موکأشفه 5 - Gilaki New Testament

بٚرّه طومأرَ وأکونِه

¹ بأزون، اونی کی تخت رو نیشته بو، رأستٚ دٚسٚ میأن ایتأ طومأر بیدِم کی اونی اَرو اورو بینیویشته بوبوسته بو و هفتأ مُهرٚ اَمرأ، اونَ مُهرٚ موم بوکوده بود.

² او وخت ایتأ فٚرٚشته‌یَ بیدِم کی قودرتٚ جَا پور بو و بولندٚ صدا اَمرأ وأورسِئی: «کی اَ لیأقتَ دأره کی اَ مُهرأنَ بٚشکٚنه و طومأرَ وأزَ کونه؟»

³ ولی هیکس آسمأن و زیمین و بٚمٚرده‌یأنٚ میأنی بیأفته نوبوسته کی بتأنه اَ طومأرَ وأزَ کونه و بٚخأنه.

⁴ من نأاومیدی جَا، خٚیلی گریه کودأندوبوم، چونکی هیکس بیأفته نوبوسته اَ لیأقتَ بٚدأره کی اَ طومأرَ وأزَ کونه و بٚخأنه.

⁵ ولی ایتأ جٚه او بیست و چأرتأ پیرٚ آدم مٚرَه بوگفته: «گریه نوأکودن. فأندر، یوهودأ قبیله شیر کی داوود نتأجٚ جَا ایسه، پیروزَ بوسته! اون لیأقت دأره طومأر و اونی هفتأ مُهرَ وأزَ کونه.»

⁶ او وخت ایتأ بٚرّه‌یَ بیدِم کی عَینٚ خیأله اونَ سٚرَ وأوِده، ولی او تخت و زٚنده جأنورأنٚ روبرو و بیست و چأرتأ پیرٚ آدمٚ میأن بٚپأ ایسأ بو. اون هفتأ شأخ و هفتأ چوم دأشتی کی هو روح کی هفتأ ایسه تومأمٚ دونیأ جأجیگأیأنَ اوسه به.

⁷ او وخت بٚرّه بأمؤ نیزدیک و طومأرَ اونی کی تخت رو نیشته بو رأستٚ دٚسٚ جَا، فأگیفت.

⁸ وختی طومأرَ فأگیفته، او بیست و چأرتأ پیرٚ آدم اونی جولو سوجده بوکودٚد. هر تأ جٚه اوشأن ایتأ چنگ و کأسه‌یأنی کی طلأ جَا بو و پور جٚه بوخور بو دأشتیدی کی ایمأندأرأنٚ دوعأیأن ایسه.

⁹ اَشأن اونٚ رِه ایتأ تأزه سورود خأندیدی و گفتیدی: «تو لیأقت دأری کی طومأرَ فأگیری و اونی مُهرَ وأزَ کونی، اونَ بٚخأیی، چونکی تی جأنَ قوربأنی بوکودی و مردومَ خودا رِه جٚه هرتأ نتأج و قوم و زوأن و قبیله بیهِیی،

¹⁰ و اَشأنَ اَمی خودا رِه کأهین چأکودی و سلطنتَ فأرٚسأنِیی؛ جٚه اَ خأطر زیمین رو پأدیشأیی کونٚده.»

¹¹ بأزون رویأ میأن، میلیون میلیون فٚرٚشته‌یَ بیدِم کی تخت و او زٚنده موجودأن و پیرٚ آدمأنٚ دؤرٚور جمَ بوستٚده،

¹² بولندٚ صدا اَمرأ اَ سورودَ خأنٚده: «خودا بٚرّه کی خو جأنَ مردومٚ نیجأتٚ وأسی قوربأنی بوکوده، لیأقت دأره کی قودرت، دولت، حیکمت، قوّت، حورمت، جلال و برکتٚ صأب بٚبه.»

¹³ او وخت تومأمٚ آسمأن و زیمین و زیمین جیر و دریأ جأنورأنٚ صدایَ بشتأوستم کی خأندیدی و گفتیدی: «ستأیٚش و حورمت، جلال و قوّت همیشٚکٚ رِه بٚرّه و اونی کی تخت رو نیشته شین بٚبه.»

¹⁴ و او چأرتأ زٚنده جأنور بوگفتٚده: «آمین»، و او بیست و چأرتأ پیرٚ آدم سوجده بوکودٚد، اونَ پرستٚش بوکودٚد.