1 তীমথিয় 6 - Garo New Testament

¹ জে নকখলরাংনি নাম্মেন গামনা নাংআ বিসং গিম্মিকান বিসংনি নকগিবারাংখো মান্দিরা·আখো মা·ন্না খ্রাগিবা দাক্কে চানচিখানা, জেদাক্কে দারাংবা ইসলনি বিমুংখো আরো আনচিংনি স্খিএতাখো জিনা মান·জা।

² জে নকখল খ্রীষ্টও বিবিরা·গিবা নকগিবানি নিং·আও দংআ বিয়া জেদাক্কে বিবিরা·গিবা জংআদা ইন্নেন উয়া নকগিবাখো চন্নিকজা বাত্তেসা আরোবা নাম্মেদাক্কে বিনা দাকচাকে হ·ন্না, মুয়ানা বিনি দাকচাকে হ·ন্নাও জেআন দাকচাকাখো মা·ন্নিংআ বিয়াদে বিবিরা·গিবা হং·আ আরো বিনি খা·সাগিবা হং·আ। ইরাংনি গিম্মিনো স্খিয়েতবো আরো নাম্মাখো আগানবো।

ব্রাংগিবা স্খিয়া আরো খাকখেৎগিবা গাম

³ সাবা দিংথাং দাক্কে স্খিওদে আরো খাকখেৎখো, আগানস্খাওদে আনচিংনি গিত্তেল যীশু খ্রীষ্টনি স্খিয়া আরো ইসলখো অলাখিয়ানি স্খিয়াখো মানিজাওদে বিয়া গাং·বিংগিবা হং·আ।

⁴ বিয়া মামুংখোন হা·আইজা; নিরিয়া আরো জিগ্রিকা জেদাক্কে বিনি গি·সা সাআ গিত্তা হং·আ। ইরাংনি বিথি হং·জক- মিকনেংআ, নিরিয়া, জিআ, ফত্তা,

⁵ আরো গিসিক চনগিবারাংনি গিসেপো গোলমাল দাক্কা। ইন্দাকা মান্দিরাংও ইসলনি বিবি দংজা; বিসং খ্রীষ্টনি থরমনি বিবিখো হা·গিলসাকো মান·দাপানি চল ইন্নে চানচিয়া।

⁶ ইন্দিবা খুসি হং·গিবা গিসিকো খ্রীষ্ট থরমনি বিবিরা·আ গিত্তা রি·ওদে নাম্মেন মান·দাপানি হং·আ।

⁷ হা·গিলসাকো আনচিংদে মামুংখোন রা·এ রি·বাজা আরো হা·গিলসাকনিখোবা মামুংখোন রা·আংনা মান·জানুয়া।

⁸ ইন্দিদে চা·আ আরো বা·রা দংজোকনোন আনচিং খুসি হং·নুয়া।

⁹ ইন্দিবা জেরাং মা·ন্নে চা·গিবা হং·না হা·ম্মা বিসং বাং·আ রুরাও আরো জা·গাও গা·আকা, আরো ইন্দাকা নামগিজাস্রাং হা·সিকা বিসংনি হং·আ জেরাং মান্দিখো ব·ন্নেতাও আরো হং·সিয়াও গাল্লেতা।

¹⁰ থাংখা-পয়সানা নামনিকা হং·জক নামগিজা গিম্মিকনি জা·থিং। বাং·আরাংএন থাংখা-পয়সানা মাদ্দুয়ে খ্রীষ্টান থরমখো বিবিরা·আওনি জিত্তাংএ আন·থাংথাংনি সাক্কাও বাং·আ দুকরাংখো রিংগামে রা·বাজক।

বন·চতগিবা স্খিয়া

¹¹ ইন্দিবা না·আদে ইসলনি মান্দি; ইরাংওনি না·আ খাতবো। খাকখেৎ জাংগি, অলাখিয়া, বিবিরা·আ, খা·সাআ, চাকচিকা আরো রিন্নকা গিসিক-বেওয়ালনা গিসিক নাংবো।

