رومیأن 7 - Gilaki New Testament

دینی حوکمأنٚ جَا آزأدَ بوستن

¹ اَی جأن و دیلٚ برأرأن و خأخورأن، شومأ کی دینی حوکمأنٚ اوصولَ دأنیدی، مگه نأنیدی کی اَ اوصول تأ وختی اینفرٚ سٚر حوکم کونه کی او آدم زٚنده بٚبه.

² شٚمٚره مثأل بٚزٚنم، دینی حوکمأنٚ موطأبٚق، ایتأ زنأی کی عروسی بوکوده، تأ او وخت کی اونی مردأی زٚنده ایسه، اونی جَا پأبنده و اونی اَمرأ عهد دأره، ولی اگه اونی مردأی بیمیره، جٚه او دینی حوکمی کی اونَ، او مردأکٚ رِه پأبند کودی، آزأدَ بِه.

³ اَطویی، تأ وختی اونی مردأی زٚنده ایسه، اگه ایتأ مردأکٚ دیگه اَمرأ جینسی ایرتیبأط بٚدأره، اونَ زٚنأکأر دؤخأنده. ولی اگه اونی مردأی بیمیره، او دینی حوکمٚ جَا آزأدَ بِه و اگه کی ایتأ مردأکٚ دِه اَمرأ عروسی بوکونه، زٚنأکأر نیبه.

⁴ می برأر و خأخورأن، مسیح جیسم وأسی، شومأنم دینی حوکمأن رِه بٚمٚردیدی، کی بتأنید اینفر دِه شین بیبید، اونی کی جٚه مورده‌یأن ویریزأنه بوبوسته. هنٚ وأسی، تأنیم خودا رِه خورومٚ مأصول بأوریم.

⁵ او وخت کی هنو اَمی کُئنه ذأت اَمی وجودٚ سٚر حوکم دأشتی، او هوسأنی کی پورجٚه گونأ بو اَمی وجود میأن کأر کودیدی و دینی حوکمأن اَمٚرَه اَنتیریک کودی و تترج مرگٚ رِه مأصول اَوٚردیمی.

⁶ ولی اَسه جٚه دینی حوکمأن آزأدَ بوستیم، چونکی اونٚ رِه بٚمٚردیم و دِه اونی قودرتٚ غولأم نیئیم. اَسه تأنیم خودایَ خیدمت بوکونیم، نه قدیمٚ رأ روش مأنستَن ینی بینیویشته بوبوسته قأنونأنٚ ایطأعت کودن اَمرأ، بلکی جٚه خودا روحٚ رأ روش کی زٚنده‌یه.

گونأ و دینی حوکمأن

⁷ پس مگه منظور اَنه کی دینی حوکمأن گونأ جَا آلوده‌ ایسه؟ معلومه کی نییٚه! رأس‌رأسِی، اَن دینی حوکمأن بود کی می گونأیَ مٚرَه نیشأن دٚیی. مٚثٚل اَوٚرم، اگه دینی حوکمأن نوگفته بود «طمع نوکون»، هیوخت نفأمستیم کی طمع کودن گونأیه.

⁸ ولی گونأ جٚه او فورصت کی دینی حوکمأن بوجود اَوٚره، ایستفأده کودی کی هرجور طمعَ می دورون زٚنده کونٚه! اگه دینٚ حوکمی نمأنسته‌بی، گونأ اَجور قودرتٚ بٚدٚس نأوٚردی.

⁹ ای وخت بو کی بودونٚ اَنکی دینی حوکمأنَ بدأنیم زٚندیگی کودیم. ولی وختی اَ حوکمأنٚ جَا وأخبدأرَ بوستم، بفأمٚستٚم کی اوشأنَ می پأ جیر بنأم و هنٚ وأسی گونأکأرٚم و مٚردنٚ رِه محکومٚم.

¹⁰ هو خورومٚ حوکمأن کی اینتظأر دأشتیم زٚندیگی رأ روشَ مٚرَه نیشأن بٚدٚد، می مٚردن و محکوم بوستنَ بأعیث بوبوستده.

