2য় করিন্থীয়রাংনা 13 - Garo New Testament

সিমসাকেতা

¹ ইয়া রাং·গিত্থামগিবাও আংআ না·সংচা রি·বাজক। শাস্ত্রও চক্কা দংআ, “সাকগ্মি বা সাকগিত্থাম সাক্ষিনি খু·সুকচা ইরাং বিবি হং·আ ইন্নে নিকনা মা·ন্না।”

² রাং·গ্মিগিবাও আংআ না·সংচা দংমিত্তিংও স্খাংও জেরাং পাপ দাক্কামিং বিসংখো আরো সাকগিপ্পিনরাংখো আংআ সিমসাকেতামিং। দা·আও আংআ দংজাওবা দা·আবা না·সংখো সিমসাকেতি আগানিংজক, জেনসালো আংআ রি·বানুয়া উনো সাকসাখোবা ওয়াতজানুয়া,

³ মুয়ানা খ্রীষ্ট আংনি গিসেপো খাৎথা আগানা উখো না·সং নিকনা হা·ম্মা। বিয়া না·সংনি গিম্মিন বিলগ্রি হং·জা, বাত্তেসা বিনি বিলখো বিয়া না·সংনি গিসেপো ফিন্নিকা।

⁴ বিখো বিলগ্রি অবস্থাও চিসলো দাৎখাপামিং, ইন্দিবা ইসলনি বিলও বিয়া থাংএ দংআ। চিংআ বিমুং নাংরিমে বিলগ্রি হং·জক, ইন্দিবা না·সংনি গিম্মিন ইসলনি বিলও বিমুং চিংআ থাংএ দংনুয়া।

⁵ না·সং আন·থাংথাংখো নিফিলে নিবো না·সং বিবিন খ্রীষ্টখো বিবিরা·আমা রা·খুজা। না·সং আন·থাংথাংখো নাম্মেদাক্কে নিবো। খ্রীষ্ট যীশু না·সংনি খা·থংও দংআ, ইখো না·সং হা·আইজামা? ইন্দাকোবা নাম্মেদাক্কে নিয়ানি গিম্মিন জেদাক্কে না·সংনি খাকখেৎ হং·গিজাখো রিম·না মান·জা।

⁶ ইন্দিবা আংআ খা·দংআ না·সং হা·আইনা মা·ন্নুয়া, চিংখো খাকখেৎ ইন্নে ফিন্নিকা হং·জক।

⁷ চিংআ ইসলচা বি·আ জেদাক্কে না·সং মামুং নামগিজা কামখো দাকজা। গিপ্পিনরাং চিংখো খাকখেৎ ইন্নে চানচিখানা চিংআ ইখো হা·ম্মা ইন্দাকেদে হং·জা। চিংআ হা·ম্মা, বিসং চিংখো খাকখেৎ ইন্নে চানচিজাওবা না·সং জেআন নাম্মা উখো দাকবো।

⁸ বিবিনি সাক্কাও চিংনি মামুং বিল দংজা ইন্দিবা বিবিনা দংআ।

⁹ জেনসালো চিংআ বিলগ্রি হং·আ আরো না·সং বিল্লাকগিবা হং·আ উনো চিংআ খুসি হং·আ। আরো চিংআ ইখো বি·আ জেদাক্কে না·সং গিম্মিকখো থিক দাক্কে রা·এ চু·সকানি রামাও রি·য়া।

¹⁰ ইনি গিম্মিন আংনি দংগিজাওন আংআ না·সংনা ইরাংখো চক্কিংজক, সকবাজোকনো জেদাক্কে গিত্তেল আংনা জে বিলখো হন·জক উখো জাকখালনা নাংজা। না·সংখো রিক্কা উয়া বিলনি মিকসংআ হং·আ, না·সংনি নামগিজাখো দাকনাদে হং·জা।

বন·খামগিবা সালাম

¹¹ জংআদারাং, দা·আওদে রি·য়াংনাজক। না·সং না·সংনি গিম্মিকখো থারিয়ে চু·সকানি রামাও রি·য়াংবো। আংনি খাৎথাও গিসিক হন·বো। না·সংনি গিসিক আপসান হং·খানা, আরো না·সং থম·থমাও দংবো। ইন্দাকোদে খা·সা আরো থম·থমানি ইসল না·সংমুং দংনুয়া।

¹² খা·সানি গিসিকখো রা·এ না·সং সাকসা সাকগিপ্পিননা সালাম হন·বো।

¹³ ইসলনি গিম্মিক মান্দিরাং না·সংনা সালাম হ·ন্নিংআ।

¹⁴ আনচিংনি গিত্তেল যীশু খ্রীষ্টনি খা·সাচাক্কা, ইসলনি খা·সা আরো গিসিক রংথালগিবানি নাংরিমা না·সং গিম্মিকমিং দংখানা।