1ম করিন্থীয়রাংনা 3 - Garo New Testament

ইসলনা দাকচাকে হন·গিবা

¹ জংআদারাং, গিসিকওনি হং·গিবা মান্দিরাংচা জেগিত্তা খাৎথা আগান্না নাংআ, আংআ না·সংচা উগিত্তা খাৎথা আগানজাজক, বাত্তেসা পাপ-বেওয়ালনি নিং·আও দংগিবারাংচা জেগিত্তা খাৎথা আগান্না নাংআ, উগিত্তান না·সংচা খাৎথা আগানামিং। খ্রীষ্টান জাংগি থাংআও না·সংদে আওয়া বি·সা গিত্তা দাক্কা, উনি গিম্মিন না·সংচা উগিত্তান খাৎথা আগানামিং।

² রাক্কা চা·আনিখো হন·গিজা আংআ না·সংনা সকচিখো রিংনা হ·ন্নামিং, মুয়ানা উয়া সময়ও না·সং রাক্কাখো চা·না গিত্তা হং·খুজামিং। আরো দা·আওবা না·সং উয়া অবস্থাও দংজা,

³ মুয়ানা দা·আওবা না·সং পাপ-বেওয়ালনি নিং·আও দংআ। না·সংও মিকনেংআ আরো নিরিয়া-গিসিয়া হং·আরি দংওদে না·সং পাপ-বেওয়ালনি নিং·আও দংজামা? আরো না·সংনি রি·য়ারাংবা ইন্দাকারি মান্দিরাং গিত্তান দাকজামা?

⁴ না·সংনি গিসেপো সাকসা পৌলনি দলনি আরো সাকগিপ্পিন আপল্লোনি দলনি ইন্নে আগানোদে না·সং ইন্দাকারিস্রাং মান্দিরাং গিত্তা দাকজামা?

⁵ আপল্লো সা? আরো পৌলবা সা? চিংআদে দাকচাকে হন·গিবাসান হং·আ জেরাং গিত্তা না·সং বিবিরা·আনি রামাওনা রি·বাজক। গিত্তেলান আনচিং সাকফ্রাকনা কাম হন·জক।

⁶ আংআ বিৎচ্রিখো গি·আমিং, আপল্লো উয়ো চি রুআমিং, ইন্দিবা ইসলান উখো দা·ল্লেতামিং।

⁷ উনি গিম্মিন বিৎচ্রিখো জে গি·আ বা চিখো জে রুআ বিয়াদে মামুংবা হং·জা; ইন্দিবা ইসল, জেআন দা·ল্লেতা, বিয়ান চু·গিম্মিক হং·আ।

⁸ বিৎচ্রি গি·গিবা আরো চি রুগিবা বিসংনি মিকসংআ আপসানান হং·আ, ইন্দিবা গিম্মিকান আন·থাংথাংনি কামনা খ্রি বকসিসখো মা·ন্নুয়া,

⁹ মুয়ানা চিংআ সাকগ্মিআন ইসলমুং কাম দাক্কিংআ। না·সং ইসলনিন হা·বা, ইসলনিন রিকগিবা দালান হং·আ।

¹⁰ ইসলচাখো আংআ মংসংগিবা খা·সাচাক্কাখো মা·ন্নে উচান দাল·গিবা মিস্ত্রি গিত্তা আংআ ফাংচাকানিখো রিকজক, আরো সাকগিপ্পিনরাং উনি সাক্কাও দালান রিক্কিংজক। ইন্দিবা সা বাদিকে রিক্কা উনি গিম্মিন বিয়া সিমসাকখানা।

¹¹ জেখো স্খাংআন রিকজক উনা আগ্রে দারাংবা রিকনা মান·জা। যীশু খ্রীষ্টআন উয়া ফাংচাকানি হং·আ।

¹² উনি সাক্কাও মান্দিরাং সোনা, রূপা, গামচাৎগিবা রং·থি, বল, খের বা নাড়াচা রিক্কোদে,

¹³ ইন্দিদে সা বাদিকে কাম দাকজক উখো নাম্মে থাল্লে নিনা মা·ন্নুয়া। বিচালনি সালোন উয়া ফারাকনুয়া, মুয়ানা উয়া সালনি ফারাকা ওয়া·আলচান হং·নুয়া। সানি কাম বাদাকা উখো ওয়া·আলান পরীক্ষা দাক্কে নিনুয়া।

¹⁴ জেখো জে রিকজক উয়া দংআরিওদে বিয়া বকসিসখো মা·ন্নুয়া;

¹⁵ আরো উয়া খাম্মোদে বিনা নামজানুয়া। বিয়া আন·থাংদে জকনুয়া, ইন্দিবা বিনি অবস্থা ওয়া·আলখো গা·বাত্তে রি·বাগিবা মান্দি গিত্তা হং·নুয়া।

¹⁶ না·সং হা·আইজামা, না·সং ইসলনি দংআনি নক হং·আ আরো ইসলনি গিসিক না·সংও দংখামা?

¹⁷ সাবা ইসলনি দংআনি নকখো নাসিয়েতোদে ইসলবা বিখো নাসিয়েতনুয়া, মুয়ানা বিনি দংআনি নক রংথালা, আরো না·সংআন উয়া নক হং·আ।

¹⁸ না·সং দারাংবা আন·থাংখো দা·আ থকাইয়াবো। না·সংনি গিসেপো সাবা ইয়া চাসংনি চানচিয়া গিত্তা আন·থাংখো হা·আইগিবা চানচিওদে বিয়া গক্কা হং·খানা জেদাক্কে বিয়া চং·মত হা·আইগিবা হং·না মা·ন্না,

¹⁹ মুয়ানা ইসলনি মিক্রোনও ইয়া হা·গিলসাকনি হা·আইয়াদে জাদানি হং·আ। রংথালগিবা শাস্ত্রও চক্কা দংআ, “ইসল হা·আইগিবারাংখো বিসংনি বু·এ চা·আচা রি·ম্মা।”

²⁰ দা·আবা ইন্দাকেবা চক্কা দংআ, “হা·আইগিবারাংনি চানচিয়া গিম্মিকান বিথিগ্রি হং·আ গিত্তেল উখো হা·আইয়া।”

²¹ উনি গিম্মিন না·সং দারাংবা সাকসা মান্দিখো রা·এ দা·আ রাসং দাক্কাবো, মুয়ানা গিম্মিকান না·সংনি হং·আ।

²² পৌল, আপল্লো, পিতর, ইয়া হা·গিলসাক, জাংগি, সিয়া, দা·আওনি চাসং আরো রি·বাগিবা চাসং গিম্মিকান না·সংনি হং·আ;

²³ না·সং খ্রীষ্টনি আরো খ্রীষ্ট ইসলনি হং·আ।