رومیأن 10 - Gilaki New Testament1 جأن و دیلٚ برأرأن، می دیلٚ آروزو و دوعأ یوهودیأنٚ رِه اَنه کی اَشأن نیجأت بیأفٚد. 2 من دأنٚم کی اوشأن خوشأنی دیلٚ دورون چی ایحترأم و غیرتی خودا رِه دأرٚده، ولی اَ غیرت جٚه فأم و دوروستٚ شنأخت نییٚه. 3 چونکی اَشأن او رأیَ کی خودا اینسأنٚ رِه بٚنأ کی اونی اَمرأ خودا ورجأ قوبیل بٚبه، نفأمٚده. خودا رأیَ رٚدَ کودنٚ اَمرأ اوشأن بٚخأستٚد خوشأنی رأ اَمرأ کی هو دینی حوکمأنٚ انجأم دٚئن ایسه، خودا حوضور قوبیل بٚبٚد. 4 چونکی مسیح، شریعتٚ تومأنَ بوستن ایسه. آخرپٚسی همه‌یٚ اوشأنی کی اونَ ایمأن بأوٚرٚد خودا ورجأ قوبیل بٚده. نیجأت همه کس رِه ایسه 5 چونکی موسا دروأره‌یٚ عأدیلَ بوستن جٚه رأی دینی حوکمأن، اَطو نیویسه: «جٚه دینی حوکمأنٚ ایطأعت کودنٚ رأیه کی اینفر جٚه اَبدی زٚندیگی بهره بٚره.» 6 ولی ایمأنٚ رأ کی اینسأنَ خودا ورجأ قأبیلٚ قوبیل چأکونه، گه: «تی دیلٚ دورون نوأگفتن کی "کیسه کی شِه آسمأنٚ جؤر " (جٚه اَ خأطر کی مسیحَ بأوٚره بیجیر، زیمینٚ سٚر). 7 و هطویم نوأگفتن " کیسه کی شِه جولفٚ جیگأیأنٚ جیر" (جٚه اَ خأطر کی مسیحَ وأگردأنٚه زٚندیگی ور).» 8 ولی چی گه؟ «اَ کلام شٚمٚره خٚیلی نیزدیکه؛ اون شیمی دٚهٚن و دیلٚ دورون نٚهأ.» و اَن دوروست هو ایمأنٚ کلام ایسه کی اَمأن اونَ موعیظه کونیم. 9 یقین بدأنید، اگه اینسأن خو زوأنٚ اَمرأ البأقیأنٚ ورجأ بٚگه کی عیسا مسیح اونی خوداوند ایسه و خو دیلٚ دورونم ایمأن بٚدأره کی خودا اونَ مرگٚ پٚسی زٚنده کوده، نیجأت یأفه. 10 چونکی او آدم خو دیلٚ دورون ایمأن اَوٚره و عأدیل بٚحیسأب اَیِه و خو ایمأنَ زوأنٚ اَمرأ ایعترأف کونه و نیجأت یأفه. 11 موقدس کیتأبأنٚم فٚرمأیه: «هرکی اونَ توٚکول بوکونه، هیوخت سٚربیجیر نیبه.» 12 اَ موضو میأن، یوهود و اونی کی یوهودی نییٚه برأبٚرٚده، چونکی همٚتأن ایتأ خوداوند دأرٚده، او خوداوند کی خو پیله گنجأنَ اوشأنی ایختیأر نِهِه کی اونی تشنه و طألب ایسٚد. 13 چونکی هر کی خوداوند نأمَ دؤخأنه نیجأت یأفه.» 14 ولی چوطو مردوم اینفرٚ نأمَ دؤخأنٚد کی اونَ ایمأن نأرٚده و چوطو ایمأن بأوٚرٚد، وختی کی اونی جَا هیچی نشتأوستٚده؟ و چوطو بشتأوٚد، اگه هیکس اینجیلٚ خوروم خٚوٚرَ اَشأنٚ رِه وأگویا نوکونه؟ 15 و چوطو بٚشٚد و وأگویا بوکوند، اگه اینفر اَشأنَ اوسه نوکونه؟ بینیویشته بوبوسته: «چی قشنگه اوشأنی پأیأن کی خوروم خٚوٚرَ اَوٚرٚده.» 16 ولی همٚتأ ایسرأییلیأن اَ خوروم خٚوٚرَ قوبیل نوکودد. چونکی اشعیای پیغمبر گه: «اَی خوداوند، کیسه کی اَمی پیغأمَ بأوٚر بوکوده؟» 17 پس ایمأن جٚه ایشتأوٚستٚن بٚدٚس اَیِه، جٚه ایشتأوٚستٚنٚ خوروم خٚوٚر دروأره‌یٚ مسیح. 18 ولی وأوٚرسٚم: مگه ایسرأییلٚ قوم نشتأوستٚده؟ البت کی بشتأوستٚده: «اوشأنی پیغأم زیمینٚ اَسٚر تأ اوسٚر پٚخشَ بوسته و اوشأنی کلام تأ دونیأ اوسٚر فأرٚسِه.» 19 ایوأردِه وأوٚرسٚم: آیا ایسرأییلٚ قوم رأس‌رأسِی بفأمستده؟ هطویه، بٚفأمٚستد، چونکی حتّا موسا زمأتٚ میأن، خودا بٚفرمأسته: «شومأن غریب و بیخودی خودایأنَ پرستٚش کودنٚ اَمرأ، می غیظ و غیرتَ بٚسٚر بأوٚردید، منم شیمی غیظ و غیرتَ، غریب و بأطیلٚ قومأنٚ اَمرأ بٚسٚر اَوٚرم.» 20 دونبألترأن اشعیا ویشتر یأرستنٚ اَمرأ، جٚه خودا ور بٚفرمأسته: «او مردوم کی می دونبأل نوبود مٚرَه بیأفتٚد و اوشأنَ کی می دونبأل نگردستٚده، مٚرَه نیشأن بٚدأم.» 21 ولی دروأره‌یٚ ایسرأییلٚ قوم بٚفرمأسته: «تومأمٚ روج می دٚسأنَ اَشأنٚ ور درأزَ کودم، ایتأ نأفرمأن و لجبأزٚ قومٚ ور.» |
© 2024 Transform Iran
Transform Iran