تیتوس 3 - Gilaki New Testament

مسیحی کردکأر و زٚندیگی

¹ ایماندأرأنَ خأطر بأوٚر کی حأکیمأن و حوکومتٚ موقأم‌دأرأنَ فرمأنَ ببرد و حورمت بٚنٚد و دائیم خورومٚ کأر کودنٚ رِه آمأده بٚبٚد.

² اَشأنَ بوگو کی هیکسٚ جَا بد نٚگد و بوگو موگو جَا دؤر بئیسٚد و رأس‌رأسِی فروتنی‌یَ همه کسَ نیشأن بٚدٚد.

³ اَمأنٚم ای زمأت جأهیل و یاغی و اَویر و شهوتأن و کثیفٚ لیذتأنٚ میأن اسیر بیم. اَمی زٚندیگی بوخل و کینه جَا پور بو؛ همٚتأن اَمی جَا نیفرت دأشتید، اَمأنٚم همٚتأنٚ جَا متنفیر بیم.

⁴ ولی او زمأت فأرٚسِه کی اَمی نیجأت بٚدأ کس خودا، مهرٚوأنی و لوطف آشیکأرَ بو

⁵ و اَمٚرَه نیجأت بٚدأ، ولی نه اَمی خورومٚ کأرأنٚ وأسی کی انجأم بٚدأبیم بلکی فقد او رحمتٚ وأسی کی اَمِرِه دأشتی. اون اَمی گونأیأنٚ شؤستن اَمرأ، روح‌القدسٚ جَا، اَمٚرَه ایتأ تأزه تولد و تأزه زٚندیگی بٚبخشه.

⁶ او کأرٚ وأسی کی اَمی نیجأت بٚدأ کس، عیسا مسیح انجأم بٚدأ، خودا روح‌القدسَ فرأوأنی اَمٚرَه بٚبخشه

⁷ کی اونٚ فیضٚ اَمرأ بی‌گونأ بٚحیسأب بأییم و موطمٚین بیبیم کی همیشٚکی زٚندیگی‌یَ ارث بریم.

⁸ اَ بینیویشته‌یأن همٚتأ رأست و دوروسته. جٚه اَ خأطر، خأیم اوشأنَ تأکیدٚ اَمرأ ایماندأرأنٚ یأد بأوری کی اَشأن دائیم خورومٚ کأرأن بوکوند، چونکی اَ کأرأن همٚتأ آدمأنٚ رِه خُب ایسه و فأیده دأره.

⁹ تٚرَه بیخودی جٚدٚلأنٚ رِه و شجره‌نأمچه‌یأن و بوگو موگو شریعتٚ سٚر درگیرَ نوکون، چون فأیده نأرِه و دردییم دوأ نوکونه.

¹⁰ اگه اینفر تفرقه و سیوأیی تأوٚدأنَ بأعیث بِه، ایوأر تأ دو وأر اونَ وأخٚوٚرَ کون. بأزون دِه اونَ کأر نوأدأشتن،

¹¹ چون دأنی اَطوچی آدم رأ اَویرَ بوسته‌ و گونأ دورون غولطه خوره و خودشٚ گونأیأن اونَ محکومَ کونه.

پولسٚ آخری سیفأرشأن و آخری سلأمأن

¹² خأیم آرتیماس یا تیخیکوسَ تی ورجأ اوسه کونم. هر زمأت ایتأ جٚه اَ دو نفر فأرٚسِه اویَه هر چی زوتر بیأ نیکوپولیس می ورجأ چون تصمیم دأرم زمستأنٚ رِه اویَه بئیسٚم.

¹³ تأ اویَه کی بِه، زیناس و اَپلسَ یاور بٚدٚن تأ خوشأنَ سٚفرٚ ایدأمه بٚدٚد و هر چی ایحتیأج دأرٚد، اَشأنٚ رِه فرأهم بوکون

¹⁴ کی اَطویی اَمی کیلیسایأنٚ آدمأن یأد بیگیرٚد کی ضروری نیأزأنٚ رفع کودن و خورومٚ کأرأنٚ انجأم دٚئنٚ رِه تلاش بوکوند و خوشأنٚ زٚندیگی‌یَ بی فأیده نوگذرأند.

¹⁵ تومأمٚ اوشأنی کی می ورجأ ایسأد تٚرَه سلأم فأرٚسأنٚده. تونم اویَه ایماندأرأنٚ رِه کی اَمٚرَه دوس دأرٚده سلأم فأرسأن. خوداوندٚ فیض شیمی همٚتأنٚ اَمرأ بٚبه.