¹² খ্রীষ্টখো বিবিরা·আনি গিম্মিন বিনা চাক্কে সিমাংথাংমাং দাকগ্রিকে রি·য়াংবো। জে ফাংনাজলনি জাংগিনি গিম্মিন ইসল নাং·খো রিক্কামামিং উয়া ফাংনাজলনি জাংগিখো রি·ম্মে রা·রিকবো। না·আ বাং·আ মান্দিরাংনি মিকখাংওন নাং·নি বিবিরা·আনি সাক্ষিখো হ·ন্নামিং।

¹³ ইসল জেআন গিম্মিকনা জাংগিখো হ·ন্না আরো খ্রীষ্ট যীশু, জেআন পন্তীয় পিলাতনি মিকখাংও বিবিনি গিম্মিনো সাক্ষি হ·ন্নামিং, উয়া ইসল আরো খ্রীষ্ট যীশুনি মিকখাংও আংআ নাং·না ইখো গি·য়েতিংজক-

¹⁴ আনচিংনি গিত্তেল যীশু খ্রীষ্ট ফারাকখুজা দিপ্পাৎ খাকখেৎ দাক্কে আংনি গি·য়েতাখো মানিয়ে রি·য়াংবো, জেদাক্কে দারাংবা নাং·খো জিনা মান·জা।

¹⁵ উয়া মিৎথেলা মান·স্রাংগিবা ইসল, জেআন সাকসা মা·মাং শাসন দাকগিবা হং·আ, জেআন রাজারাংনি রাজা আরো গিত্তেলরাংনি গিত্তেল হং·আ, বিয়ান বিনি খ্রাগিবা সময়ও খ্রীষ্টখো ফারাকেতনুয়া।

¹⁶ সাকসা মা·মাং ইসলসান সিয়ানি নিং·আও হং·জা। বিয়া ইন্দাকগিবা সেং·আও দংখামা জেও সাকসা মান্দিবা রি·য়াংনা মান·জা। সাকসা মান্দিবা বিখো মামুং সালোবা নিকখুজা, নিকনা মা·ন্নাবা মান·জা। মান্দিরা·আ আরো বিল ফাংনাজলনা বিনিন হং·আ। আমেন।

¹⁷ জেরাং ইয়া হা·গিলসাকো মা·ন্নে চা·আ বিসংনা ইন্দাকে গি·য়েৎবো জেদাক্কে বিসং গাং·বিংগিজা আরো গামরাংনি সাক্কাও ফাংচাকগিজা ইসলনি সাক্কাও ফাংচাকা। বিয়ান গিম্মিকখো জাকস্রামে আনচিংনা হ·ন্না।

¹⁸ মা·ন্নে চা·গিবারাংনা গি·য়েৎবো জেদাক্কে বিসং গিপ্পিননি নাম্মাখো দাক্কা, খাকখেৎ কামও দংআ, জাকস্রামে হ·ন্না আরো বিসংনি গামরাংনি বাকখো গিপ্পিনরাংনাবা হ·ন্না।

¹⁹ ইনি গিম্মিন বিসং আন·থাংথাংনা ইন্দাকে গাম চিম্মংনুয়া জে রি·বাগিবা চাসংও বিসংনা বিল্লাকা ফাংচাকানি গিত্তা হং·নুয়া, জেদাক্কে খাকখেৎ জাংগিখো বিসং রাক্কে রি·ম্মে রা·রিকনা মা·ন্না।

²⁰ ও তীমথিয়, জেখো রাক্ষিনা নাং·না হন·জক উখো নাম্মেদাক্কে রাক্ষিবো। বু·আ হা·আইয়ানি খা·ফাকাগ্রি হং·গিজা-নাংগিজা খাৎথাওনি আরো স্খিয়াওনি চে·ল্লে দংবো।

²¹ মিত্তাম মান্দি ইন্দাকা হা·আইয়াখো দাবি দাক্কে খ্রীষ্ট থরমনি বিবিরা·আওনি চে·ল্লাচা জিত্তে রি·য়াংজক। ইসল না·সংনা খা·সাচাকখানা।