1ম করিন্থীয়রাংনা 1 - Garo New Testament

সালাম হ·ন্না

^1-2 ইসলনি হা·সিকাচা বিনিন রিক্কামানা আংআ পৌল খ্রীষ্ট যীশুনি সাকসা ওয়াত্তেতা হং·জক। আংআ আরো জং সোস্থিনি করিন্থ সংজিলমানি ইসলনি মন্ডলীনি মান্দিরাংচা, আগানস্খাওদে না·সংচা চক্কিংজক। খ্রীষ্ট যীশুমুং নাংরিমাচা ইসল বিনা আন·থাংনা মিকসংএ না·সংখো দিংথাং দাক্কে দনজক আরো বিনি আন·থাংনি মান্দি হং·না রিক্কামজক। না·সংচা আরো গিপ্পিন হা·দামরাংচা জেরাং আনচিংনি গিত্তেল যীশু খ্রীষ্টখো গিত্তেল ইন্নে খু·রাচাক্কা বিসংনা চিংআ ইয়া চিঠিখো চক্কিংআ। বিয়া বিসংনিবা গিত্তেল, আনচিংনিবা গিত্তেল।

³ আনচিংনি আপফা ইসল আরো গিত্তেল যীশু খ্রীষ্ট না·সংনা খা·সাচাকখানা আরো থম·থমাখো হন·খানা।

⁴ আংআ ফাংনান না·সংনি গিম্মিন আংনি ইসলখো মিৎথেলা, মুয়ানা খ্রীষ্ট যীশুমুং নাংরিমে না·সং ইসলনি খা·সাচাক্কাখো মান·জক।

⁵ উয়া খা·সাচাক্কা ইয়ান, না·সং খ্রীষ্টমুং নাংরিমে গিম্মিক গিত্তান, আগানস্খাওদে গিম্মিকখো আগানানি বিলও আরো হা·আইয়াও দাল·রোরোজক,

⁶ মুয়ানা খ্রীষ্টনি গিম্মিন চিংনি সাক্ষি হ·ন্না না·সংনি খা·থংও দংআ।

⁷ উনি গিম্মিনান না·সং আনচিংনি গিত্তেল যীশু খ্রীষ্টনি ফারাকানা খা·দংএ নিচাকসোংআ ইন্নে ইসলনি হ·ন্না না·সংনা চু·ওংগিজা দংজা।

⁸ আনচিংনি গিত্তেল যীশু খ্রীষ্টআন বন·খামওনা দিপ্পাৎ না·সংখো খেম·খেম দন্নুয়া, জেনি হা·সেল বিনি রি·বানি সালো না·সং দোসগ্রি দাক্কে দংনুয়া।

⁹ ইসল বিবিরা·না খ্রাগিবা হং·আ; বিয়ান না·সংখো রিক্কামজক জেদাক্কে বিনি দেফা আনচিংনি গিত্তেল যীশু খ্রীষ্টমুং না·সং নাংরিমে দংআ।

মন্ডলীও মা·আৎগ্রিকানি

¹⁰ জংআদারাং, আনচিংনি গিত্তেল যীশু খ্রীষ্টনি হং·এ আংআ না·সংখো নাম্মেন মল·মলিংজক, না·সং গিম্মিকান আপসান হং·রিমবো। না·সংনি গিসেপো মা·আৎগ্রিকানি দংজাখানা, বাত্তেসা না·সং গিসিকসান আরো চানচিয়াসান হং·বো।

¹¹ আংনি জংআদারাং, না·সংনি গিসেপো নিরিয়া-গিসিয়া দংআ ইন্নে ক্লোয়ীনি নকনি মান্দিরাংচা খিন্নাজক।

¹² আংআ ইয়া খাৎথাখো আগান্না হা·ম্মিংআ, না·সংনি গিসেপো সাবা আগানা, “আংআ পৌলনি দলনি”; সাবা আগানা, “আংআ আপল্লোনি দলনি”; সাবা আগানা, “আংআ পিতরনি দলনি”; দা·আবা সাবা আগানা, “আংআ খ্রীষ্টনি দলনি।”

¹³ ইন্দিবা খ্রীষ্টখো বাক দাকজকমা? পৌলখো না·সংনি গিম্মিন চিসলো দাৎখাপামিংমা? না·সং পৌলনি বিমুংও রিপ্পলজকমা?

¹⁴ আংআ ইসলখো মিৎথেলা, ক্রীষপ আরো গাইয়না আগ্রে না·সং দারাংখোবা আংআ রিপ্পলেতজা,

¹⁵ জেদাক্কে দারাংবা ইন্দাকে আগান্না মান·জা, না·সং আংনি বিমুংও রিপ্পলজক।

¹⁶ স্তিফাননি নকনি মান্দিরাংখোবা আংআ রিপ্পলেতজক ইন্দিবা ইনাআগ্রে দারাংখোবা রিপ্পলেতনা ইন্নে আংনি গিসিকও নাজাংআ।

¹⁷ খ্রীষ্ট আংখো রিপ্পলেতনা ওয়াত্তেতজা বাত্তেসা নাম্মা খাৎথাখো আগানফ্রাকনান ওয়াত্তেতজক। উয়া নাম্মা খাৎথাখো বিয়া আংখো হা·আইগিবারাংনি খু·সুকচা আগানফ্রাকনা ওয়াত্তেতজা, জেদাক্কে খ্রীষ্টনি চিসলো সিয়া বিলগ্রি হং·আরিজা।

