1ম করিন্থীয়রাংনা 6 - Garo New Testament

বিবিরা·গিবারাংনি গিসেপো মকর্দমা

¹ না·সংনি গিসেপো সানিবা সাকসা বিবিরা·গিবা জংআদানি সাক্কাও নালিশ দাকনা মামুং হা·সেল দংওদে বিয়া বাদিকে দাক্কে খেনমানগিজা ইসলনি মান্দিরাংচা রি·য়াংগিজা জেরাং ইসলনি হং·জা বিসংচা রি·য়াংএ বিচালখো হা·ম্মা?

² ইসলনি মান্দিরাংআন হা·গিলসাকখো বিচাল দাকনুয়া ইন্নে না·সং হা·আইজামা? না·সং হা·গিলসাকখো বিচাল দাক্কোদে না·সং চন্না বিদিংনি গিম্মিনো বিচাল দাকনা মান·জামা?

³ আনচিং সা·গ্রেরাংখোবা বিচাল দাকনুয়া ইন্নে না·সং হা·আইজামা? ইন্দাকেন হং·ওদে ইয়া হা·গিলসাকদে মামুংআন হং·জা!

⁴ না·সংনি ইন্দাকগিবা নালিশ দংওদে মন্ডলীনি মান্দি হং·গিজারাংখোন না·সং বিচাল দাকগিবা দাক্কে থিক দাক্কামা?

⁵ না·সংখো খ্রাচা·এতনা আংআ ইয়া খাৎথাখো আগানিংজক। না·সংনি গিসেপো ইন্দাকগিবা হা·আইগিবা মান্দি সাকসাবা দংজামা, জেআন জংআদারাংনি গিসেপো গোলমালরাংখো বিচাল দাক্কে হ·ন্না মা·ন্না?

⁶ উখো দাকগিজা জংআদা জংআদানি সাক্কাও বিচাল দাকনা বিচাল দাকরামচা রি·য়াংআ, আরো উয়াবা দা·আবা বিবিরা·গিজারাংনি মিকখাংওসা!

⁷ না·সং সাকসা দা·আও সাকসানি সাক্কাও মকর্দমা দাক্কানি গিম্মিন ইখোন নিকনা মা·ন্না, না·সং হামজাজক। ইনাবাত্তে অন্যায়খো মুয়ানা চাকচিকজা? থগিয়াখো মুয়ানা মান·জা?

⁸ উখো দাকগিজা না·সংআন অন্যায় দাক্কিংজক, না·সংআন থকাই চা·আংজক, আরো উখো না·সংনি জংআদামুংআন দাক্কিংজক!

⁹ অন্যায় দাকগিবারাং ইসলনি সংনকখো মান·রিকজানুয়া, ইখো না·সং হা·আইজামা? না·সং দা·আ ব্রাংআবো। জেরাং নামজা, জেরাং মিত্তে বিমাংখো হামুয়া, জেরাং থি·ল্লেকা, জেরাং মি·আসা দারা, মি·আসা মি·আসামুং নামজাস্রাং কামখো দাকগিবারাং,

¹⁰ চা·উগিবারাং, মাদ্দুগিবারাং, চু রিংফেকগিবারাং, জাচাগিবারাং আরো থকাই চা·গিবারাং ইসলনি সংনকখো মান·রিকজানুয়া।

¹¹ না·সংও সাবা সাবা উয়ানদাকগিবান হং·আমিং, ইন্দিবা গিত্তেল যীশু খ্রীষ্টও আরো আনচিংনি ইসলনি গিসিকও না·সংখো সু·গালে থাল্লেতজক, ইসলনা মিংএ দিংথাং দাক্কেতজক আরো দোসগ্রি ইন্নে রা·চাকজক।

দিমদাক থি·ল্লেকারাংনি বিদিংও

¹² সাবা সাবা আগানা, “গিম্মিকখো দাক্কা আংনা খ্রাগিজানি হং·জা।” ইয়াদে খাকখেতান হং·আ, ইন্দাকোবা গিম্মিকান মান্দিনা নাম্মা, ইন্দাকেদে হং·জা। গিম্মিকখো দাক্কা আংনা খ্রাগিজানি হং·জাওবা ইন্দিবা আংআ মামুংনিন নকখল হং·জানুয়া।

¹³ দা·আবা সাবা সাবা ইয়া খাৎথাখোবা আগানা, “চা·আ বিকমানা হং·আ আরো বিকমা চা·না হং·আ।” ইয়াদে নাম্মান, ইন্দিবা ইয়া মিংগ্মিখোন ইসল সালসাদে গিম্মায়েতনুয়া। বে·এন থি·ল্লেকনা হং·জা বাত্তেসা উয়া গিত্তেলনান হং·আ, আরো গিত্তেল বে·এননি গিম্মিন হং·আ।

¹⁴ ইসল বিনি বিলচা গিত্তেলখো সিয়াওনি থাংচাএতজক আরো বিয়া আনচিংখোবা থাংচাএতনুয়া।

¹⁵ না·সং ইখো হা·আইজামা, না·সংনি বে·এন খ্রীষ্টনি বে·এননি বাক হং·আ? ইন্দাকোদে আংআ খ্রীষ্টনি বে·এননি বাকখো রা·এ দারিনি বে·এনমুং নাংরিমেতনুয়ামা? মামুং সালোবা হং·জা।

¹⁶ দারিনি বে·এনমুং জেআন নাংরিমা বিয়া বিমুং বে·এনসান হং·আ ইখো না·সং হা·আইজামা? মুয়ানা শাস্ত্রও চক্কা দংআ, “বিসং সাকগ্মি বে·এনসান হং·নুয়া।”

¹⁷ ইন্দিবা জেআন গিত্তেলমুং নাংরিমা বিয়া বিমুং গিসিকসান হং·আ।

¹⁸ গিম্মিক থি·ল্লেকাওনি খাত্তাংবো। মান্দি জে দিংথাং পাপখো দাক্কা উখো বিয়া বিনি বে·এননি হা·ফালও দাক্কা, ইন্দিবা জে থি·ল্লেকা বিয়া আন·থাংনি বে·এননি সাক্কাওন পাপ দাক্কা।

¹⁹ না·সং ইখো হা·আইজামা, না·সংনি খা·থংও জেআন দংখামা আরো জেখো না·সং ইসলচাখো মান·জক, উয়া গিসিক রংথালগিবানি দংগিবা নকান হং·জক না·সংনি বে·এন? না·সং না·সংনি আন·থাংনি হং·জা;

²⁰ বাং·আ দামচা না·সংখো ব্রিজক। উনি গিম্মিন ইসলনি রাসংনা না·সংনি বে·এনখো জাকখালবো।