1 তীমথিয় 5 - Garo New Testament

বিবিরা·গিবারাংনা দাক্কানিরাং

¹ জেরাং বুদেফা হং·জক, বিসংনি দোসখো ফিন্নিকনা রি·য়াংএ রাক্কা খু·সুকখো দা·আ আগানাবো; ফাআ গিত্তা চানচিয়ে বিসংখো থারিবো। ফান্থিরাংখো জংআদা চানচিয়ে বিসংখো থারিবো।

² মিচিক মা·আরাংখো মা·আ গিত্তা চানচিয়ে থারিবো আরো মি·থ্রারাংখো ন-আবি গিত্তা চানচিয়ে রংথালাও থারিবো।

³ জে রান্দি মিচিকরাংনি দারাংবা দংজা বিসংখো যতন রা·এ নিরকবো।

⁴ ইন্দিবা রান্দি মিচিকনি বি·সা-আংদি বা সু·গিবা দংওদে উয়া বি·সা-আংদি বা সু·গিবারাংআন জেদাক্কে স্খাং আন·থাংথাংনি নকনা দাক্কানিখো দাক্কে ইসলনা খা·ফাকে ফিন্নিকাখো স্খিয়া। ইন্দাকে বিসং বিসংনি ফাগিৎচামরাংনি খা·সানি জিন্নাংখো চতনা মা·ন্নুয়া, আরো ইনি গিম্মিনান ইসল খুসি হং·আ।

⁵ জে রান্দি মিচিকনি দারাংবা দংজা বিয়া ইসলনি সাক্কাওন বিনি খা·দংআ গিম্মিকখো দন্নে ওয়ালসাল ইসলচা বি·এ আরো মল·মলে দংআ।

⁶ ইন্দিবা জে রান্দি মিচিক হা·সিকরামরাম জাংগিখো থাংএতা বিয়া থাংমিত্তিংওবা সিয়া গিত্তা হং·আ।

⁷ ইরাংনি গিম্মিন গি·য়েৎবো জেদাক্কে দারাংবা বিসংখো দোস হ·ন্না মান·জা।

⁸ জেআন আন·থাংনি চাচ্চিরাংনা, মংসংদে আন·থাংনি নকখো নিজা বিয়া উচা বিনি বিবিরা·আখো জিচাকজক; বিয়া বিবিরা·গিজাগিবানা বাত্তেবা নামজা।

⁹ রান্দি মিচিকরাংনি বিমুংও সাকসা রান্দি মিচিকনি বিমুংখো রা·চাপনা স্খাং ইখো নিনা নাংনুয়া, বিনি বিলসি সতদক হং·আমা আরো বিয়া সেগিবানি বিবিরা·না খ্রাগিবা হং·আমিংমা।

¹⁰ ইনাআগ্রেবা নাম্মা কামনা বিনি মিংসিংআ দংনা নাংনুয়া। ইন্দাকা নাম্মা কামরাংও দংআ - বি·সা-আংদিরাংখো নিরকা, চাচ্চি সকবাগিবারাংনা দাকচাকে হ·ন্না, ইসলনি মান্দিরাংনি জা·চকখো সু·গালে হ·ন্না, জেরাং দুকও গা·আকা বিসংনা দাকচাকা, আরো দিংথাং নাম্মা কামরাংও দংফা।

¹¹ মি·থ্রা রান্দিরাংনি বিমুংখো রান্দিরাংনি বিমুংরাংমুং দা·আ চক্কাবো, মুয়ানা বিসংনি বে·এননি হা·সিকারাং চাখাতজোকনো আরো খ্রীষ্টনা বিসংনি খা·ফাকা কমিয়াংজোকনো বিসং সে খিমনা হা·ম্মা।

¹² ইনি গিম্মিন বিসং বিসংনি স্খাংনি খু·রাচাক্কাখো ফি·আ ইন্নে আন·থাংথাংনি সাক্কাও শাস্তিখো রা·বা।

