1 থিষলনীকী 5 - Garo New Testament

^1-2 জংআদারাং, বাসোকো আরো বাদাকগিবা সময়ও উয়া হং·নুয়া উনি গিম্মিনো না·সংচা মামুংখো চকনা নাংজা। না·সং আন·থাংথাংআন নাম্মেদাক্কে হা·আইয়া, ওয়াল্লো জেগিত্তা চা·খক রি·বাআ গিত্তেলনি উয়া সালবা উগিত্তান রি·বানুয়া।

³ জেনসালো মান্দিরাং আগান্নুয়া, “থম·থমজক, খেন্নানি মামুংবা দংজা,” উনো হা·ন্নোগ্মাং মিচিকনি রাং·গিত্তিক দাক্কে বি·সা বা·আনি সা·দিকা গিত্তা উয়া মান্দিরাংনা বন·গিম্মিকানি হং·নুয়া। মামুং দাক্কেন বিসং জকজানুয়া।

^4-5 ইন্দিবা জংআদারাং, না·সংদে আন্দালাও দংজাংআ, উয়া সাল চা·খক গিত্তা না·সংচা রি·বানুয়া। না·সংদে গিম্মিকান সেং·আনি আরো সালনিসা মান্দি হং·আ। আনচিং ওয়াল্লোনি বা আন্দালানি মান্দি হং·জা।

⁶ উনি গিম্মিন গিপ্পিনরাং গিত্তা জেদাক্কে আনচিং থুজা, বাত্তেসা মিকরাকে দংআ আরো আন·থাংথাংখো বাম্মেতে দন্না।

⁷ জেরাং থুয়া বিসং ওয়াল্লোন থুয়া, আরো জেরাং চুফেক্কা বিসং ওয়াল্লোন চুফেক্কা।

⁸ ইন্দিবা আনচিং সালনি মান্দি হং·আ; উনি গিম্মিন চেল·খো রাক্ষিনা ইন্নে বিবিরা·আ আরো খা·সাচা চেল·খো ফিনদাপে আরো স্খুখো রাক্ষিনা ইন্নে জক্কেতানি খা·দংআখো স্খুও স্থিকে হাই, আনচিং আন·থাংথাংখো বাম্মেতে দন্না।

⁹ শাস্তি মা·ন্নাদে হং·জা বাত্তেসা আনচিংনি গিত্তেল যীশু খ্রীষ্টও জকনা ইন্নেন ইসল আনচিংখো থিক দাক্কে দনজক।

¹⁰ খ্রীষ্ট আনচিংনা সিয়ামিং, জেদাক্কে আনচিং থাংএ দং বা সিয়ে দং, আনচিং জেদাক্কে বিমুংআন থাংএ দংনা মা·ন্না।

¹¹ ইনি গিম্মিন দা·আও না·সং জেগিত্তা দাক্কা উগিত্তান সাকসা সাকগিপ্পিনখো খা·দংএতনা আরো সাকসা সাকগিপ্পিনখো থারিরিকরিকবো।

বন·চতা খাৎথা

¹² জংআদারাং, চিংআ না·সংখো মল·মলা, জেরাং না·সংনি গিসেপো গাম্মিংআ, গিত্তেলনি হং·এ না·সংখো রি·দিলা আরো না·সংনা স্খিয়া বিসংখো মান্দিরা·বো।

¹³ বিসং জেখো দাক্কা উনি গিম্মিন খা·সানি গিসিকখো রা·এ বিসংখো মান্দিরা·বো। না·সং আন·থাংথাংনি গিসেপো থম·থমে দংবো।

¹⁴ জংআদারাং, চিংআ না·সংনা ইন্দাকে স্খিয়েতিংজক- জেরাং আলসিয়া বিসংখো সিমসাকেতবো; জেরাংনি খা·সকা দংজা বিসংখো খা·সকেতবো; জেরাং বিলগ্রি বিসংনা দাকচাকবো আরো গিম্মিকখো চাকচিকবো।

¹⁵ নিবো, অন্যায়নি সাক্কাও দারাংবা অন্যায়খো দাকজাখানা। না·সং সাকসা সাকগিপ্পিননি, আরোবা, গিপ্পিনরাংনি নাম্মাখো দাকনা হাম·বো।

¹⁶ ফাংনান হান·সেংবো,

¹⁷ ফাংনান বি·বো,

¹⁸ আরো গিম্মিক অবস্থাও ইসলখো মিৎথেলবো; মুয়ানা খ্রীষ্ট যীশুও না·সংনা ইয়ান ইসলনি হা·সিকা হং·আ।

¹⁹ গিসিক রংথালগিবাখো দা·আ খিম্মিতেতাবো।

²⁰ জেরাং আগানসোগিবা হং·এ ইসলনি খাৎথাখো আগানা বিসংনি খাৎথাখো দা·আ চন্নিকাবো, বাত্তেসা গিম্মিকখোন থিকখেলে নিবো।

²¹ জেআন নাম্মা উখো রি·ম্মে রা·রিকবো,

²² আরো গিম্মিক নামগিজাওনি চে·ল্লাও দংবো।

²³ থম·থমেৎগিবা ইসল আন·থাংআন না·সংখো চু·গিম্মিক দাক্কে রংথালেতখানা, আরো আনচিংনি গিত্তেল যীশু খ্রীষ্টনি রি·বাফিল্লানি সালো না·সংনি বে·এনখো-গিসিকখো দোসগ্রি দাক্কে দনবো।

²⁴ গিসিক দনবো, জেআন না·সংখো রিক্কামা বিখো ফাংচাকনা মা·ন্না; বিয়া উখো দাকবিবিনুয়ান।

²⁵ জংআদারাং, চিংনা বি·বো।

²⁶ খা·সানি গিসিকখো রা·এ গিম্মিকনা সালাম হন·বো।

²⁷ আংআ গিত্তেলনি বিমুংও না·সংনা ইখো গি·য়েতিংজক, ইয়া চিঠিখো জেদাক্কে গিম্মিক জংআদারাংনা পড়িয়ে খিন্নাএতা।

²⁸ আনচিংনি গিত্তেল যীশু খ্রীষ্টনি খা·সাচাক্কা না·সংমুং দংখানা।