ওয়াত্তেতারাংনা 11 - Garo New Testament

পিতর যিরূশালেমো

¹ গিপ্পিন জাতরাংবা ইসলনি খাৎথাখো বিবিরা·জক উখো ওয়াত্তেতারাং আরো গিম্মিক যিহূদিয়ানি বিবিরা·গিবা জংআদারাং খিন্নাজক।

² ইনি গিম্মিন পিতর যিরূশালেমচানা রি·বাও উয়া বিবিরা·গিবারাংনি গিসেপো বিগিল রাতগিবারাং বিখো গ্রো নাংএতে আগানজক,

³ “না·আ বিগিল রাতগিজা মান্দিরাংনি নকচা রি·য়াংএ বিসংমুং চা·জক রিংজক।”

⁴ পিতর উনোন স্খাংওনি হা·বাচেংএ হং·গিবারাংখো মিংসা মিংসা দাক্কে আগানে হন·জক,

⁵ “আংআ যাফো সংজিলমাও বি·ইংআমিং, উনো থুস্থিম্মা গিত্তা দাক্কে দংএ গি·সা মিকজুমাংখো নিকজক। দা·ল্লা চাদর গিত্তা দাকগিবাখো খি·থিকব্রিও রি·ম্মে সিলগাওনি আংচানা হং·ওনেতাখো আংআ নিকজক।

⁶ আংআ নাম্মেদাক্কে নিএ উয়ো বাং·আ জাংগিগ্মাংগিবা মাৎবুরুংরাং, খা·বাকো মালগিবারাং আরো দো·দ্রাং দংআখো নিকজক।

⁷ জা·মানো আংআ সানিবা আগানাখো খিন্নাজক, ‘পিতর, চাখাতবো, দক্কে চা·বো।’

⁸ “আংআ ইনজক, ‘হং·জা, হং·জা, গিত্তেল মামুং দাক্কেবা হং·জা। রংথালগিজাগিবাখো আরো মারাং নাংগিবারাংখো আংআ মামুং সালোবা খু·সুকও সিকখুজা।’

⁹ “উনি জা·মানো সালগিওনি রাং·গ্মিগিবাও আগানজক, ‘ইসল জেখো রংথালেতজক উখো না·আ রংথালগিজাগিবা ইন্নে দা·আ ইন্নাবো।’

¹⁰ ইন্দাকে রাং·গিত্থাম হং·জক, জা·মানো গিম্মিকখো দা·আবা সিলগাওনা দি·দোআংজক।

¹¹ “উনি জা·মানোন আংনি দংগিবা নক্কো মান্দি সাকগিত্থাম রি·বাএ চাদেংজক। কৈসরিয়াওনি বিসংখো ওয়াত্তেতামিং।

¹² উনোন গিসিক রংথালগিবা আংখো খেনচাকগিজা বিসংমুং রি·য়াংখানা আগানজক। ইয়া সাকদক জংআদাবা আংমুং রি·য়াংআমিং। জা·মানো চিংআ আংখো রিক্কামগিবা উয়া মান্দিনি নক্কো নাপজক।

¹³ বিয়া সাকসা সা·গ্রেখো বাদিকে দাক্কে বিনি নক্কো নিক্কামিং উখো চিংনা আগানজক। উয়া সা·গ্রে বিনা আগানামিং, ‘শিমোন, জেখো পিতর ইন্নেবা মিংআ, বিখো রিংগামে রা·বানা না·আ যাফো সংজিলমাও মান্দি ওয়াত্তেতবো।

¹⁴ বিয়া নাং·চা জে খাৎথাখো আগান্নুয়া উয়া খাৎথাচা না·আ আরো নাং·নি নকগিম্মিকান পাপওনি জকনুয়া।’

¹⁵ “গিসিক রংথালগিবা জেদাক্কে স্খাং আনচিংনি সাক্কাও রি·বামিং আংআ খাৎথা আগান্না হা·বাচেংও উয়ানদাক্কেন বিসংনি সাক্কাওবা রি·বাজক।

¹⁶ উনোন গিত্তেল জেখো আগানামিং উখো আংআ গিসিক রা·জক, ‘যোহন চিও রিপ্পলেতনুয়ামিং, ইন্দিবা না·সংনি রিপ্পলা গিসিক রংথালগিবাও হং·নুয়া।’

¹⁷ ইন্দাকোদে গিত্তেল যীশু খ্রীষ্টখো বিবিরা·নি জা·মানো ইসল আনচিংনা জেখো হন·চাকামিং উখোন বিয়া বিসংনাবা হ·ন্নোদে আংআ সা, জে ইসলখো ফেং·না মা·ন্নুয়া?”

