1ম করিন্থীয়রাংনা 7 - Garo New Testament

বিয়ানি গিম্মিনো

¹ না·সং আংচা জেরাংনি গিম্মিনো চকজক দা·আও উরাংখো আগানচাকিংজক। সাবা বিয়াজাওদে বিয়া নাম্মাখোন দাক্কা;

² ইন্দিবা গিম্মিকচান থি·ল্লেকারাং বাং·ইংজক, উনি গিম্মিন মি·আসা গিম্মিকনিন জিকথাং আরো মিচিক গিম্মিকনিন সেথাং দংখানা।

³ সেগিবা জিকগিবানা বে·এনোনি মা·ন্নাগিবাখো বিনা হন·খানা; উয়ানদাক্কে জিকগিবাবা সেগিবানা হন·খানা।

⁴ জিকনি বে·এন বিনি আন·থাংনি হং·জা, বিনি সেগিবানিসা হং·আ। উগিত্তান সেনি বে·এন বিনি আন·থাংনি হং·জা, বিনি জিকগিবানিসা হং·আ।

⁵ সাকসা সাকগিপ্পিনমুং বে·এনচা আপসান হং·না দা·আ জিচাকাবো; ইন্দাকোবা বি·না চল্‌জকে আপসান গং·গ্রিকে বাং·গিজা সালনা দিংথাং দংনা মা·ন্না। উনি জা·মানো দা·আবা আপসান হং·বো জেদাক্কোদে আন·থাংথাংখো চাকচিকেতনা মান·জানি হা·সেল শয়তান না·সংখো পাপচানা সালনা মান·জা।

⁶ ইয়া খাৎথাখো আংআ না·সংনা গি·য়েতি আগানিংআ ইন্দাকেদে হং·জা বাত্তেসা দাকনা মা·ন্না ইন্নেন আগানিংআ।

⁷ গিম্মিকান আংগিত্তা হং·ওদে! ইন্দিবা ইসলচানিখো সাকফ্রাকফ্রাকান মিংফ্রাক দাক্কে মা·ন্নানিখো মান·জক। সাকফ্রাকনি মা·ন্নানিরাং দিংথাং দিংথাং হং·আ।

⁸ বিয়াগিজারাংনা আরো রান্দি মিচিকরাংনা আংআ আগানিংজক, বিসং আংগিত্তা দাক্কে দংনা মা·ন্নোদে বিসংনা উয়া নামনুয়া।

⁹ ইন্দিবা বিসং আন·থাংথাংখো চাকচিকেতনা মান·জাওদে বিয়াখানা, মুয়ানা বে·এননি হা·সিকাও খাম্মানা বাত্তে বিয়া দাক্কান নামবাতা।

¹⁰ জেরাং বিয়াজক বিসংনা আংআ ইখো গি·য়েতিংজক- আংআদে গি·য়েৎজা, গিত্তেলান গি·য়েতিংজক- জিকগিবা জেদাক্কে সেগিবাওনি রি·য়াংআরিজা।

¹¹ ইন্দিবা বিয়া রি·য়াংআরিওদে বিয়াজাখানা বা সেগিবামুং দা·আবা নাংরিমখানা। সেগিবাবা বিনি জিকগিবাখো ওয়াতজাখানা।

¹² গিপ্পিনরাংখো গিত্তেল আগানজা ইন্দিবা আংআ আগানিংজক, সাকসা জংআদানি খ্রীষ্টও বিবিরা·গিজা জিক দংওদে আরো উয়া জিক বিমুং দংনা হা·ম্মোদে বিনি সে বিখো ওয়াতজাখানা।

¹³ দা·আবা মিচিক সাকসানি খ্রীষ্টও বিবিরা·গিজাগিবা সে দংওদে আরো উয়া সে বিমুং দংনা হা·ম্মোদে উয়া সেখো বিয়া ওয়াতজাখানা;

¹⁴ মুয়ানা জিকচা বিবিরা·গিজাগিবা সেখো আরো সেচা উয়া বিবিরা·গিজাগিবা জিকখো ইসল রংথালগিবা ইন্নে চান্না। ইন্দাকজাওদে না·সংনি বি·সারাংদে রংথালজানুয়ামিং; ইন্দিবা ইসল বিসংখো রংথালগিবা ইন্নে চান্না।

