تیتوس 2 - Gilaki New Testament

موختلفٚ گورویأنٚ وظیفه‌یأن

¹ ولی تو دوروست زٚندیگی کودنٚ رأ روشَ اوشأنَ بأموج.

² پیرٚمردأکأنَ بأموج کی سنگین و جأ دکفته و پرهیزکأر بٚبٚد، دوروست ایمأن بٚدأرٚد و همه کأرَ جٚه سٚرٚ محبت و صبر دأشتٚن انجأم بٚدٚد.

³ پیرٚزنأکأنٚم بأموج کی خوشأنٚ زٚندیگی و کردکأرٚ دورون جأ دکفته بٚبٚد، پوشتٚ‌سٚر گوئی نوکونٚد، شرأب خوردنٚ اسیر نٚبٚد، اونچی کی خورومچیه البأقیأنٚم بأموجد

⁴ کی بتأنٚد جوأنٚ زنأکأنَ بأموجد کی چوطو خوشأنٚ مرد و زأکأنَ دوس بٚدأرٚد،

⁵ عأقیل و نجیب بٚبٚد و لأیٚقٚ خانٚه‌دأر و مردٚ رِه سٚربرأهٚ عیأل بٚبٚد کی هیکس خودا کلامٚ بد گفتنٚ رِه بهأنه نیأفه.

⁶ هطویم، جأهیلأنَ اَندرز بوکون کی پرهیزکأر و عأقیل بٚبٚد.

⁷ خودٚتٚم وأستی هرتأ خورومٚ کأر انجأم دٚئنٚ اَمرأ، اَشأنٚ رِه نومونه بیبی؛ تی آمؤختٚنٚ دورون صأف و صأدیق و جدی بوبو.

⁸ تی گبأنٚم وأستی منطقی بٚبه و عقل اَمرأ جور بأیٚه تأ اوشأنی کی تی اَمرأ موخألفت کونٚده جٚه اَ خأطر کی فورصت نیافٚده اَمی جَا بد بٚگد، خجألت بوخورد.

⁹ غولأمأنَ اَندرز بوکون کی خوشأنٚ اربأبٚ دستورأنٚ جَا فرمأن ببرد و حقٚ سعی بٚزٚنٚد کی هرتأ کأرٚ دورون اَشأنٚ رضأیتَ بٚدٚس بأوٚرٚد؛ خوشأنٚ اربأبٚ اَمرأیم توک بٚتوک نأیٚد؛

¹⁰ یأد بأوٚر کی اَشأنٚ جَا دوزدی نوکونٚد بلکی خوشأنٚ کردکأرٚ اَمرأ نیشأن بٚدٚد کی همه جوره شأ اَشأنَ ایعتمأد کودن، اوطویی کی آمؤختٚن دروأره‌یٚ خودا و اَمی نیجأت بٚدأ کس جٚه هر جهت قشنگٚ چی و جالب بٚبه.

¹¹ چونکی خودا فیض ظأهیرَ بوسته، هو فیض کی تومأمٚ مردومٚ رِه نیجأتٚ بأعیث به

¹² و اَمٚرَه آموجه کی جٚه الوات‌ گیری زٚندیگی و خوشیأنی کی گونأ اَمرأ ایسه دٚس فأکٚشیم و پأکٚ زٚندیگی بٚدأریم کی خودایَ خوش بأیِه.

¹³ اگه اَطو زٚندیگی بوکونیم، تأنیم اومید و ایشتیأقٚ اَمرأ او مووأرٚکٚ روجٚ رأفأ بئیسیم کی اونٚ دورون پیله خودا و اَمی نیجأت بٚدأ کس، عیسا مسیح، شوکو و جلالٚ اَمرأ نمأیأنَ به.

¹⁴ اون خو جأنَ اَمی گونأیأنَ وأسی فٚدأ بوکود تأ اَمٚرَه همٚتأ شرورٚ کأرأنٚ جَا نیجأت بٚده و اَمٚرَه پأکٚ کونه و اَمی جَا ایتأ قوم بوجود بأوٚره کی ایجورٚ خأص اونٚ شین بٚبه، خورومٚ کأرأنٚ انجأم دٚئنٚ رِه خٚیلی موشتأق بٚبٚد.

¹⁵ اَ حِئقتأنَ بأموج و مؤمینأنَ اوشأنٚ انجأمٚ رِه تِشویق بوکون. هر وخت لأزیم بید‌ِیی، قودرت و ایختیأرٚ کأمیلٚ اَمرأ اَشأنَ تِنبیه و ایصلأح بوکون. ولأن هیکس تی گبأنَ خأر بٚحیساب بأوٚره.