¹¹ گونأ مٚرَه گول بٚزِه و پأکٚ ایلاهی حوکمأنٚ اَمرأ، مٚرَه مٚردنٚ رِه محکوم بوکوده.

¹² ولی تومأمٚ اَشأنٚ اَمرأ، هیذره بدگومأن نییٚم کی دینی حوکمأن، خؤرَه خؤرَه خٚیلی خُب و موقدس و اینصأفٚ اَمرأ ایسٚد.

¹³ ولی اَشأن چوطو ایمکأن دأره؟ اگه دینی حوکمأن می محکوم و هلأکٚ بوستنَ بأعیث بوبوسته، چوطو تأنه خُب بٚبه؟ حِئقت اَنه کی دینی حوکمأن خُبٚده، ولی گونأ بو کی جٚه ایتأ خورومٚ اَفزأر سوءایستفأده بوکود کی می محکومٚ بوستنَ بأعیث بٚبه. فأندرید کی گونأ چندر پٚلیده کی خو مقصد فأرٚسِئنٚ رِه ینی می جٚه بین شؤئؤنٚ وأسی، جٚه دین و خودا خوروم حوکمأن سوءایستفأده کونه.

گونأ اَمرأ فأکش دٚکٚش

¹⁴ پس، دینی حوکمأن خُبٚده و اونی دورون ایشکأل نٚنه. ایشکأل می دورون نٚهأ کی هچین ایتأ غولأم مأنستَن گونأیَ بوفروخته بوبوستم.

¹⁵ هنٚ وأسی، می کأرأنٚ ایختیأرَ نأرٚم، چونکی هر چی حقٚ سعی زنٚم دوروستٚ کأرَ انجأم بدم نتأنٚم، بلکی او کأری‌یَ کونم کی اونی جَا نیفرت دأرم.

¹⁶ خُب دأنٚم کی اونچی انجأم دٚهٚم، ایشتیوأیه و می دیلگیرٚ ویجدأنٚم مٚرَه نیشأن دِهه کی دینی حوکمأنٚ خُبی‌یَ قوبیل دأرم.

¹⁷ ولی هی کأر جٚه می دٚسٚ جَا برنأیه، چونکی اونی کی اَ کأرأنَ کونه من نییٚم. اَ گونأ کی می دورون ایسأ مٚرَه وأدأرِه کی اَ نأجورٚ کأرأنَ بوکونم، چونکی اون می جَا پورزورتره.

¹⁸ اَسه دِه مٚرَه ثأبیت بوبوسته کی اَ نفسٚ ذأتٚ خأطرٚ وأسی می وجود جٚه سٚر تأ پأ فأسیده. هر چی حقٚ سعی زنٚم، نتأنٚم مٚرَه وأدأرم کی خورومٚ کأرأنَ بوکونم. خأیم خُب ببم ولی نتأنٚم.

¹⁹ خأیم خُب و دوروستٚ کأرَ بوکونم، ولی قودرت نأرٚم. حقٚ سعی زنٚم کأری نوکونم کی پورجٚه گونأ بٚبه، ولی بی‌ایرأده گونأ کونم.

²⁰ پس اگه ایتأ کأر کونم کی نخأیٚم، پور معلومه کی موشکیل کویه نٚهأ: گونأ هنو مٚرَه خو چنگٚ میأن اسیر دأره.

²¹ اَ حِئقتَ می زٚندیگی دورون تجروبه بوکودم کی هر وخت خأیم خوروم کأر بوکونم، مِرِه بی‌ایرأده نأجورٚ کأر کونم.

²² خودا حوکمأنَ می دیلٚ اَمرأ دوس دأرم،

²³ ولی می دورون ایتأ دِه قودرت نٚهأ کی می فیکر اَمرأ دعوأ دأره. اَ قودرت مٚرَه گونأ غولأم چأکونِه، او گونأ کی هنو می دورون نٚهأ.

²⁴ اَخ کی چندر بیچأره‌یم! کی تأنه مٚرَه اَ مرگ ذأتٚ جَا آزأدَ کونه؟

²⁵ خودایَ شوکر، اَ کأرَ خوداوند، عیسا مسیح انجأم دِهه.