¹⁵ ইন্দিবা উয়া বিবিরা·গিজাগিবা সে বা জিক রি·য়াংনা হা·ম্মোদে রি·য়াংখানা। ইন্দাকা অবস্থাও উয়া বিবিরা·গিবা জংআদা বা নআবি খাএ-সিক্কে দন্নাও দংজা। ইসলদে আনচিংখো থম·থমাও দংখানান রিক্কামজক।

¹⁶ ও জিকগিবা, না·আ বাদিকে দাক্কে হা·আইয়া, নাং·নি সেখো না·আ জক্কেৎনা মান·জানুয়া? ও সেগিবা, না·আ বাদিকে দাক্কে হা·আইয়া নাং·নি জিকখো না·আ জক্কেৎনা মান·জানুয়া?

¹⁷ গিত্তেল জেখো জে অবস্থাও দনজক আরো ইসল জেখো জেনি গিম্মিনো রিক্কামজক, উগিত্তান বিয়া রি·খানা। আংআ গিম্মিক মন্ডলীচান ইখো গি·য়েতিংআ। বিগিল রাতগিবা মান্দিখো রিক্কামা হং·জকমা? ইন্দিদে বিয়া বিগিল রাত্তানি চিনখো রিপ্পাকে গালজাখানা।

¹⁸ বিগিল রাতগিজা মান্দিখো রিক্কামা হং·জকমা? ইন্দিদে বিখো বিগিল রাতজাখানা।

¹⁹ বিগিল রাত্তোবা মুয়া হং·আ আরো রাতজাওবা মুয়া হং·আ, ইসলনি গি·য়েতাখো মানিয়ান চং·মত খাৎথা হং·আ।

²⁰ ইসল জেখো জে অবস্থাও রিক্কামজক বিয়া উয়া অবস্থাওন দংখানা।

²¹ নাং·খো রিক্কামো না·আ নকখল দংআমিংমা? উনি গিম্মিন দা·আ দুক দাক্কাবো; জাকগিত্তেল হং·আনি চলখো মা·ন্নোদে উখো রা·চাকবো।

²² নকখল দংমিত্তিংও গিত্তেল জেখো রিক্কামজক বিয়া গিত্তেলচা জাকগিত্তেল হং·জক। উয়ানদাক্কে জেখো জাকগিত্তেল অবস্থাও রিক্কামজক বিয়া খ্রীষ্টনি নকখল হং·জক।

²³ বাং·আ দামচা না·সংখো ব্রিজক; মান্দিনি নকখল দা·আ হং·আবো।

²⁴ জংআদারাং, ইসল জেখো জে অবস্থাও দংআখো রিক্কামজক বিয়া ইসলনি মিকখাংও উগিত্তান দংখানা।

²⁵ মি·থ্রারাংনি গিম্মিনো গিত্তেলচানিখো আংআ মামুং গি·য়েতাখো মান·জা। ইন্দিদে ইসলনি খা·সাচাক্কাখো মা·ন্নে আংআ বিবিরা·না খ্রাগিবা হং·জক ইন্নে আংনি হা·সিকাখো আগানিংজক।

²⁶ দুক মান·বিয়ানি জে সাল সকবাংজক উনি হা·সেল আংনি চানচিয়াদে না·সং জে জেগিত্তা দংআ উগিত্তা দংআন না·সংনা নাম্মা।

²⁷ নাং·নি জিক দংআমা? দংওদে জিকখো দা·আ ওয়াতনা হা·ম্মাবো। নাং·নি জিক দংজামা? ইন্দিদে দা·আ বিয়ানা হা·ম্মাবো।

²⁸ ইন্দিবা না·আ বিয়াওদে নাং·নি পাপ হং·জা। সাকসা মি·থ্রা মিচিক বিয়াওদে বিনিবা পাপ হং·জা। ইন্দিবা জেরাং বিয়ানুয়া বিসং ইয়া সংসালো দুকখো মা·ন্নুয়া, আরো আংআ ইরাংনিখো না·সংখো জক্কেৎনা হা·ম্মিংআ।

