موکأشفه 9 - Gilaki New Testament

پنجومی شیپور

¹ هو وخت کی پنجومی فٚرٚشته خو شیپورٚ صدایَ بیرون بأوٚرده، بیدِم کی «ایتأ ستأره» آسمأنٚ جَا بٚکفته زیمینٚ رو. ایتأ چأ کیلیدَ اَ ستأره‌یَ فأدأده کی ته نأشتی.

² وختی او کیلیدٚ اَمرأ، چأهَ وأکوده، ایتأ دود پیله تونورٚ دودٚ مأنستَن ویریشته، او جوری کی آفتأب و هوا، او چأ دودٚ جَا سیأ و تأریکَ بوسته.

³ بأزون جٚه دودٚ میأن، ای دونیأ ملخ بیرون بأمؤده و زیمین رویَ پورَ کودٚد؛ و اوشأنَ قودرت بٚدأ بوبوسته کی عقربأنٚ مأنستَن بٚگزٚد.

⁴ ولی اوشأنَ بوگفته بوبوسته کی علف و دأرأن و سبزه اَمرأ کأر ندأرد، بلکی فقد اوشأنی‌یَ صدمه بٚزٚنٚد کی خودا مُهرَ خوشأنی پیشأنی رو نأرٚده.

⁵ اوشأنَ وئأشتٚد کی مردومَ پِنج مأه رِه اَذِت آزأر و عذأب بٚدٚد کی اَشأن ایتأ عقرٚب بٚگشته مأنستَن، درد بٚکشد؛ ولی ملخأنَ ولأشتٚده کی مردومَ بوکوشٚد.

⁶ او زمأت میأن، آدمأن مٚردنَ آروزو کونٚده، ولی مرگ اوشأنی جَا گوریزه.

⁷ ملخأن اَسبأنٚ شمأیلَ دأشتید کی جنگٚ رِه چأکون وأکون بوبوستٚد. اوشأنی سٚر رو ایچی زرینٚ تأجأنٚ مأنستَن نٚهأ بو و اوشأنی دیم اینسأنٚ دیمٚ مأنستَن بو.

⁸ اوشأن ایتأ بولندٚ مو زنأکأنٚ مو مأنستَن و گأزأنی شیرأنٚ گأزأنٚ مأنستَن دأشتید.

⁹ او زره‌یأنی کی دوکوده بود، جنگٚ آهینی زره مأنستَن بو. اوشأنی بألأنٚ صدایٚم ایتأ لشکرٚ فوتورکستنٚ صدا مأنستَن بو کی جنگی گأریأنٚ اَمرأ، جنگٚ میدأنَ فوتورکٚده.

¹⁰ اوشأن نیشدأرٚ دومأنی دأشتید کی عقرٚبٚ دومٚ مأنستَن بو کی اونی اَمرأ تأنستیدی مردومَ پِنج مأه رِه آزأر بٚدٚد.

¹¹ اوشأنی پأدیشأ، هو چأه کی ته نأشتی فٚرٚشته ایسٚه، کی عِبری زوأنٚ میأن اونَ «اَبَدون» و یونأنی زوأنٚ میأن «اپولیون» نأم نٚهٚده، و اونی مأنی «اونی کی جٚه بین بٚره» ایسٚه.

¹² ایتأ وای ینی ایتأ بلأ دٚوأرٚسته ولی هنو دوتأ دِه بلأ رأ میأن ایسأ.

شیشومی شیپور

¹³ وختی شیشومی فٚرٚشته شیپورَ بٚزِه، ایتأ صدا او زرینٚ مذبحٚ چأر کونجٚ جَا کی خودا حوضور نٚهأ بو، بشتأوستم،

¹⁴ کی او شیشومی فٚرٚشته‌یَ کی شیپور دأشتی بوگفته: «او چأرتأ فٚرٚشته‌یَ کی پیله روخأنٚ، فراتٚ میأن دٚوٚسته بوبوستده، وِلَ کون.»

¹⁵ او وخت او چأرتأ فٚرٚشته کی اَ سأعت و روج و مأه و سألٚ رِه حأضیرَ بوسته بود، آزأدَ بوستد کی ایتأ قیسمت جٚه او سه قیسمتٚ مردومَ بوکوشٚد.

¹⁶ بشتأوستم کی اوشأن دویست میلیون جنگ کودنٚ سوأرکأرأنَ دأشتید.

^17-18 اَشأنَ اَسبأن و سوأرأنٚ رویأ دورون بیدِم. اوشأنٚ سوأرأن، جنگٚ زره‌یَ دوکوده بود کی بعضیتأن آتشٚ سورخی رنگ، بعضیتأن آسمأنٚ آبی رنگ و البأقی زردٚ رنگ بو. اَشأنٚ اَسبأنٚ سٚر، ویشتر شیرأنٚ سٚرَ شبأهتٚ دٚئی و اوشأنی دٚهٚنٚ جَا دود و آتش و گوگرد بیرون اَمؤیی کی ایتأ قیسمت جٚه سه‌تأ قیسمتٚ مردومَ جٚه بین ببرد.

¹⁹ اوشأنی کوشتٚنٚ قودرت، هوطو کی اَشأنی دٚهٚنٚ میأن نٚهأ بو اَشأنی دومٚ میأنم نٚهأ بو، چونکی اَشأنی دوم لأنتیأنٚ سٚرَ شبأهتٚ دٚئی کی گزٚده و زخمأنی بوجود اَوٚرٚده کی کوشِه.

²⁰ اوشأنی کی اَ بلأیأنٚ جَا جیویشتٚده، ایوأردِه حأضیر نوبوستٚد خوشأنی شرورٚ کأرأنٚ جَا توبه بوکوند و خودایَ پرستٚش بوکوند. اَشأن حأضیر نوبود شیطان و طلأ، نوقره، مِس، سنگ و چو پرستٚشٚ جَا دٚس اوسأنٚد، بُتأنی کی نه دینٚده، نه ایشتأوده و نه تکأن خورٚده.

²¹ اَشأن نخأستیدی آدم کوشتٚن، جأدوگری، زٚنأ و دوزدی جَا دٚس فأکٚشٚد و وأگردٚد خودا ور.