২ পিতর 1 - Garo New Testament

¹ আংআ শিমোন-পিতর যীশু খ্রীষ্টনি সাকসা নকখল আরো ওয়াত্তেতা হং·আ। আনচিংনি ইসল আরো জক্কেতগিবা যীশু খ্রীষ্ট খাকখেৎগিবা হং·আ, আরো উনি গিম্মিন না·সংবা চিংনি গিত্তান আপসান বিবিরা·আখো মান·জক। ইনি গিম্মিন আংআ না·সংনা ইয়া চিঠিখো চক্কিংজক।

² ইসল আরো আনচিংনি গিত্তেল যীশুখো নাম্মেদাক্কে হা·আইয়াচা না·সংনি সাক্কাও খা·সাচাক্কা আরো থম·থমা দংখানা।

বিবিরা·গিবারাংখো রিক্কামা আরো বাচ্ছিয়ে রা·আ

³ জেআন বিনি রাসং আরো বিনি গুণচা আনচিংখো রিক্কামজক, বিখো নাম্মেদাক্কে হা·আইয়াচান বিনি ইসলনি বিল ইন্দাকাখো রন·জক জেচা আনচিং ইসলনা খা·ফাকে জাংগি মিৎথাংনা মা·ন্না।

⁴ বিয়া আন·থাংনি রাসংও আরো গুণচা আনচিংচা গামচাৎবিয়া আরো দাল·বাতাখো খু·রাচাকজক। ইনি মিকসংআ হং·জক, মান্দিনি নামগিজা হা·সিকানি হা·সেল হা·গিলসাকো জে নামজাস্রাং চিম্মংজক উয়োনি না·সং জক্কেতাখো মা·ন্নে জেদাক্কে ইসলনি গিসিক-বেওয়ালখো মান·ফাগিবা হং·আ।

⁵ ইনি গিম্মিন নাম্মেন খা·দংএ না·সংনি বিবিরা·আমুং নাম্মা গিসিক-বেওয়াল, নাম্মা গিসিক-বেওয়ালমুং হা·আইয়া,

⁶ হা·আইয়ামুং আন·থাংখো বাম্মেতা আরো আন·থাংখো বাম্মেতামুং চাকচিকা, চাকচিকামুং ইসলনা খা·ফাকা,

⁷ খা·ফাকামুং জংআদানা খা·সা আরো উয়া খা·সামুং আরোবা নাম্মেমানচা খা·সানি গিসিকখো দনফাবো।

⁸ না·সংনি ইয়া গুণরাং দংওদে আরো উয়া গাপসুয়াকফিল্লেন দংওদে, ইন্দাকোদে আনচিংনি গিত্তেল যীশু খ্রীষ্টখো নাম্মেন হা·আইয়ানি কামও না·সং বিথিগ্রি হং·জানুয়া।

⁹ জে মান্দিনি নিং·আও ইয়া গুণরাং দংজা বিয়া বাং·এ চে·ল্লে নিকনা মান·জা, বিয়া মিকগ্রি। বিখো বিনি স্খাংনি পাপওনি রংথালেতজক উখো বিয়া গুয়ালজক।

¹⁰ ইনি গিম্মিন জংআদারাং, ইসল বিবিন না·সংখো রিক্কামজক আরো বাচ্ছিয়ে রা·জক উখো হং·বিবিএতনা আরোবা বাং·এ হা·সিকমানচাবো। ইন্দাকে দাক্কোদে না·সং মামুং সালোবা জা·গিদত্তা চা·জানুয়া।

¹¹ ইনি গিম্মিন আনচিংনি গিত্তেল আরো জক্কেৎগিবা যীশু খ্রীষ্টনি সংনকও না·সংখো হা·সিকমানচাএ রা·চাকনুয়া।

¹² ইনি গিম্মিনান আংআ ফাংনান ইয়া বিদিংরাংখো না·সংখো গিসিক রা·এতিংজক। না·সং ইরাংখো হা·আইয়ান আরো জে বিবি না·সংনি খা·থংও দংআ উয়ো খেম·খেমেবা দংআ।

¹³ ইন্দিবা আংআ চানচিয়া, জেওনা দিপ্পাৎ আংআ ইয়া তাম্বু গিত্তা বে·এনো থাংএ দংনুয়া উয়োনা দিপ্পাৎ ইয়া বিদিংরাংখো গিসিক রা·এতে না·সংখো মিকরাকেতে দন্না আংনি খ্রাআনি হং·আ;

¹⁴ মুয়ানা আংআ বাং·এ ইয়া বে·এনো দংজানুয়া ইখো আনচিংনি গিত্তেল যীশু আংনা আগানজক।

¹⁵ আংনি সিয়ানি জা·মানোবা জেদাক্কে না·সং ইরাংখো গিসিক রা·আ, আংআ উনি গান্দা দাকনা নাম্মেন খ্রেংনুয়া।

ইসলনি খাৎথা বিবিরা·নি হং·আ

¹⁶ আনচিংনি গিত্তেল যীশু খ্রীষ্টনি বিল আরো বিনি রি·বাখো না·সংচা আগান্না রি·য়াংএ চিংআ মামুং বানাইগিবা গল্পখো আগানজা; চিংআ বিনি রাসংখো আন·থাংনি মিক্রোনোন নিকজক।

¹⁷ “ইয়ান আংনি খা·সাগিবা দেফান্থি, বিনি সাক্কাও আংআ খুসি হং·বিয়া,” সালগিওনি আগানা ইয়া খাৎথাচা খ্রীষ্ট ফাগিবা ইসলচাখো মান্দিরা·আ আরো রাসংখো মা·ন্নামিং।

¹⁸ চিংআ বিমুং উয়া রংথালগিবা হা·ব্রিচা দংআমিং উনো সালগিওনি আগানা ইয়া খাৎথারাংখো খিন্নামিং।

¹⁹ শাস্ত্রও আগানসোগিবারাং জেখো আগানজক উখো চিংচা বিবি ইন্নে ফিন্নিকা হং·জক। আন্দালাও না·সংনি মিক্রোন জেদাক্কে চাক্কিচানা দংআ উয়ানদাক্কেন জেওনা দিপ্পাৎ ওয়ালসেং·জা আরো না·সংনি খা·থংও ফ্রিংনি আস্কি নাবাজা উয়োনা দিপ্পাৎ আগানসোগিবারাংনি খাৎথাও গিসিক র·ন্নোদে না·সংনা নাম্মা।

²⁰ ইন্দিদে গিম্মিকনা স্খাং ইয়া খাৎথাখো গিসিকো রা·রিকবো, শাস্ত্রও দংগিবা মামুং খাৎথা আগানসোগিবারাংনি গিসিকথাংও থারিগিবা খাৎথা হং·জা,

²¹ মুয়ানা আগানসোগিবারাং বিসংনি হা·সিকা গিত্তা মামুং খাৎথাখো আগানজা; গিসিক রংথালগিবানি রি·দিলাচান বিসং ইসলনি রন·গিবা খাৎথাখো আগানজক।