²⁹ জংআদারাং, আংনি আগান্না হাম·গিবা ইয়ান- সময় বাং·এ দংজাজক। উনি গিম্মিন দা·আওনি দিপ্পাৎ জিক দংগিবারাং জিক দংগিজা গিত্তা রি·না নাংনুয়া;

³⁰ দুক দাকগিবারাং দুক দাকগিজা গিত্তা; হান·সেংগিবারাং হান·সেংগিজা গিত্তা; ব্রিগিবারাং বিসংনি ব্রিয়া জিনিসরাংখো জাকখালনা বিল দংগিজা গিত্তা;

³¹ হা·গিলসাকনি গিম্মিনো দংগিবারাং দংগিজা গিত্তা; মুয়ানা হা·গিলসাকনি বিমাং দিংথাং হং·ইংজক।

³² আংআ হা·ম্মা জেদাক্কে না·সং চানচিয়ারাংওনি জক্কে দংনা মা·ন্না। বিয়াগিজা মান্দি গিত্তেলনি গিম্মিনো চানচিয়া; বাদিকে দাক্কে বিয়া গিত্তেলখো খুসি দাকনুয়া ইখো চানচিয়া।

³³ বিয়াগিবা মান্দি নকদাংখো চানচিয়া; বাদিকে দাক্কে বিয়া জিকখো খুসি দাকনুয়া ইখো চানচিয়া।

³⁴ ইন্দাকে সামগ্মিচা বিখো সাল্লা। সে দংগিজা মিচিক আরো মি·থ্রা মিচিক গিত্তেলনি গিম্মিনো চানচিয়া জেদাক্কোদে বিয়া বে·এনো আরো খা·থংও গিত্তেলনি হং·না মা·ন্না। ইন্দিবা বিয়াগিবা মিচিক নকদাংনি গিম্মিনো চানচিয়া; বিয়া বাদিকে দাক্কে সেখো খুসি দাকনুয়া উখো চানচিয়া।

³⁵ ইয়া খাৎথাখো আংআ না·সংনি নাম্মানান আগানিংজক। আংআ না·সংখো রি·ম্মে রা·রিকনা উখো আগানজাংআ, বাত্তেসা জেখো দাকনা নাংআ আরো নাম্মা উখো দাকনা না·সংখো খা·দংএতা, জেদাক্কে না·সং গিসিক নাংএ গিত্তেলনা দাকচাকে হ·ন্না মা·ন্না।

³⁶ সাবা বিনি মি·থ্রা দেমিচিকনা খাকখেৎখো দাকজা ইন্নে চানচিওদে, মিচিকনি বিয়ানি বিলসি বাত্তাংওদে আরো বিয়া বিখো বিয়াএতনা নাংনুয়া ইন্নে চানচিওদে বিনি আন·থাংনি হা·সিকা গিত্তান কাম দাকখানা। মিচিক বিয়াখানা, উনাদে পাপ হং·জা।

³⁷ ইন্দিবা জে মান্দিনি খা·থং থম·থমে দংআ, জেনি সাক্কাও মামুংবা দংজা ইন্নে বিয়া আন·থাংনি হা·সিকা গিত্তান কাম দাকনা মা·ন্না, বিয়া বিনি দেমিচিকখো বিয়াএতজানুয়া ইন্নেন থিক দাক্কে দন্নোদে বিয়া নাম্মাখোন দাক্কা।

³⁸ ইন্দাকোদে নিকনা মা·ন্না, দেমিচিকখো বিয়া হন·গিবা নাম্মাখো দাক্কা আরো বিয়া হন·গিজাগিবা উনাবাত্তে নাম্মাখো দাক্কা।

³⁹ সেগিবা থাংএ দংআ দিপ্পাৎ জিকগিবা বিচা খাআও দংআ। ইন্দিবা সেগিবা সিয়োদে বিয়া জেখো হা·সিকা বিখো বিয়ানা মা·ন্না, উয়া মান্দি জেদাক্কে গিত্তেলনি হং·আ।

⁴⁰ ইন্দিবা আংনি চানচিয়া গিত্তাদে বিয়া জেগিত্তা দংআ উগিত্তান দংওদে বিয়া নাম্মে দংনুয়া। আংনি চানচিয়া গিত্তাদে আংআ ইসলনি গিসিকচা ইয়া খাৎথাখো আগানিংজক।