رومیأن 13 - Gilaki New Testament

مسیحیأن وظیفه دولتٚ رِه

¹ دولت و اونی قأنونأنَ ایطأعت بوکونید، چونکی اوشأنَ خودا بٚنأ بوکوده. تومأمٚ دونیأ دورون، خودا تومأمٚ دولتأنَ بأوٚرده قودرتٚ سٚر.

² پس هر کی جٚه مملکتٚ قأنونأن تمرد بوکونه، به یقین جٚه اونچی کی خودا حوکم بوکوده، رو وأگردأنِه و البت موجأزأت بِه.

³ اوشأن کی اوشأنی کأرأن دوروستٚده، دولتٚ مأمورأنٚ جَا نترسٚده، ولی خطأکأر و بٚدٚ آدمأن همیشٚک اوشأنی جَا ترسٚده. پس اگه خأیی ترس و تِشویش میأن زٚندیگی نوکونی، قأنونأنٚ جَا ایطأعت بوکون و آرأمٚش بٚدأر!

⁴ دولتٚ مأمور، جٚه خودا ور وظیفه دأره تٚرَه کومک بوکونه. ولی اگه ایتأ خلأف کأر انجأم بدی، اونی جَا بترس چونکی تٚرَه موجأزأت کونه. خودا اونَ موقرٚر بوکوده کی اوشأنی‌یَ کی خلأف کونٚده موجأزأت بوکونه.

⁵ پس قأنونٚ جَا وأستی ایطأعت کودن، نه فقد موجأزأتٚ جَا دؤر مأنستٚنٚ رِه نه، بلکی شیمی ویجدأنٚ رأحتی وأسییٚم ایسه.

⁶ هنٚ وأسییٚم شیمی مألیأتَ وأستی فأدید کی دولتٚ مأمورأنٚ موأجب فرأهم بٚبه و بتأنٚد خودا کأرَ انجأم بٚدٚد، ینی شٚمٚره خیدمت کودنَ ایدأمه بٚدٚد.

⁷ هرکسٚ حقَ اونَ فأدید: مألیأتأنَ شیمی میلٚ اَمرأ فأدید؛ شیمی بوجؤر دٚسیأنٚ جَا ایطأعت بوکونید و اوشأنی‌یَ کی ایحترأمٚ لأیقده، ایحترأم بوکونید.

مسیحیأنٚ وظیفه مردومٚ رِه

⁸ تومأمٚ شیمی بدهکأریأنَ فأدید کی هیکسٚ دِی۫نٚ جیر نئیسید. فقد اَنَ شیمی وظیفه بدأنید کی مردومَ محبت بوکونید. هیوخت جٚه محبت کودن دٚس نٚکشید چونکی البأقی‌یَ محبت کودنٚ اَمرأ یقین بدأنید ایلاهی حوکمأنٚ جَا ایطأعت بوکودیدی و خودا خأسته‌یَ انجأم بٚدأییدی.

⁹ چونکی اَ حوکمأن کی گده، «زٚنأ نوأکودٚن؛ قتل نوأکودٚن؛ دوزدی نوأکودٚن؛ طمع نوأدأشتن» و هرتأ دِه حوکم کی نٚهأ، ایتأ حوکمٚ دورون سٚر بٚهم بأمؤ کی فٚرمأیه: «تی همسأده‌یَ تی جأنٚ مأنستَن دوس بٚدأر.»

¹⁰ هطویه، محبت هیکسَ بدی نوکونه. پس اگه آدمأنَ محبت بوکونید، اَنَ مأنه کی همٚتأ ایلاهی دستورأن و حوکمأنَ بجأ بأوٚردیدی. کوتأ بٚگم تنأ حوکم و قأنونی کی شٚمٚره ایحتیأج بِه، محبته.

¹¹ ایتأ دِه موضو کی اَمٚرَه خورومٚ کأرأنٚ رِه تِشویق کونه، اَنه کی وخت سریع دٚوأره و اَمی عُمر تومأنَ بِه. پس خأبٚ جَا ویریزید چونکی اَسه خوداوند وأگردٚستنٚ وخت جٚه او زمأت کی ایمأن بأوٚردیم نیزدیکتره.

¹² شب تومأنَ بوسته و نیجأتٚ روج نیزدیکه. پس، او تأریکٚ کأرأنَ کی گونأ اَمرأ ایتأ بوبوسته ایوٚر بنید، نورٚ زره‌یَ دوکونید.

¹³ چونکی اَمأن روجٚ روشنی شینیم و البأقی آدمأنٚ ورجأ وأستی خوروم کردکأرأن بٚدأریم. عیأشی و مستی و زٚنأ و هوس بأزی و دعوأ و حسودی محفیلأنٚ دورون نیشید.

¹⁴ اونی عوض، خوداوند عیسا مسیح حوضورَ دوکونید و شیمی شرورٚ هوسأنٚ رفع کودن دونبأل نیبید.