2য় করিন্থীয়রাংনা 6 - Garo New Testament

¹ ইসলমুং কাম রিম·ফাগিবা হং·এ চিংআ না·সংখো ইন্দাকে মল·মলিংজক, ইসলনি খা·সাচাক্কাখো মান·জক ইন্নে না·সং উখো দা·আ নাসি-নাদা দাক্কেতাবো।

² ইসল রংথালগিবা শাস্ত্রও আগানজক, “খ্রাগিবা সময়ও আংআ নাং·নি খাৎথাখো খিন্নাজক আরো পাপওনি জক্কানি সালো আংআ নাং·না দাকচাকজক।” নিবো, দা·আওন খ্রাগিবা সময়, দা·আলান জক্কানি সাল।

ওয়াত্তেতা পৌলনি দাকচাকে হ·ন্নানি কামখো ফিন্নিকা

³ খ্রীষ্টনি গিম্মিন চিংআ জে কামখো দাক্কা উখো জিজাখানা ইন্নে চিংআ ইন্দাকগিবা মামুংখোবা দাকজা জেনি হা·সেল দারাংবা গিসিকো চাংফেংআখো মান·জা।

⁴ উনা বাত্তে গিম্মিকোন ইসলনা দাকচাকে হন·গিবা ইন্নে চিংআ আন·থাংথাংখো ফিন্নিকা। গিচ্চিয়ারাংও, হং·সিয়ারাংও আরো দুকরাংও বাং·এ চাকচিকে চিংআ ইখোন ফিন্নিকিংজক।

⁵ বাসিক রাং·সা চিংখো দকজক-সিকজক, বাসিক রাং·সা জেলো দনজক, বাসিক দক্কা-সু·আ চিংনি সাক্কা গিত্তা রি·য়াংজক, বাসিক নেং·বিএ কাম দাকজক, বাসিক থুগিজা ওয়ালখো সেং·এতজক আরো বাসিক রাং·সা চা·গিজা দংজক।

⁶ ইনাআগ্রে চিংনি খাকখেৎ জাংগিচা, চিংনি হা·আইয়াচা, চাকচিকানি গুণচা আরো খা·সাচাক্কাচা, গিসিক রংথালগিবাচা, চিংনি খাকখেৎ খা·সাচা,

⁷ বিবিখো আগানফ্রাকাচা আরো ইসলনি বিলচা চিংআ ইখো ফিন্নিকিংজক, চিংআ ইসলনা দাকচাকে হন·গিবা। দা·আবা জাক সামগ্মিও খাকখেৎনি জাকরিমরারাংখো রা·এ চিংআ ইখো ফিন্নিকিংজক, চিংআ ইসলনা দাকচাকে হন·গিবা।

⁸ মান্দিরাং চিংখো মান্দিরা·খানা বা রা·জাখানা, চিংনি গিম্মিন নাম্মাখো আগানখানা বা নামগিজাখো আগানখানা, চিংআ ইসলনা দাকচাকে হন·গিবা হং·আ ইখো চিংআ ফিন্নিকিংআ। মান্দিরাং চিংখো থকাই চা·গিবা ইন্নে আগানা, ইন্দিবা চং·মতদে চিংআ বিবিনি রামাও রি·য়া।

⁹ মান্দিরাং চিংখো হা·আইনা হাম·জা, ইন্দিবা গিম্মিকান চিংখো হা·আইয়া। চিংআ সিনা গিত্তিক দাক্কিংজক, ইন্দাকোবা থাংএ দংখুংআ। চিংখো দক্কিংজক-সিক্কিংজক, ইন্দাকোবা সিয়েতখুজাংআ।

¹⁰ চিংআ দুক বাং·এ মা·ন্নিংজক, ইন্দাকোবা চিংনি খা·থং ফাংনান হান·সেংআও গাপ্পা। চিংআ আন·থাংদে দিল্লা, ইন্দাকোবা চিংআ বাং·আখোন নকমা চায়েতিংজক। চিংনি মামুংআন দংজা, ইন্দাকোবা চিংআ গিম্মিকখোন মান·রিকগিবা হং·আ। ইন্দাকেন চিংআ ফিন্নিকিংজক, চিংআ ইসলনা দাকচাকে হন·গিবা হং·আ।

¹¹ করিন্থীনি বিবিরা·গিবারাং, চিংআ না·সংচা স্রংস্রাংএন খাৎথা আগানজক আরো না·সংচা চিংনি খা·থংখো এংফ্রাকজক।

¹² চিংআ চিংনি খা·থংখো না·সংনা এংফ্রাকে দনজক, ইন্দিবা না·সং না·সংনি খা·থংখো চিংনা চিপচাংএ দনজক।

¹³ আংনি দেদ্রাং গিত্তা আংআ না·সংনা আগানিংজক, চিংআ জেগিত্তা না·সংনা চিংনি খা·থংখো এংফ্রাকে দন্না না·সংবা উগিত্তান না·সংনি খা·থংখো চিংনা এংফ্রাকে হন·বো।

বিবিরা·গিজাগিবারাংমুং দা·আ নাংরিমাবো

¹⁴ না·সং বিবিরা·গিজাগিবারাংমুং আপসান জোয়ালখো দা·আ ফাকখ্রংও গাত্তাবো। খাকখেৎমুং খাকখেৎগিজা বানো নাংরিমা? সেং·আমুং আন্দালা নাংরিমামা?

¹⁵ খ্রীষ্টমুং বলীয়ালনি, আগানস্খাওদে শয়তানমুং বাও আপসান হং·আ? ইসলনি মান্দি গিত্তা বিবিরা·গিবানি জে মান·রিকানি দংআ উয়ো বিবিরা·গিজাগিবানি বাক মুয়া?

¹⁶ আরো ইসলনি দংগিবা নকও মিত্তে বিমাংনি হা·দাম বাও? আনচিংদে থাংগিবা ইসলনি দংআনি নক হং·আ। রংথালগিবা শাস্ত্রও ইসল আগানজক, “আংআ আংনি মান্দিরাংনি গিসেপো দংনুয়া, আরো বিসংমুংআন রি·ফানুয়া। আংআ বিসংনি ইসল হং·নুয়া, আরো বিসং আংনি আন·থাংনি মান্দি হং·নুয়া।”

¹⁷ ইসল আরোবা আগানজক, “ইনি গিম্মিন না·সং বিবিরা·গিজাগিবারাংওনি হং·খাতে রি·বাবো আরো দিংথাং হং·বো। মারাং নাংগিবা মামুংখো দা·আ রি·ম্মাবো, ইন্দাকোদে আংআ না·সংখো রা·চাকনুয়া।”

¹⁸ ইনাআগ্রে “বিল্লাকস্রাংগিবা গিত্তেল আগানা, ‘আংআ না·সংনি ফাগিবা হং·নুয়া আরো না·সং আংনি দেদ্রাং হং·নুয়া।’ ”