পিতর 4 - Garo New Testament

ইসলনা জাংগি মিৎথাংআ

¹ উনি গিম্মিন খ্রীষ্ট বে·এনো দুকখো চাক্কামিং ইন্নে না·সংবা আন·থাংথাংনি খা·থংও উয়া আপসান গিসিকখো থারিবো, মুয়ানা বে·এনো জেআন দুকখো চাকজক বিয়া পাপখো ওয়াতজক।

² উনি গিম্মিন ইয়া হা·গিলসাকনি থাংএ দংনাগিবা জাংগিখো বিয়া হা·গিলসাকনি নামগিজা হা·সিকারাংও হান·সেংএ মিৎথাংএতজা, বাত্তেসা ইসলনি হা·সিকাখো মানিয়েন রি·য়া।

³ জেরাং ইসলখো হা·আইজা বিসং গিত্তা না·সংবা স্খাংওদে নামজাস্রাংখো দাক্কে, নামগিজা হা·সিকারাংও দংএ, চু ফেক্কে, জেজাকবিয়ে চু রিংএ আরো চা·এ-রিংএ আরো মিৎচিয়ানি মিত্তে বিমাংখো হামুয়ে বাং·আ সময় রি·য়াংএতনুয়ামিং।

⁴ ইন্দিবা দা·আও উয়া মান্দিরাংআন নিক্কে আইয়াও ইনমানা, না·সং বিসংনি উয়া বিংবাং দাক্কাও দংফাজাংজক, আরো উনি গিম্মিন বিসং না·সংখো জাচাএ খাৎথা আগানা।

⁵ ইন্দিবা জেআন থাংগিবা আরো সিগিবা গিম্মিকনি বিচালখো দাকনা ইন্নে থারিয়ে দংসোজক বিচা বিসংনি হিসাব হ·ন্না নাংনুয়া।

⁶ সিগিবারাংচাবা উনি গিম্মিনান খ্রীষ্টনি বিদিংও নাম্মা খাৎথাখো আগানফ্রাকা হং·আমিং, জেদাক্কে বে·এনচাবাক্কানি মান্দি গিত্তান বিসংনি বিচাল হং·ওবা গিসিকো বিসং ইসল গিত্তা থাংএ দংনা মা·ন্না।

⁷ দা·আও গিম্মিকনি বন·খামগিবা সাল সেফাংজক। উনি গিম্মিন না·সংনি গিসিকখো খেম·খেম দনবো আরো আন·থাংথাংখো বাম্মেতে দনবো জেদাক্কে বি·না মা·ন্না।

⁸ আরো গিম্মিকনা বাত্তে দা·ল্লা খাৎথা হং·জক, না·সং সাকসা সাকগিপ্পিনখো নাম্মেন খা·সাবো, মুয়ানা খা·সাআ বাং·আ পাপখো ফিনদাপে দন্না।

⁹ মামুং মাংমেংআখো ফিন্নিকগিজা না·সং সাকসা সাকগিপ্পিনখো সকবাগিবা গিত্তা রা·চাকবো।

¹⁰ দিংথাং দিংথাং দাক্কে ফারাকা ইসলনি খা·সাচাক্কাখো মা·ন্নে জে মান্দি বিবিরা·না খ্রাগিবা দাক্কে উখো কাম দাক্কেতজক, উয়ানদাকগিবা মান্দি গিত্তা না·সং ইসলচাখো জেগিত্তা হন·চাকাখো মান·জক উখো সাকসা সাকগিপ্পিননা দাকচাকে হ·ন্না ইন্নে জাকখালবো।

¹¹ সাবা আগানফ্রাকোদে ইন্দাকে আগানফ্রাকখানা জেদাক্কে বিয়া ইসলনি আন·থাংনি খু·সুকখো আগানিংআ। সাবা দাকচাকে হ·ন্নোদে ইসলনি হন·গিবা বিলচা বিয়া দাকচাকে হন·খানা, জেদাক্কে যীশু খ্রীষ্টও গিম্মিক গিত্তা ইসলান রাসংখো মা·ন্না। রাসং আরো বিল ফাংনাজলনা বিনিন হং·আ। আমেন।

খ্রীষ্টান হং·এ দুক চাক্কা

¹² খা·সাগিবা রিপ্পেংরাং, না·সংখো দা·আও ওয়া·আলনি রুরাআ গিত্তা রি·য়াংনা নাংইংজক ইন্নে উনি গিম্মিনো আইয়াও ইনমানে দা·আ চানচিয়াবো, না·সংনি সাক্কাও মামুং আইয়াও ইনমানানি হং·ইংআ।

¹³ উনা বাত্তে না·সং খ্রীষ্টনি দুক চাক্কানি বাকখো রা·ফাংজক উয়ো হান·সেংবো, জেদাক্কে বিনি রাসং জেনসালো ফারাকনুয়া উনো না·সং হান·সেংআও চু·সকা।

¹⁴ খ্রীষ্টনি গিম্মিন না·সং চন্নিকাখো মা·ন্নোদে না·সং ফাত্তিয়াখো মান·গিবা হং·আ, মুয়ানা ইসলনি রাসং গাপগিবা গিসিক না·সংনি সাক্কাও দংআ।

¹⁵ না·সংনি গিসেপো সাবা স·ওতে গালগিবা, চা·খক, খ্রাগিজাখো দাকগিবা হং·এ বা খ্রাগিজা দাক্কে গিপ্পিননি বিদিংও জাক র·ন্নে দুক চাকজাখানা।

¹⁶ ইন্দিবা খ্রীষ্টান হং·এ সাবা দুক চাক্কোদে খ্রাচা·জাখানা, বাত্তেসা বিনি উয়া বিমুং দংআ ইন্নে বিয়া ইসলখো রাসং দাকখানা।

¹⁷ বিচাল হং·আনি সাল সকজক আরো উয়া ইসলনি নকনি মান্দিরাংওনিন হং·বাচেংনুয়া। আরো উয়া বিচালখো আনচিংওনিন দাক্কোদে জেরাং ইসলনি হন·গিবা নাম্মা খাৎথাখো মানিয়ে রা·জাজক বিসংনি অবস্থা মুয়া হং·নুয়া?

¹⁸ শাস্ত্রও দংআ, ইসলখো অলাখিগিবা মান্দিনি জক্কাখো মা·ন্না ইন্দাকেন রাক্কোদে, জেরাং পাপ দাকগিবা আরো ইসলনা খা·ফাকাগ্রি হং·আ, বিসংনি অবস্থা মুয়া হং·নুয়া?

¹⁹ ইন্দাকোদে ইসলনি হা·সিকাচা জেরাং দুক চাক্কিংআ, বিসং বিসংনি বিবিরা·না খ্রাগিবা থারিয়েতগিবানি জাক্কো আন·থাংথাংখো ফাকওয়াতখানা আরো নাম্মা কামখো দাকখানা।