رومیأن 15 - Gilaki New Testamentالبأقیأنٚ فیکرم بوکونیم 1 اَمأن کی پورقوّتیم، اوشأنی مولأحظه‌یٚ وأستی بوکونیم کی اَجور موضویأنٚ دورون حساسٚده. فقد نوأستی اَمٚرَه رأضی بٚدأریم. 2 هرتأ جٚه اَمأن وأستی البأقی آدمأنَ کومک بوکونیم کی اونچی‌یَ کی دوروسته انجأم بٚدٚد. اَشأنَ وأستی در خوداوند بٚنأ بوکونیم. 3 چونکی مسیحٚم خو خوشی رِه زٚندیگی نوکودی، هوطو کی موقدسٚ کیتأبأنٚ دورون بینیویشته بوبوسته: «بی‌حورمتی جٚه اوشأنی کی تٚرَه لوغاز خأنٚده، می سٚر کفته.» 4 چونکی هرچی پیشتر موقدسٚ کیتأبأنٚ دورون بینیویشته بوبوسته، اَمی آمؤختٚنٚ رِه ایسه کی بتأنیم اومید بٚدأریم او صبرو تحمولٚ جَا کی اوشأنی دورون بأمؤخته بوبوسته، بتأنیم اومید بٚدأریم. 5 بٚبه کی، او خودا کی صبر و دیلگرمی عطأ کونه، شٚمٚره کومک بوکونه کی کأمیل صولح و صفأ دورون کس‌کسٚ اَمرأ زٚندیگی بوکونید و کس‌کسٚ رِه او فیکری‌یَ بٚدأرید کی عیسا مسیحٚ پیروأنٚ رِه شأیسته ایسه. 6 اوطؤیی اَمأن همٚتأن تأنیم ایتأ دیل و ایتأ زوأنٚ اَمرأ خودایَ کی اَمی خوداوند عیسا مسیحٚ پئره، پرستٚش و ستأیٚش بوکونیم. 7 کس‌کسَ شیمی جمَ دورون جأن و دیلٚ اَمرأ قوبیل بوکونید، هوطو کی مسیحٚم شٚمٚره جأن و دیلٚ اَمرأ قوبیل بوکوده کی خودا جلال بیأفه. 8 بٚسرأفت دیبید کی عیسا مسیح بأمؤ کی یوهودیأنَ خیدمت بوکونه و اَطو ثأبیت بوکونه کی خودا اَمین ایسه و خو وعده‌یأنَ کی اَشأنٚ پیله بأبأیأنَ فأدأ انجأم دِهه. 9 هطویم بٚسرأفت بیبید کی اون بأمؤ، اوشأنی کی یوهودی نییٚدم نیجأت بٚدأ کی اَشأنٚم خودایَ او رحم و دیلسوجی وأسی کی اوشأنٚ رِه بوکوده، شوکر و ستأیٚش بوکونٚد. بینیویشته بوبوسته: «قومأنٚ میأن تِرِه شوکر گم و تی نأم رِه سورود خأنم.» 10 ایوأردِه ایتأ جأ فٚرمأیه: «اَی قومأن شومأن، اونی قوم، بنی‌ایسرأییلٚ اَمرأ، خوشألی بوکونید!» 11 هطویم گه: «اَی قومأن، خوداوندَ ستأیٚش بوکونید! همه کس اونَ ستأیٚش بوکونٚد!» 12 اشعیای پیغمبرٚم گه: «داوودٚ تختٚ وأرث ظأهیرَ بِه و قومأنٚ پأدیشأ بِه و اون اَشأنی تنأ اومیده.» 13 دوعأ کونم کی او خودا کی همٚتأ اومیدأن، اونی جَا سٚرگیره، شٚمٚره او ایمأنی کی اونَ دأریدٚ وأسی، خوشألی و آرأمٚش عطأ بوکونه کی روح‌القدس کومکٚ اَمرأ، شیمی اومید روج بٚروج ایضأفه بٚه. پولس، او قومأنی کی یوهودی نییٚده روسوله 14 اَی برأرأن، شیمی جولفٚ فأم و خورومٚ کردکأر جَا اصلن شک نأرٚم و ایطمینأن دأرم کی اَ موضو‌یَ اَندر خُب دأنیدی کی تأنیدی اوشأنَ البأقی آدمأنٚم بأموجید. 15 ولی اَطو بٚگم، بعضی جٚه اَ مسئله‌یأنٚ سٚر یأرستنٚ اَمرأ تأکید بوکودم چونکی دأنستیم فقد ایتأ بٚخأطر اَوٚردٚن وٚسته؛ چونکی من خودا فیضٚ اَمرأ، 16 شومأن کی یوهودی نیئیدی خیدمت کودنٚ رِه عیسا مسیحٚ اوسه کوده ایسٚم، کی اینجیلٚ خورومٚ خٚوٚرَ شٚمٚره فأرسأنم، شٚمٚره ایتأ خوشبو قوربأنی مأنستَن خودایَ پیشکش بوکونم، چونکی شومأن روح‌القدسٚ اَمرأ، اونی رِه قأبیلٚ قوبیل و موقدس بوبوستید. 17 پس تومأمٚ اَ کأرأنٚ وأسی کی عیسا مسیح می دٚسٚ اَمرأ انجأم دِهه، تأنٚم گولأز بوکونم. 