2 থিষলনীকীয়রাংনা 3 - Garo New Testament

বি·আনি গিম্মিন মল·মলা

¹ বন·চতাও আগান্না জংআদারাং, চিংনা বি·চাকবো জেদাক্কে গিত্তেলনি খাৎথা না·সংনি গিসেপো থেংরিদাক্কে গিপ্পাংআমিং উয়ানদাক্কেন উয়া গিপ্পাংরিকরিকা আরো রাসং মান·রিকরিকা।

² আরোবা বি·চাকবো জেদাক্কে চিংআ গিসিকগ্রি আরো নামগিজাগিবা মান্দিরাংনি জাকওনি জক্কাখো মা·ন্না, মুয়ানা গিম্মিক মান্দিনিন বিবিরা·আ দংআ ইন্দাকেদে হং·জা।

³ ইন্দিবা গিত্তেলদে বিবিরা·না খ্রাগিবা হং·আ; বিয়ান না·সংখো খেম·খেম দন্নুয়া আরো শয়তাননি জাকওনি না·সংখো রাক্ষিনুয়া।

⁴ গিত্তেলমুং নাংরিমা ইন্নে না·সংনি গিম্মিন চিংনি ইন্দাকা বিবিরা·আ দংআ, চিংআ না·সংনা জেগিত্তা গি·য়েৎজক উগিত্তান না·সং কাম দাক্কিংআ আরো দাকনুয়া।

⁵ গিত্তেল জেদাক্কে না·সংনি খা·থংখো ইসলনি খা·সানি রামাও আরো খ্রীষ্টনি চাকচিকানি রামাও রা·আংআ।

আলসিয়ানি সাক্কাও

⁶ জংআদারাং, আনচিংনি গিত্তেল যীশু খ্রীষ্টনি বিমুংও চিংআ না·সংনা ইন্দাকে গি·য়েতিংজক-সাবা আলসিয়া দাক্কে রি·ওদে আরো চিংচাখো না·সং জে স্খিয়াখো মান·জক উখো মানিজাওদে, ইন্দাকোদে না·সং বিমুং দা·আ রি·য়াবো।

⁷ বাদিকে দাক্কে চিং গিত্তা রি·না নাংআ উখো না·সং আন·থাংআন হা·আইয়া। না·সংমুং দংমিত্তিংও চিংআ আলসিয়া দাক্কে রি·জা,

⁸ বা দাম হন·গিজা দারাংনি চা·আখো চা·জা। চিংআ সালওয়াল কাম দাকজক আরো নেং·দিকবিজক জেদাক্কে চিংআ দারাংনি বোজা হং·আংজা।

⁹ না·সংচানি দাকচাকাখো মা·ন্না চিংনি বিল দংজা ইন্দাকে হং·জা, ইন্দিবা না·সং জেদাক্কে চিং গিত্তা রি·য়া উনি গিম্মিনান চিংআ ইন্দাকে কাম দাক্কে না·সংনা ফিন্নিকামিং।

¹⁰ না·সংচা দংমিত্তিংওন চিংআ না·সংখো গি·য়েতি আগানামিং, সাবা কাম দাকনা হাম·জাওদে বিয়া চা·জাখান।

¹¹ চিংআ খিন্নানা মা·ন্নিংআ, না·সংও সাবা সাবা আলসিয়া দাক্কে রি·ইংআ আরো মামুং কামখোন দাকজাংআ, উনা বাত্তে গিপ্পিনখো রা·এসা দংআ।

¹² আনচিংনি গিত্তেল যীশু খ্রীষ্টনি হং·এ চিংআ ইন্দাকগিবা মান্দিরাংনা গি·য়েতিংজক আরো স্খিয়েতিংজক, বিসং জেদাক্কে থম·থমে কাম দাক্কে আন·থাংথাংনি চা·আখো আন·থাংথাংআন থারিয়া।

¹³ জংআদারাং, নামগিবা কামও দা·আ নেং·নিকাবো।

¹⁴ ইয়া চিঠিও চক্কা চিংনি খাৎথাখো সাবা মানিজাওদে উয়া মান্দিখো হা·আইয়ে দনবো। বিমুং দা·আ রি·ফাবো জেদাক্কে বিয়া খ্রাচা·আখো মা·ন্না।

¹⁵ ইন্দিবা বিখো বোবিল ইন্নেবা দা·আ চানচিয়াবো, বাত্তেসা জংআদা ইন্নে বিখো সিমসাকেতবো।

বন·চতগিবা খাৎথা

¹⁶ থম·থমেতগিবা গিত্তেল আন·থাং ফাংনান গিম্মিকো না·সংনা থম·থমাখো হন·খানা। গিত্তেল না·সং গিম্মিকমুং দংখানা।

¹⁷ ইয়া সালামনি খাৎথাখো আংআ পৌল আন·থাংনি জাক্কো চক্কিংজক। ইয়ান আংনি গিম্মিক চিঠিনি চিন হং·আ; আংআ ইন্দাকেন চক্কে দংআ।

¹⁸ আনচিংনি গিত্তেল যীশু খ্রীষ্টনি খা·সাচাক্কা না·সং গিম্মিকমুং দংখানা।