2য় করিন্থীয়রাংনা 4 - Garo New Testament

¹ ইয়া নিয়ামখো হা·আইএতানি কামখো খা·সাচাক্কে ইসল চিংনা হন·জক ইন্নে চিংআ খা·দংআগ্রি হং·জা।

² মান্দিরাং থুম্মুয়ে খ্রাচা·আনি জে কামরাংখো দাক্কা চিংআ উরাংখো রেকথেক দাকজা। চিংআ কামরাংও বু·আনি মামুংখো দাকজা, ইসলনি খাৎথাও মামুং বু·আনিখো দনজা। বাত্তেসা চিংআ ইসলনি বিবিখো ফারাকে বিনি মিকখাংওন মান্দি গিম্মিকনি গিসিকচা আন·থাংথাংখো রা·চাকনা খ্রাগিবা দাক্কে ফিন্নিকা।

³ চিংনি নাম্মা খাৎথা ফিনদাপে দংওদে জেরাং ব·ন্নাংইংজক বিসংচান ফিনদাপে দংআ।

⁴ বিবিরা·গিজাগিবা মান্দিরাংনি গিসিকখো ইয়া চাসংনি মিত্তে মিকগ্রি দাক্কে দনজক জেদাক্কে বিসং নাম্মা খাৎথানি সেং·আখো নিকনা মান·জা। ইয়া নাম্মা খাৎথাও খ্রীষ্টনি রাসং ফারাকজক, আরো ইয়া খ্রীষ্টন ইসল চাচা দাক্কা।

⁵ চিংআদে আন·থাংথাংনি গিম্মিন আগানফ্রাকজা, বাত্তেসা ইন্দাকে আগানফ্রাকা, যীশু খ্রীষ্টন গিত্তেল আরো যীশুনি গিম্মিনান চিংআ না·সংনি নকখল হং·জক।

⁶ চিংআ ইয়া খাৎথাখো আগানফ্রাকিংজক, মুয়ানা জেআন আগানামিং, “আন্দালাওনি সেং·খানা,” উয়া ইসলান চিংনি খা·থংও চিং·আমিং, জেদাক্কে বিনি রাসংখো হা·আইয়ানি সেং·আ ফারাকা। ইয়া রাসংআন খীষ্টনি মিকখাংও দংআ।

হা·আনি দনচাক্রাও দনগিবা গাম

⁷ ইন্দিবা ইয়া গামখো হা·আনি দনচাক্রাও দনজক, আরো চিংআন উয়া হা·আনি দনচাক্রা। হা·আনি দনচাক্রাও উখো দন্না জেদাক্কোদে মান্দিরাং হা·আইনা মা·ন্না, ইন্দাকগিবা রামরাম হং·গিজা বিল আনচিংনি আন·থাংওনি রি·বাজা বাত্তেসা ইসলওনিন রি·বাআ।

⁸ গিম্মিকচানিন চিংআ সিনজেতাখো মা·ন্নিংজক, ইন্দাকোবা চিংআ গা·আকখুজা। নাওয়াং চাওবা চিংআ খা·দংআগ্রি হং·খুজা;

⁹ গিচ্চিয়েতাখো মা·ন্নোবা ইসল চিংখো ওয়াতগালজা; হা·আও গোস্থাপোবা চিংআ ব·ন্নাংজা।

¹⁰ চিংআ ফাংনান গিত্তেল যীশুনি সিয়াখো চিংনি বে·এনো রা·বিতে রি·ইংআ, জেদাক্কে চিংনি বে·এনো যীশুনি জাংগিবা ফারাকা।

¹¹ চিংআ জেরাং থাংএ দংআ চিংখো ফাংনান যীশুনি গান্দা সিয়ানি জাক্কো ফাকওয়াতে হ·ন্নিংজক, জেদাক্কোদে সিয়ানি নিং·আও দংগিবা চিংনি বে·এনো যীশুনি জাংগিবা ফারাকা।

¹² উনি গান্দা চিংও সিয়া কাম দাক্কিংজক ইন্দিবা না·সংও জাংগি কাম দাক্কিংজক।

¹³ রংথালগিবা শাস্ত্রও চক্কা দংআ, “আংআ বিবিরা·জক ইন্নেন খু·সুক আগানজক।” ইন্দাকে আপসানখোন বিবিরা·আ ইন্নে চিংআবা খু·সুক আগানিংজক,

¹⁴ মুয়ানা চিংআ হা·আইয়া, জেআন গিত্তেল যীশুখো থাংএতামিং বিয়া বিমুং চিংখোবা থাংএতনুয়া আরো না·সংমুং চিংখোবা আন·থাংনি মিকখাংও চাদেংএতনুয়া।

¹⁵ গিম্মিকান না·সংনি নাম্মানান হং·জক, জেদাক্কে ইসলনি জে খা·সাচাক্কাখো বাং·আ মান্দিরাংনা হন·জক উয়া খা·সাচাক্কানা বাং·আরাংএন ইসলখো আরোবা বাং·এ মিৎথেলা আরো ইন্দাকে ইসলনি রাসং হং·আ।

বিবিরা·আও জাংগিখো মিৎথাংএতা

¹⁶ ইনি গান্দা চিংআ খা·দংআগ্রি হং·জা। চিংনি হা·ফালনি বে·এন ব·ন্নাংওবা চিংনি নিং·আনি মান্দি সালনি সাল গিত্তাল হং·বারিকরিকিংআ।

¹⁷ দা·আও চিংআ বাং·গিজা সালনা অকখিসা মা·মাং জে দুকখো চাক্কিংজক উনি হা·সেল চিংআ ফাংনাজলনি রাসংখো মা·ন্নুয়া। ইয়া রাসং ইন্দাকেন বাং·আ জেখো থোনা মান·জা।

¹⁸ জেখো নিকনা মা·ন্না আনচিং উখো নিজাংআ, বাত্তেসা জেখো নিকজা উখোন নিইংজক। জেখো নিক্কা উয়া বাং·গিজা সালনাসান, ইন্দিবা জেখো নিকজাংআ উয়াদে ফাংনাজলনি।