رومیأن 4 - Gilaki New Testament

ایبرأهیمٚ ایمأن

¹ بأزین اَطو بٚبه دروأره‌یٚ اونچی کی ایبرأهیم بیأفته چی وأ بیگیم، اون کی اینسأنی حیسأب بوکونیم، اَمأن کی یوهودی ایسیمٚ پیله بأبأ بو؟

² اگه اونی خوروم کأرأن بأعیث بوبوسته کی خودا ورجأ قوبیل بٚبه، تأنستی گولأز بوکونه. ولی خودا رأ روش اَن نوبو.

³ بیدینیم موقدس کیتأبأن میأن چی بوگفته بوبوسته: «ایبرأهیم خودایَ ایمأن بأوٚرده و اَن اونٚ رِه عیدألت بٚحیسأب بأمؤ.»

⁴ وختی اینفر ایتأ کأر کونه، اونی موأجب دِه پیشکشی بٚحیسأب نأیِه، بلکی ایچی ایسه کی خو کأرٚ وأسی فأگیفته.

⁵ ولی اونی کی کأری نوکونه، بلکی او خودایَ کی حتّا اوشأنی‌یَ کی اونَ نشنأسٚده عأدیل بٚحیسأب اَوٚره و نیجأت دِهه توٚکول کونه، اونی ایمأن اونٚ رِه عیدألت بٚحیسأب اَیِه.

⁶ داوود هه حِئقتٚ گفتن اَمرأ، گونأکأرٚ آدمٚ خوشألی وٚصفَ گه کی بودونٚ اَنکی لیأقت بٚدأره، خودا اونَ «بی‌گونأ» دؤخأنه:

⁷ «خوشبحألٚ اونی کی اونٚ گونأ بٚبخشه بوبوسته و اونی خطأ لأپوشأن بوبوسته.

⁸ خوشبحأل اونی کی خوداوند اونَ خطأکأر نشنأسه!»

⁹ هسأ ایمکأن دأره اَ سوأل پیش بأیٚه کی اَ خوشبختی کیأنٚ سأم بِه؟ مگه فقد اوشأنی سأم بِه کی هطو کی عیسا مسیحَ ایمأن دأرٚده دینی حوکمأنٚ موطأبٚق ختنه‌یٚم بٚده؟ یا اوشأنی سأم بِه کی بودونٚ ختنه، فقد عیسا مسیحَ ایمأن دأرٚده؟ ایبرأهیم رِه چوطو بو؟ بیدِییم کی ایبرأهیمٚ ایمأن اونٚ رِه عیدألت بٚحیسأب بأمؤ.

¹⁰ ولی اَ کأر چوطو ایتفأق دکفته؟ جٚه ختنه پٚسی بو کی اون عأدیل بٚحیسأب بأمؤ یا پیشتر جٚه اَنکی ختنه بٚبه؟ پور معلومه کی پیشتر جٚه ختنه رسمٚ و روسومأن بو.

¹¹ رأس‌رأسِی اون هو وخت ختنه بوبوسته کی پور زمأت بوستی خودایَ ایمأن بأوٚرده بو و او ایلاهی برکتٚ وعده‌یَ فأگیفته بو. ختنه مرأسیم، هه حِئقتٚ جَا ایتأ نیشأن و نٚمود بو. هنٚ وأسی ایبرأهیم روحأنی رأ روشٚ اَمرأ، اوشأنی رِه کی بودونٚ ختنه بوستن خودایَ ایمأن اَوٚرٚده پئر ایسه کی اوشأنم عأدیل بٚحیسأب بأیٚد.

¹² اَنٚم بٚگم کی ایبرأهیم روحأنی رأ روشٚ اَمرأ اوشأنی رِه کی ختنه بوبوستده، پئر ایسه، ولی ایبرأهیم زٚندیگی اَمرأ بفأمستده کی خودا لوطف و نیجأت جٚه ایمأنٚ رأ بٚدٚس اَیِه و ختنه مرأسیم اَمرأ نیبه. چونکی ایبرأهیم فقد جٚه رأی ایمأن بتأنسته خودا رضأیتَ بٚدٚس بأوٚره، پیشتر جٚه اَنکی ختنه بٚبه.

