1ম করিন্থীয়রাংনা 11 - Garo New Testament

¹ আংআ জেদাক্কে খ্র্রীষ্ট গিত্তা রি·য়া না·সংবা উয়ানদাক্কে আং গিত্তা রি·বো।

খ্রাএ অলাখিয়ানি নিয়াম

² আংআ না·সংখো মিৎথেলা, মুয়ানা না·সং গিম্মিকোন আংনি খাৎথাখো গিসিক রা·আ, আরো আংআ না·সংনা জেখো স্খিয়া উগিত্তা রি·য়া।

³ আংআ ইখোন হা·ম্মা জেদাক্কে না·সং হা·আইনা মা·ন্না, খ্রীষ্টন সাকগিম্মিক মি·আসানি স্খুথং, সেগিবা বিনি জিকগিবানি স্খুথং, আরো ইসল খ্রীষ্টনি স্খুথং হং·আ।

⁴ জে মি·আসা স্খু ফিনদাপে বি·আ বা আগানসোগিবা গিত্তা ইসলনি খাৎথাখো আগানা বিয়া বিনি স্খুখো চন্নিকা।

⁵ জে মিচিক স্খু ফিনদাপগিজা বি·আ বা আগানসোগিবা গিত্তা খাৎথা আগানা বিয়া বিনি স্খুখো চন্নিকা, মুয়ানা উনোদে বিয়া খিন্নি রক্কা মিচিক গিত্তান হং·নুয়া।

⁶ মিচিক স্খুখো ফিনদাপজাওদে বিয়া খিন্নিখো রক্কে গালখানা। ইন্দিবা মিচিকনা খিন্নি রক্কে গাল্লা খ্রাচা·আনি হং·আ ইন্নে বিয়া বিনি স্খুখো ফিনদাপে দনখানা।

⁷ স্খু ফিনদাপা মি·আসানা খ্রাজা, মুয়ানা ইসল মি·আসাখো আন·থাংনি জা গিত্তা থারিয়ামিং আরো ইসলনি রাসং মি·আসাও ফারাকা; ইন্দিবা মি·আসানি রাসং মিচিকও ফারাকা।

⁸ মি·আসা মিচিকওনি রি·বাজা ইন্দিবা মিচিকদে মি·আসাওনি রি·বাআ।

⁹ মিচিকনি গিম্মিন মি·আসা হং·জা ইন্দিবা মি·আসানি গিম্মিন মিচিক হং·আ।

¹⁰ উনি গিম্মিন আরো সা·গ্র্রেরাংনি গিম্মিন বাম্মানি চিন গিত্তা স্খু ফিনদাপা মিচিকনা খ্রাআ।

¹¹ গিত্তেলমুং নাংরিমে জিকগিবা বিনি সেগিবানি সাক্কাও ফাংচাকা, দা·আবা সেগিবাবা বিনি জিকগিবানি সাক্কাও ফাংচাকা;

¹² মুয়ানা জেদাক্কে মি·আসাওনি মিচিক রি·বামিং উয়ানদাক্কে দা·আবা মিচিকোন মি·আসা আৎচিয়া। ইন্দিবা গিম্মিকান ইসলওনি হং·আ।

¹³ না·সং আন·থাংআন বিচাল দাক্কে নিবো। স্খুয়ো বা·রা হন·গিজা ইসলচা বি·আ মিচিকনা মা·গাপামা?

¹⁴ বুদ্ধিচা ইখো হা·আইনা মান·জামা, মি·আসা খিন্নিখো রো·এ দন্নোদে বিনা মান্দিরা·গিজানি হং·আ,

¹⁵ ইন্দিবা মিচিক খিন্নিখো রো·এ দন্নোদে বিনা রাসং দাক্কানি হং·আ? আন·থাংখো ফিনদাপনান মিচিকনা খিন্নি রো·আখো হন·জক।

¹⁶ সাবা ইখো রা·এ জিগ্রিকনা হা·ম্মোদে আংআ ইন্দাকে আগান্নুয়া, দিংথাং নিয়াম চিংনিবা দংজা বা ইসলনি মন্ডলীরাংওবা দংজা।

গিত্তেলনি মিয়াথামনি গিম্মিনো

¹⁷ দা·আও আংআ জেনি গিম্মিন গি·য়েৎনা হা·ম্মিংজক উনি গিম্মিনো না·সংখো মিৎথেলজা, মুয়ানা না·সং জেদাক্কে মন্ডলীও আপসান হং·আ উনি হা·সেল না·সংনি নাম্মা হং·গিজা নামগিজান হং·আ।

¹⁸ আংআ খিন্নাংআ, না·সং মন্ডলী গিত্তা আপসান হং·আনি সময়ও না·সংও মা·আৎগ্রিকা দংআ, আরো আংআ উখো অকখিসা বিবিবা রা·আ।

