2য় করিন্থীয়রাংনা 11 - Garo New Testament

পৌল আরো বু·এ চা·গিবা ওয়াত্তেতারাং

¹ না·সং আংনি অকখিসা গিসিক সেং·গিজাখো চাকবো ইখো আংআ হা·ম্মা। ইখো না·সং চাক্কিংজকান।

² না·সংনি গিম্মিন আংআ আংনি খা·থংও ইসলনি হন·গিবা গিসিক সা·দিকাও সা·দিকিংজক, মুয়ানা আংআ চাওয়ারি সাকসা মা·মাংমিং, আগানস্খাওদে খ্রীষ্টমুং না·সংনি বিয়ানি গিম্মিনো থিক দাক্কে দনসোজক, জেদাক্কে রংথালগিবা নামচিক গিত্তা বিচান না·সংখো হ·ন্না মা·ন্না।

³ ইন্দিবা উয়া চিপ্পু বিনি নামগিজা বুদ্ধিচা জেদাক্কে হবাখো থগিয়েতামিং উয়ানদাক্কে খ্রীষ্টনি গিম্মিন স্রংআ আরো রংথালা অলাখিয়াওনিখো সাবা না·সংখোবা থগিয়েতনা দংআ ইন্নে আংআ খেনমানিংআ।

⁴ জে যীশুনি খাৎথাখো চিংআ আগানফ্রাকজক সাবা বিনা আগ্রে গিপ্পিন যীশুনি খাৎথাখো না·সংচা আগানফ্রাকোদে, বা জে গিসিক রংথালগিবাখো না·সং মান·জক বিনা আগ্রে দিংথাং দাকগিবা গিসিকখো না·সং মা·ন্নোদে, বা জে নাম্মা খাৎথাখো না·সং রা·চাকজক উনা আগ্রে দিংথাং দাকগিবা নাম্মা খাৎথাখো না·সং মা·ন্নোদে, খুসি হং·এন উরাংখো মানিয়ে রা·আ।

⁵ ইন্দিবা আংআ উয়ানদাকগিবা “মংসংগিবা” ওয়াত্তেতারাংনা বাত্তে জা·মান চাক্কা ইন্নে আংআদে চানচিমানজা।

⁶ আংআ নাম্মেদাক্কে খাৎথা আগান্না মান·জা ইন্দাকোবা আংনি হা·আইয়া দংআ আরো উখো গিম্মিক গিত্তান না·সংচা ফারাকজক।

⁷ ইসলনি হন·গিবা নাম্মা খাৎথাখো আংআ না·সংচা আগানফ্রাকে আন·থাংখো চন্নেতজক জেদাক্কে না·সংখো দাল·নিকে ফিন্নিকনা মা·ন্না। ইনি হা·সেল আংআ পাপ দাকজকমা?

⁸ না·সংনা দাকচাকে হ·ন্না আংআ গিপ্পিন মন্ডলীরাংচাখো থাংখা রা·জক, আগান্না রি·য়াংওদে বিসংচাখো রা·সেকজক।

⁹ না·সংমুং দংমিত্তিংও আংনি চু·ওংজাওবা আংআ দারাংনিবা বোঝা হং·জা, মুয়ানা ম্যাসিডোনিয়াওনি রি·বাগিবা জংআদারাংআন আংনি চু·ওংগিজাখো চু·সকেতামিং। মামুংনান আংআ না·সংনি বোঝা হং·খুজা আরো হং·বা হং·জানুয়া।

¹⁰ আংও খ্রীষ্টনি জে বিবি দংআ উগিত্তা আংআ আগান্না, আখায়া হা·দকনি মামুং হা·দামওন আংনি ইয়া রাসং দাক্কাখো দারাংবা দনচাংএতনা মান·জানুয়া।

¹¹ মুয়ানা আংআ ইয়া খাৎথাখো আগানিংজক? না·সংখো খা·সাজানি গিম্মিনমা? আংআ না·সংনা খা·সা ইখো ইসল হা·আইয়া।

¹² জেরাং বিসংনি রাসং দাক্কাখো রা·এ আন·থাংথাংখো চিংনি আপসান ইন্নে ফিন্নিকনা হা·ম্মা বিসং উয়া চলখো মান·জাখানা উনি গিম্মিন আংনি দাকগিবাখো আংআ দাক্কেন দংনুয়া।

¹³ চং·মতদে উয়ানদাকগিবা মান্দিরাং বু·এ চা·গিবা ওয়াত্তেতা আরো থকাই চা·গিবা কাম রিম·গিবা হং·আ। আন·থাংথাংখো খ্রীষ্টনি ওয়াত্তেতা ইন্নে ফিন্নিকনা বিসং আন·থাংথাংখো দিংথাং দাকফিলা।

¹⁴ ইনি গিম্মিন আইয়াও ইনমানানি মামুং দংজা, মুয়ানা শয়তানবা আন·থাংখো সেং·আও চু·সকগিবা সা·গ্রে হং·আ ইন্নে ফিন্নিকনা আন·থাংখো দিংথাং দাক্কে গাল্লা।

¹⁵ ইন্দাকোদে জেরাং শয়তাননা দাকচাকে হ·ন্না বিসং আন·থাংথাংখো দিংথাং দাক্কে খাকখেৎনা দাকচাকে হ·ন্না ইন্নে ফিন্নিকোদে, উনোদে আইয়াও ইনমানানি মুয়া দংআ? জা·মানো বিসংনি কামনি খ্রি মা·ন্নাগিবাখোন বিসং মা·ন্নুয়া।

ওয়াত্তেতা হং·এ পৌলনি দুক চাক্কা

¹⁶ আংআ দা·আবা আগান্না, দারাংবা আংখো জাদা ইন্নে চানচিজাখানা। না·সং ইন্দাকে চানচিওদে জাদা ইন্নেন আংখো রা·চাকবো, জেদাক্কোদে আংআ অকখিসা রাসং দাকনা মা·ন্না।

¹⁷ আংআ দা·আও গিত্তেলনি গি·য়েতা গিত্তা আগানজাংআ, ইন্দিবা আন·থাংনি গিম্মিন রাসং দাকনা রি·য়াংএ জাদা গিত্তান আগানিংআ।

¹⁸ মান্দিরাং জেখো রা·এ রাসং দাক্কা, বাং·আরাংএন উখো রা·এ রাসং দাক্কোদে আংআবা মুয়ানা দাকজানুয়া?

