2য় করিন্থীয়রাংনা 9 - Garo New Testament

¹ ইসলনি মান্দিরাংনা হ·ন্নানি জে কাম হং·ইংজক উনি গিম্মিনো না·সংচা চক্কানি মামুংআন দংজা,

² মুয়ানা ইয়া কামনা না·সংনি গিসিক নাংআখো আংআ হা·আইয়া। আংআ না·সংখো রা·এ ম্যাসিডোনিয়ানি মান্দিরাংচা ইখো আগানে রাসং দাক্কা, রি·য়াংগিবা বিলসিওনি আখায়ানি মান্দিরাং, আগানস্খাওদে না·সং ইয়া হ·ন্নানি গিম্মিন থারিসোএ দংআ। না·সংনি ইয়া গিসিক নাংআ বিসংওনি ফাকমা মান্দিরাংখো মিকরাকেতজক।

³ আংআ ইয়া জংআদারাংখো ওয়াত্তেতিংজক জেদাক্কে ইনি গিম্মিনো না·সংখো রা·এ চিংনি রাসং দাক্কা বিবি হং·আ ইখো বিসং নিকনা মা·ন্না, আরো আংআ জেগিত্তা আগানজক উগিত্তান জেদাক্কে না·সং বিবিন থারিসোএ দংনা মা·ন্না।

⁴ ইন্দাকজাওদে ম্যাসিডোনিয়ানি মান্দিরাং আংমুং রি·য়াংফাএ না·সংনি থারিসোগিজাখো নিক্কোদে ইন্দিদে না·সংনি সাক্কাও চিংনি ইন্দাকফিল্লে বিবিরা·আনি গিম্মিন চিংআ খ্রাচা·নুয়া; আরো না·সংবা খ্রাচা·নুয়া।

⁵ উনি গিম্মিন আংআ ইয়া জংরাংখো স্খাং না·সংচা রি·য়াংখানা মল·মলনা নাংনুয়া ইন্নে চানচিজক, জেদাক্কে না·সং জে দাল·বাৎগিবা হ·ন্নানিখো হ·ন্না খু·রাচাক্কামিং উখো বিসং স্খাংআন থারিয়ে দনসোনা মা·ন্না। উনি গিম্মিন না·সংচানিখো চিংনি দ্রাএ মামুংখো রা·না নাংজানুয়া, বাত্তেসা না·সং জেখো হ·ন্নুয়া উয়া হ·ন্নানি গিত্তা স্খাংআন থারিসোয়া দংনুয়া।

হ·ন্নানি বিদিংও স্খিয়া

⁶ গিসিক দনবো, জেআন বিৎচ্রিখো অকখিসা গোওয়া বিয়া মিবিথিখো অকখিসান রাতনুয়া আরো জেআন বিৎচ্রিখো বাং·এ গোওয়া বিয়া মিবিথিখো বাং·এ রাতনুয়া।

⁷ সাকফ্রাকান গিসিকথাংথাংও জেখো চানচিয়ে দনজক বিয়া উখোন হন·খানা। সাবা গিসিকো দুক রা·এ হন·জাখানা বা হ·ন্না নাংনুয়া ইন্নে হন·জাখানা, মুয়ানা জেআন খুসি হং·এ হ·ন্না ইসল বিনা খা·সাআ।

⁸ না·সংনা গিম্মিক গিত্তা খা·সাচাক্কানি বিল ইসলনি দংআ, জেদাক্কে না·সংনি নাংগিবা গিম্মিকান ফাংনান না·সংচা দংআ; আরো উনি গিম্মিন জেদাক্কে না·সং গিম্মিক নাম্মা কামরাংনা জাকস্রামে হ·ন্না মা·ন্না।

⁹ রংথালগিবা শাস্ত্রও চক্কা দংআ, বিয়া জাকস্রামে দিল্লা-চন্নারাংনা হন·জক; বিয়া ফাংনাজলনা খাকখেৎগিবা হং·আ।

¹⁰ জেআন গামগিবানা বিৎচ্রিখো আরো চা·না রুটিখো হ·ন্না বিয়া না·সংনা গোনা বিৎচ্রিখোবা হ·ন্নুয়া আরো উখো জাল্লেতনুয়া। আরো বিয়া না·সংনি নাম্মা কামনি বিথিখো বাং·এ হ·ন্নুয়া।

¹¹ না·সং গিম্মিক গিত্তান নকমা হং·নুয়া জেদাক্কে না·সং জাকস্রামে হ·ন্না মা·ন্না, আরো উয়োন চিং গিত্তা ইসলখো মিৎথেলা হং·নুয়া।

¹² না·সংনি ইয়া কামনি হা·সেল ইসলনি মান্দিরাংনি দিল্লা দংজানুয়া ইন্দাকেসান হং·জা; ইসলনি গিম্মিন বাং·আ মান্দিরাংনি মিৎথেলাবা গাপসুয়াকনুয়া।

¹³ না·সং বিবিরা·না খ্রাগিবা হং·আ, না·সংনি ইয়া হ·ন্না উখো ফিন্নিকনুয়া, আরো উখো নিক্কে বিসং ইসলনি রাসংখো দাকনুয়া, মুয়ানা না·সং খ্রীষ্টনি গিম্মিন নাম্মা খাৎথাখো বিবিরা·এ উয়ো বাম্মে দংজক আরো না·সং জাকস্রামে বিসংনা আরো গিপ্পিনরাংনা হন·জক।

¹⁴ ইসলচাখো না·সং জে বন·চাংগিজা খা·সাচাক্কাখো মান·জক উনি গিম্মিন বিসং খা·থং গিম্মিকো না·সংনা বি·নুয়া।

¹⁵ জে হ·ন্নানি খাৎথাখো খু·সুকচা ফারাকনা মান·জা ইসলনি উয়া হ·ন্নানি গিম্মিন বিখো মিৎথেলা।