¹³ خودا ایبرأهیم و اونی نتأجَ وعده بٚدأ کی دونیأیَ اَشأنَ فأده معلومه کی خودا اَیتأ وعده اَنی وأسی نوبو کی ایبرأهیم دینی حوکمأن و مرأسیمَ انجأم دٚیی، بلکی فقد اونی ایمأنٚ وأسی بو، ایمأن و ایعتمأد اَنَ کی خودا خو وعده‌یأنَ وفأ کونه. خودایٚم اَ ایمأنٚ وأسی، ایبرأهیمَ عأدیل حیسأب بوکود.

¹⁴ پس اگه تأ هسأ ایدعأ دأریدی کی خودا برکتأن اوشأنی سأم بِه کی یوهودٚ حوکمأن و تشریفأتَ حیفظ کونٚده، ینی شیمی منظور اَنه کی خودا وعده‌یأن اوشأنی کی ایمأنٚ صأب ایسٚده رِه ایعتبأر نأرِه و خودایَ ایمأن دأشتنم ایتأ بیخودی کأر ایسه.

¹⁵ ولی حِئقتٚ اَنه کی هر وخت حقٚ سعی بٚزنیم کی نیجأت و ایلاهی خوشبختی‌یَ جٚه رأیٚ دینی حوکمأنٚ انجأم دئن بٚدٚس بأوریم، همیشٚک آخرپٚسی اَطو به کی خودا غیظ و غضب اَمی سأم بِه؛ چونکی هیوخت نتأنیم او حوکمأنَ تومأمٚ و کمأل انجأم بٚدیم. اَمأن فقد وختی تأنیم قأنونَ دیپیچأنیم کی هیذره قأنون نٚمأنه.

¹⁶ پس اَطو تأنیم بیگیم کی خودا خو برکتأنَ جٚه ایمأنٚ رأ اَمٚرَه عطأ کونه، ایتأ پیشکشی مأنستَن. هسأ چی مذهبی مرأسیمَ بجأ بأوریم و چی بجأ نأوریم، اگه ایتأ ایمأن ایبرأهیمٚ ایمأنٚ مأنستَن بٚدأریم، بودونٚ شک او برکتأن اَمی سأمٚم بِه، چونکی ایمأنٚ وأسی ایبرأهیم اَمی همٚتأنٚ پئره.

¹⁷ هوطو کی موقدس کیتأبأن دورون بینیویشته بوبوسته: «تٚرَه خٚیلی قومأنٚ پئر چأکودم.» اَ کأر اَن وأسیه کی ایبرأهیم او خودایَ ایمأن بأوٚرده کی مورده‌یأنَ زٚنده کونه و تأزه چیأنَ جٚه اونچی کی ننأ چأکونه.

¹⁸ هنٚ وأسی، او وخت کی خودا ایبرأهیمَ بوگفته کی اونَ ایتأ پٚسر زأی فأدِه و جٚه اونی نتأج مردوم زیأدی بوجود اَیٚده، ایبرأهیم خودا وعده‌یَ ایمأن بأوٚرده، گرچی اَ کأر بوستنی نوبو.

¹⁹ چونکی او زمأت ایبرأهیم صد سأل دأشتی و اونی زن سارا نود سأل و هیتأن نتأنستیدی زأیدأر بٚبٚد. ولی وأزم، چونکی ایبرأهیمٚ ایمأن قوی بو، خودا وعده‌یَ شک نوکوده.

²⁰ دوروسته، اون هیوخت شک نوکوده. اون خودایَ ایمأن دأشتی و اونی ایمأن هر روج پورقوّت‌تر بوستی و خودایَ جلال دٚیی.

²¹ چونکی بأوٚر دأشتی خودا تأنه خو همٚتأ وعده‌یأنَ انجأم بٚده.

²² هه ایمأنٚ وأسی بو کی خودا اونَ عأدیل بٚحیسأب بأوٚرده.

²³ اَ بینیویشته کی «جٚه ایمأن رأ بو کی خودا شٚمٚره قوبیل بوکود» فقد دروأره‌یٚ ایبرأهیم بینیویشته نوبوسته.

²⁴ بلکی جٚه اَ خأطر بینیویشته بوبوسته کی اَمأن ایطمینأن بیأفیم کی خودا اَمٚرَه‌یٚم جٚه هو رأ، خو حوضور قوبیل کونه، ینی جٚه رأی خودا وعده‌یَ ایمأن دأشتٚن، او خودا کی اَمی خوداوند عیسایَ مٚردنٚ پٚسی زٚنده کوده.

²⁵ اون اَمی گونأیأنٚ وأسی مٚردنٚ بیسپأرده بوبوسته و دووأره زٚنده بوسته کی اَمأن خودا حوضور دورون عأدیل بٚحیسأب بأییم.