¹³ ইনাআগ্রে বিসং নকরিখিতচা রোমে আলসিয়া হং·না স্খিয়া। বিসং আলসিয়াসান হং·জা, ইন্দিবা হং·গিজা-নাংগিজা খু·সুকখো আগান্না আরো গিপ্পিনখো রা·এ জাচাএ আগান্না স্খিয়া আরো জেখো বিসংনি আগানা খ্রাজা উয়া খাৎথাখো আগানা।

¹⁴ উনি গিম্মিন আংআ ইখো স্খিয়া, মি·থ্রা রান্দিরাং বিয়াখানা, বি·সানি মা·গিবা হং·খানা, আন·থাংথাংনি নকদাংখো নিখানা আরো বোবিলরাংনা জিয়ানি মামুং চলখো হন·জাখানা।

¹⁵ দা·আওন মিত্তাম রান্দি মিচিকরাং ফি·ল্লাংএ শয়তাননি রামাও রি·ইংজক।

¹⁶ খ্রীষ্টও বিবিরা·গিবা সাকসা মিচিকনি নক্কো মিত্তাম রান্দি মিচিকসারাং দংওদে উয়া মিচিকান বিসংখো নিরকখানা। ইয়া রান্দিরাংখো নিরকানি কামখো মন্ডলীনি সাক্কাও গালনা নাংজা, জেদাক্কে জে রান্দি মিচিকরাংনি দারাংবা দংজা মন্ডলী বিসংখো নিরকনা মা·ন্না।

¹⁷ মন্ডলীনি দাল·গিবারাং জেরাং মন্ডলীখো চালাইয়া, মংসংদে জেরাং ইসলনি খাৎথাখো আগানফ্রাকনা আরো স্খিএতনা কাম দাক্কা, বিসংনি মা·ন্নানি বাং·না নাংআ।

¹⁸ রংথালগিবা শাস্ত্রও দংআ, “মি গা·মিত্তিংও মা·সুনি খু·সুকখো দা·আ খাথিপাবো।” আরোবা চক্কা দংআ, “জেআন কাম দাক্কা বিয়া বেতন মা·ন্না খ্রাআ।”

¹⁹ সাকগ্মি বা সাকগিত্থাম সাক্ষিনি সাক্ষি হ·ন্না আগ্রে মন্ডলীনি দাল·গিবানি সাক্কাও মামুং দোসনি খাৎথাখো দা·আ খিন্নাবো।

²⁰ জে দাল·গিবারাং পাপ দাক্কারিন দংআ মন্ডলীনি গিম্মিক মান্দিনি মিকখাংও বিসংনি দোসখো ফিন্নিকে হন·বো জেদাক্কে গিপ্পিন দাল·গিবারাংবা খেন্না।

²¹ ইসল আরো খ্রীষ্ট যীশু আরো বাচ্ছিয়ে রা·গিবা সা·গ্রেরাংনি মিকখাংও আংআ নাং·না ইখো গি·য়েতিংআ- দারাংনা চাকগিজা ইরাংখো দাকবো আরো সাকসাখোসান নিএ মামুং কামখো দা·আ দাক্কাবো।

²² থেংরি দাক্কে সানিবা সাক্কাও জাক দন্নে সাকসাখো মামুং কামনা দা·আ থিক দাক্কাবো। গিপ্পিনরাংনি পাপ দাক্কাও বিসংমুং দা·আ দংফাবো। আন·থাংখো খাকখেৎ দনবো।

²³ সময়মিত্তিং না·আ জম্মাসাআও গা·আকা ইন্নে বিকমানি হা·সেল অকখিসা দাক্কে আংগুর বিৎচিখো রিংবো; চিখোসান দা·আ রিংআবো।

²⁴ সানিবা সানিবা পাপখো ইন্দাকে নাম্মেদাক্কে নিকনা মা·ন্না, উনি বিচাল স্খাংআন হং·আংআ। দা·আবা সানিবা সানিবা পাপখো জা·মানো নিকনা মা·ন্না।

²⁵ উয়ানদাক্কে খাকখেৎ কামখো নাম্মেদাক্কে নিকনা মা·ন্না, আরো জেরাংখো নিকনা মান·জা উরাংবা থুম্মুয়ে দংজা।