খ্রীষ্টআন ইসলনি হা·আইয়া আরো বিল হং·আ

¹⁸ জেরাং ব·ন্নানি রামাও রি·ইংজক বিসংচা খ্রীষ্টনি উয়া চিসলো সিয়ানি খাৎথাদে জাদানি আগ্রে মামুংবা হং·জা; ইন্দিবা আনচিং জেরাং পাপওনি জক্কেতানি রামাও রি·ইংজক আনচিংনাদে উয়া ইসলনি বিল হং·আ।

¹⁹ রংথালগিবা শাস্ত্রও চক্কা দংআ, “আংআ হা·আইগিবারাংনি হা·আইয়াখো নাসিয়েতনুয়া, বুদ্ধি দংগিবারাংনি বুদ্ধিখো বিথিগ্রি দাক্কেতনুয়া।”

²⁰ ইন্দিবা হা·আইগিবা মান্দি বাও? স্খিয়াখো মান·গিবা মান্দিবা বাও? আরো জিগ্রিকানি বিল দংআ ইয়া চাসংনি ইন্দাকগিবা মান্দিবা বাও? ইয়া হা·গিলসাকনি হা·আইয়া জাদানিসান হং·আ ইসল উখো ফিন্নিকখুজামা?

²¹ ইসল বিনি আন·থাংনি হা·আইয়াও থিক দাকজক ইন্নেন হা·গিলসাক বিনি আন·থাংনি হা·আইয়াচা ইসলখো হা·আইনা মান·জা। ইনি গিম্মিন নাম্মা খাৎথানি গক্কাচা পাপওনি বিবিরা·গিবারাংখো জক্কেতাখো ইসল নাম্মা ইন্নে চানচিজক।

²² যিহূদীরাং চিন গিত্তা আইয়াও ইনমানগিবা কামখো নিনা হা·ম্মা, গ্রীকরাং হা·আইয়াখো সান্দিয়া,

²³ ইন্দিবা আনচিং চিসলো দাৎখাপা মান·গিবা খ্রীষ্টনি খাৎথাখো আগানফ্রাকা। উয়া খাৎথা যিহূদীরাংনা চাংফেংআনি আরো গিপ্পিন জাতরাংনা গক্কানি হং·আ,

²⁴ ইন্দিবা যিহূদী হং·খানা আরো গ্রীকবা হং·খানা, ইসল জেরাংখো রিক্কামজক বিসংচা উয়া খ্রীষ্টন ইসলনি বিল আরো ইসলনি হা·আইয়া।

²⁵ ইসলও জেখো গক্কা ইন্নে চানচিমা·ন্না উয়াদে মান্দিনি হা·আইয়ানা বাত্তে বাং·এন হা·আইয়ানি হং·আ, আরো জেখো বিলগ্রি ইন্নে চানচিমা·ন্না উয়াদে মান্দিনি বিলনা বাত্তে বাং·এন বিলগ্মাং হং·আ।

²⁶ জংআদারাং, না·সংখো জেনসালো রিক্কামামিং উনসালো না·সং বাদাকগিবা মান্দি হং·আমিং উখো চানচিয়ে নিবো। মান্দিনি বিচালো না·সংনি গিসেপো বাং·এন হা·আইগিবা বা বিল্লাকগিবা বা দাল·বাৎগিবা মা·চংওনি হং·আ ইন্দাকেদে হং·জা।

²⁷ ইন্দিবা হা·গিলসাক জেখো গক্কা ইন্নে চানচিয়া ইসল উখোন বাচ্ছিয়ে রা·জক জেদাক্কে হা·আইগিবারাং খ্রাচা·আখো মা·ন্না। হা·গিলসাক জেখো বিলগ্রি ইন্নে চানচিচিপা ইসল উখো বাচ্ছিয়ে রা·জক জেদাক্কে বিল্লাকগিবা বিলগ্রি হং·আ।

²⁸ হা·গিলসাক জেখো চন্নিকানি আরো মান্দিরা·গিজানি ইন্নে চানচিয়া, আরোবা হা·গিলসাকনি মিক্রোনও জেআন মামুংআন হং·জা উখোন ইসল বাচ্ছিয়ে রা·জক জেদাক্কে হা·গিলসাকনি মিক্রোনও গামচাৎগিবারাং গামচাতাগ্রি হং·আ।

²⁹ বিয়া উরাংখো বাচ্ছিয়ে রা·জক জেদাক্কে বিনি মিকখাংও মান্দি সাকসাবা রাসং দাকনা মান·জা।

³⁰ খ্রীষ্ট যীশুমুং না·সং নাংরিমজক ইয়াদে ইসলওনিন হং·জক। যীশু খ্রীষ্টন আনচিংনা ইসলনি হন·গিবা হা·আইয়া; বিয়ান আনচিংনি খাকখেৎগিবা, রংথালানি আরো জক্কেতানি হং·আ।

³¹ ইনি গিম্মিন রংথালগিবা শাস্ত্রনি খাৎথা গিত্তা, “রাসং দাকগিবা গিত্তেলখো রা·এন রাসং দাকখানা।”