رومیأن 14 - Gilaki New Testament

مسیحیأن وظیفه کس‌کسٚ رِه

¹ اونی کی سوستٚ ایمأن دأره، شیمی جمَ میأن قوبیل بوکونید و دروأره‌یٚ کأرأنی کی اوشأنٚ رِه ایتأ موشخصٚ نظر ننأ، اونی اَمرأ توک‌ بٚتوک نأیید.

² مثل بأوٚرٚم، اینفرٚ ایمأن اونَ وئأله هرچی‌یَ بوخوره، ولی اویتأ کی اونی ویجدأن حسأسه، فقد سبزییأنَ خوره.

³ پس اوشأنی کی اَجور گوشتٚ خوردنٚ رِه موشکیل نأرٚده، اوشأنی‌یَ کی نوخورٚده ملأمت نوکونٚد و اوشأنی کی نوخورٚده، اوشأنی جَا کی خورٚده ایرأد نیگیرٚد، چونکی خودا قوبیل بوکوده کی اَشأنٚم اونی زأی بٚبٚد.

⁴ اوشأن خودا بنده‌یأن ایسٚد، شیمی بنده‌یأن نییٚد، اوشأن فقد خودایَ جوأب پس دٚهٚده، نه شٚمٚره. هنٚ وأسی، وئألید خودا اوشأنی عقیده دوروست یا غلط بؤئؤنَ اَشأنَ نیشأن بٚده و البت خودا قأدیره کی اوشأنَ کومک بوکونه کی دوروستٚ رأیَ پیش بیگیرٚد.

⁵ بعضی‌یٚم گومأن کونٚده کی مسیحیأن وأستی یوهودیأنٚ موقدس روجأنَ خودا خأصٚ عیبأدتٚ روجأنٚ مأنستَن حیفظ بوکونٚد ولی بعضی دِه اَجور کأرأنَ بیخود دأنده و ایعتقاد دأرٚده کی همٚتأ روجأن ایجور خودا شین ایسٚد. دروأره‌یٚ اَجور موضویأن، هرکی وأستی خؤرَه تصمیم بیگیره.

⁶ اوشأنی کی خأصٚ روجأنٚ دورون خوداوندَ عیبأدت کونٚده، اونی حورمت نٚهٚنٚ رِه اَطو کونٚده. اوشأنم کی هرجور غذأیَ خورٚده، خوداوندٚ ایحترأم نٚهٚنٚ رِه اَطو کونٚده، چونکی پیشتر جٚه اونی خوردن خودایَ شوکر گده و اوشأنم کی بعضی خوراکأنٚ خوردنٚ جَا پرهیز کونٚده، خوداوندَ خأیٚد خوشألَ کونٚد و خودایَ شوکر کونٚده.

⁷ هر جور کی بٚبه نوأستی جٚه خأطرٚ دیم کی اَمی صأب ایختیأر خودمأن نیئیم و نتأنیم هرجور کی خأییم زٚندیگی بوکونیم و یا هرجور کی خأییم، بیمیریم.

⁸ چی زٚندیگی دورون چی مٚردنٚ دورون، اَمأن خودا جَا پیروی کونیم و اونی شینیم.

⁹ مسیحٚم جٚه مٚردن و زٚنده بوستن هه منظورَ دأشتی کی بتأنه چی زٚندیگی درأزأ دورون و چی اَمی مٚردن زمأتٚ دورون، اَمی خوداوند و صأب ایختیأر بٚبه.

¹⁰ پس، چٚره تی برأر و تی خأخورَ قیضأوت کونی؟ یا چٚره اونَ تی چومٚ دورون کوجه‌دأنه دینی؟ شیمی خأطرٚ دورون بٚدأرید کی هرتأ جٚه اَمأن وأستی خودا دأوری تختٚ جولو تنأ بئیسیم.

¹¹ چونکی بینیویشته بوبوسته: «خوداوند گه: می حیأتَ قسم خورم کی هرتأ زانو می جولو فوچومه و هرتأ زوأن مٚرَه ستأیٚش کونه.»

