موکأشفه 8 - Gilaki New Testament

هفتومی مُهر و بوخورسوجی کی طلأ جَا بو

¹ او وخت کی بٚرّه هفتومی مُهرَ وأکوده، آسمأنٚ میأن نیزدیکٚ نیم سأعت بوستی کی کأمیل سأکیت بو.

² بأزون بیدِم کی هفتأ فٚرٚشته خودا حوضور بٚپأ ایسأده. اَشأنَ هفتأ شیپور فأدأ بوبوسته.

³ اونی پٚسی، ایتأ دِه فٚرٚشته بأمؤ و مذبحٚ ورجأ بٚپأ بئیسأ. اونی دٚسٚ دورون بوخور سوجأنئن رِه ایتأ آتش پأیه نٚهأ بو. پس اونَ خٚیلی بوخور فأدأده کی ایمأندأرأنٚ دوعأیأنٚ اَمرأ قأطی بوکونه و او زرینٚ مذبح رو کی خودا تختٚ ورجأ نٚهأ، پیشکش بوکونه.

⁴ او وخت بوخورٚ خورومٚ عطر، کی ایمأندأرأنٚ دوعأیأنٚ اَمرأ قأطی بوبوسته بو، فٚرٚشته دٚسٚ جَا خودا ورجأ بوجؤر بوشؤ.

⁵ بأزون او فٚرٚشته، آتش پأیه‌یَ مذبحٚ آتشٚ جَا پورَ کوده و تأوٚدأ زیمینٚ ور. نأخٚوٚرکی گؤرخأنه و زیمین لرزه رأ دکفته.

چأرتأ اوّلی شیپورأن

⁶ بأزون، او هفتأ فٚرٚشته کی هفتأ شیپور دأشتیدی، حأضیرَ بوستٚد کی شیپورأنٚ صدایَ بیرون بأوٚرد.

⁷ اوّلی فٚرٚشته شیپورٚ صدایَ بیرون بأوٚرده. نأخٚوٚرکی، زیمین رو تگرگ و آتش و خون بٚوأرسته، جوری کی ایتأ قیسمت جٚه سه‌تأ قیسمت زیمینٚ شین آتش بیگیفته و ایتأ قیسمت جٚه سه‌تأ قیسمت دأرأنٚ، تومأمٚ سبزه‌یأنٚ اَمرأ بوسوخته.

^8-9 دویُمی فٚرٚشته شیپورٚ صدایَ بیرون بأوٚرده. نأخٚوٚرکی ایچی ایتأ پیله کوه مأنستَن کی شوأله زِئی بٚکفته دریأ میأن، جوری کی ایتأ قیسمت جٚه سه‌تأ قیسمت تومأمٚ کشتیأن غرقَ بوستد و ایتأ قیسمت جٚه سه‌تأ قیسمت دریأ خونٚ مأنستَن، سورخَ بوسته، و ایتأ قیسمت جٚه سه‌تأ قیسمت تومأمٚ مأئیأن بٚمٚردٚد.

¹⁰ وختی سیومی فٚرٚشته شیپورٚ صدایَ بیرون بأوٚرده، ایتأ شوأله بٚکٚشه ستأره، آسمأن جَا بٚکفته ایتأ قیسمت جٚه سه‌تأ قیسمتٚ روخأنأن و چشمه‌یأنٚ رو.

¹¹ او ستأره ایسم «زرخی» بو؛ و هو وخت کی بوشؤایتأ قیسمت جٚه سه تأ قیسمتٚ تومأمٚ زیمینٚ آبأنٚ دورون، او آبأن زرخَ بوسته و خٚیلیأن اَ زرخی وأسی بٚمٚردٚده.

¹² بأزون چأرومی فٚرٚشته شیپورٚ صدایَ بیرون بأوٚرده. هو وخت ایتأ قیسمت جٚه سه‌تأ قیسمت خورشید، مهتأب و ستأره‌یأنَ ایتأ ضربه بوخورده،اوطو کی اوشأنی ایتأ قیسمت جٚه سه‌تأ قیسمت تأریکَ بوسته. اَطویی بو کی، ایتأ قیسمت جٚه سه‌تأ قیسمتٚ روج و شب بوشؤ تأریکی دورون.

¹³ هوطو کی فأندرستنٚ میأن غرق بوم، ایتأ آلؤغَ بیدِم کی آسمأنٚ وٚسٚط پروأز کودأندٚره و بولندٚ صدا اَمرأ گه: «وای، وای، وای بحألٚ زیمین آدمأن، چونکی اَسه او سه‌تأ دِه فٚرٚشته‌یم خوشأنی شیپورٚ صدایَ بیرون اَوٚرٚده.»