¹⁹ না·সং হা·আইগিবা হং·আ ইন্নে খুসি হং·এ জাদারাংখো চাকচিকা।

²⁰ ইয়াসান হং·জা, সাবা না·সংখো নকখল দাক্কোদে, না·সংখো চু·গিম্মিক ব·ন্নেতোদে, না·সংখো জা·গাও গাল্লোদে, না·সংনি নকগিবা হং·ওদে বা না·সংনি নাথেংখো চরাইওদে, না·সং উরাংখোবা চাক্কা।

²¹ ইরাংনি গিম্মিন চিংআ না·সংচা বিলগ্রিমিং ইখো আংআ খ্রাচা·এ খু·রাচাকিংজক। জেখো রা·এ রাসং দাকনা গিপ্পিনরাং ফা·আ আংআবা উখো রা·এ রাসং দাকনা ফা·আ; ইয়া খাৎথাখো আংআ জাদা গিত্তান আগানিংজক।

²² রাসং দাকগিবারাং ইব্রীয় হং·আমা? আংআবান উয়ান হং·আ। বিসং ইস্রায়েলনি হং·আমা? আংআবান উয়ান হং·আ। বিসং অব্রাহামনি দেরিচ্ছু হং·আমা? আংআবান উয়ান হং·আ।

²³ বিসং খ্রীষ্টনা দাকচাকে হন·গিবা হং·আমা? আংআ আরোবা বাং·এ দাক্কে উয়ান হং·আ। গিসিকো রা·রিকবো, আংআ খোরে মান্দি গিত্তা খাৎথা আগানিংআ। খ্রীষ্টনা দাকচাকে হ·ন্না রি·য়াংএ আংআ বিসংনা বাত্তে বাং·এ বিমচিপজক, বাং·এ জেলো দংজক, আরোবা বাং·এ দক্কা চা·জক, রাং·নিরাং সিনা গিত্তিক হং·জক।

²⁴ যিহূদীরাংনি জাক্কো আংআ রাং·বংআ সৎব্রি চাবুক দক্কাখো চা·জক,

²⁵ বেতচা আংখো রাং·গিত্থাম দকজক। রাং·সাও আংখো রং·থিচা গোথাত্তামিং। রাং·গিত্থাম আংনি জাহাস রিপ্পামিং। সালসা আরো ওয়ালসা আংআ সাগালনি চিও দংআমিং।

²⁶ আংআ হা·সং বাং·এ রোমজক। চি দা·ল্লানি গিম্মিন, রা·সেকে রা·গিবারাংনি গিম্মিন, আন·থাংনি জাতস্খা মান্দিরাংনি গিম্মিন আরো গিপ্পিন জাতরাংনি গিম্মিন আংআ হং·সিয়াও গা·আকজক। ইনাআগ্রে সংজিলমাও, হা·গিসি জওলো, সাগালও আরো বু·এ চা·গিবা জংআদারাংনি গিসেপোবা আংআ হং·সিয়াও গা·আকজক।

²⁷ খ্রীষ্টনা দাকচাকে হ·ন্না রি·য়াংএ আংআ দুকনি গিসেপোবা নেং·দিকে কাম দাকজক। আংআ থুগিজা বাসিক ওয়াল সেং·এতজক, অকখ্রিয়ানা আরো চি রিংনা হা·সিকানা দুক মান·জক, চা·গিজা দংজক, সি·ন্নানা আরো বা·রা-চলারাং দংজানা দুক মান·জক।

²⁸ ইরাংনা আগ্রেবা গিম্মিক মন্ডলীরাংনা সালাজ্রিংআন আংআ চানচিবিংজক।

²⁹ সাবা বিলগ্রি হং·ওদে আংআ বিমুং বিলগ্রি হং·ফাজামা? সানিবা হা·সেলো সাবা পাপও গা·আকোদে উনা গান্দা আংআ খা·খিমচাজামা?

³⁰ আংনি রাসং দাকনান নাংওদে আংআ আংনি বিলগ্রিখো রা·এন রাসং দাকনুয়া।

³¹ আনচিংনি গিত্তেল যীশু খ্রীষ্টনি ইসল আরো ফাগিবা, জেআন ফাংনাজলনা রাসংখো মা·ন্না খ্রাগিবা হং·আ, বিয়া হা·আইয়া আংআ বু·এ আগানজাংআ।

³² দামেস্কও রাজা আরিতানি নিং·আও দংগিবা শাসন দাকগিবা আংখো রিম·না ইন্নে দামেস্করাংনি সংজিলমাখো রাক্ষিখানা গি·য়েতামিং।

³³ ইন্দিবা দেয়ালনি জানলা গিত্তা আংখো খকো দাক্কে রং·খাত্তেতামিং, আরো ইন্দাকেন আংআ বিনি জাকওনি খাত্তে রি·য়াংআমিং।