2 যোহন 1 - Garo New Testament

¹ ইসল জেখো বাচ্ছিয়ে রা·জক উয়া মিচিক আরো বিনি বি·সারাংচা উয়া বুদেফা দাল·গিবা আংআ ইয়া চিঠিখো চক্কিংআ। ইসলনি বিবিনি গান্দা আংআ না·সং দিমদাকনা খা·সা। আংআসান না·সংনা খা·সা ইন্দাকেদে হং·জা, ইন্দিবা জেরাং ইসলনি বিবিখো হা·আইনা মান·জক বিসং দিমদাকান না·সংনা খা·সা।

² জে বিবি আনচিংনি খা·থংও দংআ আরো ফাংনাজলনা আনচিংমুং দংনুয়া উয়া বিবিনি গিম্মিনান চিংআ না·সংনা খা·সা।

³ ফাগিবা ইসল আরো উয়া ফাগিবানি দেফান্থি যীশু খ্রীষ্টচানিখো বিবি আরো খা·সাচা খা·সানিকা, খা·সাচাক্কা, আরো থম·থমা আনচিংমুং দংনুয়া।

বিবি আরো খা·সা

⁴ ফাগিবা আনচিংনা জেখো গি·য়েৎজক উগিত্তান নাং·নি মিত্তাম বি·সারাংখো ইসলনি বিবিনি রামাও রি·য়াখো নিক্কে আংআ খুসি হং·বিজক।

⁵ আনচিং জেদাক্কে সাকসা সাকগিপ্পিননা খা·সা, ইয়ান হং·জক নাং·চা আংনি মল·মলা। খা·সাগিবা ননো, আংনি চকগিবা গিত্তাল গি·য়েতা হং·জা, বাত্তেসা ইয়া গি·য়েতাখো চিংআ স্খাংওনিন মা·ন্নামিং।

⁶ খা·সা হং·জক ইসলনি গি·য়েতা গিত্তা রি·য়া। না·সং স্খাংওনিন জে গি·য়েতানি খাৎথাখো খিন্নাএ রি·বাংজক উগিত্তান না·সং খা·সানি রামাও রি·বো।

⁷ হা·গিলসাকো ইন্দাকা বাং·আ মান্দি হং·খাতজক জেরাং দাক্কামব্রুএ রওমিংআ। যীশু খ্রীষ্ট মান্দি হং·এ রি·বামিং বিসং উখো খু·রাচাকজা। ইন্দাকা মান্দিরাংআন দাক্কামব্রুগিবা আরো খ্রীষ্টনি বোবিল হং·আ।

⁸ না·সং সিমসাকে দংবো, জেদাক্কে না·সংনি নেং·আনি বিথি গিম্মাগিজা না·সং গিম্মিক বকসিসখোন মা·ন্না।

⁹ জেরাং খ্রীষ্টনি হন·গিবা স্খিয়াখো বাত্তাংএ রি·য়াংআ আরো উয়া স্খিয়াও খেম·খেমে দংজা বিসংনি খা·থংও ইসল দংজা। ইন্দিবা জেআন উয়া স্খিয়াও খেম·খেম দংআ বিনি খা·থংও ফাগিবা আরো দেফান্থি সাকগ্মিআন দংআ।

¹⁰ দারাংবা না·সংচা রি·বাএ উখো স্খিএতজাওদে ইন্দিদে না·সংনি নক্কো বিখো দা·আ নকচাকাবো আরো দা·আ সালামবা হ·ন্নাবো।

¹¹ জেআন বিখো সালাম হ·ন্না বিয়া বিনি নামগিজা কামনি বাকখোবা রা·আ।

¹² না·সংচা আংনি বাং·আ খাৎথা চকনা দংআমিং ইন্দাকোবা লেকখা আরো কালিচা উখো চকনা হাম·জা। উনা বাত্তে আংআ না·সংচা রি·য়াংএ মিকখাংগ্রিক খু·সুক আগান্না খা·দংআ, জেদাক্কে আনচিংনি হান·সেংআ চু·সকা।

¹³ ইসলনি বাচ্ছিয়ে দনগিবা নাং·নি ন-আবিনি বি·সারাং নাং·না সালাম হ·ন্নিংজক।