¹² هطویه، هرتأ جٚه اَمأن وأستی خودایَ حیسأب پس بٚدیم.

¹³ پس، کس‌کسٚ محکوم کودنٚ جَا دٚس فأکٚشیم و اونی عوض، حقٚ سعی بٚزنید شیمی کردکأر اوجور بٚبه کی البأقی ایمأندارأنٚ لغزش و کٚفتنَ بأعیث نٚبه.

¹⁴ منم، او ایختیأرٚ وأسی کی خوداوند عیسا مٚرَه فأدأ، بأوٚر دأرم کی هیتأ غذأیَ خوردن، خؤرَه خؤرَه ایشتیوأ نییٚه. ولی اگه اینفر ایعتقاد بٚدأره کی اَ کأر ایشتیوأیه، اَطو بٚبه، اَجور آدمٚ رِه ایشتیوأیه.

¹⁵ هطویم اگه دینیدی کی اوچی کی خوریدی شیمی برأرٚ ویجدأنَ اَذِت آزأر دِهه، وأستی اَ کأرٚ جَا دٚس بٚکشید، اَطو نٚبه محبتٚ موطأبٚق کردکأر نوکونیدی. ولأنید شیمی خوردن اینفرٚ ایمأنٚ جٚه بین شؤئؤنَ بأعیث بٚبه کی مسیح اونٚ رِه خو جأنَ فٚدأ بوکوده.

¹⁶ پس جوری عمل نوکونید کی اونی وأسی شیمی جَا ایرأد بیگیرٚد، حتّا اگه او کأر شیمی فیکر دورون دوروست بٚبه.

¹⁷ چونکی خودا ملکوت کی اَمأن مسیحیأنٚ زٚندیگی هدفه، خوردن و وأخوردن نییٚه بلکی خُبی و آرأمٚش و خوشألی جَا بهره بردٚنه کی روح‌القدس عطأ فٚرمأیه.

¹⁸ اگه اَطو مسیحَ خیدمت بوکونید، بأعیث بیدی خودا خوشألَ بٚه و البأقیأنم شٚمٚره تصدِق کونٚده.

¹⁹ پس شیمی هدف اَن بٚبه کی البأقی ایمأندأرأنٚ اَمرأ صولح و صفأ دورون بئیسید کی بأعیث بیبید اوشأنی ایمأن تقویت بٚبه.

²⁰ ایتأ پیسخأله گوشتٚ وأسی خودا کأرَ خرأبَ نوکونید. وأزم تیکرأر کونم، گوشتٚ میأن ایشکأل ننأ، ولی اگه اونی خوردن اینفرٚ ایمأنٚ سوستی و لغزشَ بأعیث بٚبه، اَ کأر گونأ بٚحیسأب اَیِه.

²¹ خوروم کأر اَنه کی جٚه گوشت خوردن و شرأب وأخوردن و هرتأ دِه کأر کی البأقی آدمأنٚ لغزش خوردن و نأرأحتی‌یَ بأعیث بِه، پرهیز بوکونید.

²² هنٚ وأسی، هرتأ بأوٚر کی اَ موضویأنٚ رِه دأریدی، اونَ خودا و شیمی میأن بٚدأرید. خوشبحأل اونی کی اونچی‌یَ کی دوروست دأنه انجأم دئنٚ وأسی خؤرَه محکوم و ملأمت نوکونه.

²³ ولی اینفرٚ ویجدأن، او کأرٚ وأسی کی کودأندٚره نأرأحته، اصلن نوأستی او کأرَ دٚس بیگیره، چونکی اَطویی گونأ بوکوده، چونکی اونی ویجدأن او کأرَ گونأ دأنه. پس اگه خأییدی ایتأ کأر بوکونید کی اونَ گونأ دأنیدی، اونَ انجأم ندید، چونکی او کأر کی غورصه‌دأر ویجدأنٚ اَمرأ انجأم بٚبه گونأیه.