موکأشفه 6 - Gilaki New Testament

شیش تأ اوّلی مُهرَ وأکودن

¹ هوطو کی قأقأنٚ مأنستَن فأندرستأندوبوم، بٚرّه، اوّلی مُهر، جٚه او هفتأ مُهرَ وأکوده. نأخٚوٚرکی ایتأ جٚه او چأرتأ زٚنده موجود، ایتأ گؤرخأنه مأنستَن صدا اَمرأ بوگفته: «بیأ!»

² فأندرستٚم و ایتأ سیفیدٚ اسبَ بیدِم. اسبٚ رو اینفرَ بیدِم کی ایتأ کمأن اونی دٚسٚ میأن و ایتأ تأج خو سٚرٚ رو دأشتی. اون اسبَ پیش تأوٚدأیی کی خٚیلی جنگأنٚ میأن، پیروزَ بٚه و جنگَ فتح بوکونٚه.

³ بأزین بٚرّه دویُمی مُهرَ وأکوده. بأزون بشتأوستم کی دویُمی زٚنده موجودَ بوگفته: «بیأ!»

⁴ اَیدٚفأرِه، ایتأ سورخٚ اسب ظأهیرَ بوسته. اونی سوأرَ ایتأ پیله شٚمشیر و قودرت فأدأ بوبوسته بو کی زیمینٚ جَا صولح و سلأمتی‌یَ اوسأنه. اَطو بو کی، جنگ و خون فوکودٚن همٚتأ جیگأ سٚر بیگیفته بوبوسته.

⁵ چونکی بٚرّه سیومی مُهرَ وأکوده، بشتأوستم کی سیومی زٚنده موجود بوگفته: «بیأ» او وخت ایتأ سیأ اسبَ بیدِم کی اونی سوأر ایتأ ترأزو خو دٚس دأشتی.

⁶ بأزون جٚه او چأرتأ زٚنده موجود میأن ایتأ صدا گوشَ فأرٚسِه کی گفتی: «ایتأ دأنه نأنٚ گندم، یا ای کیلو جؤبٚ آرد، ایتأ کأرگرٚ روجأنه موزدٚ اَندر بٚبه. ولی زیتونٚ روغن و شرأبَ ضرر فأنرسأن!»

⁷ وختی بٚرّه چأرومی مُهرَ وأکوده، چأرومی زٚنده موجودٚ صدایَ بشتأوستم کی بوگفته: «بیأ!»

⁸ فأندرستٚم و بیدِم ایتأ رنگ دٚمٚرده اسب ظأهیرَ بوسته کی اونی سوأرٚ ایسم مرگ بو. اونی دونبألسر، ایتأ دِه اسب اَمؤیی کی بٚمٚرده‌یأنٚ دونیأ، اونی سوأرٚ ایسم بو. او دو نفرَ، اَ ایختیأر و قودرت فأدأ بوبوسته کی ای چأرٚک جٚه زیمینَ جنگ، قحطی، نأخوشی و وأشی حیوأنأنٚ اَمرأ جٚه بین ببرد.

⁹ وختی پنجومی مُهرَ وأکوده، ایتأ مذبح ظأهیرَ بوسته. مذبحٚ جیر، اوشأنی روحأنَ بیدِم کی خودا کلامٚ موعیظه و خوشأنٚ او وأگویا کودن کی حِئقت ایسه وأسی شهید بوبوسته بود.

¹⁰ اَشأن ایتأ بولندٚ صدا اَمرأ خوداوندَ گفتیدی: «ای خوداوند کی پأک و حق ایسی، چندر زمأت دِه زیمینٚ آدمأنٚ رو قیضأوت نوکونی و اَمی خونٚ اینتقأمَ اوشأنٚ جَا فأنگیری؟»

¹¹ بأزون هرتأ جٚه اَشأنَ، ایتأ سیفیدٚ رخت فأدأده و بوگفتٚده کی ایپچه‌یم ده ایسترأحت بوکوند کی اَشأنٚ هم دؤره‌یأن کی وأستی اَشأنٚ مأنستَن عیسا مسیحٚ خیدمت کودنٚ وأسی شهید بٚبٚد، اوشأنی جمٚ میأن بٚشٚد.

¹² او وخت بٚرّه شیشومی مُهرَ وأکوده. نأخٚوٚرکی ایتأ پیله زلزله ایتفأق دکفته و خورشید ایتأ سیأ پارچه مأنستَن تأریک و سیأ بوبوسته و مهتأب، خونٚ رنگ بوبوسته.

¹³ بأزون بیدِم کی آسمأنٚ ستأره‌یأن زیمینٚ سٚر فٚوٚده، هوطو کألٚ اَنجیلأن مأنستَن کی توندٚ بأدٚ اَمرأ، دأرَ جَا بٚکنده بوبوسته، زیمینٚ سٚر کفده.

¹⁴ آسمأنٚم ایتأ طومأرٚ مأنستَن خو میأن دیپیچسته و غیبَ بوسته و تومأمٚ کوهأن و جزیره‌یأن تکأن بوخوردٚد، جٚه خوشأنی جیگأ سٚر ایتأ جیگأ دِه بوشؤده.

¹⁵ زیمینٚ پأدیشأیأن و دونیأ رهبرأن، فرمأندأرأن و مأل و مینألدأرأن، کوجه‌دأنه و پیله‌دأنه، بٚرده و آزأد، همٚتأن خوشأنَ غأرأنٚ میأن و کوهأنٚ صخره‌یأنٚ جیر جوخوفتده.

¹⁶ اَشأن کوهأن و صخره‌یأنَ ایلتیمأس بوکودٚد، گفتیدی: «اَی کوهأن و اَی صخره‌یأن، اَمی رو بٚکفید و اَمٚرَه جٚه اونی کی تختٚ رو نیشته و بٚرّه غیظٚ، جیگأ بدید.

¹⁷ چونکی اوشأنی غیظٚ پیله روج فأرٚسِه. پس کی تأنه تأب بأوٚره کی قأیم بئیسه؟»