতরখোবা রিম·না রি·য়াংজক। ইরাং ওয়ানথিগ্রি রুটিখো মানিয়ানি সালো হং·আমিং।

⁴ বিয়া পিতরখো রি·ম্মে জেলো দনজক। সাকব্রি সাকব্রি দাক্কে দলব্রি সিপাইরাংখো পিতরখো রাক্ষিনা দনজক। ওয়াতচাংআনি সালনি জা·মানো পিতরখো বিচাল দাকনা মান্দিরাংনি মিকখাংও রা·বানুয়া ইন্নে হেরোদ থিক দাকজক।

⁵ ইনি গিম্মিনান পিতরখো জেলো চিপচাংএ দনজক। ইন্দিবা মন্ডলীনি মান্দিরাং ইসলচা গিসিক নাংবিএ পিতরনি গিম্মিন বি·ইংআমিং।

⁶ জেনসালো হেরোদ পিতরখো বিচাল দাকনা হং·খাত্তেতনুয়া উনি ওয়াল্লো সিপাই সাকগ্মিনি জাংচিও পিতর থুংআমিং। বিখো গি·গ্মি জেংজুলচা খায় দন্নামিং আরো রাক্ষিগিবারাং দ·গাও রাক্ষিংআমিং।

⁷ উনো রাং·গিত্তিক গিত্তেলনি সা·গ্রে সাকসা উয়ো রি·বাএ চাদেংজক। উনি গিম্মিন জেলনি উয়া নক সেং·আও থেং·সুজক। সা·গ্রে পিতরনি বে·এনো রাক্কে সুদ্দকে বিখো চামিসাএ আগানজক, “থেংরি চাখাতবো।” উনি হা·সেল পিতরনি জাক সামগ্মিওনি জেংজুল গো·ওকাংজক।

⁸ উনোন সা·গ্রে পিতরখো ইনজক, “নাং·নি খাংখারিখো খাবো, জুতাখো গানবো।” পিতর উখোন দাকজক। সা·গ্রে বিনা আগানজক, “নাং·নি চাদরখো চিন্নে আংনি জা·মান জা·মান রি·বাফাবো।”

⁹ পিতর বিখো জা·রিকে জেলোনি হা·ফালওনা হং·খাতবাজক, ইন্দিবা সা·গ্রেনি দাকগিবারাং বিবিন হং·ইংজক উখো বিয়া মামুংখোন হা·আইনা মান·জাজক। বিয়া মিকজুমাং নিক্কিংআ ইন্নে চানচিজক।

¹⁰ বিসং স্খাংগিবা আরো গ্মিগিবা নিথিমগিবারাংনি দলখো বাৎবাএ সংজিলমাও নাপগিবা সিলনি দ·গাওনা রি·বাজক। উয়া সিলনি দ·গা বিসংনা আন·থাংথাংআন এংআংজক আরো বিসং উগিত্তা হং·খাতাংজক। বিসং গি·সা রামা গিত্তা রি·ইংআমিং উনো রাং·গিত্তিক উয়া সা·গ্রে পিতরখো ওয়াত্তে রি·য়াংজক।

¹¹ উনোন পিতর সিম্মাকা গিত্তা দাকজক আরো আগানজক, “দা·আও আংআ বিবিন ইখো হা·আইনা মান·জক, গিত্তেল বিনি সা·গ্রেখো ওয়াত্তেতি হেরোদনি জাকনিখো আরো যিহূদীরাং জেখো দাকনা খু·মংগ্রিকামিং উনিখো আংখো জক্কেৎজক।”

¹² ইয়া খাৎথাখো হা·আইনা মা·ন্নে বিয়া যোহননি মা·গিবা মরিয়মনি নকচা রি·য়াংজক। ইয়া যোহনখো মার্ক ইন্নেবা রিক্কামনুয়ামিং। উয়া নক্কো বাং·আ মান্দিরাংআন থম·দাকে বি·ইংআমিং।

¹³ পিতর হা·ফালনি দ·গাখো দকথিপো রোদা মিংগিবা সাকসা নকখল মিচিক দ·গাখো এংনা রি·বাজক।