¹⁹ না·সংনি গিসেপো চানচিয়ারাং আপসান হং·জানুয়ান জেদাক্কে ইসলনি মিক্রোনও না·সংনি গিসেপো খাকখেৎ মান্দি সা হং·আ, উখো নিকনা মা·ন্না।

²⁰ মন্ডলী হং·এ আপসান হা·দামও জেখো চা·আ উয়াদে গিত্তেলনি মিয়াথাম হং·জা,

²¹ মুয়ানা না·সং সাকসাবা সাকগিপ্পিননা সেংগিজান চা·এ গাল্লা। আরো উনি হা·সেল সাকসা অকখ্রিয়ানা দাক্কা আরো সাকগিপ্পিন চুফেক্কা।

²² চা·না-রিংনা না·সংনি নক-জাম দংজামা? না·সং ইসলনি মন্ডলীখো চন্নিকিংজকমা আরো জেরাংনি মামুংআন দংজা বিসংখো খ্রাচা·এতিংআমা? আংআ না·সংনা মুয়াখো আগান্নুয়া? ইনি হা·সেল আংআ না·সংখো মিৎথেলনুয়ামা? মিৎথেলজাস্রাং।

²³ আংআ না·সংনা জেখো স্খিয়া উখো আংআ গিত্তেলচাখো মা·ন্না। জেনি ওয়াল্লো গিত্তেল যীশুখো বোবিলরাংনি জাক্কো রি·ম্মে হ·ন্নামিং,

²⁴ উনি ওয়াল্লো বিয়া রুটিখো রা·এ ইসলখো মিৎথেলামিং আরো উখো ফি·থংএ আগানামিং, “ইয়া আংনি বে·এন জেখো না·সংনান হ·ন্নুয়া; আংখো গিসিক রা·না ইন্দাকে দাকবো।”

²⁵ চা·আনি জা·মানো বিয়া রিংচাক্রাখো রা·এ আগানামিং, “আংনি হান·চিচা ইসলনি জে গিত্তাল খু·রাচাক্কাখো রা·রিকনুয়া উয়া খু·রাচাক্কানি চিন হং·জক ইয়া রিংচাক্রা। না·সং উনিখো রিংআ রিক্ষিতান আংখো গিসিক রা·না ইন্দাকে দাকবো।”

²⁶ উনি গিম্মিন বিনি রি·বাখুজানা দিপ্পাৎ না·সং ইয়া রুটিখো চা·আ আরো ইয়া রিং·চাক্রাওনিখো রিংআ রিক্ষিতান গিত্তেলনি সিয়ানি খাৎথাখো আগানফ্রাকবো।

²⁷ উনি গিম্মিন জেআন খ্রাগিজা দাক্কে ইয়া রুটিখো চা·আ আরো রিংচাক্রাওনিখো রিংআ বিয়া গিত্তেলনি বে·এননি আরো হান·চিনি সাক্কাও পাপ দাক্কা ইন্নে দোসি হং·আ।

²⁸ উয়া রুটিখো চা·না আরো রিংচাক্রাওনিখো রিংনা স্খাং মান্দি আন·থাংখো পরীক্ষা দাক্কে নিখানা,

²⁹ মুয়ানা চা·মিত্তিংও বিয়া গিত্তেলনি বে·এননি গিম্মিনো হা·আইজাওদে উয়া চা·আনি হা·সেল বিয়া আন·থাংনি সাক্কাওন শাস্তিখো রিংগামে রা·বাআ।

³⁰ উনি গিম্মিনান না·সংনি গিসেপো মিত্তামরাং বিলগ্রি আরো বে·এন সাজক, দা·আবা মিত্তামরাং সিজক।

³¹ আনচিং আন·থাংথাংখো বিচাল দাক্কে নিওদে আনচিং গিত্তেলনি বিচালওনি জক্কা।

³² ইন্দিবা আনচিংনি বিচালখো গিত্তেল দাক্কোদে বিয়া আনচিংখো শাসন দাক্কা, জেদাক্কোদে হা·গিলসাকনি গিম্মিকমুং আনচিংখো দোসি ইন্নে চানজা।

³³ উনি গিম্মিন আংনি জংআদারাং, না·সং মন্ডলী হং·এ গি·সা হা·দামও চা·না থম·দাকও সাকসা দা·আও সাকসানা সেংসোবো।

³⁴ সাবা অকখ্রিওদে বিয়া নকনিখো চা·এ রি·বাখানা, জেদাক্কোদে মন্ডলী হং·এ গি·সা হা·দামও থ·ম্মানি হা·সেল শাস্তিখো মা·ন্না নাংজা। দিংথাংরাংনি বিদিংও জেনসালো আংআ রি·বানুয়া উনো নাম্মাখো আগান্নুয়া।