18 دروأره‌یٚ البأقیأنٚ خیدمت کودن نیأرم قیضأوت بوکونم، ولی تأنٚم دروأره‌یٚ می خیدمت قیضأوت بوکونم و بٚگم کی مسیح مٚرَه اوشأنی رِه کی یوهودی نییٚد ایتأ اَفزأر چأکوده کی چی می پیغأم اَمرأ چی می کأرأنٚ اَمرأ خودا ور هیدأیت بٚبٚد. 19 و اَشأن او نیشأنه‌یأن و موجیزه‌یأنٚ قودرتٚ تأثیرٚ اَمرأ کی جٚه خودا روح بو، قأنع بوستیدی. اَطو بو کی مسیحٚ اینجیلٚ خورومٚ خٚوٚرَ جٚه اورشلیم تأ ایلیریکوم تومأم و کمأل وأگویا بوکودم. 20 ولی تومأم وخت می آروزو اَن بو کی همٚتأ جأجیگأیٚم بٚشٚم، خودا کلامَ او جیگأیأنٚ دورون کی مسیح نأم هیوخت بشتأوسته نوبوسته، بشأرت بدم. ولی هیوخت نخأستم کی اینجیلٚ خورومٚ خٚوٚرَ او جیگأیأنٚ دورون کی اینفر پیشتر اویَه ایتأ عیدّه‌یَ مسیح ور هیدأیت بوکوده، و ایتأ کیلیسا چأکوده بوبوسته موعیظه بوکونم. 21 رأس‌رأسِی هو نقشه‌یَ کی موقدس کیتأبأنٚ دورون بأمؤ دونبأل کودأندرم، اویَه کی فٚرمأیه: «اوشأنی کی هیچی دروأره‌یٚ اون اَشأنَ بوگفته نوبوسته بو، دینٚده و اوشأنی کی هیوخت دروأره‌یٚ اون نشتأوسته بود، فأمٚده.» 22 هنٚ وأسی ایسه کی تومأمٚ اَ مودّتٚ دورون نتأنستٚم شیمی دِئنٚ رِه بأیٚم، چونکی اَ جیگأیأنٚ دورون موعیظه کودنٚ موشغول بوم. پولس نقشه دونبألترٚ رِه 23 ولی اَسه دِه می خیدمت اَیِه تومأنَ بوسته و خٚیلی سالأن رأفأ ایسأنٚ پٚسی، موشتأقٚم کی بأیٚم شیمی ورجأ. 24 اومید دأرم اسپانیا رأ سٚر، بأیٚم شٚمٚره بیدینٚم کی ایتأ مودّتٚ پٚسی کی شیمی ورجأ بئیسأم و جٚه شیمی دِئن ایپچه سِئرَ بوستم، مٚرَه اسپانیا ور، شؤئؤنٚ رِه بدرقه بوکونید. 25 ولی پیشتر جٚه اَنکی بأیٚم شیمی ورجأ، اوّل شٚم اورشلیم کی اویَه مسیحیأن وأسی کی جٚه یوهود نتأجٚده، ایتأ پیشکش بٚبرم. 26 چونکی هوطو کی دأنیدی، یونأن و مقدونیه مسیحیأن، او مسیحیأنٚ رِه کی اورشلیمٚ میأن سختٚ شرأیطٚ دورون زٚندیگی کودأندٚرٚده، ایپچه پیشکش جمَ کودٚده. 27 اوشأن اَ کأرَ رضأیت و خوشألی اَمرأ انجأم بٚدأده، چونکی ایحسأس کونٚده اورشلیمٚ مسیحیأنٚ دِینٚ جیر ایسٚد. دأنیدی چٚره؟ جٚه اَ خأطر کی اَ مسیحیأن کی جٚه پیشتر یوهودی نوبود، مسیح نیجأتٚ خٚوٚرَ جٚه اورشلیمٚ کیلیسا مسیحیأن بشتأوستٚد. هنٚ وأسی چونکی اَ روحأنی عطیه‌یَ جٚه اویَه فأگیفتد، حس کونٚده کی ایتأ کوجه خیدمت کی تأنٚده اونٚ عوض انجأم بٚدٚد، اَن ایسه کی اَشأنَ مألی کومک بوکونٚد. 28 هطوکی اَ پیشکشَ مقصدَ فأرسأنم و اَشأنٚ خورومٚ کأرَ تومأنَ کونم، می رأ سٚر اسپانیا شؤئؤنٚ رِه، شیمی دِئنٚ وأسی اَیٚم 29 و ایطمینأن دأرم کی وختی بأیٚم، مسیح مٚرَه ایتأ عألمه برکتأن عطأ کونه کی شٚمٚره فأرسأنم. 30 اَی می جأن و دیلأن، ایلتمأس کونم عیسا مسیح و او محبت وأسی کی جٚه روح‌القدس شیمی دیلٚ میأن مِرِه بٚنأ بوبوسته، مٚرَه شیمی دوعأیأنٚ اَمرأ می تقلأ زِئنٚ دورون کومک فأرسأنید. 31 دوعأ بوکونید کی اورشلیمٚ دورون او یوهودیأنٚ جَا کی مسیحَ ایمأن نأرٚده، در اَمأن ببم. هطویم دوعأ بوکونید کی می خیدمت، اویَه مسیحیأنٚ رِه قأبیلٚ قوبیل بٚبه. 32 بأزون، تأنٚم خودا خأست اَمرأ، ایتأ خوشألٚ دیلٚ اَمرأ بأیٚم شیمی ورجأ کی کس‌کسَ قوّت بٚدیم. 33 می دوعأ اَنه کی او خودا کی آرأمٚش اونی سرأگیره، شیمی همٚتأنٚ اَمرأ بٚبه. آمین! |
© 2024 Transform Iran
Transform Iran