¹⁸ ইয়া খাৎথাখো খিন্নাএ যিহূদিয়ানি বিবিরা·গিবারাং জিচাকগিজা ইসলখো রাসং চাএতে আগানজক, “ইন্দাকোদে ইসল গিপ্পিন জাতরাংখোবা জাংগি মান·খানা পাপওনি গিসিক ফিল·না চল হন·জক।”

সিরিয়া হা·সংনি আন্তিয়খিয়ানি মন্ডলী

¹⁹ স্তিফানখো রা·এ বিবিরা·গিবারাংখো গিচ্চিয়েতানি গিম্মিন জেরাং বিলদিং বিলদাং হং·আংআমিং বিসং ফৈনীকিয়া, সাইপ্রাস আরো সিরিয়া হা·সংনি আন্তিয়খিয়াওনা দিপ্পাৎ রি·য়াংএ যিহূদীরাংচাসান ইসলনি খাৎথাখো আগানজক।

²⁰ ইন্দিবা বিসংওনি মিত্তামরাং আন্তিয়খিয়াওনা রি·য়াংএ গ্রীক খু·সুকখো আগানগিবা মান্দিরাংচাবা গিত্তেল যীশুনি গিম্মিন নাম্মা খাৎথাখো আগানফ্রাকনা হা·বাচেংজক। বিসং সাইপ্রাস চিচাং আরো কুরীণী সংজিলমানি মান্দি হং·আমিং।

²¹ ইসলনি বিল বিসংনি সাক্কাও দংআনি গিম্মিন বাং·আ মান্দিরাং গিত্তেলখো বিবিরা·এ বিচা ফিল·জক।

²² ইয়া খাৎথা যিরূশালেম মন্ডলীনি মান্দিরাংনি নাচিলো রি·য়াংআনি জা·মানো বিসং বার্ণবাখো আন্তিয়খিয়াওনা ওয়াত্তেতজক।

²³ ইসল আন্তিয়খিয়ানি মান্দিরাংনা বাদিকে খা·সাচাকজক বার্ণবা রি·বাএ উখো নিক্কে খুসি হং·বিজক। বিসং জেদাক্কে খা·থং গিম্মিকচা গিত্তেলো বিবিগিবা হং·এ দংনা মা·ন্না উনি গিম্মিন বিয়া বিসং গিম্মিকখো খা·দংএতনা হা·বাচেংজক।

²⁴ বার্ণবা সাকসা নাম্মা মান্দি হং·আমিং আরো বিয়া গিসিক রংথালগিবাও আরো বিবিরা·আও চু·সকামিং। উনোন গিত্তেল বাং·আরাংখোন আন·থাংওনা রা·বামিং।

²⁵ উনি জা·মানো বার্ণবা শৌলখো সান্দিয়ে তার্ষ সংজিলমাওনা রি·য়াংজক,

²⁶ আরো বিখো সান্দিয়ে মা·ন্নে আন্তিয়খিয়াওনা রিমবাজক। বার্ণবা আরো শৌল বিলসিসা দিপ্পাৎ মন্ডলীনি মান্দিরাংমুং আপসান হং·রিমে মান্দি বাং·আরাংনা স্খিজক। আন্তিয়খিয়াওন খ্রীষ্টনি জা·রিকগিবারাংখো খ্রীষ্টান ইন্নে দিমদাকনা স্খাং মিংচেংজক।

²⁷ উনি গিসেপো মিত্তাম আগানসোগিবা যিরূশালেমোনি আন্তিয়খিয়াওনা রি·বাজক।

²⁸ বিসংওনি আগাব মিংগিবা সাকসা চাদেংএ গিসিক রংথালগিবাও রি·য়াখো মা·ন্নে আগানজক, রোম গিম্মিকো আকাল হং·নুয়া। (সম্রাট ক্লৌদিয়নি শাসন দাক্কানি সালো উয়া খাৎথা চু·সকামিং।)

²⁹ উনোন জা·রিকগিবারাং থিক দাকজক, যিহূদিয়া হা·দকনি বিবিরা·গিবা জংআদারাংনা দাকচাকনা বিসং গিম্মিকান আন·থাংথাংনি মা·ন্না গিত্তা থাংখা ওয়াত্তেতনুয়া। বিসং উখো দাক্কামিং।

³⁰ বিসং বার্ণবা আরো শৌলনি জাক্কো যিহূদিয়ানি মন্ডলীরাংনি মি·আফারাংচা উয়া দাকচাকাখো ওয়াত্তেতামিং।