¹⁴ পিতরনি খু·রাংখো হা·আইনা মা·ন্নে বিয়া খুসি হং·বিএ দ·গাখো এংগিজান নিং·আচানা খাত্তাংএ রি·য়াংএ আগানজক, “পিতর দ·গাচিলো চাদেংএ দংআ।”

¹⁵ উনোন জা·রিকগিবারাং উয়া মিচিকনা আগানজক, “নাং·নি স্খু থিক দংজা।” ইন্দিবা বিনি দাপ্পেৎ দাপ্পেৎ আগানানি গিম্মিন বিসং ইনজক, “ইন্দিদে বিয়া পিতরখো জক্কেৎগিবা সা·গ্রে হং·আ।”

¹⁶ পিতর দ·গাখো দকথিপেন দংজক। উনোন জা·রিকগিবারাং দ·গাখো এংএ পিতরখো নিক্কে আইয়াও ইনমানজক।

¹⁷ পিতর বিসংখো স্রক দংখানা জাকজিপেতজক আরো জেলোনি গিত্তেল বাদিকে বিখো হং·খাত্তেতি রা·বাজক উখো আগানজক। বন·চতাও বিয়া আগানজক, “ইখো যাকোব আরো সাকগিপ্পিন জংআদারাংনাবা আগানবো।” ইখো আগানে বিয়া হং·খাতে গিপ্পিন হা·দামচানা রি·য়াংজক।

¹⁸ ওয়াল সেং·আনি জা·মানো পিতর বাওনা রি·য়াংজক উখো রা·এ সিপাইরাংও নাম্মেন জাজ্রেংআনি হং·জক।

¹⁹ হেরোদ নাম্মেদাক্কেন বিখো সান্দিজক, ইন্দিবা বিখো মান·জাএ নিথিমগিবারাংখো সিং·থেকজক আরো জা·মানো উয়া নিথিমগিবারাংখো স·ওতনা গি·য়েৎজক। উনি জা·মানো হেরোদ যিহূদিয়াওনি কৈসরিয়াওনা রি·য়াংজক আরো উয়ো বাং·গিজা সালনা দংজক।

হেরোদনি সিয়া

²⁰ উয়া সময়ও হেরোদ সোর আরো সীদোন সংজিলমানি মান্দিরাংখো খা·আওনাংবিজক। উনো উয়া হা·দামনি মান্দিরাং আপসান হং·এ হেরোদমুং গ্রংনা রি·য়াংজক। রাজানি থুগিবা নকনি বিবিগিবা নকখল ব্লাস্ত মিংগিবাখো আন·থাংথাংওনা রা·বাএ বিসং রাজামুং নাংরিমনা হাম·জক, মুয়ানা রাজা হেরোদনি হা·সংওনিন বিসংনি হা·সংওনা চা·আরাং সকবানুয়ামিং।

²¹ উনোন হেরোদ সালসাখো থিক দাকজক। উনসালো বিয়া রাজানি বা·রাখো গান্নে সিংহাসনও আসংএ উয়া মান্দিরাংচা খাৎথা আগান্না হা·বাচেংজক।

²² বিনি খাৎথাখো খিন্নাএ বিসং চ্রিকে আগানজক, “ইয়া মিত্তেনি খু·রাং, মান্দিনি খু·রাং হং·জা।”

²³ হেরোদ ইসলনি রাসং দাকজা ইন্নে উনোন গিত্তেলনি সা·গ্রে সাকসা বিখো দকজক, আরো বিখো জ·ওং চা·নি গান্দা বিয়া সিজক।

²⁴ ইন্দিবা ইসলনি খাৎথা গিপরোরোআংজক আরো বাং·আ মান্দিরাংআন উখো বিবিরা·না হা·বাচেংজক।

²⁵ বার্ণবা আরো শৌলনি কাম ব·ন্নানি গিম্মিন বিসং যোহনখো রা·এ যিরূশালেমচানা রি·য়াংফিলজক। ইয়া যোহনখো মার্ক ইন্নেবা রিক্কামনুয়ামিং।